Yesu alinangwile vilinga vyamwaza omu azachilenga hamwe naIse, kahechi chamulingishile apwenga muka-kuzata kanawa navakwavo omu apwile hano hamavu. Tunahase kulinangulako ika kuli Yesu? Kukekesa chakutalilaho chenyi chinahase kutukafwa tuwane jindongi jitatu jize najitulingisa tuzatenga kanawa navakwetu. Eji jindongi najitukafwa chikuma tulinunge hamwe navandumbwetu.

Mutu uze eji kuzatanga kanawa navakwavo apwa wakulinyisa, amona vakwavo muvazachila kupwa vavalemu kaha kasaka kulisolola nge ikiye atachikiza vyavivuluko. Muchima kanou wakulinyisa ukiko Yesu alinangwile kuli Ise. Numba tuhu Yehova ukawenyi kaha ikiye apwa Tengi, oloze asakile vatu veka vatachikize mulimo waulemu azachile Mwanenyi. Twatachikiza ngocho mwomwo yamazu ahanjikile Kalunga akwamba ngwawo: “Tutenge mutu muchifwanyisa chetu.” (Kupu. 1:26) Yesu atachikijile ngwenyi Ise apwa wakulinyisa chikupu omu ahanjikile mazu kana.—Samu 18:35.

Omu Yesu apwile hano hamavu naikiye asolwele muchima kanou wakulinyisa. Omu vatu vamusangejekele havyuma alingilenga ikiye alishilenga Kalunga. (Mako 10:17, 18; Yowa. 7:15, 16) Yesu azachilenga mukuunda natumbaji twenyi, kaha avamwenenga kupwa masepa jenyi keshi nge vandungoko. (Yowa. 15:15) Avasanyishile nakumahinji mangana avanangule mwakupwila vakulinyisa.  (Yowa. 13:5, 12-14) Nayetu nawa twatela kuvumbika vakwetu mutwazachila muchishishisa chakulimona etu vavene kupwa vavalemu. Nge natuvumbikanga vakwetu nakuhona kufwila kutwalisa kaha tunahase kutesamo vyuma vyavivulu.—Loma 12:10.

Mutu wakulinyisa atachikiza nawa ngwenyi, “vyuma vyeji kutesangamo nge vaka-kulweza mangana vanavulu.” (Vishi. 15:22) Chamokomoko nauhashi chipwe chinyingi twatwama nacho twatela kutachikiza ngwetu kakweshi mutu atachikiza vyuma vyosenako. NaYesu etavilile ngwenyi katachikijile vyuma vyosenako. (Mateu 24:36) Evwilenga kuwaha kwivwilila vyuma vahanjikilenga tumbaji twenyi vakuhona kukupuka. (Mateu 16:13-16) Echi chikiko chalingishile vatu vaze azachilenga navo vapandame kuli ikiye. Chochimwe nayetu nawa, kachi nge natulinyisa nakwanuka ngwetu katwatachikiza vyuma vyosenako, nakwivwilila vyuma navahanjika vakwetu, kaha nachitulingisa tutwame navo mukuunda ‘nakutesamo’ vyuma tunajinyi kulinga.

Chikumanyi tulama vatela kulondezeza chakutalilaho chaYesu omu navazatanga navakwavo tulama. Vatela kutachikiza ngwavo shipilitu yajila yinahase kutwaminyina kala kalama halizavu lyavakulwane omu navasakula vyakulinga. Kachi nge tulama vali kukuliwana chavakulwane, vosena vatela kupwa vakukasunuka kuhanjika vyuma vali nakushinganyeka, echi nachivalingisa vasakule kanawa vyakulinga vize navinganyalisa chikungulwilo chosena.

Mutu uze asaka kuzata kanawa navakwavo apwa muka-kwashiwisa muchima. Atwama namuchima wauvwovu. Yesu amwene ngwenyi Ise apwile muka-kwashiwisa muchima omu vapwilenga hamwe. Chakutalilaho, Yehova amutumine kwiza nakusokola vatu kukufwa.—Yowa. 3:16.

Yesu ashiwishilenga muchima kachi nge chinatemo kulinga ngocho. Anukenu omu akafwile pwevo wakaFwenyisha numba tuhu vamutumine kuya nakukafwa vatu vakuzuvo yaIsalele kaha. (Mateu 15:22-28) Ashiwishile nawa muchima omu apwilenga natumbaji twenyi. Omu Petulu uze apwile sepa lyenyi amukanyine hameso avatu, Yesu amukonekelele. Kufumaho amuhanyine mulimo waulemu chikuma. (Luka 22:32; Yowa. 21:17; Vili. 2:14; 8:14-17; 10:44, 45) Chakutalilaho chaYesu chatukafwa tumone ngwetu twatela kulinga vyuma vize navilingisa ‘vatu vosena vamone ngwavo twapwa tuvaka-kwashiwisa muchima.’—Fwili. 4:5.

