မ့ၢ်နကဲ ပှၤမၤသကိးတၢ်လၢ အဂ့ၤတဂၤဧါ
“ယအိၣ်ဒီးအီၤ, ဒ်ပှၤမၤတၢ်သ့တဂၤအသိး, . . . ယသူၣ်ပိၢ် သးဝးလၢ အမဲာ်ညါတထံၣ်ဃီ.” (ကတိၤဒိ ၈:၃၀) လံာ်စီဆှံတဆၢအံၤ ပာ်ဖျါထီၣ်ဝဲလၢ တချုးလၢ ကစၢ်ယွၤအဖိခွါ ဟဲလီၤလၢ ဟီၣ်ခိၣ်ချၢဒံးဘၣ်အခါ အဝဲမၤသကိးတၢ်ဒီး ကစၢ်ယွၤ ဒ်လဲၣ်လီၤ. ဒီးအဝဲသ့ၣ် မၤသကိးတၢ်လၢ အနံၣ်လၢ ပဂံၢ်အီၤတသ့ဘၣ် အတီၢ်ပူၤလီၤ. ဒီးပာ်သူၣ်ပာ်သးစ့ၢ်ကီးလၢ ဖဲယ့ၣ်ၡူးမၤသကိးတၢ်ဒီး ကစၢ်ယွၤအခါ အ “သူၣ်ပိၢ်သးဝး” လီၤ.
ဖဲယ့ၣ်ၡူးအိၣ်လၢမူခိၣ်အခါ အဝဲမၤလိန့ၢ်ဝဲ တၢ်ဂ့ၤတၢ်ဝါလၢ ကမၤစၢၤအီၤ ဒ်သိး အကကဲထီၣ်ပှၤမၤတၢ်ဖိလၢ အဂ့ၤတဂၤလီၤ. အဃိ ဖဲအဝဲဟဲလီၤလၢဟီၣ်ခိၣ်အခါ ကဲထီၣ်ပှၤဒိဂ့ၤတဲာ်ဘၣ်လၢ ပှၤရ့ဒီးအီၤတဖၣ် အဂီၢ်လီၤ. ပဟံးန့ၢ်တၢ်မၤလိလၢ ယ့ၣ်ၡူးအအိၣ်ကသ့ဒ်လဲၣ်. ပမ့ၢ်ဆိကမိၣ်ထံ ယ့ၣ်ၡူးအဒိအတဲာ်န့ၣ် ပကထံၣ်န့ၢ် တၢ်ဟံးစုနဲၣ်ကျဲသၢခါ လၢကမၤစၢၤပှၤဒ်သိး ပကကဲထီၣ် ပှၤမၤသကိးတၢ်လၢ အဂ့ၤလီၤ. တၢ်ဟံးစုနဲၣ်ကျဲတဖၣ်အံၤ ကမၤစၢၤပှၤဒ်သိး ပကမၤသကိးတၢ်ဒီး ပဒီပုၢ်ဝဲၢ် ဃူဃူဖိးဖိး အါန့ၢ်ဒံးအလီၢ်လီၤ.
