We Jizɔs bin de na ɛvin, i lan di kwaliti dɛn we bin mek i bi pɔsin we ebul wok fayn wit ɔda pipul dɛn. Dɔn, we i bin de na di wɔl, in na bin pafɛkt ɛgzampul ɔf pɔsin we de wok fayn wit ɔda pipul dɛn. Aw wi go bɛnifit frɔm Jizɔs in ɛgzampul? We wi tek tɛm stɔdi in ɛgzampul, wi go fɛn tri prinsipul dɛn we go ɛp wi fɔ wok fayn wit ɔda pipul dɛn. Dɛn prinsipul dɛn ya go ɛp wi fɔ gɛt wanwɔd mɔ wit wi brɔda ɛn sista dɛn.

Pɔsin we de wok fayn wit ɔda pipul dɛn de put insɛf dɔŋ. I valyu in kɔmpin wokman dɛn, ɛn i nɔ de tray fɔ sho-ɔf. Jizɔs bin lan frɔm in Papa aw fɔ put insɛf dɔŋ da we de. Pan ɔl we na Jiova nɔmɔ fit fɔ gɛt di taytul, di Wan we mek ɔltin, i bin want fɔ mek ɔda pipul dɛn no bɔt di impɔtant wok we in Pikin bin du. Wi si we i du dat bay we i bin se: “Lɛ wi mek mɔtalman we go tan lɛkɛ wi.” (Jɛn. 1:​26) We Jiova bin tɔk dɛn wɔd dɛn de, dat mek Jizɔs kam fɔ no se Jiova rili ɔmbul.—Sam 18:​35.

We Jizɔs bin de na di wɔl, insɛf bin sho se i ɔmbul. We pipul dɛn bin de prez am fɔ di tin dɛn we i bin de du, i bin de gi di prez to di Wan we fit fɔ gɛt am. (Mak 10:​17, 18; Jɔn 7:​15, 16) Jizɔs bin de tray fɔ mek pis kɔntinyu fɔ de bitwin in ɛn in disaypul dɛn, ɛn bifo i trit dɛn lɛk slev dɛn, i bin de trit  dɛn lɛk in padi dɛn. (Jɔn 15:​15) I bin ivin was dɛn fut dɛn fɔ tich dɛn se dɛn fɔ ɔmbul. (Jɔn 13:​5, 12-14) Lɛk Jizɔs, wi nɔ fɔ put wetin wi want bifo wetin wi kɔmpin wokman dɛn want, bɔt wi fɔ valyu dɛn. We wi “sho ɔnɔ to [wi] kɔmpin dɛn” ɛn nɔ wɔri bɔt udat go gɛt di prez, wi go ebul fɔ du mɔ tin dɛn.—Rom. 12:​10.

Ɔmbul pɔsin no se “if yu gɛt bɔku advays, bɛtɛ go fala yu.” (Prɔv. 15:​22) Ilɛk us ɛkspiriɛns wi gɛt ɔ wetin wi sabi du, wi fɔ mɛmba se no mɔtalman nɔ de we no ɔltin. Ivin Jizɔs bin tɔk se tin dɛn de we i nɔ no. (Mat. 24:​36) Dɔn bak, pan ɔl we in disaypul dɛn nɔ bin pafɛkt, i bin want fɔ no wetin dɛn tink bɔt sɔntin. (Mat. 16:​13-16) Na dat mek in kɔmpin wokman dɛn bin de fil fayn we dɛn de arawnd am. Semweso, we wi ɔmbul ɛn mɛmba se wi nɔ no ɔltin, ɛn we wi de lisin to wetin ɔda pipul dɛn tink, wi de ɛp fɔ mek pis kɔntinyu fɔ de, ɛn “bɛtɛ go fala [wi].”

I impɔtant mɔ fɔ ɛlda dɛn fɔ falamakata di we aw Jizɔs bin ɔmbul we dɛn de wok togɛda. Dɛn nid fɔ mɛmba se oli spirit kin ɛp ɛni wan pan di ɛlda dɛn fɔ se sɔntin we go ɛp fɔ mek dɛn ebul fɔ disayd fɔ du di rayt tin. We ɛlda dɛn gɛt mitin, if dɛn tray fɔ mek shɔ se ɔlman fil fri fɔ tɔk wetin i tink, dɛn go ebul fɔ disayd fɔ du sɔntin we go bɛnifit di wan ol kɔngrigeshɔn.

Pɔsin we de wok fayn wit ɔda pipul dɛn nɔ de pin pan sɔntin. I kin ajɔst ɛn gri wit wetin in kɔmpin wokman dɛn se. Jizɔs bin gɛt fayn chans dɛn fɔ si aw in Papa nɔ de pin. Fɔ ɛgzampul, Jiova bin sɛn am fɔ sev mɔtalman frɔm sin ɛn day, pan ɔl we dɛn bin fit fɔ day.—Jɔn 3:​16.