 Kwashiwisa muchima nachitukafwa nawa tuhase kuzata navatu vakulisezaseza mukuunda. Yesu atwaminenga kanawa navatu vosena, echi chalingishile vaka-kole jenyi vamuvangijikile “ngwavo apwa sepa lyavaka-kutambula mitelo navaka-shili” vaze vetavilile mujimbu ambulwilenga. (Mateu 11:19) Kutala tunahase kulondezeza Yesu hakuzata kanawa navatu vakulisezaseza tahi? Ndumbwetu Louis uze nazate navatu vakulisezaseza haMbetele namumulimo wakutambwojoka ambile ngwenyi: “Kuzachila hamwe navandumbwetu vakuhona kukupuka chinafwane nge kutunga zuvo namalwola akulisezaseza mukutohwa. Muka-kutunga asakiwa kuzata nangolo nakusungamisa kanawa numba zuvo yoloke. Shikaho nayami ngunalumunangako vyuma vimwe mukuyoya chami mangana nguzate mukuunda navakwetu nakutesamo mulimo.” Muchima kana wamwaza.

Tunahase nawa kwashiwisa muchima omu natupwanga hamwe navandumbwetu. Muchima kana tunahase kuusolola kachi nge tuli kukuliwana chakuya muwande. Vanahase kutupanga tuzate navandumbwetu vaze vali namilimo yakulisezaseza yakuzakama tanga kuhambakana yize tuli nayo, chipwe vaze vali namyaka yakulihandununa nayetu. Kutala tunahase kwalumunako tambukiso yetu chipwe kwambulula kuzachisa jila yize vali nakusaka mangana navakiko valivwise kuwaha tahi?

Mutu uze eji kuzatanga kanawa navakwavo apwa ‘wakulizanga kulipangila vyuma navakwavo.’ (Chimo. 1, 6:18) Omu Yesu apwile nakuzata hamwe naIse, pamo amwene ngwenyi Ise kamuswekelelelenga vyumako. Chakutalilaho, omu Yehova “atengele melu” Yesu ‘kwapwile,’ kaha alinangwileko kuli ikiye. (Vishi. 8:27) Kufumaho, Yesu naikiye alwezeleko tumbaji twenyi vyuma ‘vyosena vize evwile’ kuli Ise. (Yowa. 15:15) Shikaho nayetu nawa twatela kulondezeza Yehova hakulwezangako vandumbwetu vyuma twalinangula. Mutu uze eji kuzatanga kanawa navakwavo kasaka vakwavo vapendaminenga kaha hali ikiye hakuvaswekela vyuma vize natachikiza ngwenyi navivakafwako. Oloze eji kwivwanga kuwaha kulwezako vakwavo vyuma alinangula.

Tunahase nawa kukolezeza vakwetu vaze natuzatanga navo. Kutala kamweshi kwivwa kuwaha kachi nge mutu mwamisakwilila hamilimo muli nakuzatako tahi? Yesu asangejekelenga vatu vaze azachilenga navo hakumona vilinga vyamwaza vapwilenga navyo. (Esekesenuko Mateu 25:19-23; Luka 10:17-20.) Kaha nawa avalwezele ngwenyi ‘navakazata milimo yakuhambakana’ yize azachile. (Yowa. 14:12) Haufuku wamakumishilo shimbu kanda afwenga, asangejekele vaposetolo jenyi vakushishika ngwenyi: “Enu yenu munalinjilila kuli ami muvyeseko vyami.” (Luka 22:28) Twafwelela chikupu ngwetu mazu ahanjikile avakwachile kumuchima nakuvalingisa vazate natwima. Nayetu nawa kachi nge natusangejekanga vaze tuli nakuzata navo kaha navawahilila nakuzata kanawa milimo.

Ndumbwetu walunga Kayode ambile ngwenyi: “Mutu uze eji kuzatanga kanawa navakwavo kasakiwa kupwa wakukupukako, oloze eji kulingisanga vakwavo vapwenga vakuwahilila nakuvalingisa nawa vapwenga vakukasunuka kuzata nenyi.” Kutala omu mukiko mwapwa nayenu tahi? Munahase kuhulisako vandumbwenu vamilweze numba nge mweji kuzatanga kanawa navakwenu nyi chiku. Kachi nge vandumbwetu veji kwivwanga kuwaha kuzata nayenu ngana muze tumbaji valivwishile kuwaha kuzata naYesu, kaha munahase kuhanjika ngana muze ahanjikile kaposetolo Paulu ngwenyi: “Tunapu tuvakwenu mutwazachila hamwe mangana mupwenga vakuwahilila.”—Koli. 2, 1:24.