Na Séu, Jizus prende kes kualidadi ki djuda-l trabadja dretu djuntu ku otus algen. Dipôs, kantu el ben Téra, el inxina se disiplus kes kualidadi. Modi ki izénplu di Jizus ta djuda-nu? Nu ben odja três prinsípiu ki nu ta prende ku se izénplu. Kes prinsípiu li, ta djuda-nu trabadja más dretu ku otus algen i sta más unidu ku nos irmons.

Pa nu ser un bon koléga di trabadju nu meste ser umildi. Un algen umildi ta da valor pa se kolégas di trabadja i el ka ta fika ta tenta txoma atenson sô pa se kabésa. Jizus prende ser umildi ku se Pai, Jeová. Pur izénplu, é verdadi ki é sô Jeová ki pode txomadu di Kriador, má simé, el kreba pa otus algen sabe ma se Fidju trabadja djuntu ku el. Nu ta odja kel-li klaru na kes palavra di Jeová, ki sta na Génesis 1:26. El fla: ‘Nu faze ómi sima nos imaji’. Kes palavra li mostra Jizus ma Jeová é txeu umildi. — Sal. 18:35.

Kantu Jizus staba na Téra, tanbê el mostra ma el éra umildi. Pur izénplu, sénpri ki pesoas ta ilojiaba el, el ta daba ónra pa Jeová. (Mar. 10:17, 18; João 7:15, 16) Tanbê el sforsa txeu pa mante pas ku se disiplus. Jizus ta trataba es sima amigus envês di skravu. (João 15:15) Jizus ti laba pé di se disiplus pa inxina-s modi ki é inportanti ser umildi. (João 13:5, 12-14) Nu meste  imita izénplu di Jizus i poi interesis di nos irmons na primeru lugar. Nu ta konsigi ser un bon koléga di trabadju, si nu ‘da ónra pa kunpanheru’ i nu ka fika tudu óra ta spéra pa nu fladu ma nu faze un bon trabadju. — Rom. 12:10.

Un algen umildi sabe ma ‘ku konsedju di txeu algen ta ten bons rezultadu.’ (Pro. 15:22) Ka ta nporta kantu spiriénsa ô kapasidadi ki nu ten, nu meste lenbra ma nu ka sabe tudu kuza. Ti mésmu Jizus rekonhese ma el ka sabia di tudu kuza. (Mat. 24:36) Tanbê el sabia ma se disiplus éra inperfetu, má simé el ta krê sabeba ses opinion. (Mat. 16:13-16) Kel-li ta djuda-nu ntende pamodi ki se disiplus ta xintiba avontádi djuntu ku el! Nos tanbê, nu meste ser umildi sima Jizus. Si nu rekonhese ma nu ka sabe tudu kuza i nu obi opinion di otus algen, nu ta konsigi mante pas i ‘ten bons rezultadu.’

Prinsipalmenti kes ki é ansion meste imita umildadi di Jizus óras ki es ta trabadja djuntu. Ansions meste lenbra ma spritu santu pode djuda kalker un di es fla un kuza ki ta djuda grupu di ansions toma un bon disizon. Si na un runion di ansion es tudu ta xinti avontádi pa da ses opinion, ta ser más fásil toma bons disizon ki ta djuda tudu algen na kongregason.

Nu meste ser ikilibradu óras ki nu ta trabadja ku otus algen i nu ka debe insisti pa kuzas fazedu sénpri di nos manera. Jizus tevi txeu oportunidadi di odja modi ki se Pai é ikilibradu. Pur izénplu, el odja ma Jeová mostra-nu txeu mizerikórdia. Pamodi pekadu, nu merese móre. Má dja ki Jeová é un Deus ikilibradu, el manda Jizus pa salva nos tudu. — João 3:16.

Na alguns situason, Jizus tanbê mostra ma el éra un algen ikilibradu. Un izénplu di kel-li é kantu el djuda un mudjer di Finísia. Jizus mandadu pa ben djuda sô kes algen di kaza di Israel, má simé el djuda kel mudjer ki éra di otu nason. (Mat. 15:22-28) Jizus tanbê mostra ma el éra ikilibradu pamodi el ka ta speraba pa se disiplus sérba perfetu. Nu ta odja un próva di kel-li kantu Jizus púrdua se amigu, Pedru, mésmu dipôs ki el fla ma el ka konxeba Jizus. Dipôs, Jizus da Pedru responsabilidadis inportanti. (Luc. 22:32; João 21:17; Atos 2:14; 8:14-17; 10:44, 45)  Izénplu di Jizus ta inxina-nu ma nu debe ser ‘ikilibradu’. — Fil. 4:5.

