Yesu kpɛlɩkɩ wɛtʋ kɩbandʋ ndɩ ndɩ, piyeba nɛ pʋwayɩ ɛkɔm tɛtʋ yɔɔ lɛ, ɛ nɛ lalaa pɛkpɛndɩ nɛ pala tʋmɩyɛ camɩyɛ; ɛkɛ kɩɖaʋ kɩbaŋʋ hɔɔlʋʋ ŋgʋ kɩ-taa. Ɛbɛ ɖɩpɩzɩɣ ɖɩla nɛ Yesu kɩɖaʋ wazɩ-ɖʋ? Ye ɖɩtazɩ Yesu kɩɖaʋ taa yɔ, ɖɩpɩzɩɣ nɛ ɖɩna paɣtʋ kila naadozo wena apɩzɩɣ asɩnɩ-ɖʋ nɛ ɖɩkɛ mba pa nɛ lalaa pɛkpɛndɩɣ nɛ palakɩ tʋmɩyɛ camɩyɛ yɔ. Paɣtʋ kila ana, akaɣ-ɖʋ sɩnʋʋ nɛ ɖa nɛ ɖo-koobiya ɖɩwɛɛ nɔɔ kʋɖʋmaɣ taa nɛ pɩkpaɖɩ.

Tʋmlaɖʋ weyi ɛ nɛ lalaa pɛkpɛndɩɣ nɛ palakɩ tʋmɩyɛ camɩyɛ yɔ, eluzuu ɛ-tɩ nɛ ɛɖʋʋ lalaa hɩɖɛ nɛ ɛɛñakɩ pana se ɛwɩlɩ se ɛkpaɖɩ-wɛ. Wɛtʋ kɩbandʋ ndʋ Yesu kpɛlɩkɩ ɛ-Caa cɔlɔ. Paa Yehowa ɖeke ɛmʋnɩna se payaa-ɩ se Lɩzɩyʋ yɔ, ɛsɔɔlaa se lalaa ɩtɩlɩ tʋmɩyɛ kɩcɛyɩyɛ nɖɩ ɛ-Pɩyalʋ laba yɔ. Tɔm ndʋ ɛyɔɔdaa yɔ, ndʋ yebina nɛ ɖɩtɩlɩ tɔm ndʋ. Ɛyɔɔdaa se: “Ðɩlɩzɩ ɛyʋ ɖɛ-lɛzʋʋ.” (Kiɖe 1:26) Alɩwaatʋ ndʋ Yehowa yɔɔdɩ tɔm ndʋ yɔ, Yesu nawa se ɛwɛnɩ tɩ luzuu siŋŋ.—Keɣa 17:36.

Yesu kɔm tɛtʋ yɔɔ lɛ, ɛlɩzɩ tɩ luzuu mbʋ nɛ ɛwɩlɩ. Alɩwaatʋ ndʋ ɛyaa saŋaɣ-ɩ ɛ-tʋma yɔɔ yɔ, ɛkɛzɩ samtʋ ndʋ nɛ ɛcɛlɩ Ɛsɔ. (Mark. 10:17, 18; Yoh. 7:15, 16) Yesu ñaɣ pana se eyele nɛ laŋhɛzɩyɛ wɛɛ ɛnɛ ɛ-tɔmkpɛlɩkɩyaa pɛ-hɛkʋ taa tam, nɛ ɛtɩkpaɣ-wɛ ɛzɩ yomaa yɔ ɛlɛ ɛzɩ taabalaa yɔ. (Yoh. 15:15) Halɩ ɛkɔ pa-nɩŋgbanzɩ lɩm se ɛwɩlɩ-wɛ se pɩpɔzʋʋ se pɛwɛɛnɩ tɩ luzuu. (Yoh. 13:5, 12-14) Ða ɖɔɖɔ pɩwɛɛ se ɖɩɖʋ hɩɖɛ mba ɖa nɛ wɛ ɖɩlakɩ tʋmɩyɛ yɔ, nɛ ɖɩtaaɖɛzɩ  ɖa-maɣmaɣ ɖɛ-kɛzɛsɩ nɔɔ ɛlɛ pa-ñɩnzɩ. Alɩwaatʋ ndʋ ‘ɖɩɖʋʋ lalaa hɩɖɛ’ nɛ ɖɩɩnɩɣzɩɣ weyi paacɛlɩ samtʋ yɔ ɛ-yɔɔ yɔ, piyeki nɛ ɖɩpɩzɩ nɛ ɖɩla tʋmɩyɛ camɩyɛ nɛ pɩkpaɖɩ.—Roma 12:10.

