Bu keri ku mazulu, Yezu walongoka bifu biamubakisa mu kwizi sala bubote. Bu kayiza ha mutoto, wayizi bâ tifwani tia tibote tia muntu wusalaka na bampwana’andi. Ngano bwe tulendi bakila ndandu mu tifwani tia Yezu? Bu tutomo taluzula tifwani tiandi, tulendi baka mitieno mitatu milendi tu bakisa mu salaka bubote na bampwana’eto. Mitieno mio mbo mitubakisa mu bâ na bumosi.

Muntu wusalaka bubote na bampwana’andi wa kuluka wubâka. Mbo kasongelaka ti bampwana’andi mfunu bena mpe ka dingaka ko batalaka kwa yandi. Yezu kwe Tata’andi kalongokela tifu tio tia kuluka. Ni bu sa ti Yehova ni Yandi kwa bafweti tâ Mvangi, wazolo ti bantu bazaba tisalu tia mfunu tia sala Mwana’andi. Mbo tubakulaka musamu wo mu misamu emi mia tâ Nzambi: “Tayirikeno muntu mu tifwani tieto.” (Mba. 1:26) Kampe Yezu bu kawâ misamu mio wamona ti Yehova wa kuluka wena.​—Mik. 18:35.

Bu keri ha mutoto, Yezu mpe wa kuluka weri. Mu ntangu bantu yi beri mu kembesaka mu bungu dia misamu mi keri yirikaka, yandi mbo keri hanaka mukembo kwe Nzambi. (Mak. 10:17, 18; Za 7:15, 16) Yezu wasala mu tidzunu na milongoki miandi, mbo keri ba bongelaka ntiana ndiku zandi; mpe keri’â ba bongelaka ntiana bangamba ko. (Za 15:15) Mu ba longesa tifu tia kuluka, wasukula malu mawu. (Za 13:5, 12-14) Ntiana yandi, tufweti kembesaka bantu ba tusalaka na bo, kani tatoko yôkesa nsatu za beto beni ku matu. Tulendi sala tisalu tiatingi mu ntangu yi ‘tutizangulaka beto na beto,’ mpe ka tudinga ko ti batuzangula.​—Rom. 12:10.

 Muntu wa kuluka mbo wubakulaka ti makani “mbo malunganaka mu ntangu milongi mibâka miamingi.” (Bin. 15:22) Ni bu sa ti misamu miamingi tuzebi peleko lenda diadingi die neto, tufweti bambukaka ti ka kwena muntu ko wuzebi misamu miamiansoni. Yezu mpe wazabikisa ti ka zaba misamu miamiansoni ko. (Mat. 24:36) Mpe mbo keri kipaka misamu mia zaba milongoki miandi na mi beri banzaka. (Mat. 16:13-16) Ntiangu milongoki miandi mieri zoloko mu bâ tintwari nandi! Mpila mosi mpe, bu tubâka bakuluka, mbo tubakulaka ti ka tuzebi’â misamu miamiansoni ko, mpe bu tuwirikilaka bampwana’eto, mbo tusingasaka tidzunu, mpe makani mbo malunganaka.

Musamu wa mfunu wena kwe bakuluntu mu landa tifu tia kuluka tia Yezu mu ntangu yi basalaka tintwari. Bafweti bambukaka ti mpeve santu yilendi sala kwe bakuluntu babansoni. Mu ntangu ya tukutakanu twawu, tala ti bakuluntu basiri ti muna mukuluntu kabâ na lenda dia zonzela mabanza mandi, mbo babonga nzengolo zinata ndandu mu timvuka tiatiansoni.

Muntu wusalaka bubote na bampwana’andi, mabanza ma delakana mabâka nandi. Ka saka misiatiri ko mpe mbo katambulaka mabanza ma bampwana’andi. Ntembe kâni, Yezu mbala zazingi kamona Tata’andi bu keri sarilaka mabanza ma delakana. Mu tifwani, Yehova wamutambika ha mutoto mu kûla nza mu lufwa.​—Za 3:16.

Yezu mbo keri tambulaka mabanza ma bantu bakaka bu weri fwanakanaka. Mbo tuta wa bakula mu mpila yi kabakisila mukento wa ku Fenisi ni bu sa ti ku kanda dia Israele bamutambika. (Mat. 15:22-28) Mabanza ma delakana mpe meri nandi mu misamu mi keri kekoloko kwe milongoki miandi. Ndiku’andi Piere wamukala ha lungiri bantu, kâ Yezu wa kubama weri mu mu lemvokela. Ha manima, wahana Piere madema ma mfunu. (Like 22:32; Za 21:17; Bis. 2:14; 8:14-17; 10:44, 45) Tifwani tia Yezu mbo tita tomo songela ti ‘tifu tieto tia bâka na mabanza ma delakana [tifweti] zabakana kwe bantu babansoni’ bu tutambula mabanza mawu.​—Flp. 4:5, NWT.

