Jesu hanaali kwa lihalimu, naaitutile tulemeno totunde tone tumutusize kuba mubeleki yomunde, mi hanaatile fa lifasi naali mutala omunde hahulu wa mutu yanaasebelisana hande ni babañwi. Luitutañi kwa mutala wa Jesu? Haiba lunyakisisa mutala wahae, lukaituta mwakubela babeleki babande mi mwa taba ye, lukanyakisisa likuka zetaalu zekona kulutusa kueza cwalo. Likuka zeo lika lutusa kuswalisana ni kusebelisana hande ni mizwale ni likaizeli baluna.

Mubeleki yomunde waikokobeza mi uunga babeleki babañwi kuli ki ba butokwa, haalikangi kuiponahalisa ku bona. Jesu naaitutile buikokobezo bo ku Ndatahe. Nihaike kuli Jehova ki yena feela yaswanela kubizwa Mubupi, naabata kuli babañwi bazibe musebezi wa butokwa wanaaezize Mwanaa hae hanaasebeza ni yena. Lulemuha taba yeo mwa manzwi anaabulezi Mulimu hanaaize: “Halueze mutu ka siswaniso saluna.” (Gen. 1:26) Jesu uswanela kuba yanaaitebuhile hahulu buikokobezo bwanaabonisize Jehova ka kubulela manzwi ao.—Samu 18:35.

Jesu hanaali fa lifasi, naabonisize buikokobezo bobuswana bo. Babañwi hane bamulumbile kabakala lika zanaaezize, naafile tumbo yeo ku Mulimu, yena yanaaswanela kulumbiwa. (Mare. 10:17, 18; Joa. 7:15, 16) Jesu naapilisani ni balutiwa bahae ka kozo mi naabaangile kuli ki balikani isiñi kuli ki batanga. (Joa. 15:15) Mane naatapisize mahutu abona kuli abatuse  kuba ni buikokobezo. (Joa. 13:5, 12-14) Ni luna luswanela kuunga batu bolubeleka ni bona kuba ba butokwa kufita kubeya zaluna mwa sibaka sapili. Haiba ‘lukuteka babañwi,’ mi lusebeza feela lusabilaeli kufiwa tumbo ki batu, lukapeta zeñata.—Maro. 12:10.

Mutu yaikokobeza hape waziba kuli “lika zakonda hakunani baelezi babañata.” (Liprov. 15:22) Kusina taba ni yeloseli yaluna kamba buikoneli bwaluna, luswanela kuhupula kuli hakuna mutu yaziba lika kaufela. Mane nihaiba Jesu naabulezi kuli kunani lika zeñwi zanaasa zibi. (Mat. 24:36) Hape naatabela kuziba zene banahana balutiwa bahae bane basika petahala. (Mat. 16:13-16) Ki lona libaka batu bane basebelisana ni yena hane batabela kuba ni yena. Haiba luikokobeza ni kuhupula kuli haluzibi lika kaufela, mi luteeleza kwa liakalezo za babañwi, lukapilisana ka kozo ni bona mi lika zelueza ‘likakonda.’

Baana-bahulu sihulu bakona kulikanyisa mutala wa Jesu wa buikokobezo habanze basebelisana hamoho. Baswanela kuhupula kuli moya wa Mulimu okenile wakona kususumeza muuna-muhulu ifi kamba ufi kutalusa sisupo sesika tusa kuli baeze katulo yeswanela. Haiba ka nako ya mikopano yabona, mañi ni mañi aikutwa kulukuluha kutalusa maikuto ahae, baana-bahulu bakaeza likatulo zekatusa puteho kaufela.

Mubeleki yomunde ubanga ni kutwisiso hanzaa sebelisana ni babañwi. Ki yabunolo mi hañañelelangi mihupulo yahae. Jesu hañata-ñata, naaiponelanga mo Ndatahe naaboniseza kutwisiso. Ka mutala, Jehova naamulumile fa lifasi kuli ato lukulula batu bane baatulezwi lifu.—Joa. 3:16.

Jesu naabonisize kutwisiso mwa miinelo yeshutana-shutana. Ka mutala, muhupule kuli nako yeñwi naatusize Musali yomuñwi wa Mufenisia nihaike kuli naalumilwe ku ba ndu ya Isilaele. (Mat. 15:22-28) Hape naabonisize kutwisiso ka kusalibelela kuli balutiwa bahae baeze lika zene basakoni kueza. Pitrosi mulikanaa hae yomutuna hanaa mulatuzi fapilaa batu, Jesu naamuswalezi. Hasamulaho, Jesu naafile Pitrosi buikalabelo bobutuna. (Luka 22:32; Joa. 21:17; Lik. 2:14; 8:14-17; 10:44, 45) Mutala wa Jesu ulutusa kulemuha kuli ‘kutwisiso yaluna [iswanela] kuzibahala kwa batu kaufela.’—Mafil. 4:5.

