Yesu longukaka bikadulu yina salaka ti na manima yandi vuanda kifuani ya mbote na diambu metadila kuvuanda nkundi ya kisalu samu na bantu yina vuandaka sala kintuadi na yandi. Yinki mambote beto lenda baka na kifuani ya Yesu? Na kulongukaka kifuani na yandi, beto lenda mona bansikudukusu tatu yina lenda sadisa beto samu beto kuma bankundi ya mbote ya kisalu. Bansikudukusu yango kesadisa beto beto vuanda na bumosi na bampangi na beto.

Nkundi ya mbote ya kisalu yina kele na kumikitisa kepesaka bantu yina kena kusala kintuadi na yandi valere mpe yandi kemekaka ve kusosa kumonisa bantu ti yandi meluta bau. Yesu longukaka kikadulu yango ya kumikitisa na Tata na yandi. Atako Yehova kaka nde mebonga kubokudulua Mvangi, kasi yandi zolaka bantu yankaka zaba kisalu ya mfunu yina Muana na yandi salaka. Beto kemonaka yau na mambu yina Nzambi tubaka: ‘Beto sala muntu na kifuani na beto.’ (Kuy. 1:26) Ntangu Yehova tubaka bampova yango, Yesu zabaka ti Yehova kele na kumikitisa.—Nk. 18:35.

Ntangu Yesu vuandaka na ntoto, yandi monisaka kaka kumikitisa ya mutindu yina. Ntangu bantu vuandaka kumisa yandi samu na mambu yina yandi vuandaka sala, yandi vuandaka vutula lokumu yango na Nzambi. (Mar. 10:17, 18; Yoa. 7:15, 16) Yesu vuandaka sala nionso samu na kutula kiyenge na banlonguki na yandi mpe yandi vuandaka tadila bau lokola bankundi kasi ve lokola bananga. (Yoa. 15:15) Yandi sukulaka kutu makulu na bau samu na kulonga bau dilongi ya kumikitisa. (Yoa. 13:5, 12-14) Beto diaka beto fueti pesa bankundi na beto  ya kisalu lokumu na kisika ya kutula bansatu na beto mosi na kisika ya ntete. Na ‘kupesanaka lokumu’ mpe na kukitungisaka ve samu na kusosa kuzaba nani fueti baka lokumu, beto lenda nunga kusala mambu mingi.—Bar. 12:10.

Muntu ya kumikitisa kezabaka diaka ti ‘mambu kenungaka kana bantu kepesa malongi kele mingi.’ (Bin. 15:22) Yavuanda beto mezaba mambu mingi to beto kele na makoki mingi, beto fueti zimbakana ve ti muntu mosi ve mezaba mambu nionso. Ata Yesu zabaka ti yavuandaka na mambu yina yandi zabaka ve. (Mat. 24:36) Diaka, yandi vuandaka tula dikebi na mambu yina banlonguki na yandi ya kuzanga kukoka zabaka to yina bavuandaka kanisa. (Mat. 16:13-16) Yau yina bankundi na yandi ya kisalu vuandaka kukimona mbote pembeni na yandi! Mutindu mosi, kana beto kele na kumikitisa mpe beto kena kuzimbakana ve ti beto zaba ve mambu nionso mpe beto kena kuwa makanisi ya bantu yankaka, beto kesala ti kiyenge vuanda kintuadi na bau, mpe kintuadi “beto kenunga kusala.”

Yakele mfunu kuluta na bankulutu balanda kifuani ya kumikitisa ya Yesu ntangu bakena kusala kintuadi. Bafueti zaba ti mpeve ya nlongo lenda vuanda na bupusi na konso nkulutu na kati ya kimvuka ya bankulutu. Na balukutakanu na bau, bankulutu fueti kukindimisa ti konso muntu kele na yinsua ya kupesa makanisi na yandi, kintuadi balenda baka banzengolo yina kenata mambote na kimvuka ya mvimba.

Nkundi ya mbote ya kisalu kevuandaka ve mambu ya ngolo na bantu yina kena kusala kintuadi na yandi. Yandi kesobaka banzengolo na yandi mpe yandi kekangamaka ve na mambu. Kondua ntembe, Yesu vuandaka na maluaku ya kumona kikadulu ya kuvuanda ve mambu ya ngolo yina Tata na yandi vuandaka na yau. Na kifuani, Yehova tindaka yandi samu na kuvukisa bantu na kitumbu ya lufua yina babakaka.—Yoa. 3:16.

Yesu vuandaka kangama ve na mambu kana yamelomba yandi sala yau. Kanisa mutindu yandi sadisaka nketo mosi ya buala ya Fenisi, atako yandi tindamaka samu na dikanda ya Yisaele. (Mat. 15:22-28) Diaka yandi vuandaka ve na kikadulu ya mambu ya ngolo na mambu yina yandi vuandaka vingila banlonguki na yandi basala. Ntangu Petelo nkundi na yandi ya ntima wanganaka yandi na meso ya bantu mingi, Yesu vuandaka pene ya kunlemvukila yandi. Na manima, yandi pesaka Petelo biyekua ya mfunu. (Luk 22:32; Yoa. 21:17; Bis. 2:14; 8:14-17; 10:44, 45) Kifuani ya Yesu kena kumonisa beto puelele ti ‘beto fueti bika bantu nionso zaba kikadulu na [beto] ya kuvuanda ve mambu ya ngolo’ na kukangamaka ve na mambu.—Fil 4:5.