Jizɔs bin de gri wit wetin ɔda pipul dɛn se we rizin de fɔ du so ɔ we i fayn fɔ du so. Mɛmba aw i bin ɛp wan Fonishian uman, pan ɔl we na to di Izrɛlayt dɛn Gɔd bin sɛn am. (Mat. 15:​22-28) Dɔn bak, i nɔ bin de ɛkspɛkt tumɔs frɔm in disaypul dɛn. Afta in tayt padi we na Pita bin dinay am na pɔblik, Jizɔs bin rɛdi fɔ fɔgiv am. Leta, i bin gi Pita impɔtant wok dɛn fɔ du. (Lyuk 22:​32; Jɔn 21:​17; Akt 2:​14; 8:​14-17; 10:​44, 45) Jizɔs in ɛgzampul sho wi klia wan se wi fɔ mek “ɔlman no se [wi]  nɔ de pin pan sɔntin” bay we wi de gri wit wetin ɔda pipul dɛn se.—Fil. 4:​5.

If wi na pɔsin we nɔ de pin, dat go ɛp wi bak fɔ ajɔst wisɛf so dat wi go wok pisful wan wit ɔlkayn pipul dɛn. Bikɔs Jizɔs bin rili trit pipul dɛn fayn, dat bin mek in ɛnimi dɛn we de jɛlɔs am tɔk se in na padi to “sina dɛn ɛn pipul dɛn we de gɛda taks” we bin lisin to in mɛsej. (Mat. 11:​19) Lɛk Jizɔs, wi go ebul fɔ wok fayn wit pipul dɛn we difrɛn frɔm wi? Luis, we na wan brɔda we bin wok wit bɔku difrɛn pipul dɛn na di sakit wok ɛn Bɛtɛl, tɔk se: “A kin tray fɔ kɔmpia ɔlman we a de wok wit to wɔl we dɛn bil wit ston dɛn we gɛt difrɛn sayz dɛn. We yu ajɔst di say dɛn we yu de put sɔm pan di ston dɛn, dat go mek yu ɛnd-ɔp fɔ gɛt stret wɔl. A dɔn tray fɔ ajɔst misɛf so dat a go wok fayn wit ɔda pipul dɛn.” Dat na fayn tin fɔ du!

Ustɛm wi go sho se wi nɔ de pin we wi de wit di brɔda ɛn sista dɛn na wi kɔngrigeshɔn? Wi gɛt di chans fɔ du dat we wi de wit wi fil savis grup. Sɔntɛm wi go wok wit pɔblisha dɛn we gɛt wok na dɛn famili we difrɛn frɔm wi yon ɔ we gɛt difrɛn ej. Wi go ebul ajɔst wisɛf ɔ rɛdi fɔ prich di we aw dɛn want so dat dɛn go ɛnjɔy di prichin wok mɔ ɛn mɔ?

Pɔsin we de wok fayn wit ɔda pipul dɛn “rɛdi fɔ sheb.” (1 Tim. 6:​18) We Jizɔs bin de wok wit in Papa, i go dɔn si se I nɔ bin de ayd tin dɛn pan am. We Jiova bin “mek” di ɛvin, Jizɔs ‘bin de de’ ɛn i bin ebul lan frɔm am. (Prɔv. 8:​27) Leta, Jizɔs insɛf bin gladi fɔ tɛl in disaypul dɛn “di tin dɛn we [i bin] yɛri” frɔm in Papa. (Jɔn 15:​15) Wi kin falamakata Jiova in ɛgzampul bay we wi de tɛl wi brɔda ɛn sista dɛn di tin dɛn we wi dɔn lan. Pɔsin we de wok fayn wit ɔda pipul dɛn nɔ de ayd tin dɛn we dɛn nid fɔ no ɔ we go ɛp dɛn, jɔs fɔ mek i kɔntinyu fɔ kɔntrol dɛn. I de gladi fɔ tɛl ɔda pipul dɛn di gud tin dɛn we i dɔn lan.

Wan ɔda tin we wi kin du na fɔ ɛnkɔrej wi kɔmpin wokman dɛn. Wi kin rili gladi we pɔsin notis di wok we wi de du ɛn tɛl wi tɛnki wit ɔl in at, nɔto so? Jizɔs bin de tɛl in kɔmpin wokman dɛn bɔt di gud tin dɛn we dɛn bin de du. (Luk Matyu 25:​19-23; Lyuk 10:​17-20.) I bin ivin tɛl dɛn se dɛn go “du tin dɛn we pas” in yon. (Jɔn 14:​12) Di nɛt bifo i day, i bin tɛl in fetful disaypul dɛn se: “Na una dɔn de wit mi we a de sɔfa.” (Lyuk 22:​28) Imajin aw in wɔd dɛn go dɔn tɔch dɛn at ɛn muv dɛn fɔ du sɔntin! If wisɛf sho se wi gladi fɔ di wok we wi kɔmpin wokman dɛn de du, fɔ tru, dɛn go gladi ɛn kɔntinyu fɔ du mɔ gud wok.

Wan brɔda we nem Kayɔdɛ bin tɔk se, “Pɔsin we de wok fayn wit ɔda pipul dɛn, nɔto pɔsin we pafɛkt, bɔt i de mek di wan dɛn we de wok wit am gladi ɛn ɛnjɔy di wok.” Yu na da kayn wokman de? Sɔntɛm yu kin aks sɔm pan yu brɔda ɛn sista dɛn bɔt uskayn wokman dɛn tink se yu bi. If dɛn de ɛnjɔy fɔ wok wit yu lɛk aw Jizɔs in disaypul dɛn bin de ɛnjɔy fɔ wok wit am, yu go tɔk di sem tin we apɔsul Pɔl bin se: “Wi na una kɔmpin wokman dɛn fɔ mek una gɛt gladi-at.”—2 Kɔr. 1:​24.