Ɛyʋ weyi ɛwɛnɩ tɩ luzuu yɔ, ɛnɩɣ pɩ-taa se “ɖenɖe lɔŋ pasɩyaa kpaɖɩ ɖɔʋ yɔ, peeɖe papɩzɩɣ.” (Adu. 15:22) Paa ɖɩwɛ lɛɣtʋ yaa niye ɛzɩma yɔ, pɩwɛɛ se ɖɩtɔzɩ se nɔɔyʋ fɛyɩ nɛ ɛsɩm pɩtɩŋa. Halɩ Yesu tisaa se nabʋyʋ wɛɛ lɛ ɛnʋ ɛɛsɩŋ-pʋ. (Mat. 24:36) Pɩtasɩ lɛ, Yesu tɔmkpɛlɩkɩyaa taatalɩ pilim ɛlɛ ɛɛsɔɔlaa se ɛtɩlɩ ndʋ pasɩma nɛ ndʋ pamaɣzɩɣ yɔ. (Mat. 16:13-16) Pʋyɔɔ ɛ nɛ mba palakaɣ tʋmɩyɛ yɔ pa-taa kaawɛ leleŋ! Mbʋ ɖɔɖɔ ye ɖɩwɛnɩ tɩ luzuu nɛ ɖɩtɔzʋʋ se ɖɩɩsɩŋ pɩtɩŋa nɛ ɖiwelisiɣ lalaa lɩmaɣza yɔ, ɖɩkaɣ yebu nɛ laŋhɛzɩyɛ wɛɛ; nɛ ɖɩkpɛndɩɣ lɩmaɣza lɛ, ‘ɖɩpɩzɩɣ’ yaa pɩtɩŋa pɩɖɔŋ camɩyɛ.

Kɔzɩ kɔzɩ lɛ, alɩwaatʋ ndʋ ɛgbɛyɛ taa ɛzʋtʋyaa kpɛndɩɣ nɛ palakɩ tʋmɩyɛ yɔ, pɩcɛyaa se pamaɣzɩnɩ Yesu tɩ luzuu. Pɩpɔzʋʋ se pɔtɔzɩ se fezuu kiɖeu pɩzɩɣ nɛ kiseɣti paa ɛgbɛyɛ taa ɛzʋtʋyʋ weyi nɛ ɛyɔɔdɩ tɔm natʋyʋ nɛ tɩsɩna nɛ pakpaɣ lɩmaɣzɩyɛ kɩbanɖɛ. Alɩwaatʋ ndʋ paalakɩ pe-kediɣzisi yɔ, ye pañakɩ pana se peyele nɛ paa weyi ɛyɔɔdɩ ɛ-lɩmaɣza yɔ, piyeki nɛ pɛkpɛndɩ nɛ pakpaɣ lɩmaɣza wena awazɩɣ ɛgbɛyɛ tɩŋa yɔ.

Tʋmlaɖʋ weyi ɛ nɛ lalaa pɛkpɛndɩɣ nɛ palakɩ tʋmɩyɛ camɩyɛ yɔ, ɛ nɛ lalaa paalakɩ tʋmɩyɛ lɛ, ɛwɩlɩɣ se ɛnɩɣ tɔm taa. Ɛɛñɔʋnɩ ɛ-lɩmaɣza, nɛ ɛkpakɩɣ lalaa ñɩna nɛ ɛlakɩnɩ tʋmɩyɛ. Pɩtʋʋ fɛyɩ se wɛtʋ sakɩyɛ yeba nɛ Yesu na se ɛ-Caa kɛ weyi ɛnɩɣ tɔm taa yɔ. Kɩɖaʋ nakʋyʋ yɔ. Ɛyaa mʋnɩ sɩm ɛlɛ Yehowa tiyi Yesu se ɛya pa-ñʋʋ sɩm nesi tɛɛ.—Yoh. 3:16.

