Jesus okwa li e lihonga omaukwatya oo lwanima e ke mu kwafela a kale oshihopaenenwa sha denga mbada. Okwa kala ha longele kumwe naavo a kala ta longo navo, eshi a li kombada yedu. Oshihopaenenwa shaJesus otashi tu hongo shike? Ngeenge otwa konakona oshihopaenenwa shaye, otashi ke tu kwafela tu didilike mo omafinamhango atatu, oo tae tu kwafele tu kale hatu longele kumwe navamwe. Omafinamhango oo otae ke tu kwafela tu kale moukumwe notwa hangana novamwatate.

Omunhu oo ha longele kumwe navamwe oha kala omulininipiki noiha kendabala okuliulika. Jesus okwe lihonga elininipiko kuXe. Nonande Jehova oye aeke a wana okwiifanwa Omushiti, okwa li yo a hala vamwe va shiive oilonga oyo Omona a longa. Osho otu shi liwetele meendjovo odo Kalunga a popya, eshi a ti: “Tu meni ovanhu oshifefa shetu.” (Gen. 1:26) Jesus okwa li a mona kutya Jehova omulininipiki, eshi a popya eendjovo odo. — Eps. 18:35.

Eshi Jesus a li kombada yedu, naye okwa li yo a ulika oukwatya oo welininipiko. Eshi a li ta tangwa omolwoilonga oyo a longa, okwa li a yandja efimano Kwaao a wana oku li pewa. (Mark. 10:17, 18; Joh. 7:15, 16) Okwa li ha longo noudiinini, opo  a kaleke po ombili pokati kaye novahongwa vaye. Okwa li yo e va tala ko onga ookaume, ndele hangaashi ovapiya. (Joh. 15:15) Okwa li nokuli a kosha eemhadi davo, opo e va honge okukala ovalininipiki. (Joh. 13:5, 12-14) Nafye otwa pumbwa okukala ovalininipiki, ponhele ashike tu kale twa pitifa ouwa wetu komesho. Ngeenge ‘otwa kala twa fimaneka vamwe’ nokuhenuka okukala twa hala okutangwa, ohatu ka pondola shihapu. — Rom. 12:10.

Omunhu oo omulininipiki oha kala yo e shii kutya ‘apa pe novapukululi vahapu, eemhangela otadi wanifwa.’ (Omayel. 15:22) Kashi na nee mbudi kutya otu na owino u fike peni, ile ohatu pondola shi fike peni, natu kaleke alushe momadiladilo kutya kape na omunhu e shii keshe shimwe. Jesus naye okwa li a dimina kutya ke shii keshe shimwe. (Mat. 24:36) Okwa li yo e na ohokwe mwaasho ovahongwa vaye inava wanenena ve shii notava diladila. (Mat. 16:13-16) Itashi tu kumwifa, eshi ovahongwa vaye va li hava kala va manguluka okukala puye. Sha faafana, ngeenge otwa kala ovalininipiki notu shii kutya katu shii keshe shimwe, ohatu ka pwilikina komadiladilo avamwe, ‘neemhangela detu otadi ka wanifwa.’

Osha fimana kovakulunhuongalo okuhopaenena elininipiko laJesus, eshi tava longo pamwe. Ova pumbwa yo okudimbuluka kutya omhepo iyapuki otai dulu okulongifa omukulunhuongalo keshe mokati kavo. Ngeenge ovakulunhuongalo ova kala ovalininipiki, eshi ve li momitumba davo, keshe umwe ota ka kala a manguluka okuninga omatyekosha notava ka ninga omatokolo e li mondjila, oo taa ka kwafela eongalo alishe.

Omulongi muwa oha kala e na ondjele, ngeenge ta longo pamwe navamwe. Oha tifuka. Jesus okwa mona lwoikando nghee Xe a ulika kutya oku na ondjele. Pashihopaenenwa, Jehova okwa li a tuma Jesus a ka xupife ovanhu mefyo, olo va li ve lilongela. — Joh. 3:16.

Jesus okwa li alushe ha tifuka, opo sha pumbiwa. Dimbuluka nghee a li a xupifa omukainhu Omufoinikia, nonande okwa li ashike a tumwa a ka xupife eedi odo da kana domeumbo laIsrael. (Mat. 15:22-28) Okwa li yo ha kala e na ondjele shi na sha naasho a li a teelela ovahongwa vaye va longe. Eshi kaume kaye Petrus e mu lidimbika mokati kovanhu, Jesus okwa li e mu dimina po diva. Nolwanima, okwa li e lineekelela Petrus oinakuwanifwa ya kwata moiti. (Luk. 22:32; Joh. 21:17; Oil. 2:14; 8:14-17; 10:44, 45) Oshihopaenenwa shaJesus otashi ulike filufilu kutya  otwa pumbwa okuulikila ‘ovanhu aveshe kutya otu na ondjele,’ mokukala hatu tifuka. — Fil. 4:5.