ပကွၢ်လိမၤဒိး ယဟိဝၤယွၤ ဒီးယ့ၣ်ၡူးသ့ခီဖျိ ပတဲဘၣ် ပဒီပုၢ်ဝဲၢ်မုၣ်ခွါတဖၣ်လၢ ပတၢ်လဲၤခီဖျိ ဒီးတၢ်လၢပသ့ၣ်ညါအီၤတဖၣ်
တၢ်ဟံးစုနဲၣ်ကျဲ ၁– “ပာ်ဖျါထီၣ် . . . တၢ်ယူးယီၣ်ပာ်ကဲ လၢပှၤဂၤအဖီခိၣ်တက့ၢ်”
ပှၤမၤသကိးတၢ်ဖိလၢအဂ့ၤတဂၤန့ၣ် အဆီၣ်လီၤအသး ဒီးအပာ်လုၢ်ပာ်ပှ့ၤ ပှၤလၢအမၤသကိးတၢ်ဒီးအီၤတဖၣ် ဒီးအဝဲတဂုာ်ကျဲးစၢး မၤဒ်သိး ပှၤကထံၣ်ဒိၣ်အီၤအဂီၢ်ဘၣ်. တၢ်ဆီၣ်လီၤသးဒ်အံၤန့ၣ် ယ့ၣ်ၡူးမၤလိန့ၢ်လၢ အပၢ်အိၣ်လီၤ. ထဲဒၣ်ယဟိဝၤယွၤတဂၤန့ၣ် အမ့ၢ်တၢ်ဘၣ်တ့ကစၢ် ဘၣ်ဆၣ် အဝဲအဲၣ်ဒိးလၢ ပှၤကသ့ၣ်ညါလၢ အဖိခွါ မၤတၢ်လၢ အရ့ဒိၣ်စ့ၢ်ကီးလီၤ. ပသ့ၣ်ညါဘၣ် တၢ်ဂ့ၢ်အံၤခီဖျိ တၢ်ကတိၤလၢ ကစၢ်ယွၤတဲဝဲလီၤ. ကစၢ်ယွၤ တဲဝဲလၢ “မ်ပတ့လီၤ ပှၤကညီဒ်ပဂီၤဒၣ်ပဝဲအသိး” လီၤ. (၁ မိၤၡ့ ၁:၂၆) ဖဲယဟိဝၤယွၤ တဲဝဲတၢ်ကတိၤအံၤအခါ ယ့ၣ်ၡူးကသ့ၣ်ညါဝဲလၢ ယဟိဝၤယွၤ အိၣ်ဒီးတၢ်ဆီၣ်လီၤသးဒိၣ်မး.—စံးထီၣ်ပတြၢၤ ၁၈:၃၅.
ဖဲယ့ၣ်ၡူး အိၣ်လၢဟီၣ်ခိၣ်ချၢအခါ အဆီၣ်လီၤအသးလီၤ. ဖဲအမၤတၢ် ကဲထီၣ်လိၣ်ထီၣ်ဒီး ပှၤပတြၢၤအီၤအခါန့ၣ် အပတြၢၤကဒါက့ၤဝဲ ကစၢ်ယွၤလီၤ. (မၢ်ကူး ၁၀:၁၇, ၁၈; ယိၤဟၣ် ၇:၁၅, ၁၆) ဖဲယ့ၣ်ၡူးရ့ဒီး အတၢ်မၢဖိတဖၣ်အခါ အဝဲမၤဝဲဒ်သိး တၢ်ဃူတၢ်ဖိးကအိၣ်ဝဲ ဒီးရ့ဒီးအဝဲသ့ၣ် ဒ်သကိးအသိး ဒီးတမ့ၢ်ဒ် ကုၢ်အသိးဘၣ်. (ယိၤဟၣ် ၁၅:၁၅) တကးဒံးဘၣ် အသ့န့ၢ် အဝဲသ့ၣ်အခီၣ် ဒ်သိးကသိၣ်လိ အဝဲသ့ၣ်လၢ ကအိၣ်ဒီး တၢ်ဆီၣ်လီၤသးအဂီၢ်. (ယိၤဟၣ် ၁၃:၅, ၁၂-၁၄) ဒ်ယ့ၣ်ၡူးအသိး ပကဘၣ်ရ့ဒီး ပှၤလၢအမၤသကိးတၢ်ဒီးပှၤဂ့ၤဂ့ၤ ဒီးပာ်ဆိ အဝဲသ့ၣ်အတၢ်ဘၣ်သး လၢညါ. ဖဲပ “ပာ်ဖျါထီၣ် . . . တၢ်ယူးယီၣ်ပာ်ကဲ လၢပှၤဂၤအဖီခိၣ်” ဒီးပတဘၣ်ယိၣ်လၢ မတဂၤကဘၣ် တၢ်စံးထီၣ်ပတြၢၤအီၤလဲၣ်အခါန့ၣ် ပမၤတၢ်ကလဲၤအသး ဘၣ်ဘျီးဘၣ်ဒါ အါန့ၢ်အလီၢ်လီၤ.—ရိမ့ၤ ၁၂:၁၀.
