Ntangu Yezu vandaka na zulu, yandi longukaka bikalulu yina sadisaka yandi na kuvanda nduku ya mbote ya kisalu. Na nima ntangu yandi kwisaka awa na ntoto, yandi vandaka mpi mbandu ya mbote sambu na bantu yina vandaka kusala ti yandi. Inki mutindu beto lenda landa mbandu ya Yezu? Kana beto longuka mbandu na yandi na dikebi, beto ta mona minsiku tatu yina ta sadisa beto na kuvanda banduku ya mbote ya kisalu. Minsiku yina ta sadisa beto na kuzinga na bumosi ti bampangi na beto.

Nduku ya mbote ya kisalu ke vandaka ti kikalulu ya kudikulumusa, yandi ke monaka mfunu ya banduku na yandi ya kisalu mpi yandi ke sosaka ve kubenda dikebi ya bantu na kimuntu na yandi. Yezu longukaka kikalulu ya kudikulumusa na Papa na yandi. Yehowa mpamba muntu kele Ngangi. Kansi yandi zolaka mpi nde bantu ya nkaka kuzaba kisalu ya mfunu yina Mwana na yandi salaka. Mambu yina yandi tubaka ke monisa yo. Yandi tubaka nde: “Beto sala muntu na kifwani na beto.” (Kuy. 1:26) Ntangu Yehowa tubaka mambu yina, Yezu zabaka nde Yehowa kele kibeni ti kikalulu ya kudikulumusa.—Nk. 18:35.

Ntangu Yezu vandaka awa na ntoto, yandi vandaka mpi ti kikalulu ya kudikulumusa. Ntangu bantu vandaka kukumisa yandi sambu na mambu yina yandi vandaka kusala, yandi vandaka kupesa lukumu yonso na Yehowa. (Mar. 10:17, 18; Yoa. 7:15, 16) Yezu vandaka kusala yonso sambu na kutula ngemba ti balongoki na yandi mpi yandi vandaka  kubaka bo bonso banduku kansi ve bonso bampika. (Yoa. 15:15) Yandi yobisaka nkutu makulu na bo sambu na kulonga bo na kuvanda bantu ya kudikulumusa. (Yoa. 13:5, 12-14) Bonso Yezu, beto mpi beto fwete pesa banduku na beto ya kisalu lukumu na kisika ya kutula bampusa na beto na kisika ya ntete. Kana ‘beto ke pesana lukumu’ mpi kana beto ke sosa ve nde bantu kukumisa beto, beto lenda sala mambu mingi.—Bar. 12:10.

Muntu ya kudikulumusa ke bakisaka mpi nde “mambu ke nungaka na nzila ya bandongisi mingi.” (Bing. 15:22) Ata beto me zaba mambu mingi to beto me zaba kusala mambu mingi, beto fwete vila ve nde ata muntu mosi ve me zaba mambu yonso. Yezu nkutu ndimaka nde yandi zabaka ve mambu yonso. (Mat. 24:36) Diaka, yandi vandaka kuzola kuzaba bangindu ya balongoki na yandi ya kukonda kukuka. (Mat. 16:13-16) Yo yina banduku na yandi ya kisalu vandaka kudiwa mbote na lweka na yandi. Mutindu mosi, kana na kudikulumusa yonso beto ke ndima nde kele ti mambu yina beto me zaba ve mpi kana beto ke ndima bangindu ya bantu ya nkaka, beto ta tula ngemba ti bampangi mpi ‘mambu ta nunga.’

Yo kele kibeni mfunu nde bankuluntu kulanda mbandu ya kikalulu ya Yezu ya kudikulumusa. Bo fwete vila ve nde mpeve santu lenda sadisa konso nkuluntu yina na kimvuka ya bankuluntu. Ntangu bankuluntu ke sala balukutakanu na bo, kana bo ke sala yonso sambu konso nkuluntu kupesa ngindu na yandi kukonda mpasi, bo yonso na kimvuka, bo ta baka balukanu yina ta sadisa dibundu ya mvimba.

Nduku ya mbote ya kisalu ke vandaka ve makambu ngolo ntangu yandi ke sala ti bantu ya nkaka. Yandi ke ndimaka kusoba ngindu na yandi mpi yandi ke ndimaka bangindu ya bantu ya nkaka. Ya kieleka, na mabaku mingi Yezu monaka kikalulu ya Papa na yandi ya kuvanda ve makambu ngolo. Mu mbandu, Yehowa tindaka Yezu sambu na kugulusa bantu na ndola ya lufwa.—Yoa. 3:16.

Yezu vandaka ve makambu ngolo. Mu mbandu, yandi sadisaka nkento mosi ya bwala Fenisia ata bo tindaka Yezu na dikanda ya Izraele. (Mat. 15:22- 28) Yandi vandaka mpi ve makambu ngolo na yina me tala mambu yina yandi vandaka kuzola nde balongoki na yandi kusala. Ntangu Piere nduku ya ngolo ya Yezu buyaka yandi na meso ya bantu, Yezu vandaka ya kuyilama na kulolula yandi. Na nima, Yezu pesaka Piere mikumba ya nene. (Luka 22:32; Yoa. 21:17; Bis. 2:14; 8:14-17; 10:44, 45) Mbandu ya Yezu ke monisa pwelele nde beto fwete ndima mpi bangindu ya bantu ya nkaka sambu yo  ta sala nde “bantu yonso kuzaba kikalulu na [beto] ya kuvanda ve makambu ngolo.”—Bafil. 4:5.