Ngeenge otwa kala tu na ondjele otashi ke tu linyengifa yo tu dule okukala hatu longo noupu novanhu vomaludi aeshe. Jesus okwa li ha ungaunga nawa naavo ve li puye fiyo oposhitwa opo ovatondi vaye, ovo va li ve mu twila ondubo, ve mu ula kutya oku li “kaume kovafendelifi nokovalunde,” ovo hava pwilikine ketumwalaka laye. (Mat. 11:19) Mbela nafye ohatu ka hopaenena ngoo Jesus mokulongela kumwe nawa navamwe? Louis, omumwatate oo a kala ha longo luhapu novanhu va yoolokafana e li omupashukilishikandjo nosho yo moilonga yaBetel, okwa ti: “Ohandi kendabala okufaafanifa ongudu oyo handi longo pamwe nayo nekuma olo la tungwa nomamanya a yoolokafana. Ngeenge owa unganeke nawa omamanya oo, otashi ke ku kwafela u tunge ekuma la yukilila. Ohandi kendabala alushe okuninga omalunduluko opo sha pumbiwa, opo ndi dule okulonga nombili navamwe notu pondole moshilonga osho.” Oyo kai fi tuu onghedi ya denga mbada yokulonga navamwe!

Omeenghedi dilipi hatu dulu okuulika kutya otu na ondjele, ngeenge hatu ungaunga navamwe meongalo? Ohatu dulu okuninga ngaho, eshi hatu longo pamwe navo moilonga yokuudifa. Otashi dulika tu longe pamwe novaudifi, ovo ve na oinakuwanifwa youkwaneumbo ya yooloka ko kuyetu, ile vomido da yooloka. Mbela itashi ka kala pandunge okuhola ko konhapo yetu, eshi hatu udifa, ile tu longife onghedi yokuudifa oyo ve shii nawa, opo yo navo va mone ehafo moilonga yokuudifa?

Omulongi muwa oha kala alushe e lilongekida ‘okutukulilafana navakwao.’ (1 Tim. 6:18) Jesus oku na okukala a mona kutya Jehova iha holeke sha, eshi a li ta longo pamwe naye. Eshi Jehova “a longekida eulu,” Jesus ‘opo a li’ nokwa li e lihonga kuye. (Omayel. 8:27) Lwanima, Jesus okwa li a shiivifila nehalo liwa ovahongwa vaye “oinima aishe oyo a uda” kuXe. (Joh. 15:15) Ohatu dulu okushikula oshihopaenenwa shaJehova mokulombwela ovamwatate novamwameme oinima oyo twe lihonga. Oshoshili kutya omuhongi muwa iha ngungunine vakwao ouyelele oo va pumbwa, opo ngeno a kale oye katokote moinima aishe. Ndele ponhele yaasho, oha kala a hafa okulombwela vamwe oinima oyo e lihonga.

Nafye ohatu dulu okutwa omukumo ovo hatu longo pamwe navo. Mbela ihashi tu hafifa, ngeenge umwe e tu pandula tashi di komutima, molwaashi a didilika oilonga yetu iwa? Jesus okwa li ha kufa efimbo, opo a pandule ovo ta longo pamwe navo, omolwoilonga yavo iwa. (Yelekanifa naMateus 25:19-23; Lukas 10:17-20.) Okwa li nokuli e va lombwela kutya otava ka “longa oilonga inene i dule” oyo a longa. (Joh. 14:12) Moufiku oo wa tetekela efyo laye, okwa li a pandula ovayapostoli vaye, a ti: “Nye omwa kala pamwe naame naashi nda li momayeleko.” (Luk. 22:28) Diladila nghee eendjovo daye da li da kuma omitima davo noku va twa omukumo va longe shihapu! Ngeenge otwa kala hatu pandula ovalongi pamwe nafye, otava ka kala va hafa notava ka pondola.

Omumwatate wedina Kayode okwa ti: “Itashi ti omunhu okwa pumbwa okukala a wanenena, opo a kale omulongi muwa. Ndele oha hafifa ovo ha longo pamwe navo noihe va li oilonga.” Mbela naave osho u li ngaho? Mbela ito dulu okupula Ovakriste vakweni, ovo hamu longo pamwe navo, kutya ove omulongi a tya ngahelipi? Ngeenge ohava kala va hafa okulonga pamwe naave ngaashi ovayapostoli va li hava hafele okulonga pamwe naJesus, naave oto dulu okupopya ngaashi omuyapostoli Paulus, oo a ti: “Otu li ovalongi pamwe nanye omolwehafo leni.”​—2 Kor. 1:24.