ပှၤလၢအဆီၣ်လီၤအသးတဂၤန့ၣ် သ့ၣ်ညါဝဲလၢ “ပှၤဒုးကူၣ်တၢ်အိၣ်အါဂၤန့ၣ် ဂၢၢ်ဝဲကျၢၤဝဲလီၤ.” (ကတိၤဒိ ၁၅:၂၂) ပတၢ်လဲၤခီဖျိ ဒီးပတၢ်သ့တၢ်ဘၣ် မ့ၢ်အိၣ်ထဲလဲၣ်သနာ်က့ ပကဘၣ် သ့ၣ်နီၣ်ထီၣ်လၢ ပှၤဟီၣ်ခိၣ်ဖိတဂၤမး တသ့ၣ်ညါတၢ်ခဲလၢာ်ဘၣ်. ယ့ၣ်ၡူးစ့ၢ်ကီး တဲဝဲလၢ တၢ်လၢအတသ့ၣ်ညါဘၣ်န့ၣ်အိၣ်ဝဲ. (မးသဲ ၂၄:၃၆) အတၢ်မၢဖိတဖၣ် အတၢ်ထံၣ်အိၣ်ဒ်လဲၣ်, အတၢ်ဆိကမိၣ် အိၣ်ဒ်လဲၣ်န့ၣ် ယ့ၣ်ၡူးအဲၣ်ဒိးသ့ၣ်ညါဝဲ. (မးသဲ ၁၆:၁၃-၁၆) လၢတၢ်န့ၣ်အဃိ အပျဲၢ်အဘီၣ်တဖၣ် ရ့ဘၣ်ဒီးအီၤ ညီဒိၣ်မး. ဒ်န့ၣ်အသိး ဖဲပဆီၣ်လီၤသး ဒီးပသ့ၣ်ညါလီၤသးလၢ ပတသ့ၣ်ညါ တၢ်ခဲလၢာ်ဘၣ် ဒီးပဒိကနၣ်န့ၢ်ပှၤဂၤ အတၢ်ထံၣ်အခါန့ၣ် ပကဒုးအိၣ်ထီၣ် တၢ်ဃူတၢ်ဖိးလီၤ. ပမ့ၢ်မၤသကိးတၢ် ဒ်န့ၣ်န့ၣ် ပတၢ်မၤ က “ဂၢၢ်ဝဲကျၢၤဝဲ,” အဲၣ်ဒိးတဲဝဲ ပတၢ်မၤ ကကဲထီၣ်လိၣ်ထီၣ်လီၤ.
လီၤဆီဒၣ်တၢ် ဖဲတၢ်အိၣ်ဖှိၣ်သးပှၢ်တဖၣ် မၤသကိးတၢ် ဒ်သိးသိးအခါ အရ့ဒိၣ်ဒိၣ်မးလၢ အဝဲသ့ၣ်ကကွၢ်လိမၤဒိး ယ့ၣ်ၡူးအတၢ်ဆီၣ်လီၤသးလီၤ. အဝဲသ့ၣ် ကဘၣ်သ့ၣ်နီၣ်ထီၣ်လၢ သးစီဆှံ မၤစၢၤဝဲ တၢ်အိၣ်ဖှိၣ်သးပှၢ် တဂၤဂ့ၤတဂၤဂ့ၤလၢ ကမၤတၢ်ဆၢတဲာ်လၢအဂ့ၤသ့လီၤ. ဖဲတၢ်အိၣ်ဖှိၣ်သးပှၢ်တဖၣ် အိၣ်ဖှိၣ်အခါ အဝဲသ့ၣ် မ့ၢ်မၤဝဲဒ်သိး ပှၤတဲဖျါထီၣ် တၢ်ထံၣ် ကဘူၣ်ကိးဂၤဒဲးအဂီၢ်န့ၣ် အဝဲသ့ၣ် မၤတၢ်ဆၢတဲာ်လၢ အကဲဘျုးလၢ တၢ်အိၣ်ဖှိၣ်ဒီဖျၢၣ်အဂီၢ် ကသ့ဝဲလီၤ.
