Idiay langit, nasursuro ni Jesus dagiti kualidad a nakatulong kenkuana nga agbalin a nasayaat a katrabahuan. Isu nga idi addan ditoy daga, nagsayaat ti inyulidanna kadagidiay nakipagtrabaho kenkuana. Ania ti maitulong kadatayo ti ulidan ni Jesus? No adalentayo ti ulidanna, adda tallo a prinsipio a makitatayo tapno agbalintayo a nasayaat a katrabahuan. Dagitoy a prinsipio ti makatulong tapno lallalo a maitandudotayo ti panagkaykaysa ken kooperasion.

Ti nasayaat a katrabahuan ket napakumbaba. Ibilangna a napateg dagiti katrabahuanna ken saanna nga ipakita a nalalaing isuna ngem kadakuada. Nasursuro ni Jesus ken Amana dayta a kinapakumbaba. Uray no ni Jehova laeng ti maikari a maawagan kas Namarsua, kayatna a maammuan ti dadduma dagiti naaramidan ti Anakna ken katrabahuanna. Makitatayo dayta iti imbaga ti Dios: “Aramidenta ti tao a kaladladawanta.” (Gen. 1:26) Sigurado nga inapresiar ni Jesus dayta a kinapakumbaba ni Jehova.​—Sal. 18:35.

Kasta met la a kinapakumbaba ti impakita ni Jesus idi adda ditoy daga. Kada mapadayawan idi gapu kadagiti nagapuananna, inturongna ti dayaw iti Daydiay maikari iti dayta. (Mar. 10:17, 18; Juan 7:15, 16) Inkagumaan ni Jesus a kanayon a natalna ti relasionna kadagiti adalanna ken imbilangna ida kas gagayyem imbes nga ad-adipen.  (Juan 15:15) Binugguanna pay ketdi dagiti sakada tapno maisurona kadakuada ti kinapakumbaba. (Juan 13:5, 12-14) Kas kenkuana, masapul a padayawantayo dagiti katrabahuantayo, imbes nga iyun-unatayo dagiti personal nga interestayo. No ‘ipakitatayo ti pammadayaw’ iti maysa ken maysa ken no saantayo a pakasikoran no asino ti mapadayawan, ad-adu nga amang ti maitungpal.​—Roma 12:10.

Bigbigen met ti napakumbaba a tao nga “adda maitungpal no adu ti mamalbalakad.” (Prov. 15:22) Kasanoman kalaingtayo wenno kaadu ti kapadasantayo, masapul a laglagipentayo nga awan ti tao nga ammonan ti amin. Uray ni Jesus inaminna nga adda dagiti banag a dina ammo. (Mat. 24:36) Kasta met, interesado isuna no ania ti ammo wenno pampanunoten dagiti imperpekto nga adalanna. (Mat. 16:13-16) Isu met la gayam a nalag-an ti rikna kenkuana dagiti katrabahuanna! Kasta met, no sipapakumbaba a bigbigentayo dagiti limitasiontayo ken ipalubostayo nga ibaga ti dadduma dagiti suhestionda, agtalinaed ti natalna a relasiontayo kadakuada, ken ‘adda maitungpaltayo’ a sangsangkamaysa.

Nangruna a napateg para kadagiti panglakayen a tuladen ti kinapakumbaba ni Jesus bayat a makipagtrabtrabahoda iti maysa ken maysa. Masapul a laglagipenda a mabalin a tignayen ti nasantuan nga espiritu ti asinoman iti bagi dagiti panglakayen. Kadagiti miting dagiti panglakayen, siguraduenda a marikna ti amin a nawayada a mangyebkas iti suhestionda. Iti kasta, makaaramidda kadagiti desision a pagimbagan ti intero a kongregasion.

Ti nasayaat a katrabahuan ket nainkalintegan iti panangtratona kadagiti katrabahuanna. Isu ket mannakibagay ken managpabus-oy. Sigurado a namin-adu a nakita ni Jesus ti kinanainkalintegan ni Amana. Kas pagarigan, imbaon ni Jehova ni Jesus a mangisalakan iti sangatauan manipud iti sentensia nga ipapatay a maikari koma kadagiti tattao.​—Juan 3:16.

Nagpabus-oy ni Jesus no kasapulan wenno no maitutop. Kas pagarigan, tinulonganna ti maysa a babai a taga-Fenicia, uray no kadagiti umili ti Israel ti nakaibaonanna. (Mat. 15:22-28) Nainkalintegan met ti ekspektarenna kadagiti adalanna. Pinakawan latta ni Jesus ti nadekket a gayyemna a ni Pedro uray no inlibakna iti publiko. Idi agangay, intalekna ken Pedro dagiti nadagsen a responsabilidad. (Luc. 22:32; Juan 21:17; Ara. 2:14; 8:14-17; 10:44, 45) Silalawag nga ipakita ti ulidan ni  Jesus a rumbeng laeng a “maammuan koma ti amin a tattao a nainkalintegan[tayo]” babaen ti panagpabus-oytayo.​—Fil. 4:5.