Mabanza ma delakana mbo matubakisaka mu bâ na lenda dia sala na bantu ba mpila zazansoni mu tidzunu. Mu bungu ti Yezu mu mpila ya mbote keri bongelaka bantu beri penepene nandi, mbeni zandi zamukwikisila ti yandi ‘ndiku [yeri] ya bantu bafutisaka mpaku na ya bankwa-masumu’ beri wirikilaka nsangu zandi. (Mat. 11:19) Ngano, ntiana Yezu, tulendi sala na bantu bakaka ba swaswana? Louis, mpangi mosi yasala  tisalu tia munkengi wa tizunga mpe wasala ku Betele na mpangi zazingi za swaswana têle ti: “Mbo ndieri fwanakasaka bantu ba ndieri salaka na bo na tibaka tieri na bibriki bilembolo na bunene bumosi. Bu tomo delakasa bibriki mpe bu tûla bio ha mbuka yi bifweti bâ, tibaka tilendi kwizi bâ tia sungama. Me beni mpe nayizi sa nsobolo ngatu nasala mu tidzunu na bantu bakaka mpe ngatu tisalu tienda ku matu.” Diangana, mabanza mo ma nguria ma mbote mena!

Mu ntia ntangu tulendi songela kwe mpangi za timvuka tieto ti mabanza ma delakana me neto? Tulendi wa songela mu ntangu yi tusamunaka na tikunku tieto tia bisamuni. Tulendi kwizi samuna na bantu bê na madema ma swaswana mu kanda ntiana beto peleko bê na mvula za swaswana. Tulendi sarila ngolo mu bâ na mabanza ma delakana bu tukipa lenda peleko nsatu za bampwana’eto, peleko bu tusarila mpila za samuna zi bazololo ngatu bamona nsayi ya tisalu tia samuna?

Muntu wusalaka bubote na bampwana’andi, ‘wa kubama bâka mu kaba.’ (1 Tim. 6:18) Yezu bu keri kwe sari na Tata’andi, wamona ti keri’â mu swekelaka misamu ko. Mu ntangu Yehova keri kubikaka mazulu, Yezu hô keri mpe walongoka mu misamu mi keri yirikaka. (Bin. 8:27) Ha manima, Yezu walongesa milongoki miandi misamu miamiansoni mi kawâ kwe Tata’andi, na nsayi yayansoni. (Za 15:15) Na mabanza mo mu mutu, tufweti bâka ba kubama mu kabaka misamu mi tuzebi kwe bampwana’eto. Wa matieleka, muntu wusalaka bubote ka wudingaka ko mu sweka misamu mia mfunu kwe bampwana’andi ngatu misamu miamiansoni miayôkelaka kwa ha yandi. Mbo kabâka na nsayi ya zonzela misamu mia mbote mi kalongoka kwe bampwana’andi.

Tulendi tindisaka mpe bampwana’eto ba tusalaka na bo. Mu ntangu muntu yi kamonaka ngolo zi tusarilaka mpe yi katutondaka, ngano ka wututâka nsayi ko? Yezu wabonga ntangu ya zonzela misamu mia mbote mi keri monaka kwe milongoki miandi. (Fwanakasa na Matie 25:19-23; Like 10:17-20.) Mpe wabatêla ti ‘mbo bayirika misamu yôka’ mio mi kayirika yandi. (Za 14:12) Mpimpa mosi ntete lufwa lwandi, wasîka milongoki miandi mia kwikama mpe wabatêla ti: “Kâ beno, ni beno lwatatamane mu bâ nani mu ntontolo zani.” (Like 22:28, NWT) Banza’eti ka mu ntia mpila misamu mio miabasimbila mutima mpe miabatumina mu tatamana mu sala! Beto mpe, tamana bongaka ntangu ya tindisaka bampwana’eto ba tusalaka na bo, nsayi mbo yibabaka mpe mbo basala mu mpila ya mbote.

Mpangi mosi ye na nkumbu Kayode yatâ ti: “Mu bâ tisari tia mbote muntu ka wena na nsatu ko ya bâ wa lunga, kâ mbo katâka bampwana’andi nsayi mpe mbo kasaka ti tisalu ka tibândi dema.” Ngano nge mpe tisari tia mbote tiena? Kampe, lendi yula kwe mpangi zaku ka bwe bamwinaka mpila yi sarilaka? Tala ti nsayi yibâka nawu mu sala na nge, ntiana milongoki mieri na nsayi mu sala na Yezu, lendi tâ misamu emi mia tâ ntumwa Paulo: “Ndiku za tisalu twena mu bungu dia nsayi’eno.”​—2 Kor. 1:24, NWT.