တၢ်ဟံးစုနဲၣ်ကျဲ ၂– “သုတမ့ၢ်ပှၤလၢအခိၣ်ကိၤဘၣ်န့ၣ် မ်အအိၣ်ဖျါထီၣ် . . . တက့ၢ်”
ပှၤမၤသကိးတၢ်လၢအဂ့ၤတဂၤန့ၣ် ကနၢ်ပၢၢ်စၢၤ ပှၤလၢအမၤသကိးတၢ်ဒီးအီၤတဂၤလီၤ. ဒီးအလီၢ်မ့ၢ်အိၣ်န့ၣ် ကဆီတလဲ အတၢ်ထံၣ် ဒီးကတူၢ်လိာ် ပှၤဂၤအတၢ်ထံၣ်လီၤ. ယ့ၣ်ၡူးအိၣ်ဒီး တၢ်ခွဲးတၢ်ယာ်အါမးလၢ ကထံၣ်ဘၣ်ဝဲ အပၢ်ပာ်ဖျါထီၣ် တၢ်နၢ်ပၢၢ်စၢၤပှၤဂၤလီၤ. အဒိ, ပှၤဟီၣ်ခိၣ်ဖိတဖၣ်န့ၣ် ကြၢးသံဝဲ ဘၣ်ဆၣ် ယဟိဝၤယွၤဆှၢလီၤ ယ့ၣ်ၡူးဒ်သိး ကအုၣ်က့ၤခီၣ်က့ၤ ပှၤဟီၣ်ခိၣ်ဖိလၢ တၢ်သံလီၤ.—ယိၤဟၣ် ၃:၁၆.
အလီၢ်မ့ၢ်အိၣ် ဒီးမ့ၢ်ကြၢးမ့ၢ်ဘၣ်န့ၣ် ယ့ၣ်ၡူးတူၢ်လိာ် ပှၤဂၤအတၢ်ထံၣ်လီၤ. အဒိ, အဝဲဘၣ်တၢ်ဆှၢလီၤအီၤလၢ ပှၤအံၣ်စရ့လးဖိတဖၣ် အကျါသနာ်က့ အဝဲမၤစၢၤဝဲ ပှၤဖံၤနံက့ၤမုၣ်တဂၤလီၤ. (မးသဲ ၁၅:၂၂-၂၈) ဒီးယ့ၣ်ၡူးနၢ်ပၢၢ်စၢၤ အပျဲၢ်အဘီၣ်တဖၣ် ခီဖျိ တမုၢ်လၢ်တၢ်လၢတၢ်ပှဲၤလၢ အပျဲၢ်အဘီၣ်တဖၣ် အအိၣ်ဘၣ်. ဖဲစီၤပ့းတရူး သမၢအီၤလၢ ပှၤအါဂၤအမဲာ်ညါ ဝံၤအလီၢ်ခံ ယ့ၣ်ၡူးသးအိၣ်ပျၢ်ကွံာ် အတၢ်ကမၣ်လီၤ. ဒီးလၢခံန့ၣ် ယ့ၣ်ၡူးဟ့ၣ်လီၤအီၤမူဒါဖးဒိၣ် တဖၣ်လီၤ. (လူၤကၣ် ၂၂:၃၂; ယိၤဟၣ် ၂၁:၁၇; မၤတၢ် ၂:၁၄; ၈:၁၄-၁၇; ၁၀:၄၄, ၄၅) ယ့ၣ်ၡူး အဒိအတဲာ်အံၤ ဒုးသ့ၣ်ညါပှၤလၢ ပ “တမ့ၢ်ပှၤလၢအခိၣ်ကိၤဘၣ်န့ၣ်” ကဘၣ် “အိၣ်ဖျါထီၣ်လၢ ပှၤခဲလၢာ်အမဲာ်ညါ” ခီဖျိ ပမၤဒ်ယ့ၣ်ၡူးအသိးလီၤ.—ဖံလံးပံၤ ၄:၅.
