O wali nda wa tosaa latulu wo niŋ, mi Chiisu pɛɛku suliŋnda mala ndu mbo huŋ tosa wallo a acheleŋnda o chieeŋndo choo wo. Tɔnɔɔ yɛɛ naŋ sɔla yɛ o tamasi ndɔɔ niŋ? Te ŋ yaasiaa pɛ tamasi ndɔɔ nyɛkɛndɛi, ŋ cho chɔ sawala mandaalaŋ la yaa la mala naa miŋ tosa wallo latulu a acheleŋnda wo. Sawala mandaalaŋ ndaŋ la cho naa mala miŋ wa o diompilɛ niŋ a wanaa naŋ cho wallo wa.

Wana waŋnda wa a kɔl kɛndɛ le wallo tosaa a ndu latulu wo nɔ mbo wa wana tusiaŋ, mbo che wanaa nda tosa wallo wa a sɔvɛ, nduyɛ o nɔ mbo chɔm maa o hiou nda sina le. Hei Chiisu ndoo pɛɛku Finya ndɔ o ba ni. Mi che bɛɛ Chɛhowa kinɛi naŋ veelu aa Wana Toosiaa ni, kɛ ndoo yeema mi waŋnda ndaa sina a wali sɔvɛ Po ndɔɔ ndoo tosa wo okɔɔ. Hei cho kpendekele o diomnda o dimilaŋ niŋ. Mbo dimi aa: “Ŋ toosiaŋ waŋnda chieeya maa velaŋ naa.” (Chɛ. 1:​26) O hei niŋ, mi Chiisu cha kpendekele maa Chɛhowa cho wana tusiaŋ.—Sam 18:​35.

Mɛɛ Chiisu hiŋ o chieeŋndo, mbo chɔm kpendekele maa wana tusiaŋndo o cho ni. Mɛɛ waŋnda wa ndu saŋgalaa le sɔɔŋ o wa tosaa woŋ, mbo dimul nda maa a saŋgala Mɛlɛka. (Maki 10:​17, 18; Chɔŋ 7:​15, 16) Mi Chiisu tosa wallo diompilɛ a buɛiyaa nduaa latulu o kɔl nyulu niŋ, nduyɛ o chue nda maa ŋchɛ le. O baa pilɔɔ choo, chaŋyɛi kpɛɛluŋnde wa nda tɛɛŋ.  (Chɔŋ 15:​15) Nduyɛ pɛŋ, mbo pulu nda peloŋ le nda pɛɛkoo ma wa wanaa tusiaŋnda. (Chɔŋ 13:​5, 12-14) Naa bɛɛ nɔ miŋ che wanaa naŋ tosa wallo wa a sɔvɛ, nduyɛ miŋ kɛsi yeemaŋ ndaŋ ŋ naŋ lachi. Te ŋ ke pɛ acheleŋnda bɛɛleŋ nduyɛ miŋ fafaŋ tosaa mi waŋnda saŋgala naa, keŋ mala naa miŋ sɔla batiuwaa.—Luomaŋ. 12:​10.

Wana tusiaŋndo sina vɛlɛ maa “tuula bɔɔ bɔɔ mi la tambu, le wana silaa lepɛŋndo.” (Pulɔ. 15:​22) Mɛɛ mɛɛ naŋ nɔ sinapɛŋgoo ɔɔ taasioo, ŋ nɔ miŋ loonuŋ maa wana o wana sina sɔɔŋ kpou le. Mi Chiisu dimi maa o cho sɔɔŋ kpou le o sina le. (Maa. 24:​36) Ndoo nɔ vɛlɛ yeemɛi o nyɛ buɛiyaa nduaa ndaa sina ɔɔ yiyaŋndo niŋ. (Maa. 16:​13-16) Hei chɔm sabu buɛiyaa nduaa ndaa wa a kɔl kɛndɛ le waa a ndu latulu wo. O nɛi pilɛ koŋ choo, te ŋ wa pɛ wanaa tusiaŋ, miŋ loonuŋ maa o cho sɔɔŋ kpou le naŋ sina le, nduyɛ miŋ yaŋ acheleŋnda nilaŋ, keŋ cho tosa mi kɔl nyuloo wa naa tɛɛŋ, miŋ tosa wallo o diompilɔɔ niŋ, nduyɛ mi “sɔɔŋ tuunuŋ le tosaŋndo woŋ, ŋ tosaŋ.”