Kana beto kele ve makambu ngolo yo ta sadisa beto mpi na kusala na ngemba ti bantu ya mitindu yonso. Yezu vandaka kuzinga mbote ti bantu yo yina bambeni na yandi yina vandaka kuwila yandi kimpala tubaka nde yandi vandaka “nduku ya bakalaki ya mpaku mpi ya bansumuki” bayina vandaka kundima nsangu na yandi. (Mat. 11:19) Keti beto lenda landa mbandu ya Yezu mpi kusala mbote ti bantu ya nkaka? Mpangi Louis salaka mingi na kisalu ya nziunga mpi na Betele. Yandi salaka ti bantu mingi ya kuswaswana. Yandi ke tuba nde: “Kusala ti bantu ya kukonda kukuka kele bonso kutunga kibaka ti matadi yina kele ve nene kiteso mosi. Yo ke lombaka bikesa mingi sambu na kutula konso ditadi na kisika na yo sambu kibaka yina bo ke tunga kukwenda ve na lweka. Mono sobaka kimuntu na mono sambu mono sala na ngemba ti bampangi ya nkaka.” Yo kele kikalulu mosi ya mbote kibeni.

Inki ntangu beto lenda monisa kikalulu yina ya kusala mbote ti bampangi na dibundu na beto? Beto lenda monisa yo ntangu beto ke longa nsangu ya mbote ti kimvuka na beto ya kulonga nsangu ya mbote. Beto lenda longa nsangu ya mbote ti bansamuni yina kele ti mikumba mingi na mabuta, mikumba yina beto kele ve ti yo. To beto lenda longa nsangu ya mbote ti bansamuni yina kele ve mvula mosi ti beto. Beto lenda sala bikesa ya kuyikama ti bo sambu beto longa nsangu ya mbote na kiese yonso mpi yo buta mbuma.

Nduku ya mbote ya kisalu ke ‘vandaka ya kuyilama sambu na kukabila bankaka.’ (1 Tim. 6:18) Ntangu Yezu vandaka kusala ti Papa na yandi, yandi bakisaka nde Yehowa bumbaka ve mambu yina yandi zabaka sambu na yandi mosi. Ntangu Yehowa “yidikaka zulu,” Yezu “vandaka pana” mpi yandi longukaka mambu mingi na Yehowa. (Bing. 8:27) Na nima ntangu yandi kwisaka na ntoto, yandi vandaka na kiese ya kusonga balongoki na yandi ‘mambu yonso yina yandi waka na Tata’ na yandi. (Yoa. 15:15) Beto mpi lenda landa mbandu ya Yehowa ntangu beto ke songa bampangi ya nkaka mambu yina beto me zaba. Ya kieleka, nduku ya mbote ya kisalu ke bumbaka ve mambu ya mfunu yina yo ke lomba nde bantu ya nkaka kuzaba mpi mambu yina ta sadisa bo. Yandi ke bangaka ve nde bantu ya nkaka ta baka kisika na yandi. Yandi ke vandaka na kiese ya kusonga bantu ya nkaka mambu ya mbote yina yandi me zaba.

Beto lenda pesa mpi banduku na beto ya kisalu kikesa. Kana muntu mosi me mona bikesa yina beto ke sala mpi me pesa beto mersi, yo ke salaka beto mbote. Yezu bakaka ntangu ya kusonga banduku na yandi ya kisalu mambu ya mbote yina bo vandaka kusala. (Tala mpi Matayo 25:19-23; Luka 10:17-20.) Nkutu yandi songaka bo nde bo ta sala “mambu ya nene kuluta” yandi. (Yoa. 14:12) Na mpimpa ya kilumbu yina Yezu fwaka, yandi sikisaka bantumwa na yandi yina kangamaka ti yandi mpi yandi songaka bo nde: “Beno kele bantu yina me kangama ti mono na bampasi na mono.” (Luka 22:28) Mambu yina Yezu songaka bo pesaka bo kibeni kikesa mpi yo pusaka bo diaka na kusala mambu mingi. Ya kieleka, kana beto ke sikisa mpi banduku na beto ya kisalu, bo ta vanda na kiese mpi yo lenda pusa bo na kusala diaka mingi.

Mpangi Kayode ke tuba nde: “Sambu muntu kuvanda nduku ya mbote ya kisalu, yo ke lomba ve nde yandi vanda muntu ya kukuka. Nduku ya mbote ya kisalu kele muntu yina ke salaka nde bantu yina ke sala ti yandi kuvanda na kiese mpi bo sala kukonda mpasi.” Keti nge ke salaka mpi mutindu yina? Nge lenda yula bampangi ya nkaka na kusonga nge kana nge kele nduku ya mbote ya kisalu. Kana bo ke vandaka na kiese ya kusala ti nge mutindu balongoki ya Yezu vandaka na kiese ya kusala ti yandi, nge lenda tuba bonso ntumwa Polo nde: “Beto kele banduku ya kisalu sambu na kiese na beno.”—2 Bak. 1:24.