တၢ်နၢ်ပၢၢ်စၢၤပှၤဂၤန့ၣ် ကမၤစၢၤပှၤလၢ ပကဆီတလဲပသး ဒ်သိးပမၤတၢ်ဒီးပှၤအါဂၤ ဃူဃူဖိးဖိး ကသ့အဂီၢ်လီၤ. ယ့ၣ်ၡူးရ့ဒီးပှၤဂၤဂ့ၤဂ့ၤ ဒီးအဝဲ “ဒီတံၤဒီသကိးဒီး ပှၤဃ့သွဲဖိ ဒီးပှၤတၢ်ဒဲးဘးဖိ” လၢအဒိကနၣ် အတၢ်ကစီၣ်တဖၣ်အဃိ အဒုၣ်အဒါလၢ အသးက့ၣ်အီၤတဖၣ် တဲဆါအီၤလီၤ. (မးသဲ ၁၁:၁၉) ဒ်ယ့ၣ်ၡူးအသိး မ့ၢ်ပမၤသကိးတၢ်ဒီးပှၤဂၤဂ့ၤဂ့ၤ ကသ့ဧါ. ဒီပုၢ်ဝဲၢ်ခွါ လူဝံ(စ်) လၢအမၤဘၣ်တၢ်ဒီး ပှၤအါဂၤလၢ ကဝီၤအပှၤကွၢ်တၢ်တၢ်မၤ ဒီးဘ့ၤသ့လးန့ၣ် အတဲဝဲလၢ “ပှၤလၢယမၤသကိးဘၣ်တၢ်ဒီးအီၤ တဖုဂ့ၤတဖုဂ့ၤန့ၣ် ယထံၣ်အဝဲသ့ၣ် ဒ်တၢ်ဒူၣ်လၢ ပှၤတ့ထီၣ်အီၤဒီး လၢၢ်လၢ အလီၤဆီလိာ်အသးတဖၣ်. ဒ်သိးပှၤတ့ထီၣ်တၢ်ဒူၣ် ကန့ၢ်ဝဲဘျၢဘျၢအဂီၢ် ပှၤကဘၣ်ဆီတလဲ လၢၢ်တဖၣ်အံၤအလီၢ် တစဲးတမွဲးလီၤ. ယနီၢ်ကစၢ်ဒၣ်ဝဲစ့ၢ်ကီး ယဆီတလဲယသး ဒ်သိးပကမၤသကိးဘၣ်တၢ် ဃူဃူဖိးဖိး ဒီးတၢ်မၤကဝံၤဝဲဂ့ၤဂ့ၤအဂီၢ်.” တၢ်ပာ်သူၣ်ပာ်သးတခါအံၤန့ၣ် ဂ့ၤဒိၣ်မး တမ့ၢ်ဧါ.
ပှၤမၤသကိးတၢ်လၢ အဂ့ၤတဂၤန့ၣ် တပာ်ခူသူၣ်ဃာ် တၢ်ဂ့ၢ်တၢ်ကျိၤ ဒ်သိးအကဲသရၣ်လၢ ပှၤဂၤအဖီခိၣ် ကန့ၢ်အဂီၢ်ဘၣ်
ဖဲပမၤသကိးတၢ်ဒီး ပှၤလၢတၢ်အိၣ်ဖှိၣ်ပူၤအခါ ပပာ်ဖျါထီၣ်လၢ ပနၢ်ပၢၢ်စၢၤအဝဲသ့ၣ် ကသ့ဒ်လဲၣ်. ပအိၣ်ဒီးတၢ်ခွဲးတၢ်ယာ်လၢ ပကပာ်ဖျါထီၣ် တၢ်ဂ့ၤတၢ်ဝါတခါအံၤ ဖဲပမၤသကိးတၢ်ဒီး ပှၤလၢပတၢ်စံၣ်တဲၤတဲလီၤ ကရူၢ်အခါသ့လီၤ. ဘၣ်သ့ၣ်သ့ၣ် ပကဟးစံၣ်တဲၤတဲလီၤတၢ်ဒီး ပှၤစံၣ်တဲၤတဲလီၤတၢ်ဖိလၢ အအိၣ်ဒီး ဟံၣ်ဖိဃီဖိ အမူဒါလၢလီၤဆီဒီးပှၤ မ့တမ့ၢ် အသးနံၣ် လီၤဆီဒီးပှၤလီၤ. ဒ်သိး အဝဲသ့ၣ် အတၢ်သးခုကအါထီၣ်လၢ တၢ်စံၣ်တဲၤတဲလီၤတၢ်မၤပူၤအဂီၢ် ပဆီတလဲ ပတၢ်ရဲၣ်တၢ်ကျဲၤ မ့တမ့ၢ် ပမၤဒ် အဝဲသ့ၣ် အတၢ်ရဲၣ်တၢ်ကျဲၤအသိး သ့ဝဲလီၤ.