I cho suɛi sɔvɛ le mi bɛnduaa kundaa tol tamasi Chiisu wo kɔɔli o nɛiyo hoo choo. A nɔ ma loonuŋ maa, nyina diandaa tiuba mbo tosa wallo a bɛndu kunda kɛ kɛ. Te o yɔŋ pɛ ma wa bɔŋaŋndo biyɔɔ, wana o wana nɔ mbo wa fɛɛsɛŋ le nyɛ o yiyaŋndo chɔmndo. Te o yɔŋ pɛ ma suukaŋ vellaa velle, keŋ cho nda mala ma tosa kɛɛsiaala chuu niŋ kundaa tɔnɔɔ laŋ.

Mi wana waŋnda wa a kɔl kɛndɛ le wallo a ndu latulu wo, yaŋ wanaa nda tosa wallo wa nilaŋ. O kindu isɔɔ dimul te, nduyɛ o beŋ yiyaŋ ndɔɔ le. Mi Chiisu cha teleŋnda bɔɔbɔɔ mɛɛ Finya ndɔ chɔm kaa hoo yɛ. Le tamaseliiyo, mi Chɛhowa yɔŋ ndu o chieeŋndo choo le mbo huŋ soli waŋnda chieeya o sendi piɔmndo bɛŋgu.—Chɔŋ 3:​16.

Mi Chiisu ndoo yaŋ acheleŋnda nilaŋ. Le tamaseliiyo, mi che bɛɛ o Isɔluɛiya lo Mɛlɛka ndoo vem ndu ni, kɛ a teleŋ pilɛ mɛɛ chua ndoo fula o tanda Foniisiaa wo niŋndo nyuna ndu le ndu malaa, mbo yaŋ ndu nilaŋ nduyɛ mbo mala ndu. (Maa. 15:​22-28) Mi ndoo chɔm vɛlɛ buɛiyaa nduaa sinapɛŋgoo. Mɛɛ chaaŋ ndɔ kpɛɛluŋndo Pitɛ viinuŋ ndu waŋnda o hɔl, o wa o bɛɛndiaŋ le ndu malɔɔ haki. Okoŋ kɔɔli, mbo ke Pitɛ kalaŋndaŋ tau. (Luku 22:​32; Chɔŋ 21:​17; Walta. 2:​14; 8:​14-17; 10:​44, 45) Tamasi Chiisu wo chɔm naa kpendekele maa, ŋ nɔ miŋ tosa mi ‘waŋnda kpou che maa, ŋ cho wanaa dimuluŋ isɔɔ.’—Filipi. 4:​5.

 Te ŋ wa pɛ wanaa dimuluŋ isɔɔ, keŋ cho naa nyindɔɔ miŋ tosa yɛlɛmiaalaŋ le halikpeŋ miŋ tosa wallo diompilɛ a acheleŋnda o kɔl nyulu niŋ. Mi Chiisu ndoo bii wana o wana nyɛkɛndɛi. Le hei, mi yaamɔɔwaa nduaa dimi pɛŋ maa, ‘chaaŋ o wanaa biyaa paawaa a wanaa lahakiaa’ a ndaa yaŋ ndu nilaŋ nda o wa ni. (Maa. 11:​19) Maa Chiisu, baa naa bɛɛ tiu pa ba miŋ sɔla batiuwaa le wallo tosaa o diompilɔɔ niŋ a acheleŋnda? Mi puaapilɛnɔ pilɛ diolaŋ Luis, tosa buɛile ibuŋgaleŋ vɛlɛ mbo tosa wallo o Bɛtɛɛl a waŋnda fulaa o kɔɔlima yɛ yiaŋ niŋ. Mbo dimi aa: “Mi tuu wanaa ya tosa wallo latulu wa a chiɛi nda taŋgul a kpilikiŋ yɛ yiɔɔŋ ndo. Kpilikiŋ muŋ hɛɛnduu wo o fondaŋnda yɛ yɛlaŋ tosa miŋ sɔla chiɛi kɛndɛ kɛndɔɔ. Mi kindiŋ le yɛlɛmiaalaŋ tosaa le halikpeŋ mi tosa wallo a acheleŋnda o diompilɔɔ niŋ.” Nuawɔ se kaa kɛndɛ bɛndu!

O nɛila kuɛɛ niŋ naŋ tosa yɛ wallo diompilɛ a acheleŋnda o kundala naalaŋ niŋ? Ŋ tosa hei te ŋ wa pɛ a kunda wali poli naa latulu. Miŋ kuɛ o wali pollo niŋ a wanaa dimiaa yooŋgu kɛndiaa nɔ kalaŋnda yɛ yɛlaŋ o yuŋgula ndalaŋ niŋnda. Nduyɛ a bɔɔbɔɔ, ŋ ve wɔsiŋ pilɛ le. Ŋ nɔ miŋ kindiŋ le yɛlɛmiaalaŋ tosaa le halikpeŋ mi wana naŋ cho lakɔ latulu wo tuei wali pollo yeela.

