Yeez waakady mulongel myand ku biikadil bilengel bya Taat indiy byaakady mwa kulong bwa iikal cileejel cilengel cya mukal a mudimw bwa baat baakady bakal mudimw ni bakwaabw. I biny bitudy mwa kuhetel ku cileejel cya Yeez? Hatukookontonon cileejel eecy, tudy mwa kutal may matam masat mady mwa kwiitwambulwiish bwa kwiikal bakal ba mudimw balengel. May matam aam miiyiiy kwiitwambulwiish bwa kwiikal ni meej ma kaacyumw ni kuhetangan.

Mukal a mudimw mulengel udy ni kwiihweekesh wangangat badyey ukal naabw mudimw ni buseeb ni kiin ukaam teng kwiikal ku mut kwa bakwaabw. Kwiihweekesh i bwaal bwaakady Yeez mulongel kudy Taat indiy. Yehow kaayend ki udy mukumban bwa kumubiikanobw neey Cyakahang, waakady mukat bwa bakwaabw bamanyik mudimw a buseeb waakady Mwaan indiy ukal. Ki bwabiny Mawej uleebel neey: “Tuhangaay muut: iikal mwiitufwaanok baatut.” (Kbwa. 1:26) Yeez waakady mukat mwaakady Yehow mwiihweekesh mu bulund bwaabab.​—Mis. 18:35, NWT.

Ning haakady Yeez ha bulab, waakady byend wiihweekesh teng bu Taat indiy. Haakadyey mutumbish Taat indiy bwa myand yindiy yikumbeen, waakishil Oow waakady mukumbanyin buneem. (Mark 10:17, 18; Jah 7:15, 16) Yeez waakady mwiikashishomw bwa kulamey diitalal hakacy indiy ni biiyij bindiy ni waakady wiibangat bu balund hamut a kwiibangatey bu bahik. (Jah 15:15) Waakady cikwaabw mwiiboowosh mwanz ku makas bwa kwiibalongweesh bwa biikal ni kwiihweekesh. (Jah 13:5, 12-14) Tut byeet  tuloolong bilengel ha twangangat batukaakal naabw mudimw ni buseeb ha kulek kuteek teng myand yiitut kuuhal kwa yaababw. ‘Hatuneeneemekangan,’ katwiin teng tukaam bwa bakwaabw biitutumbish, ki tudy bakat kulong myand yivul bwa kuneemek bakwaabw.​—Rom 12:10.

Cikwaabw, mwiin kwiihweekesh i mumanyik neey: bwa kukumbajey bwaal “teng waakalombok meej kudy baat bubw bwaalongek.” (Tus. 15:22) Ning mutudy ni mamany eecy biheel kahand, bikaam tumanyik neey: kakwiishoh bend muut udy mumanyik myand yoos. Ning Yeez waakady mujaadik neey: kaakady mumanyik myand yoos. (Mat. 24:36) Cikwaabw, waakady wiimanyin teng ha myand yilengel eecy meej byaakady naaby biiyij bindiy ning mwaakadyobw kabay bawaakan. (Mat. 16:13-16) Ki bwabiny baakadyey ukal naabw mudimw, baakady bumvw bilengel haakadyobw nend! Bya mushind aakaabumw, hatumaamanyik mikal yiitut ni kwiihweekesh ni twiitab bwa bakwaabw biitwambulwiish, twiiyiiy kushikat naabw talal, tut bakaamok meej kudy baat bakwaabw, bwaal butudy balang bwa kukumbaj bwiiyiiy ‘bulongek.’

I bya buseeb bwa bakul kwiidikij Yeez hadyobw baneemek badyobw bakal naabw mudimw haakaabumw. Bikaam bavuluk neey: spirit mujilang udy mwa kusak umw wa ku bakul bwa kutwaaley lungeny lulengel ludy mwa kwiibambulwiish bwa kwangatobw diihangadik dilengel. Bab biikal mu bisangil byaabab, bikaam balam diitalal hiisaasambobw, bwa mukul woos iikal mwiilekelel hatwaatwaaley meej madyey naam, bab boos, bady mwa kwangat mahangadik malengel mady mwa kwambulwiish cisumbw cyoos.

Mukal a mudimw mulengel udy mwa kuleej mudyey mutalal myand hadyey ukal mudimw ni bakwaabw bilengel. Umvumvwiil bakwaabw ni ulong cidyobw bamwambil. Yeez waakady mumanyik biin-biin mwaakady Taat indiy utal myand. Cileejel, Yehow waakady mumutum ha bulab bwa kukuuley baat ku cibaw cya lufw cyaakady cibakumbanyin.—Jah 3:16.

Yeez waakady ukooyel haakadyey utal neey: bidy ni buseeb eecy i bikumban bwa kulong nook. Vuluk mwaakadyey mwambulwiish mwaan-mukaj wa ku Fenisih, ning mwaakadyobw bamutum teng bwa Biin Izaleel. (Mat. 15:22-28) Uleejel cikwaabw mwaakadyey mutalal myand bwa myand yaakadyey ukaam bwa biiyij bindiy balong. Haanyim ha mulund nend wa ha micim Pyeel mumam kumutun kuuhal kwa baat boos, Yeez waakady habwiih bwa kumufwiil lus. Hahicil mafuk, wiiyiil kumuteekel micim hakumwaakishey majit matam. (Luuk 22:32; Jah 21:17; Yil. 2:14; 8:14-17; 10:44, 45) Cileejel cya Yeez cituleeleej hatook neey: tudy ni diibanz dya kwiikal baat “batalal myand kuuhal kwa baat boos” hatukookooyel.​—Fili. 4:5.