Alɩwaatʋ ndʋ pɩcɛyaa yaa pɩmʋnaa yɔ, Yesu ɛɛñɔʋnɩ ɛ-lɩmaɣza. Paa Izrayɛɛlɩ mba cɔlɔ paatiyi-i yɔ, tɔzɩ ɛzɩma ɛsɩnɩ Fenisii halʋ nɔɔyʋ yɔ pɩ-yɔɔ. (Mat. 15:22-28) Mbʋ ɛɛsɔɔlaa se ɛ-tɔmkpɛlɩkɩyaa ɛla yɔ, pɩ-hɔɔlʋʋ taa ɖɔɖɔ lɛ ɛwɩlaa se ɛnɩɣ tɔm taa. Yesu taabalʋ kɩbanʋ Pɩyɛɛrɩ kizi ɛyaa ɛsɩndaa se ɛɛsɩŋɩ-ɩ nɛ pɩtɛ lɛ, etisi faaa nɛ ekpeɣ-i. Pʋwayɩ, ɛɖʋ Pɩyɛɛrɩ tʋma wena a-tɔm cɛyaa yɔ. (Luka 22:32; Yoh. 21:17; Tʋma 2:14; 8:14-17; 10:44, 45) Yesu kɩɖaʋ wɩlɩɣ-ɖʋ kpayɩ se pɩtɩpɔzɩ se ɖɩñɔɔnɩ ɖa-lɩmaɣza ɛlɛ ‘ɖiyele nɛ ɛyaa tɩŋa tɩlɩ se ɖɩkɛ mba panɩɣ tɔm taa yɔ.’—Fil. 4:5.

Ye ɖɩkɛ ɛyaa mba panɩɣ tɔm taa yɔ, pɩkaɣ-ɖʋ seɣtuu ɖɔɖɔ nɛ ɖɩla lɛɣzɩtʋ nɛ pɩsa nɛ ɖa nɛ ɛyaa ndɩ ndɩ ɖɩla tʋmɩyɛ nɔɔ kʋɖʋmaɣ taa. Yesu lakaɣ kɩbandʋ mba paacɔ-ɩ nɛ pata yɔ, piyeba nɛ e-koyindinaa  mba pasʋsaɣ-ɩ yɔ, pakʋyɩ ɛ-yɔɔ se ɛkɛ “lambuu mʋyaa nɛ kɩwɛɛkɩm laɖaa pa-taabalʋ;” paba kaamʋ ɛ-tɔm. (Mat. 11:19) Ɛzɩ Yesu yɔ, mba pɛwɛ ndɩ nɛ ɖʋ yɔ, ɖa nɛ wɛ ɖɩpɩzɩɣ nɛ ɖɩla tʋmɩyɛ nɔɔ kʋɖʋmaɣ taa? Payaɣ koobu abalɩñɩnʋ nɔɔyʋ se Louis nɛ ɛlabɩ egeetiye yɔɔ cɔnʋʋ tʋmɩyɛ nɛ Betɛɛlɩ tʋmɩyɛ; ɛ nɛ ɛyaa ndɩ ndɩ pɛkpɛndaa nɛ pala tʋmɩyɛ. Ɛyɔɔdaa se: “Ɛyaa mba patɩtalɩ pilim yɔ, ye ña nɛ wɛ ɩkpɛndaa nɛ ɩlakɩ tʋmɩyɛ naɖɩyɛ yɔ, pɩwɛ ɛzɩ pamaʋ koloŋa nakɛyɛ nɛ pɛɛ wena a-paɣlɩka wɛ ndɩ ndɩ yɔ. Ɛzɩma pɛɛ ana awɛ ndɩ ndɩ yɔ pʋyɔɔ lɛ, pɩpɔzʋʋ pana ñaɣʋ nɛ pɩkɩlɩ, ɛlɛ koloŋa ŋga kapɩzɩɣ nɛ katʋʋzɩ. Mañaɣ pana se mala lɛɣzɩtʋ nɛ ma nɛ lalaa ɖɩla tʋmɩyɛ laŋhɛzɩyɛ taa se pɩsa nɛ ɖɩla tʋmɩyɛ nɖɩ paɖʋ-ɖʋ yɔ.” Pɩkɛ wɛtʋ kɩbandʋ kpem!

