Jesu o muẹrohọ obọdẹ uruemu nọ Jihova o wo nọ o je lele iei ru iruo na yọ o wuhrẹ mi ei. U te ru nọ eva e jẹ rọ were ahwo nọ a je lele ọyomariẹ ru iruo evaọ otọakpọ obonẹ. Ẹvẹ ma sai ro wo emamọ uruemu nọ Jesu o wo na? Eware esa jọ e riẹ nọ ma rẹ sai wuhrẹ mi Jesu. Yọ ma te ru eware nana, o te hae were amọfa re a lele omai ru iruo. O te jẹ whae ze nọ ma ti ro lele amọfa ru iruo dhedhẹ avọ evawere.

Re ma jọ ohwo nọ amọfa a rẹ gwọlọ lele ru iruo, ma re wo omaurokpotọ yọ ma rẹ rọ adhẹẹ kẹ ahwo nọ ma bi lele ru iruo. Ma re dhesẹ nọ mai họ ọnọ ọ mae riẹ hẹ. Nwanọ ere Jesu ọ rrọ. O wuhrẹ emamọ uruemu nana nọ u dhesẹ nọ o wo omaurokpotọ na mi Ọsẹ riẹ. Dede nọ Jihova họ Ọmemama na, ọ gwọlọ nọ amọfa a riẹ nọ Jesu o lele i rie ma eware. Ẹvẹ ma rọ riẹ ere? Ọghẹnẹ ọ ta nọ: “Joma ma ohwo evaọ uwoho mai.” (Emu. 1:26) Jesu ọ riẹ nọ Jihova o wo omaurokpotọ nọ ọ ta kẹe nọ a gbẹ ma ohwo keme ọ riẹ nọ iruo yena i re te Ọsẹ riẹ ru kiọkọ.​—Ol. 18:35.

Jesu o wo omaurokpotọ re. Nọ a jiri ei fiki eware nọ o ru, ọ ta nọ Ọghẹnẹ họ ọnọ a re  jiri. (Mak 10:17, 18; Jọn 7:15, 16) Jesu ọ daoma gaga re avọ ilele riẹ a ru iruo kugbe dhedhẹ. Ọ rehọ e rai fihọ egbẹnyusu riẹ, orọnikọ o je ru ai wọhọ erigbo ho. (Jọn 15:15) Ọ tubẹ wozẹ awọ rai ro wuhrẹ ae nọ u fo re a wo omaurokpotọ. (Jọn 13:5, 12-14) U fo nọ ma rẹ rọ adhẹẹ kẹ ahwo nọ ma gbe bi ru iruo, orọnikọ oware nọ o te wha erere se omai ọvo ma rẹ suobọhọ họ. Ma tẹ be hae ‘rọ ọghọ rọkẹ ohwohwo,’ yọ ma gbẹ be gwọlọ nọ mai họ ohwo nọ a re jiri kẹ iruo na ha, o te whae ze nọ iruo mai e te rọ nyaharo ziezi.​—Rom 12:10.

Ohwo nọ o wo omaurokpotọ ọ rẹ kareghẹhọ ẹsikpobi nọ “a rẹ sai ru oware, nọ ekohrẹ i te bu.” (Itẹ 15:22) Ma tẹ make riẹ epanọ a re ru oware jọ gaga hayo ma wo eriariẹ gaga, ma rẹ kareghẹhọ nọ ohwo ọvo ọ riẹ hẹ nọ ọ riẹ eware kpobi re. Makọ Jesu dede ọ ta nọ u wo eware jọ nọ ọ riẹ hẹ. (Mat. 24:36) U te no ere no, ilele Jesu yọ ahwo-akpọ nọ a gba ha. Dede na, Jesu ọ jẹ hae gwọlọ nọ a ta oware nọ ae omarai a roro. (Mat. 16:13-16) Agbẹta nọ eva e jẹ hae rọ were ilele riẹ nọ a tẹ rrọ kugbei na. Epọvo na re, ma tẹ be hae kareghẹhọ nọ ma riẹ oware kpobi hi, jẹ kuvẹ re ahwo nọ ma gbẹ rrọ iruo a ta ẹkẹ rai ze, o rẹ whae ze nọ ma rẹ rọ riẹ yerikugbe dhedhẹ. Yọ u ti ru nọ ma te ‘sai ro ru oware’ nọ ẹro ọ rẹ ruẹ.