 Kuba ni kutwisiso hape kulutusa kuba bababunolo ilikuli lukone kusebelisana ka kozo ni batu babashutana-shutana. Jesu naapilisana hande ni babañwi kuli mane lila zahae zene mushwela muna neli mutamelelize kuli naali “mulikanaa batelisi ni baezalibi,” ili bane bateelelize kwa lushango lwahae. (Mat. 11:19) Sina Jesu, ni luna lwakona kusebelisana hande ni batu babashutana-shutana. Muzwale yabizwa Louis, ili yanaasebelize ni batu babashutana-shutana ka nako yanaali muokameli wa mupotoloho ni hanaali fa Betele, utalusa kuli: “Kusebelisana ni batu babasika petahala kuswana sina kuyaha limota ka kuitusisa macwe ashutana-shutana. Bakeñisa kuli macwe ao ashutana, mutu utokwa kueza buikatazo bobutuna ilikuli limota leo liotolohe hande. Ni na niezanga licinceho ilikuli nikone kusebelisana ka kozo ni batu babañwi ni kuli musebezi ukone kupetiwa.” Wo ki mubonelo omunde luli!

Ki mwa miinelo ifi moluswanela kubonisa kuli lwasebelisana hande ni batu bañwi mwa puteho yaluna? Lukona kueza cwalo haluli mwa sikwata saluna sa sebelezo ya mwa simu. Lukona kusebeza ni bahasanyi babanani buikalabelo bwa mwa lubasi bobushutana ni bwaluna, kamba ni mizwale ni likaizeli babali babahulu kamba banana ku luna. Lwakona kucinca mukutalezo waluna ilikuli batu bolusebeza ni bona babe ni tabo mwa bukombwa.

Mubeleki yomunde ‘utabela kuikabela ni babañwi.’ (1 Tim. 6:18) Jesu hanaasebelisana ni Ndatahe, naalemuhile kuli Jehova naasapata-patangi lika. Jehova “hanaalukisa mahalimu,” Jesu ‘naaliteñi’ mi naaitutile ku yena. (Liprov. 8:27) Hasamulaho, Jesu naataluselize balutiwa bahae ‘lika kaufela zanaautwile’ ku Ndatahe. (Joa. 15:15) Ka kulikanyisa Jehova, ni luna luswanela kutabela kutaluseza mizwale ni likaizeli baluna lika zeluitutile. Mubeleki yomunde hapatelangi batu basebelisana ni bona lika zebatokwa kuziba kamba zekona kubatusa kabakala kuli uikalelwa kuli haiba baziba lika zeo, baka muyola fa musebezi. Utabela kutaluseza babañwi lika zende zaitutile.

Hape lwakona kususueza batu bolusebelisana ni bona. Lwatiiswanga mutu yomuñwi halemuha buikatazo bolueza ni kuitumela ku luna. Jesu naataluselize batu banaasebeza ni bona lika zende zanaalemuhile ku bona. (Mubapanye Mateu 25:19-23; Luka 10:17-20.) Mane naabataluselize kuli nebaka ‘eza misebezi yemituna hahulu kufita’ yanaaezize. (Joa. 14:12) Fa busihu bone butatamiwa ki busihu bwanaabulailwe, Jesu naababalize baapositola bahae babasepahala kuli: “Ki mina babatiiselize ni na mwa litiko zaka.” (Luka 22:28) Munahane feela mone batiiselizwe baapositola kuutwa manzwi ao. Ni luna haiba lubabaza batu bolusebelisana ni bona, bakaba ni tabo mi bakona kususuezwa kueza zeñata.

Muzwale yabizwa Kayode utalusa kuli: “Mutu haatokwi kuba yapetahalile kuli abe mubeleki yomunde, kono utokwa kutusa babeleka ni bona kuba ni tabo, mi ubaimulula kwa misebezi yabona.” Kana ni mina ki mona momuinezi cwalo? Mwendi mwakona kubuza mizwale ni likaizeli bamina kuli bamituse kuziba kuli mu babeleki babacwañi. Haiba baikola kusebeza ni mina sina feela balutiwa ba Jesu hane baikozi kusebeza ni yena, uzibe mwakona kubulela sina mwanaabulelezi muapositola Paulusi yanaaize: “Lubeleka hamoho ni mina kuli mube ni tabo.”—2 Makor. 1:24.