တၢ်ဟံးစုနဲၣ်ကျဲ ၃– “သးအိၣ် ဟ့ၣ်နီၤလီၤတၢ်တက့ၢ်”
ပှၤမၤသကိးတၢ်ဖိလၢ အဂ့ၤတဂၤန့ၣ် “သးအိၣ် ဟ့ၣ်နီၤလီၤတၢ်” လီၤ. (၁ တံၤမသ့း ၆:၁၈) ဖဲယ့ၣ်ၡူး မၤသကိးတၢ်ဒီး အပၢ်အခါ အဝဲကထံၣ်ဘၣ်ဝဲလၢ အပၢ်ယဟိဝၤယွၤန့ၣ် တပာ်ခူသူၣ်ဃာ် တၢ်ဂ့ၢ်တၢ်ကျိၤဘၣ်. ဖဲယဟိဝၤယွၤ “ကတဲာ်ကတီၤမူခိၣ်” အခါယ့ၣ်ၡူး “အိၣ်ဖဲန့ၣ်” အဃိ ယ့ၣ်ၡူးကမၤလိန့ၢ်တၢ်လၢ အပၢ်အအိၣ်လီၤ. (ကတိၤဒိ ၈:၂၇) လၢခံန့ၣ် ယ့ၣ်ၡူးစ့ၢ်ကီး သးအိၣ်ဟ့ၣ်နီၤလီၤ အပျဲၢ်အဘီၣ်တဖၣ်လၢ ‘တၢ်ခဲလၢာ်လၢ အနၢ်ဟူဘၣ်လၢ အပၢ်အအိၣ်’ လီၤ. (ယိၤဟၣ် ၁၅:၁၅) ပကွၢ်လိမၤဒိး ယဟိဝၤယွၤသ့ခီဖျိ တၢ်လၢပမၤလိဘၣ်တဖၣ်န့ၣ် ပတဲဘၣ်က့ၤ ပဒီပုၢ်ဝဲၢ်မုၣ်ခွါတဖၣ်လီၤ. ပှၤမၤသကိးတၢ်လၢ အဂ့ၤတဂၤန့ၣ် အတပာ်ခူသူၣ်ဃာ် တၢ်ဂ့ၢ်တၢ်ကျိၤ လၢပှၤကြၢးသ့ၣ်ညါ ဒ်သိးအကဲသရၣ်လၢ ပှၤဂၤအဖီခိၣ် ကန့ၢ်အဂီၢ်ဘၣ်. လၢတၢ်န့ၣ်အလီၢ် အသးအိၣ်ဟ့ၣ်နီၤလီၤ ပှၤဂၤလၢ တၢ်အဂ့ၤလၢ အမၤလိဘၣ်ဝဲတဖၣ်လီၤ.