No nainkalintegantayo, ammotayo met ti makibagay tapno makatunosantayo ti amin a klase ti tattao. Nagsayaat ti pannakilangen ni Jesus kadagiti tattao isu nga inakusaran dagiti naimon a kabusorna nga isu ket “gayyem dagiti agsingsingir iti buis ken dagiti managbasol” nga immawat iti mensahena. (Mat. 11:19) Kas ken Jesus, kayatayo kadi ti makipagtrabaho a naimbag iti agduduma a tattao? Napadasan ti maysa a brother a ni Louis ti makipagtrabaho iti agduduma a tattao idi nagserbi kas manangaywan iti sirkito ken bayat nga adda iti Bethel. Imbagana: “Ti pannakipagtrabaho kadagiti imperpekto a tattao ket kas iti panagkabite wenno panangibangon iti pader nga agusar iti agduduma ti kadakkelna a bato. Gapu ta agduduma dagiti bato, ad-adu a panagregget ti kasapulan. Ngem masimpanto met laeng ti pader. Adda met dagiti personal a binalbaliwak tapno natalna ti pannakipagtrabahok iti sabsabali. Kas resultana, nasimpa ken pulido ti pannakairingpas ti trabaho.” Anian a nagsayaat a kababalin!

Kaano a mabalin a maipakitatayo a mannakikooperartayo iti kongregasiontayo? Adda gundawaytayo a mangaramid iti dayta no kaduatayo ti grupotayo iti panangasaba. Mabalin a makaduatayo dagiti kakabsat a naiduma kadatayo ti edadda wenno responsabilidadda iti pamilia. Tapno agbalintayo a nainkalintegan, mabalintayo kadi a balbaliwan ti kapaspas wenno estilotayo a mangasaba tapno naragragsakda iti ministerio?

Ti nasayaat a katrabahuan ket “nakasagana a mangted.” (1 Tim. 6:18) Bayat a makipagtrabtrabaho ni Jesus ken Amana, nakitana la ketdi a saan a managilimed ni Jehova. Idi ‘insagana ni Jehova ti langit,’ ni Jesus ket ‘adda idi’ sadiay ken mabalinna ti agsursuro ken Amana. (Prov. 8:27) Idi agangay, siraragsak nga inranud ni Jesus kadagiti adalanna “ti amin a nangngeg[na]” ken Amana. (Juan 15:15) Matuladtayo dayta nga ulidan no nakasaganatayo met a mangiranud kadagiti ammotayo ken kapadasantayo kadagiti katrabahuantayo. Sigurado a ti nasayaat a katrabahuan saanna nga iyimut ti kasapulan wenno makatulong nga impormasion tapno laeng mapetpetanna ti posisionna. Maragsakan a mangiranud kadagiti nasayaat a bambanag a nasursurona.

Mabalintayo met a paregtaen dagiti katrabahuantayo. No adda ti makakita kadagiti panagreggettayo ken naimpusuan nga apresiarenna dagita, saan kadi a nagmayat dayta iti rikna? Inwayaan ni Jesus nga ibaga kadagiti katrabahuanna dagiti nasayaat a nakitana kadakuada. (Idilig ti Mateo 25:19-23; Lucas 10:17-20.) Imbagana pay ketdi kadakuada a ti aramidenda ket ‘dakdakkelto pay ngem kadagiti ar-aramidenna.’ (Juan 14:12) Iti rabii sakbay ti ipapatayna, kinomendaranna dagiti matalek nga apostolna idi imbagana: “Nagtalinaedkayo a matalek kaniak bayat a maipaspasangoak kadagiti pannubok.” (Luc. 22:28) Natukay la ketdi ti pusoda kadagita a sasaona, isu nga inspiradoda a nagtrabaho! No iwayaantayo met a komendaran dagiti katrabahuantayo, sigurado a naragragsakda ken ad-adu ti maileppasda.

“Saan a kasapulan a perpekto ti nasayaat a katrabahuan,” kuna ti brother a ni Kayode, “ngem parparagsakenna dagiti katrabahuanna ken palpalag-anenna ti trabahoda.” Kastaka kadi? Mabalin a damagem ti dadduma kadagiti kapammatiam no ania ti makunada kenka kas katrabahuanda. No maragragsakanda a makipagtrabaho kenka a kas iti narikna dagiti adalan ni Jesus idi nakipagtrabahoda kenkuana, maibagam met ti naibaga idi ni apostol Pablo: “Katrabahuandakami tapno agragsakkayo.”​—2 Cor. 1:24.