Ndyaakalinga kwiculu, Yesu wakeeya mibo yakamucafwa kusebensa kabotu abamwi. Aboobo ndyaakalinga pacishi capanshi, wakatondesha cakubonenaako cibotu abuumbi cakusebensa kabotu abamwi. Ino cakubonenaako cakwe Yesu inga catucafwa buyani? Kwiinda mukwiiya pacakubonenaako cakwe inga twacana njiisho shotatwe sheenga shatucafwa kusebensa kabotu abamwi. Njiisho ishi shilaakutucafwa kuyumya lucatano lwesu abamakwesu.

Muntu usebensa kabotu abamwi ngumuntu uliceesha. Ulabona ayi abo mbwasebensaabo balayandika alimwi ngumuntu utaliboneshi. Yesu wakeeya kuliceesha kuswa kuli baIshi. Nabi kwaamba ayi Yehova eenkabo ngoweelela kwiitwa ayi Mulengi, wakalinga kusuni ayi bamwi bashibe ncito iyandika Mwanaakwe njaakacita. Tulishi cancine ici ceebo ca maswi Lesa ngakaamba ayi: “Atulenge muntu mucikoshanyo cesu.” (Mata. 1:26) Yehova ndyaakaamba maswi aya, Yesu wakeshiba ayi Yehova ngu Lesa uliceesha.—Kulu. 18:35.

Yesu alakwe wakalinga muntu uliceesha ndyaakalinga pacishi capanshi. Na bantu bamulumbaisha pacintu cimwi ncaacita, wakalinga kulumbaisha Lesa. (Maako 10:17, 18; Joni 7:15, 16) Yesu wakasebensa cankusu kwaamba ayi atolelele kunyumfwana abashikwiiya bakwe alimwi akubalama mbuli bashicibusa bakwe, kuteshi basha. (Joni 15:15) Wakabasansha akushimpanta kwaamba ayi abeeishe kuliceesha. (Joni 13:5, 12-14) Bweenka mbuli Yesu, aswebo tulyeelete kulemeka  bashominyinesu muciindi cakusuna kuba panembo lya bamwi. Kulemeka bamwi alimwi akutasuna kulumbaishikwa lyoonse, inga kwatucafwa kukumanisha shiinji.—Loma. 12:10.

Alimwi muntu uliceesha alicishi kwaamba ayi ‘miyeeyo ilaswitilila na kwafula beshikukupandako maano.’ (Tus. 15:22) Tatweelete kuluba cancine cakwaamba ayi nabi tube alushibo luli buyani, taakuwo muntu ucishi shintu shoonse. Nabi Yesu alakwe wakalinga kucishi kwaamba ayi kwakalinga shintu shimwi nshatakalinga kucishi. (Mate. 24:36) Alimwi wakalinga kusuni kushiba bashikwiiya bakwe batamaninite nshobakalinga kucishi na kuyeeya. (Mate. 16:13-16) Ici ncecakapa basebenshinyina kunyumfwa kabotu kuba anguwe! Ubu mbocibete na katuliceesha akwiibaluka cancine cakwaamba ayi tatucishi shintu shoonse alimwi na twakutika kushitokwaamba bamwi, tulayuminisha luumuno alimwi kucita boobo kulapa kwaamba ayi soonse tuswitilile.

Kukonkela cakubonenaako cakwe Yesu kulayandika abuumbi kubamanene ndyebatoosebensela pomwi. Balyeelete kwiibaluka kwaamba ayi mushimu usalashi inga wapa munene uli woonse kwaamba muyeeyo umwi weenga wacafwa likoto lya bamanene kusala kabotu. Pakubungana kwa bamanene, na bamanene boonse kabashinisha kwaamba ayi munene womwi awomwi walinyumfwa kwaanguluka kwaamba mbwaatoyeeya, balaakusala sheenga shacafwa libungano lyoonse.

Muntu usebensa kabotu abamwi ngooyo ushibikitwe ayi ulalibombya. Taayuminini pacintu comwi. Yesu wakalinga kucite coolwe cakubona baIshi mbobalibombya. Kucakubonenaako, Yehova wakamutuma kusa mukupulusha bantu kulufu ulo ndobakapyana.—Joni 3:16.

Yesu wakalinga kulibombya na kaciyandika kucita boobo. Na mutokwiibaluka, paciindi cimwi wakacafwa mwanakashi waku Fonisha, nabi kwaamba ayi wakatumwa ku bene Isilaeli. (Mate. 15:22-28) Alimwi taakalinga kulangila bashikwiiya bakwe kucita nshobatakalinga kucikonsha. Pesule lyakwaamba ayi Pita shicibusa wakwe wamukaka pabantu, Yesu taakwe kumubikila mfundilishi. Yesu ndyaakabushikwa wakapa Pita mikuli iyandika abuumbi. (Luka 22:32; Joni 21:17; Milimo 2:14; 8:14-17; 10:44, 45) Cakubonenaako cakwe Yesu cilatondesha patuba kwaamba ayi tulyeelete kutondesha ‘kulibombya [kwesu] kubantu boonse’ kwiinda mukutayuminina pacintu.—Filip. 4:5, NWT.