ဖဲပှၤတဂၤဂၤ ပာ်သူၣ်ပာ်သး ပတၢ်ထဲးဂံၢ်ထဲးဘါ ဒီးပာ်ဖျါထီၣ် တၢ်စံးဘျုးစံးဖှိၣ် လၢအသးဒီဖျၢၣ်အခါ ပသးခုလီၤ. အဃိ ပဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ် လၢပတၢ်စံးတၢ်ကတိၤသ့လီၤ. ယ့ၣ်ၡူးစ့ၢ်ကီး ဟံးန့ၢ်တၢ်ဆၢကတီၢ်လၢ ကတဲဘၣ် အပှၤမၤသကိးတၢ်တဖၣ်လၢ အဝဲသ့ၣ်အတၢ်ဂ့ၤတၢ်ဝါလီၤ. (ထိၣ်သတြီၤဒီး မးသဲ ၂၅:၁၉-၂၃; လူၤကၣ် ၁၀:၁၇-၂၀.) တကးဒံးဘၣ် ယ့ၣ်ၡူးတဲဘၣ် အဝဲသ့ၣ်လၢ အဝဲသ့ၣ်က “မၤ တၢ်မၤတဖၣ် ဒိၣ်န့ၢ်ဒံး” အီၤလီၤ. (ယိၤဟၣ် ၁၄:၁၂) တချုးဖဲယ့ၣ်ၡူးသံအနၤန့ၣ် အဝဲစံးပတြၢၤ အတၢ်မၢဖိလၢ အအိၣ်ဒီးတၢ်သးတီတဖၣ် ဒီးတဲဝဲလၢ “ဖဲယဘၣ် တၢ်မၤကွၢ်တဖၣ်အခါ သုမ့ၢ်ပှၤလၢ အအိၣ်ဝဲဆိးဝဲဒီးယၤလီၤ.” (လူၤကၣ် ၂၂:၂၈) ယ့ၣ်ၡူးအတၢ်ကတိၤတဖၣ်အံၤ ကကဲထီၣ်တၢ်ဂံၢ်တၢ်ဘါလၢ အဝဲသ့ၣ်အဂီၢ် ဒိၣ်မး ဒီးကမၤစၢၤအဝဲသ့ၣ် ဒ်သိးအကဆဲးလဲၤဆူညါ အဂီၢ်လီၤ. ပမ့ၢ်ဟံးန့ၢ်တၢ်ဆၢကတီၢ်လၢ ပကပတြၢၤ ပဒီပုၢ်ဝဲၢ်မုၣ်ခွါတဖၣ်န့ၣ် အဝဲသ့ၣ် ကသးခုသပှၢ်ကတၢၢ် ဒီးဘၣ်သ့ၣ်သ့ၣ် အဝဲသ့ၣ် ကလဲၤထီၣ်လဲၤထီ ဒိၣ်ထီၣ်လီၤ.
နကဲထီၣ်ပှၤမၤသကိးတၢ်ဖိ လၢအဂ့ၤသ့
ဒီပုၢ်ဝဲၢ်ခွါခးယိဒံၤ တဲဝဲလၢ “ပှၤမၤသကိးတၢ်ဖိလၢအဂ့ၤတဂၤန့ၣ် တမ့ၢ်ပှၤလၢပှၤပှဲၤဘၣ်, ဘၣ်ဆၣ် အဝဲကမၤသးခု ပှၤလၢအမၤသကိးတၢ်ဒီးအီၤ ဒီးကကဲထီၣ် တၢ်မၤစၢၤလၢ ပှၤမၤသကိးတၢ်ဒီးအီၤအဂီၢ်လီၤ.” မ့ၢ်နကဲ ပှၤမၤသကိးတၢ်ဖိ ဒ်အံၤတဂၤဧါ. ဘၣ်သ့ၣ်သ့ၣ် နသံကွၢ် ဒီပုၢ်ဝဲၢ်မုၣ်ခွါတဖၣ် လၢအမၤသကိးတၢ်ဒီးနၤ လၢအဝဲသ့ၣ် ထံၣ်နၤဒ်လဲၣ် သ့လီၤ. အဝဲသ့ၣ် မၤသကိးတၢ်ဒီးနၤ မ့ၢ်မုာ် ဒ်ယ့ၣ်ၡူးအတၢ်မၢဖိတဖၣ် မၤသကိးတၢ်ဒီးအီၤ မုာ်အသိးန့ၣ် နတဲဒ် တၢ်မၢဖိပီလူးအသိး သ့လၢ “ပမ့ၢ်ဒၣ်ပှၤလၢ အမၤသကိးတၢ်ဒီးသု ဒ်သိး သုကအိၣ်ဒီး တၢ်သးခုအဂီၢ်လီၤ.”—၂ ကရံၣ်သူး ၁:၂၄.
