Kimye kyo ajinga mwiulu, Yesu wafunjile byubilo byawama byamukwashishe kwingila bulongo na bantu bo aingijilenga nabo kimye kyo aishile pano pa ntanda. Twakonsha kufunjilako ka ku byaubile Yesu? Kwisamba pa byo aubile kwitukwasha kuyuka mafunde asatu amukwashishe kwingila bulongo na bakwabo. Ano mafunde asakwitukwasha kukwatankana na balongo.

Muntu wingila bulongo na bakwabo wipelula ne kunemeka bakwabo kabiji kechi ulanguluka’mba wanema kukila bakwabo ne. Yesu wafunjile kwipelula kwi Shanji. Nangwa kya kuba Yehoba ye yenka utelwa’mba Mulenga, bino wakebelenga bantu kuyuka mwingilo wanema Mwananji ye aingijile. Twayuka bino kupichila mu byambo byaambile Lesa amba: “Tulenge muntu mu kipasha kyetu.” (Nte. 1:26) Abino byambo byafwainwa byalengejile Yesu kuyuka’mba Yehoba wipelula.—Sala. 18:35.

Yesu byo ajinga pano pa ntanda, wamwesheshe kyubilo kya kwipelula kijipo na Shanji. Bantu byo bamutakaikilenga pa bintu byo aubilenga, aye wapainenga munema kwi Lesa. (Mako 10:17, 18; Yoa. 7:15, 16) Yesu waikele mu mutende na baana banji ba bwanga kabiji wibamonanga amba balunda nanji kechi bazha ne. (Yoa. 15:15) Kabiji wibovwele ku maulu abo pa kuba’mba ebafunjishe kwipelula. (Yoa. 13:5, 12-14) Byonka  byaubile Yesu, ne atweba twafwainwa kunemeka bakwetu ba mu lwitabilo kechi kukeba’mba kimye kyonse betutotenga ne. Umvwe ke ‘tunemeke bakwetu’ ne kubula kukeba munema kwiya kwi atweba, tukakonsha kwingila mingilo yavula.—Loma 12:10.

Muntu wipelula uyuka’mba “paji babulañana maana bavula, bintu bilumbuluka.” (Maana 15:22) Nangwa kya kuba twayuka bintu byavula nangwa tuji na maana a kuba bintu, bino twafwainwa kuyuka’mba kafwako muntu wayuka byonse ne. Nangwatu Yesu wayukile kuba’mba kwajinga bintu byo abujile kuyuka. (Mat. 24:36) Kabiji Yesu watele muchima pa bintu byayukile baana banji ba bwanga bambulwa kulumbuluka nangwa byo balangulukanga. (Mat. 16:13-16) Akino kyo kyalengejile bantu bo aingilanga nabo kukasuluka. Kyo kimotu ne atweba, umvwe twipelula ne kuyuka’mba kuji bintu byo twabula kuyuka, ne kuteleka milanguluko ya bakwetu, tukekala mu mutende na bakwetu ne bintu byo tukobanga “bikalumbuluka.”

Kyanema bingi bakulumpe mu kipwilo kulondela Yesu kimye kyo bengijila pamo na bakwabo bakulumpe. Bafwainwa kuvulukanga kuba’mba mupashi wazhila wakonsha kulengela mukulumpe umo kwamba byambo byakonsha kukwasha jibumba ja bakulumpe mu kipwilo kufuukula bintu byawama. Umvwe kimye bakulumpe mu kipwilo kyo basambakana pamo na kwisamba ke balengele mukulumpe yense kukasuluka kwamba milanguluko yanji, bakafuukula bintu bikakwasha kipwilo kyonse.

Muntu wingila bulongo na bakwabo wikala wakooka muchima kimye kyo engila na bakwabo. Kechi ukebatu byonka byamuwamina ne. Yesu bimye byavula wamwenenga Shanji byo amweshanga kukooka muchima. Yehoba watumine Mwananji kwiya na kupokolola bantu bafwainwe kufwa.—Yoa. 3:16.

Inge kyakebewa, Yesu kechi wauminangatu pa bintu byo akebanga ne. Vulukai byo akwashishe mwanamukazhi mwina Fenesha, nangwa kya kuba bamutumine ku kisaka kya Isalela. (Mat. 15:22-28) Wamweshanga kukooka muchima pa bintu byaubanga baana banji ba bwanga. Mulunda nanji aye Petelo byo amukaine pa mvula bantu, Yesu waswile kumulekelako mambo. Mu kuya kwa kimye, wapele Petelo mingilo yavula. (Luka 22:32; Yoa. 21:17; Byu. 2:14; 8:14-17; 10:44, 45) Byaubile Yesu bitumwesha kuba’mba twafwainwa kuleka ‘kukooka muchima kwetu kuyukanyikwa ku  bantu bonse’ kupichila mu kubula kukosela pa kintu kimo.—Fili. 4:5.