Nọ orọnọ ekpako ukoko a re ru iruo kugbe ẹsibuobu na, o roja gaga re a rọ aro kele Jesu evaọ ẹme nana. U fo re a kareghẹhọ nọ ẹzi Ọghẹnẹ ọ sai fiobọhọ kẹ ọkpako kpobi jẹ emamọ iroro ze. Nọ ekpako ukoko a tẹ be hai ru re ohwo kpobi ọ jọ ẹgwae ekpako ta eva riẹ, aikpobi na a te jẹ emamọ iroro nọ u re fiobọhọ kẹ ukoko na soso.

Ohwo nọ o re roro kẹ ohwo, o rẹ were amọfa re a lele iei ru iruo. Ohwo otiọnana ọ rẹ ta nọ onọ ọ ta ze ọvo a re ro ru hu. Jesu nọ o lele Ọsẹ riẹ ru iruo ikpe nọ i wo unu hu na ọ riẹ nọ Ọsẹ riẹ o re roro kẹ amọfa. Wọhọ oriruo, Jihova o vi rie nọ ọ nyae ta ahwo-akpọ no igbo uzioraha gbe uwhu nọ a reuku riẹ.​—Jọn 3:16.

Jesu ọ jẹ hai roro kẹ amọfa nọ ọ tẹ ruẹ nọ u fo re o ru ere. Wọhọ oriruo, Jesu o fiobọhọ kẹ aye jọ nọ ọ jọ ohwo Fonisia dede nọ ahwo Izrẹl a vi ọyomariẹ bru. (Mat. 15:22-28) O roro kẹ ilele riẹ re keme ọ jẹ hae kareghẹhọ nọ oware o rẹ sae thọ ae obọ. Nọ Pita ọ make jọ ẹgbede vro Jesu, Jesu ọ rọvrẹ riẹ. Uwhremu na, ọ tubẹ kẹ Pita iruo jọ nọ i wuzou gaga. (Luk 22:32; Jọn 21:17; Iruẹru 2:14; 8:14-17; 10:44, 45) Oware nọ Jesu o ru na u wuhrẹ  omai nọ ma rẹ hai roro kẹ amọfa jẹ rọ ere ‘ru re ahwo kpobi a ruẹ nọ ma wo iroro.’​—Fil. 4:5.

Ma tẹ be hai roro kẹ amọfa, ma ti nwene oghẹrẹ iruemu mai jọ re ma sai ru iruo kugbe oghẹrẹ ahwo kpobi. Jesu ọ jẹ hae riẹ amọfa ru gaga. Fikinọ ọ jẹ riẹ yerikugbe ahwo nọ a gaviezọ kẹe, u ru nọ ewegrẹ riẹ nọ e be re iẹe ihri a je ro sei “ogbẹnyusu enọ i re mi osa-uzou gbe erahaizi.” (Mat. 11:19) Kọ whọ be hae riẹ ru kugbe amọfa ziezi nọ wha tẹ rrọ iruo wọhọ epanọ Jesu o ru? Oniọvo jọ nọ a re se Louis o ru iruo kugbe oghẹrẹ ahwo buobu no evaọ oke nọ ọ jọ ọsẹro ọnyawariẹ gbe Ebẹtẹle. Ọ ta nọ: “Mẹ jẹ hae daoma rri oghẹrẹ ahwo kpobi nọ me bi lele ru iruo wọhọ eblọko nọ e rrọ oghẹrẹ ọvona ha. Dede nọ e rrọ oghẹrẹ ọvona ha, ohwo ọ sae ruẹrẹ ae họ evaọ oghẹrẹ nọ ugbẹhẹ nọ ọ be bọ o rẹ rọ jọ riẹriẹriẹ. Mẹ daoma nwene eware jọ re mẹ avọ ahwo nọ me bi lele ru iruo ma sai ru iruo kugbe dhedhẹ.” Emamọ oware oniọvo na o ru na.