Ɛgbɛyɛ nɖɩ ɖɩ-taa ɖɩwɛɛ yɔ, alɩwaatʋ ndʋ taa ɖɩpɩzɩɣ nɛ ɖɩwɩlɩ se ɖɩkɛ ɛyaa mba panɩɣ tɔm taa yɔ? Ðɩwɛnɩ waɖɛ se ɖɩla mbʋ, alɩwaatʋ ndʋ ɖa nɛ ɖɔ-tɔm susuu ɛgbɛyɛ taa mba ɖɩwɛɣ yɔ. Ða nɛ tɔm susuyaa mba pɛwɛnɩ hɔʋ taa tʋma wena awɛ ndɩ nɛ ɖa-ñɩna yɔ yaa mba pɛwɛnɩ pɩnzɩ ndɩ ndɩ yɔ, ɖɩpɩzɩɣ nɛ ɖisusi tɔm. Ðɩpɩzɩɣ nɛ ɖɩla lɛɣzɩtʋ nɛ ɖiwolo hɛɛ yaa ɖɩsɔɔlɩ nɛ ɖɩlabɩnɩ tʋmɩyɛ tɔm susuu nʋmɔŋ weyi pɔsɔɔlaa yɔ se pɩsa nɛ pehiɣ taa leleŋ tɔm susuu taa nɛ pɩkɩlɩ.

Tʋmlaɖʋ weyi ɛ nɛ lalaa pɛkpɛndɩɣ nɛ palakɩ tʋmɩyɛ camɩyɛ yɔ, ‘ɛsɔɔlɩ tayʋʋ.’ (1 Tim. 6:18) Alɩwaatʋ ndʋ Yesu lakaɣ tʋmɩyɛ ɛ-Caa Yehowa cɔlɔ yɔ, ɛnawa se ɛlɛ taamɛsɩ-ɩ nabʋyʋ. Alɩwaatʋ ndʋ Yehowa “ñɔɔzaɣ ɛsɔdaa yɔ,” Yesu ‘kaawɛ peeɖe’ nɛ ɛpɩzaɣ se ɛkpɛlɩkɩ lɔŋ ɛ-cɔlɔ. (Adu. 8:27) Pʋwayɩ lɛ, Yesu maɣmaɣ wɩlɩ ɛ-tɔmkpɛlɩkɩyaa ‘tɔm ndʋ ɛnɩ’ ɛ-Caa cɔlɔ yɔ nɛ taa leleŋ. (Yoh. 15:15) Ɛzɩ Yehowa yɔ, pɩwɛɛ se ɖitisi faaa nɛ ɖɩwɩlɩ mba ɖa nɛ wɛ ɖɩlakɩ tʋmɩyɛ yɔ sɩmtʋ nɛ lɛɣtʋ ndʋ ɖɩkpɛlɩkaa yɔ. Pɩtʋʋ fɛyɩ se tʋmlaɖʋ weyi ɛ nɛ lalaa pɛkpɛndɩɣ nɛ palakɩ tʋmɩyɛ camɩyɛ yɔ, ɛɛkaɣ mɛsʋʋ lalaa tɔm ndʋ pɩpɔzʋʋ se patɩlɩ yaa tɔm ndʋ tɩsɩɣnɩ-wɛ yɔ se pɩsa nɛ ɛkpaɖɩ-wɛ. Pɩkɛdɩɣnɩ-ɩ se ɛwɩlɩ lalaa mbʋ ɛkpɛlɩkaa yɔ.

