Yesu mw’igha emibere, eyo enyuma waho iniane okwa kihugho muyaleka iniabya ky’erileberyako ekyuwene eky’oyukakolongana ndeke n’abakoli balikyabu. Eky’erileberyako kya Yesu kyanga thughasira kithi? Omw’ilebya ndeke eky’erileberyako kiwe, thwangana lhangira emisingyi isathu eyanga thuwathikya erikolongana ndeke n’abakoli balikyethu. Emisingyi eyi yikendi thuthokesya eribya n’omuthima w’obughuma n’ow’erikolongana.

Oyukakolongana ndeke n’abakoli balikyabu, omw’iyikehya akabalhangira mw’ab’obughuli kandi syali yihalisaya. Omubere w’eriyikehya oyo ni kindu ekya Yesu ighira oku Thatha wiwe. Nomwakine indi Yehova musa yutholere eryahulhwamu Omuhangiki, mwanza n’abandi baminye olhukwamirwa lhwa Mughalha wiwe kandi omukoli mulikyabu. Ekyo thukakilhangira omwa binywe bya Nyamuhanga bino: ‘Thuhangike omundu omo kisosekanio kyethu.’ (Enz. 1:26) Ekyo kyangabya imukyaleka Yesu inialhangira eriyikehya lya Yehova.​—Esy. 18:35.

Iniane okwa kihugho, Yesu mwakangania eriyikehya ng’eryo. Abere akapipwa busana n’eby’akolha, mwanza olhukengerwa lhughendere Oyutholerelho. (Mk. 10:17, 18; Yn. 7:15, 16) Yesu mwakolha kutsibu eribya buholho n’abigha biwe kandi mw’abathwalha ng’abanywani biwe butsira bakobe. (Yn.  15:15) Nibya mwanabya ebisandu byabu eribakangirirya erisomo ly’eriyikehya. (Yn. 13:5, 12-14) Nethu kuthya thutholere thwalhangira abakoli balikyethu mw’ab’obughuli omwakanya k’erihira ebiyithawa byethu by’embere okwa byabu. ‘Thwamakengana’ n’erithendi tsomana oyukendi pipwa nga nindi, ini bingyi ebikendi kolhwa.​—Abar. 12:10.

Kandi oyuyikehirye akaminya ngoku “omwa bungyi bw’abahani ebindu bikakoleka.” (Emi. 15:22) Mbulha thwasi bingyi kutse thuwithe amaaka, thutholere ithwibuka ngoku sihali oyuwasi obuli kindu. Na Yesu nayu mwaligha ngoku hane eby’athasi. (Mt. 24:36) Kandi mwanza eriminya ebyo abigha biwe abathahikene basi kutse amalengekania wabu. (Mt. 16:13-16) Kwesi ky’ekyaleka abo abya akakolha nabu ibayowa buholho eribya nayu! Kuthya, omw’iyikehya thukabya thuk’ibuka erilemererwa lyethu n’erilighira abandi erihayo ebirengekanio byabu, thukaleka ihabya obuholho, kandi ithwe bosi haghuma ikyaleka ‘ebindu ibyakoleka.’

Kwilhabirirya ni kikulhu abasyakulhu erigherererya Yesu omw’eki bakakolha haghuma. Batholere ibibuka ngoku omulimu abuyirire angana kolesya omusyakulhu wosi-wosi okwa kathunga kabu. Omwa mihindano yabu, abasyakulhu bamalengaho erihiraho emibere eyangaleka obuli mundu iniayowa buholho erihayo ekirengekanio kiwe, abosi haghuma ibakendi thwamu ebikendi ghasira ekithunga kyosi.

Oyukakolongana ndeke n’abakoli balikyabu akakanganaya eriyibombeka [obuyitheghererya] akakolongana nabu. Syali mayirira ekiwe mughulhu wosi. Ahathe erithika-thika Yesu aby’awithe highisa hingyi hy’eriyilhangirira obuyitheghererya bwa Thatha wiwe. Ng’eky’erileberyako, Yehova mwamuthuma eryasa lhamya abandu okwa lhubanza lhw’olhuholho olhwa babya batholere.​—Yn. 3:16.

Yesu iniakanahindulha amalengekania kikayithayisibawa kutse kyamatholera. Wibuke ngoku mwawathikya omukali Omukanana, nomwakine indi athumawa okwa nyumba ye Israeli. (Mt. 15:22-28) Kandi mwakangania obuyitheghererya bikahika okwa by’aby’anzire bigha biwe ibakolha. Munywani wiwe w’okwa ndungu ya Petero abere abirimughana embere sy’abandu, Yesu abya inianayitheghekire erimughanyira. Enyuma waho, mwaha Petero y’esyongwamirwa esirithohire. (Lk. 22:32; Yn. 21:17; Emib. 2:14; 8:14-17; 10:44, 45) Eky’erileberyako kya Yesu kikathukanganaya ndeke-ndeke ngoku thutholere ‘ithwaminyikalya eriyibombeka lyethu okwa abandu abosi’ omw’ibya ithwangana hindulha amalengekania.​—Fil. 4:5.