Wana waŋnda wa a kɔl kɛndɛ le wallo tosaa a ndu wo, cho lɔɔlɔɔ o bɛɛndiaŋ le chaaŋaa nduaa nyɛm o nɔ woŋ kioo. (1 Timo. 6:​18) Mɛɛ Chiisu wa wallo tosaa a Finya ndɔ latulu, mbo sina kpendekele maa o viŋ ndu nyɛ o nyɛ le. Teleŋ Chɛhowa wa ‘choo choo toosiaa’ wo, o “wa loŋ,” nduyɛ mbo pɛɛku ndu o ba tau. (Pulɔ. 8:​27) Chiisu bɛɛ o wa a kɔl kɛndɛ le buɛiyaa nduaa chɔmndo nyɛ Finya ndɔ dimul ndu wo. (Chɔŋ 15:​15) A hei o kɔl, naa bɛɛ nɔ miŋ wa a bɛɛndiaŋ, le wanaa naŋ cho wallo wa taasi naa chɔmndo. Wana waŋnda wa a kɔl kɛndɛ le wallo a ndu latulu wo, kɛɛ wanaa nda cho wallo wa sɔɔŋ ŋpum dimullo le halikpeŋ mbo chɔm maa ndu le cho wana banaa le. Mbo wa a kɔl kɛndɛ le acheleŋnda chɔmndo sɔɔŋ o pɛɛku woŋ.

Ŋ nɔ vɛlɛ miŋ dɛɛniaa wanaa naŋ cho wallo wa kɔltaŋ. Te waŋndo che pɛ sɛmbɛ naŋ cho dɔwɔɔ wo nduyɛ mbo chandu naa, baa ŋ ve a kɔl kɛndɛ le? Mi Chiisu ndoo chua teleŋndo le wanaa ndaa tosa wallo latulu wa dimullo sɔɔŋ kɛndɛŋ o che nda o ŋdialloŋ. (Tuuwɔ Maatiu 25:​19-23; Luku 10:​17-20.) Mbo dimul nda pɛŋ maa, a cho waltaŋ tosa mbo “hiou bɛɛ la [o] tosa laŋ.” (Chɔŋ 14:​12) O nyumma ndɔma mɛɛlaŋ choo tuupa mbo sɔla piɔmndo, mbo dimul buɛiyaa nduaa lo o laalaŋ ndaa choo wa aa: “Nya wa a ya latulu o nyɛpalaa nuu niŋ ni.” (Luku 22:​28) Yiyaŋndɔ mɛɛ hei ndii pilaŋ buɛiyaa nduaa kɔltaŋ yɛ. Nduyɛ mi nyɛ o dimi koŋ ndo luei nda yoomuaŋ le ma hiou lachi a wallo tosaa. Te naa bɛɛ chua pɛ teleŋndo le wanaa naŋ tosa wallo wa chandɔɔ, mi keŋ tosa ma wa a kɔl kɛndɛ, nduyɛ ma chɔɔlu yoomuaŋ dɔwɔɔ le wallo tosaa.

Mi puaapilɛnɔ pilɛ diolaŋ Kayodɛ dimi aa: “Mi che bɛɛ ŋ cho walaŋ te, kɛ ŋ tiuba miŋ wa wana waŋnda wa a kɔl kɛndɛ le wallo tosaa a ndu latulu wo. Nduyɛ ŋ tiuba miŋ tosa mi wanaa wa naa ikɛiya wa a kɔl kɛndɛ a chi wallo maa wolɔɔla lusulɛi le.” Baa wana waa lende pa ŋ cho ni? Naapum, a nyuna puaapilɛnɔɔ ɔɔ ndepilɛnɔ nya cho wallo wo, le mbo chɔm num wana suu ŋ cho wo. Te o yɔŋ pɛ mi acheleŋnda wa a kɔl kɛndɛ le wallo a num latulu, mɛɛ buɛiyaa Chiisuaa wa a kɔl kɛndɛ le wallo a ndu latulu yɛ, mɛɛ a tiuba ma dimi diomnda kiilanɔɔ Pɔɔl dimilaŋ. Mbo dimi aa: “Wanaa walla naŋ cho latulu a nya ni le mi la wa a nyaale.”—2 Kɔliŋ. 1:​24.