Ser ikilibradu ta djuda-nu trabadja na pas ku tudu tipu di algen. Dja ki Jizus ta trataba tudu algen dretu, se inimigus txoma-l di ‘amigu di kobradoris di inpostu i di pekadoris’, ki éra kes algen ki ta setaba se mensaji. (Mat. 11:19) Modi ki nu pode imita izénplu di Jizus óras ki nu ta lida ku otus algen? Irmon Luís, pasa txeu ténpu ta vizita kongregasons i ta trabadja na Betel. Pur isu el trabadja ku txeu algen diferenti. El fla: “N ta atxa ma trabadja djuntu ku otus algen é sima faze un paredi ku pédras di tamanhu diferenti. É klaru ki ta da txeu trabadju pa faze un paredi rétu ku pédras asi, má nu ta konsigi faze un paredi dretu si nu poi kada pédra na se lugar. Di mésmu manera, N ta tenta muda nha manera di ser pa N mante pas i pa N ser un bon koléga di trabadju.” É si tanbê ki nu krê ser!

Na ki situasons nu pode mostra ma nos é ikilibradu ku irmons di nos kongregason? Nu ten un bon oportunidadi di faze kel-li óras ki nu ta trabadja djuntu ku nos grupu pa pregason. Tanbê nu pode trabadja ku kes publikador ki ten responsabilidadi na família ô ki ten idadi diferenti di nos. Pa nu ser ikilibradu na pregason, talvês nu meste anda na pasu di kel algen i trabadja na kel tipu di pregason ki el gosta más txeu.

Un bon koléga di trabadju sta ‘prontu pa dividi’ kel ki el ten ku otus. (1 Tim. 6:18) Duránti tudu kel ténpu ki Jizus trabadja djuntu ku se Pai la na Séu, el odja ma Jeová ka tenta sukundi-l ninhun informason. Kantu Jeová ‘pripara séu’ i tudu kes otu kuza, Jizus ‘staba la’ i el prende ku se Pai. (Pro. 8:27) I kantu Jizus staba na Téra, el inxina se disiplus ‘tudu kel ki [el] obi’ di se Pai. (João 15:15) Nu pode imita izénplu di Jeová, óras ki nu ta fla nos irmons ku irmans kes kuza ki nu prende. Un bon koléga di trabadju ka ta dexa di fla otus algun kuza ki es meste sabe ô ki pode djuda-s, sô pa el pode kontinua ta kontrola-s. Envês di kel-li, el ta fika kontenti di inxina otus algen kes kuza ki el sabe.

Tanbê nu pode nkoraja nos koléga di trabadju. Bu ka ta fika kontenti óras ki algen ta ilojia-u i ta agradese-u di korason pa algun kuza ki bu faze? Klaru ki sin. Jizus ta traba ténpu pa ilojiaba se disiplus. (Odja tanbê Mateus 25:19-23; Lucas 10:17-20.) Jizus ti fla se disiplus ma es ta ben fazeba ‘óbras más grandi di ki’ kes ki el faze. (João 14:12) Na kel noti antis di el móre, Jizus ilôjia se disiplus fiel kantu el fla-s: ‘Anhos é kes ki fika ku mi na nhas provasons’. (Luc. 22:28) Bu ta konsigi imajina modi ki kes palavra li poi disiplus di Jizus kontenti! Di sertéza, kel-li pô-s ku más vontadi di aji. Óras ki nu ta ilôjia nos koléga di trabadju, tanbê es ta xinti más filís i es ta trabadja más dretu.

Un irmon fla: “Bu ka meste ser perfetu pa bu trabadja djuntu ku otus. Kuzê ki bu meste faze é dexa tudu algen ki ta trabadja djuntu ku bo xinti más avontádi i djuda pa es faze ses trabadju dretu.” Abo é un bon koléga di trabadju? Pamodi ki bu ka ta pergunta alguns irmon ku irmans kuzê ki es ta pensa sobri kel-li? Si es gosta di trabadja djuntu ku bo, sima disiplus di Jizus gostaba di trabadja djuntu ku el, bu pode fla mésmu kuza ki apóstlu Polu: ‘Nu ta kolabora pa nhos ten alegria’. — 2 Cor. 1:24.