Ðɩpɩzɩɣ ɖɔɖɔ nɛ ɖiheyi ɖa nɛ mba ɖɩlakɩ tʋmɩyɛ yɔ tɔm ndʋ tɩkpazɩɣ-wɛ ɖoŋ yɔ. Alɩwaatʋ ndʋ nɔɔyʋ naɣ ɖa-pana ñaɣʋ nɛ eheyi-ɖʋ se ɛwɛnɩ ɛsɩmɩyɛ ɖa-pana ñaɣʋ yɔɔ yɔ, ɖa-taa ɩɩlakɩ leleŋ yaa we? Yesu kpakaɣ alɩwaatʋ nɛ eheyiɣ ɛ nɛ mba pɛkpɛndaɣ nɛ palakɩ tʋmɩyɛ yɔ kɩbandʋ ndʋ palakaɣ yɔ tɩ-tɔm. (Kpaɣ-tʋ nɛ ŋmaɣzɩnɩ Maatiyee 25:19-23; Luka 10:17-20.) Halɩ Yesu heyi-wɛ se pakaɣ “labʋ tʋma wena akɩlɩ” ɛ-ñɩna yɔ. (Yoh. 14:12) Ðoo wena tɛʋ feŋaɣ se pakʋ-ɩ yɔ a-taa, ɛsam ɛ-apostoloowaa siɣsiɣ tɩnaa nɛ ɛyɔɔdɩ se: “Ɩkɛ mba pɔñɔnɩ-m man-kʋñɔmɩŋ taa yɔ.” (Luka 22:28) Maɣzɩ nɛ ŋna ɛzɩma ɛ-tɔm ndʋ tɩkpazɩ-wɛ ɖoŋ nɛ tiseɣti-wɛ se powolo tʋmɩyɛ yɔɔ yɔ! Ye ɖa ɖɔɖɔ ɖɩkpakɩɣ alɩwaatʋ nɛ ɖɩsaŋ mba ɖa nɛ wɛ ɖɩlakɩ tʋmɩyɛ yɔ, pɩtʋʋ fɛyɩ se pa-taa kaɣ labʋ leleŋ nɛ pɩkɩlɩ nɛ pakaɣ labʋ tʋmɩyɛ nɛ pɩkpaɖɩ.

Payaɣ koobu abalɩñɩnʋ nɔɔyʋ se Kayode. Ɛyɔɔdaa se: “Tʋmlaɖʋ weyi ɛ nɛ lalaa pɛkpɛndɩɣ nɛ palakɩ tʋmɩyɛ camɩyɛ yɔ, pɩtɩcɛyɩ se ɛtalɩ pilim; ɛlɛ eyeki se ɛ nɛ mba pɛkpɛndɩɣ nɛ palakɩ tʋmɩyɛ yɔ, pa-taa ɩwɛɛ leleŋ nɛ tʋmɩyɛ ɛtaakɛ-wɛ sʋʋtʋ.” Tʋmlaɖʋ ɛnʋ ɛ-ɖɔndɩ ŋkɛnaa? Pɩɩwɛɣ ɖeu se ŋpɔzɩ koobiya Krɩstʋ ñɩma mba ña nɛ wɛ ɩkpɛndɩɣ nɛ ɩlakɩ tʋmɩyɛ yɔ pa-taa nabɛyɛ nɛ peheyi-ŋ tʋmlaɖʋ weyi ɛ-ɖɔndɩ ŋkɛnaa yɔ? Ye pa-taa ɩwɛ leleŋ se ña nɛ wɛ ɩkpɛndɩɣ nɛ ɩlakɩ tʋmɩyɛ ɛzɩ Yesu tɔmkpɛlɩkɩyaa taa kaawɛʋ leleŋ se pa nɛ Yesu pɛkpɛndaa nɛ palakɩ tʋmɩyɛ yɔ, pʋbʋ ŋpɩzɩɣ nɛ ŋyɔɔdɩ ɛzɩ apostoloo Pɔɔlɩ yɔ se: “Ðɩkɛ mba mɩ nɛ wɛ ɩkpɛndɩɣ nɛ ɩlakɩ tʋmɩyɛ se ihiɣ taa leleŋ yɔ.”—2 Kɔr. 1:24.