Ẹvẹ ma sai ro dhesẹ nọ ma bi roro kẹ inievo nọ ma gbẹ rrọ ukoko? U wo eware buobu nọ ma rẹ sai ru nọ a tẹ ghale omai kugbe ohwo evaọ usi uwoma. O sae jọ nọ o wo ewha-iruo uviuwou nọ e vọ otọ kẹe nọ ọ be dhẹ ogbohrẹ rai, yọ ma wo tere he. O sae jẹ jọ nọ ọ kpako hayo ọ maha vi omai. Ma sai roro kẹ inievo itienana nọ ma gbe bi siawọ siọ ae ba ha hayo kẹ ae uvẹ serihọ nọ a tẹ gwọlọ ru ere. Ma sae jẹ rọwokugbe ae nọ a tẹ gwọlọ nọ ma rọ oghẹrẹ ọfa ta usi uwoma. Ma te ru ere, usi uwoma na o te were ae oma ziezi.

Re ma sae jọ ohwo nọ amọfa a rẹ gwọlọ lele ru iruo, ma rẹ hai “siobọno kẹ amọfa,” koyehọ ma rẹ vuẹ ae eware nọ ma riẹ. (1 Tim. 6:18) Nọ Jesu o je lele Ọsẹ riẹ ru iruo na, ọ ruẹ nọ ọ jẹ kuọ oware ovo dhere noi hi. Oke nọ Jihova “ọ ruẹrẹ idhiwu na họ,” Jesu ọ “jọ etẹe” yọ o wuhrẹ eware buobu mi ei. (Itẹ 8:27) Jesu omariẹ ọ jẹ kuọ eware dhere no ilele riẹ hẹ. O wuhrẹ i rai ‘eware nọ o yo’ mi Ọsẹ riẹ. (Jọn 15:15) U fo nọ ma re ru re ahwo nọ ma gbe bi ru iruo a riẹ eware nọ ma riẹ. Re ma jọ ohwo nọ amọfa a rẹ gwọlọ lele ru iruo, ma rẹ kuọ eware nọ ma riẹ dhere ae he, inọ ma tẹ vuẹ ae, a ti mi omai otọ no. Ukpoye, eva e rẹ were omai re ma vuẹ amọfa eware nọ ma riẹ.

Ma rẹ sae jẹ tuduhọ ahwo nọ ma gbe bi ru iruo awọ. Nọ ohwo o te muẹrohọ nọ ma be daoma evaọ iruo nọ ma bi ru, nọ o je jiri omai, eva e rẹ were omai gaga. Nọ Jesu ọ tẹ ruẹ nọ ilele riẹ a ru oware uwoma jọ, ọ jẹ hai jiri ai fiki oware uwoma nọ a ru na. (Rri Matiu 25:19-23; Luk 10:17-20.) Ọ tubẹ ta kẹ ae nọ a ti “ru iruo nọ e rro vi” enọ ọyomariẹ o ru. (Jọn 14:12) Aso urere taure Jesu o te ti whu, ọ ta kẹ ikọ riẹ nọ e talamu ei nọ: “Whai họ enọ e talamu omẹ evaọ edawọ mẹ.” (Luk 22:28) Ma riẹ nọ eva e te were ikọ na gaga fiki ẹme yena, yọ a te gwọlọ daoma viere. Ma tẹ be hai jiri ahwo nọ ma gbe bi ru iruo, eva e te were ai ziezi yọ a te gwọlọ daoma viere.

Oniọvo jọ nọ a re se Kayode ọ ta nọ: “Re ohwo ọ sae jọ ọnọ amọfa a rẹ gwọlọ lele ru iruo, orọnikọ eware e rẹ thọe obọ họ họ. Ukpoye, o re ru eva were ahwo nọ a rrọ kugbei, je ru nọ iruo i re ro vori ae oma.” Kọ oghẹrẹ ohwo otiọye whọ rrọ? Whọ sae nọ inievo nọ wha gbe bi ru iruo re a vuẹ owhẹ oghẹrẹ nọ a rri owhẹ fihọ. Eva e tẹ be hae were ahwo nọ wha gbe bi ru iruo wọhọ epanọ eva e jẹ hae were ilele Jesu nọ a tẹ rrọ kugbei na, kiyọ whọ te sae ta ọkpọ ẹme nọ Pọl ukọ na ọ ta inọ: “Mai yọ ibe iruiruo rai nọ i bi fiobọhọ kẹ owhai wo oghọghọ.”​—2 Kọr. 1:24.