 Kuvuanda ve na kikadulu ya mambu ya ngolo ketinda beto beto mesana kusala na kiyenge na bantu ya mitindu nionso. Yesu vuandaka sadila bantu yina vuandaka pembeni na yandi mutindu yina atako bambeni na yandi yina vuandaka na kimpala fundaka yandi ti yandi mekuma ‘nkundi ya bakongoli mpaku mpe ya bansumuki’ yina ndimaka nsangu na yandi. (Mat. 11:19) Mutindu mosi na Yesu, beto lenda sala kintuadi na bantu yina kele ya kusuasana na beto? Louis, mpangi mosi ya bakala yina salaka na bantu ya mutindu na mutindu lokola nkengi ya kizungidila mpe na Betele, metuba: “Munu vuandaka meka kukokanisa konso mua kimvuka ya bantu yina muvuandaka sala na bau lokola kibaka yina bametunga na mabanga ya kusuasana. Na kutulaka konso dibanga na kisika yina mefuana na yau, nge lenda tunga kibaka ya kusungama. Munu mosi diaka munu salaka bansobolo yina mefuana samu munu sala na kiyenge na bantu yankaka.” Yakele kikadulu mosi ya mbote!

Yinki ntangu beto lenda monisa kikadulu ya kusala kintuadi na kati ya kimvuka na beto? Beto kevuanda na diluaku ya kusala yau ntangu beto kele kintuadi na bampangi ya mua kimvuka na beto ya kisalu ya kusamuna. Beto lenda sala kintuadi na bansamuni yina kele na biyekua ya dibuta to mpe bamvula yina kele ya kusuasana na beto. Beto lenda soba mutindu na beto ya kusadila to kuvuanda pene ya kupona mutindu ya kisalu ya kusamuna yina bakesepelaka na yau samu bamona kiese ya kisalu ya kusamuna.

Nkundi ya mbote ya kisalu kevuandaka ‘pene samu na kukabila bantu yankaka.’ (1 Tm. 6:18) Ntangu Yesu vuandaka pembeni ya Tata na yandi, yandi monaka ti Yehova vuandaka ve na kikadulu ya kusueka mambu yankaka. Ntangu Yehova ‘vuandaka bongisa dizulu,’ Yesu ‘vuandaka vana’ mpe yandi vuandaka baka malongi na ntadisi na yandi. (Bin. 8: 27) Na manima, Yesu kabulaka na kiese nionso na banlonguki na yandi ‘mambu nionso yina [yandi] kuwaka’ na Tata na yandi. (Yoa. 15:15) Na kulundaka yau na makanisi, beto diaka beto fueti vuanda pene ya kukabula nzayilu yina beto kele na yau na bankundi na beto ya kisalu. Kondua ntembe, nkundi ya mbote ya kisalu kemekaka ve kusuekila bantu yankaka mambu ya mfunu yina bafueti zaba to yina lenda sadisa bau. Yandi kevuandaka na kiese ya kukabudila bantu yankaka mambu ya mbote yina yandi mezaba.

Beto lenda kindisa diaka bankundi na beto ya kisalu. Kana muntu mosi memona bangolo yina beto kena kusala mpe yandi mepesa beto matondo, yakesala beto mbote, mutindu yina ve? Yesu vuandaka baka ntangu ya kuzabisa bankundi na yandi ya kisalu mambu ya mbote yina yandi vuandaka mona na bau. (Fuanikisa Matayo 25:19-23; Luka 10:17-20.) Yandi zabisaka bau kutu ‘bakesala mambu ya nene kuluta’ yandi. (Yoa. 14:12) Na nkokila mosi tekila yandi kufua, yandi pesaka bantumua na yandi ya kukuikama felisitasion, na kutubaka: ‘Beno kele bantu yina mekangama na munu na bampasi na munu.’ (Luka 22:28) Kanisa ntete mutindu bampova yango simbaka ntima na bau mpe ya tindaka bau basala! Kana beto diaka beto kena kubaka ntangu ya kupesa bankundi na beto ya kisalu felisitasion, kondua ntembe bakevuanda na kiese mpe bakebuta mbuma mingi.

Mpangi mosi ya bakala na nkumbu ya Kayode metuba ti: “Yalomba ve ti nkundi ya mbote ya kisalu vuanda ntete muntu ya kukoka, kasi yandi kepesaka bantu yankaka kiese mpe yandi kekumisaka kisalu pete samu na bayina kena kusala kintuadi na yandi.” Nge kele nkundi ya kisalu ya mutindu yina? Mbala yankaka nge lenda yuvusa bampangi kana bakemonaka nge nge kele nkundi ya kisalu ya yinki mutindu. Kana bakesepelaka kusala kintuadi na nge, ata banlonguki ya Yesu vuandaka sepela kusala kintuadi na yandi, nge lenda tuba mutindu mosi na ntumua Paulo ti: ‘Beto kele bankundi ya kisalu samu na kiese na beno.’—2Bk 1:24.