 Kandi obuyitheghererya bukendi leka ithwaghenda-ghendania n’emibere eyiriho nuku thuthoke erikolha omwa bughuma n’abandu b’emisindo yosi. Yesu mwakolongana ndeke nabo abya nabu kyamaleka esyonzighu siwe sy’erihale isyamutsweba sithi ni “mwira w’abasolesya n’abakolha-nabi” abahulikirira omwatsi wiwe. (Mt. 11:19) Mbwino, nethu nga Yesu, thwangana thoka erikolongana ndeke n’abandi? Louis mughalha wethu oyumabirighunza myaka mingyi inianemukolha n’abandu abalhuire omwa mibere muthina-muthina ng’omulebererya w’omuthimbo kandi n’okwa Beteli, akabugha athi: “Nabirilengaho erilinganisya obuli bandu abanga kolha nabu ng’olhuhimbo olhuhimbire omwa mabwe aw’emikwikire muthina-muthina. Eribindulikania emithondere y’awandi mabwe, mwanganalhua olhuhimbo olhuterekerere. Kandi naghe nabiriIengaho erikolha esyombinduka nuku olhuhimbo lhubye ilhunaterekerere.” Oyu ka ni mubere owuwene!

Ni mughulhu wahi thwanga kangania omuthima w’erikolongana n’abandi omwa kithunga kyethu? Thuwithe akaghisa k’erikolha ekyo omughulhu thuli haghuma n’egurupu yethu y’eriyathulira. Thwangana kolha n’abathuliri abawithe esyongwamirwa muthina-muthina esy’amaka kw’ithulhaba kutse ab’emyaka eyithasosene. Mbwino thwangana lengaho eribya n’obuyitheghererya omw’ihindulha esipidi kutse emibere y’erithuliramu eribawathikya eryongera eritsemera omubiiri w’erithulira?

Oyukakolongana ndeke n’abakoli balikyabu ‘akasangira ebindu biwe n’abandi.’ (1 Tim. 6:18) Yesu inianemukolha na Thatha wiwe, atholere eribya imwalhangira ngoku Yehova syali mubisa kindu. Omughulhu Yehova “asingika amathuku,” Yesu abya inianeho kandi mwamwighirako. (Emi. 8:27) Enyuma waho, Yesu iyuwene-wene mwatsema akabwira abigha biwe ‘emyatsi eyo owa’ oku Thatha wiwe. (Yn. 15:15) Eky’erileberyako ekyo kine omwa bulengekania, nethu thutholere ithwabya ithunayitheghekire eribwira abakoli balikyethu okwa bya thwasi. Ahathe erithika-thika, oyukakolongana ndeke n’abakoli balikyabu, syali ghana eribabwira omwatsi owakayithaghisibawa kutse owanga wathikya habw’erianza eribathabalhako. Akatsema akabwira abandi okwa bibuya eby’abir’igha.

Kandi thwangana hira omwa bakoli balikyethu mw’omuhwa. Mbwino si thuli tsema omundu akalhangira akaghalha ako thukahiraho n’erikangania erisima liwe erikalhua okwa muthima? Yesu mwahiraho obuthuku bw’eribwira abakoli balikyabu ebibuya ebyo abalhangiramo. (Thasyalebaya na Matayo 25:19-23; Luka 10:17-20.) Kandi nibya mwababwira athi ‘banga kolire emibiiri eyirengire’ eyiwe. (Yn. 14:12) Omw’ithumbi athali aholha, mwasingya abakwenda biwe abathaleghulha athi: “Inywe muli ababirinyihanganira omw’irengwako lyaghe.” (Lk. 22:28) Thathera akasasani ebinywe biwe ebyo nga bitholere eribya imubyahamba bungahi okwa mithima yabu n’erileka ibayira ekyo bakakolha! Nethu thwamahiraho obuthuku bw’erisima abakoli balikyethu, ahathe erithika-thika, ibakendyongera eritsema kandi obundi ibongera erikolha bingyi.

Mughalha wethu Kayode akabugha athi, “Oyukakolongana ndeke n’abakoli balikyabu syali yithagha eribya iniahikene aliwe akabya inianatsemire n’erileka omubiiri abolhobere.” Wune mukoli ng’oyo? Busana naki iwuthabulya abaghuma b’okwa Bakristayo abawukakolha nabu erikubwira nga wuli mukoli oyuli athi? Bamabya ibakatsema erikolha haghuma nawu, ngoku abigha ba Yesu babya bakatsema erikolha haghuma nayu, iwangana bugha ng’omukwenda Paulo wuthi: “Thwanzire erikolha haghuma nenyu, n’eribaha obutseme.”​—2 Kor. 1:24.