 Kulibombya kulaakutucafwa kwaaluka kwaamba ayi tusebense muluumuno abantu ba mishobo ipusenepusene. Yesu wakalinga kunyumfwana kabotu abuumbi abantu bakalinga kutambula maswi akwe cakwaamba ayi ceebo camunyono balwani bakwe bakatalika kumubekesha ayi “ngushicibusa abeshikusonkesha alimwi abamucita shibi.” (Mate. 11:19) Sa aswebo inga tweeleshako kusebensa kabotu abantu mbotupuseneabo? Mukwesu Louis, uyo wasebensa abantu baanji bapusenepusene kwa myaaka iinji muncito yakufwakashila mabungano alimwi apa Bethel, wakaamba ayi: “Ndeelesha kukoshanisha bantu bali boonse mbondasebensaabo kulubumbu lyakayakwa amabwe apusenepusene. Lubumbu lulalulama na mwabamba kabotu mabwe amwi ndyemutoyaka. Anebo ndeelesha kwaalulako shimwi kwaamba ayi lubumbu lululame kabotu.” Uyu ngumushimu ubotu abuumbi!

Ino ndilili ndyeenga twayandika kutondesha mushimu wakunyumfwana mulibungano? Tulaba acoolwe cakucita boobo ndyetuli kukakoto kesu ka kushimikila. Inga twasebensa abeshikushimikila bacite mikuli ipusenepusene mumukwashi kwiinda njetucite na mpashi mbotupuseneabo ciimo. Inga twaalula mbotushimikila kwaamba ayi tusebense munshila yeenga yapa mbotutosebensaabo kusangalala.

Muntu usebensa kabotu abamwi ngooyo ‘ulibambite kupako bamwi shintu.’ (1 Timo. 6:18) Yesu ndyaakalinga kusebensa pomwi abaIshi, cilyeelete wakabona kwaamba ayi Yehova taakalinga kumushisa shintu. Yehova ndyaakalinga “kubamba liculu,” Yesu “wakalingaako” alimwi alyeelete wakeeya kuswa kuli baIshi. (Tus. 8:27) Mukuya kwaciindi, Yesu alakwe wakalwiitako bashikwiiya bakwe ‘nshaakanyumfwa’ kuswa kuli baIshi. (Joni 15:15) Aswebo inga twakonkela cakubonenaako cakwe Yehova kwiinda mukulwiitaako bamakwesu abenankashi nshotwakeeya. Ncakutatoonsha kwaamba ayi muntu usebensa kabotu abamwi ulalwiitako bamwi makani eenga abacafwa muciindi cakuumunabo kwaamba ayi anoobeendelesha. Alakondwa kulwiitako bamwi shintu shibotu nshakeeya.

Alimwi inga twabayuminisha basebenshinyineesu. Soonse tulayuminishikwa abuumbi na muntu watulumba kuswa panshi lya moyo, pakusebensa cankusu kwesu. Yesu wakalinga kulwiita bashikwiiya bakwe shintu shibotu nshaakalinga kubona muli mbabo. (Amweelanye a Mateyo 25:19-23; Luka 10:17-20.) Alimwi wakabalwiita ayi ‘balaakucita shiinda pasheesho nshaakacita.’ (Joni 14:12) Mashiku kaatana kufwa, wakayuminisha batumwi bakwe bashomeka ayi: ‘Mwebo ndimwe mwekala anebo mumasunko angu oonse.’ (Luka 22:28) Amuyeeyebo mbobakayuminishikwa kunyumfwa maswi aya! Aboobo na katuyuminishako basebenshinyineesu, balaakukondwa alimwi cilaakubapa kucita shiinji.

Mukwesu waliina lya Kayode wakaamba ayi, “Muntu taeelete kuba umaninite kwaamba ayi acikoonshe kusebensa kabotu abamwi, sombi alapa kwaamba ayi bamwi basangalale alimwi aloobya ncito.” Sa amwebo mbomubete? Mpashi inga mweepushako bamakwesu abenankashi bamwi kwaamba ayi bamulwiiteko mbomusebensa ambabo. Na balasangalala kusebensa pomwi andimwe bweenka mbuli bashikwiiya bakwe Yesu mbobakalinga kusangalala kusebensaakwe, amwebo inga mwaamba bweenka bwakaamba mutumwi Paulo ayi: “Tuli basebenshinyinaanu kwaamba ayi mukondwe.”—2 Koli. 1:24, NWT.