Kabiji kwikala bakooka muchima kuketukwasha kwingila mu mutende na bantu bonse. Yesu waubilanga byawama bantu bo atanwanga nabo kya kuba balwanyi banji bamupelengamo mambo a kuba’mba “mulunda wa basonkeshi ne bandengamambo,” bantu bonka batambwijile byambo byanji. (Mat. 11:19) Nanchi ne atweba twakonsha kwingila bulongo na bantu bapusana-pusana nyi? Mulongo Louis waingijile kimye kyabaya na bantu bafuma mu bisho byapusana-pusana mu mwingilo wa mu mwanzo ne pa Betele waambile’mba: “Kikebewa kwibikako pa kuba’mba twingile bulongo na bakwetu mambo bonse twibambulwa kulumbuluka. Bino inge twipelula ne kubula kukosela pa kintu kyo tukeba, twakonsha kwingila bulongo mwingilo wetu. Nebikako kupimpulako byubilo byami pa kuba’mba twingilenga mu mutende na bakwetu, kabiji kino kilengela mwingilo kwenda bulongo.” Uno ye muchima ye twafwainwa kwikala nanji.

Ñanyi kimye kyo twakonsha kumwesha muchima wakooka mu kipwilo kyetu? Twakonsha kuba bino kimye kyo tusambakana ku jibumba jetu ja mwingilo. Twakonsha kwingila na basapwishi baji na mingilo ya mu kisemi yapusana na yo tuji nayo nangwa ba jifumbi japusana na jetu. Nanchi twakonsha kumwesha kukooka muchima kupichila mu kupimpulako jishinda jo twingijilamo mwingilo pa kuba’mba twingile busapwishi bo batemwa pa kuba’mba bekale na lusekelo mu mwingilo nyi?

Muntu wingila bulongo na bakwabo ‘winengezha kukwashañana.’ (1 Timo. 6:18) Kimye kyo aingijilenga pamo ne Shanji, Yesu wafwainwa wamwene’mba Yehoba kechi wamufilengapo kintu ne. Yehoba kimye kyo “anengezhezhenga jiulu” Yesu ‘wajinga konka’ kabiji wafunjilenga ne kwi aye. (Maana 8:27) Byo papichile kimye, Yesu wafunjisheko ne baana banji ba bwanga “bintu byo [aumvwine]” kwi Shanji. (Yoa. 15:15) Twakonsha kulondela Yehoba kupichila mu kubuulako balongo ne banyenga bintu byo twafunda ne byo twapitamo. Kwambatu kine, muntu wingila bulongo na bakwabo kechi ukana kubuulako bakwabo bintu byo ayuka pa kuba’mba ebatangijilengatu bakwabo ne. Aye usekela mu kubuulako bakwabo bintu byawama byo afunda.

Twakonsha kubuulako bakwetu ba mwingilo umo ne atweba byambo bya lutundaiko. Umvwe mukwetu wamona byo tubena kwingila na ngovu ne kwitusanchila, nanchi kechi tumvwa bulongo nenyi? Yesu waikalangapo na kimye kya kubuula bakwabo mo baingijilanga mwingilo bintu byawama byo baubanga byo amonanga. (Esakanyaiko Mateo 25:19-23; Luka 10:17-20.) Kabiji wibabuujile ne kuba’mba “[bakengila] mingilo yakila” pa yo aingijile. (Yoa. 14:12) Bufuku bwapeleleko saka bakyangye kumwipaya, wabuujile batumwa banji ba kishinka amba: “Yenu mwatwajijila kwikala pamo ne amiwa mu makatazho ami.” (Luka 22:28) Fwanyikizhai bino byambo byanji byo bibatundaikile ne kwibalengela kwingila na mukoyo. Ne atweba inge ketwikalepo na kimye kya kusanchila bakwetu mo twingijila mwingilo umo, bakekala na lusekelo kabiji bakengilanga bulongo.

Mulongo wa jizhina ja Kayode waambile’mba: “Muntu wingila bulongo na bakwabo kechi wafwainwa kwikala muntu waoloka ne. Pano bino, ulengela bakwabo mo bengijila kusangalala ne kulengela mwingilo kupeela.” Nanchi byo byo muji nyi? Kampe mwakonsha kwipuzha bakwenu bena Kilishitu bamo bo mwingila nabo kwimubuulako byo muji. Inge beyowa kwingijila pamo ne anweba, byonkatu baana ba bwanga byo beyowanga kwingila ne Yesu, ne anweba mwakonsha kwamba byonka byaambile mutumwa Paulo amba: “Twi ba mwingilo umo ne anweba kuba’mba mwikale na lusekelo.”—2 Ko. 1:24.