 Kwiikal batalal myand kwiiyiiy kwiitusak cikwaabw bwa kwiibidilangan bwa kukal mudimw haakaabumw mu mushind mulengel ni baat ba mitah yoos. Yeez waakady ulongel baat baakadyey naabw myand yilengel, i bwiin kuleeb neey: balwiish bindiy ba mukaw bamufundilomw neey: “i mulund nend a balambwiish ba bitady ni biin myand yibiih” baakady bakun mat ku musah indiy. (Mat. 11:19) Teng bu Yeez, tudyok mwa kwiikal ni musangal a kukal mudimw haakaabumw ni bakwaabw eeny? Mwiin-kweet mwaan-mulum Louis, udy muhitij diib dindiy divul mu mudimw a kulombol bijeng ni ha kukal mudimw ku Betel haakaabumw ni baat ba byaab bishil-shilangan, uleeleeb neey: “Natwaadijil kufwanyikij cisumbw cyoos cya baat cinaakady nakal nacy mudimw ni ciman cidy ciibak ni mabw mashil-shilangan. Hakulongolol mabw makwaabw bwa kwiimateek bilengel, wiiyiiy kutal mudy ciman cilulat. Bya mushind aakaabumw, nady mwiikashishomw bwa kulongolol mushind a kulong myand bwa kushikat talal ni bakwaabw.” Kulong nook i kulengel!

I diib kaay ditudy mwa kuleej neey: tukaakal mudimw haakaabumw ni biin-kweet mu cisumbw? Tudy ni mushind a kulong nook hatudy mu kasumbw kiitut ka mudimw a kudiil baat musah. Tudy mwa kukal mudimw haakaabumw ni bakajaady bady mu bisak bishil-shilangan eecy ba mivw yishil-shilangan. Tudyok mwa kwiikashish ha kwiikal batalal myand bwa kulongolol mushind iitut a kwiibambulwiish bwa biikal ni musangal bwa kuhatulobw bihet bilengel mu mudimw a bukajaady eeny?

Mukal a mudimw neet mulengel ‘waabaabanyangan ni bakwaabw.’ (1 Tim. 6:18) Ning haakady Yeez ukal mudimw haakaabumw ni Taat indiy, Kaleebeloh bend neey: Yehow waakady musokok myand kahand. Diib dyaakady Yehow ‘muteek diiwul,’ Yeez ‘waakadyok’ ni waakady mwa kulongel myand yivul kudyey. (Tus. 8:27) Hahicil mafuk, Yeez waakady wambil biiyij bindiy ‘myand yoos [yaakadyobw] bamwambil’ kudy Taat indiy ni musangal. (Jah 15:15) Ni cileejel eecy mu meej, bikaam twiikal twambil biin-kweet baan-balum ni baan-bakaj batukaakal naabw mudimw haakaabumw myand yitudy balong ni dimany ditudy naady. Biin-biin, mukal a mudimw mulengel kiin mwa kulekoh bend kwambil bakwaabw myand yikaakaamobw eecy yidy mwa kwiibambulwiish. Wiikaakal ni musangal hadyey wambil bakwaabw myand yilengel yidyey mulong.

Cikwaabw, tudy mwa kukashish biin-kweet batukaakal naabw mudimw haakaabumw. Hady muut utal kwiikashishomw kwiitut ni wiitufwiijok ni mucim woos bwa myand yituloolong, katwiin mwa kumvwok musangal eeny? Yeez waakady wangat diib bwa kwambil baakady bakal nend mudimw myand yilengel yaakadyey utal kudyobw. (Fwanyikij ni yidy mu Matewus 25:19-23; Luuk 10:17-20.) Wiibambiil cikwaabw neey: biiyiiy “kulong ni myand yitam yihitok yiineey.” (Jah 14:12) Bufuk bwa muladil a kufw kwindiy, ukashishil bapostol bindiy ba lulamat, wiibambiil neey: “Nun nwaakadyaay teng naany mu mal maam moos.” (Luuk 22:28) Lang ket bwa mwaakady may aam mwa kuteng micim yaabab ni kwiibasak bwa kulongobw bwaal! Tut tufwiijok biin-kweet batukaakal naabw mudimw, biiyiiy kwiikal biin-biin ni musangal ni biiyiiy kuhatul bihet bilengel mu mudimw aabab.

Mwiin-kweet Kayode uleeleeb neey: “Kabiin bilomb neey: mukal a mudimw neet mulengel iikal teng muut muwaakan, “ki uloolong bwa bakwaabw biikal ni musangal ni wiibaheehejelok myand.” Udy mwiin mudimw neet wa mushind oow eeny? Misang yikwaabw udy mwa kwiihangujok baan-been bakwaabw baan-balum ni baan-bakaj bwa bakwambil ciwudy. Bab biikal ni musangal a kukal neeb mudimw, teng bu mwaakady biiyij ba Yeez biikal ni musangal haakadyobw bakal nend mudimw, udy mwa kuleeb bu mupostol Pool neey: ‘Tudy bakal ba mudimw neen haakaabumw bwa mwaaby iinun.’​—2 Kor. 1:24.