Yesu wadizili yilwilu yamukwashili kwikala mukwakukalakala wamuwahi. Nichenjiliyi hanu hamaseki wazatileña chiwahi nawantu. Chakutalilahu chaYesu chinateli kutukwasha ñahi? Neyi tudiza nsañu yindi, tukwiluka yishina yisatu yikutukwasha kuzataña chiwahi nawakwetu. Iyi yishina yikutukwasha kwikala anuñañana nawamanakwetu.

Muntu wazataña chiwahi nawakwawu wayilemeshaña hakeñaña kudimwekesha nindi wayibadikaku. Yesu wadizili chilwilu chakudizoza kudi Tata yindi. Hela chakwila Yehova hohu diyi itwatela kutena netu Nleñi, wakeñaña antu eluki mudimu walema wazatiliyi Mwanindi. Mazu ahosheliyi Nzambi nindi: ‘Twilenu muntu neyi chitwekala etu” atukwashaña kwiluka chumichi. (Kutach. 1:26) Yehova chahosheliyi awa mazu Yesu welukili nindi Yehova wadizoza.—Mas. 18:35.

Hampinji yadiñayi Yesu hamaseki wamwekesheli nindi wadiña wadizoza. Antu neyi anakumuhameka hanyidimu yazatileñayi niyena wamuhamekeleña Nzambi. (Maku 10:17, 18; Yow. 7:15, 16) Yesu wazatileña nañovu kulonda yatwalekihu kwikala mukuwunda nawatumbanji twindi nawa wayimweneña nindi amabwambu  jindi bayi anduñuku. (Yow. 15:15) Wayiwelesheli kunyendu yawu kulonda yayidizishi chakwikala adizoza. (Yow. 13:5, 12-14) Ninetu twatela kuyilemeshaña akwetu itwazataña nawu chatela tutwamijeñaku yuma yitwafwilaña. Neyi tudilemeshaña wumu namukwawu nikubula kwakama muntu atela kuhamekawu, tukuzataña nyidimu yayivulu.—Rom. 12:10.

Muntu wadizoza weluka cheñi nindi, “havula akwakushakama hampuña yakolaña.” (Yish. 15:22) Hela chakwila tweluka nyidimu hela tweluka chakuyizata, twatela kwanuka netu kwosi muntu weluka yuma yejima. NiYesu welukili nindi kudi yuma yabulili kwilukayi. (Mat. 24:36) Wakeñeleña cheñi kwiluka yuma yelukiliwu hela yatoñojokeleña atumbanji twindi abula kuwanina. (Mat. 16:13-16) Dimuloña waweni atumbanji twindi atiyileña kuwaha kwikala nindi! Munjila yoyimu neyi twadizoza nawa twanukaña netu wejima wetu hitweluka yuma yejimaku nawa tutiyililaña kuyitoñojoka yawakwetu, tukuleta kuwunda. Yuma yitukuzataña wejima wetu yikulumbulukaña hohu.

Sweje-e akulumpi atela kumwimbujola Yesu neyi anakuzatila hamu. Atela kwanuka nawu spiritu yajila yinateli kukwasha mukulumpi wudi wejima kuhosha yuma yinateli kuyikwasha kufukula chiwahi. Neyi anabulakani hamu akulumpi atela kumona nawu mukulumpi wudi wejima nekali wakasunuka kushimuna yitoñojoka yindi nawa neyi azatila hamu chikuyikwasha kufukula yuma yikukwasha chipompelu chejima.

Muntu wazataña chiwahi nawakwawu wekalaña wamwovu neyi nakuzata nawakwawu nawa wetejaña yitoñojoka yawakwawu. Yesu wamweneña Tata yindi chamwekesheleñayi kwovwaha. Chakutalilahu, Nzambi wamutemesheli kulonda yayamwini antu kukufwa hela chakwila chayiteleleli.—Yow. 3:16.

Yesu wetejeleña yitoñojoka yawantu neyi hanateleli. Anukenu chamukwashiliyi mumbanda Kafwenisa hela chakwila amutemesheli kukwasha antu amwitala daIsarela. (Mat. 15:22-28) Wadiña cheñi wamwovu nawatumbanji twindi. Dichi hanyima yakumukaana kudi ibwambu dindi Petulu hadi antu amavulu, Yesu wamwanakeneni. Nkumininaku wamwinkeli Petulu nyidimu yalema. (Luka 22:32; Yow. 21:17; Yilw. 2:14; 8:14-17; 10:44, 45) Chakutalilahu chaYesu chamwekeshaña nawu twatela “[ku]mwekesha  kwovwaha kudi antu ejima” kuhitila mukwiteja yitoñojoka yawu.—Fwili. 4:5.

Kwikala amwovu cheñi kukutukwasha kuzatila hamu nawantu ejima mukuwunda. Yesu wahandileña chiwahi nawantu adiñayi nawu. Chakwila ayilumbu jindi amwinkeleña nyiloña nawu wadiña “ibwambu dawakwakutambula nyisonku niakwanshidi.” (Mat. 11:19) Komana ninetu tunateli kuzata chiwahi nawantu ejima? Manakwetu Louis wunazati mumudimu wakwenda nawa wunazatili haBeteli nawantu amavulu nawa amboka-mboka wahosheli nindi: “Kuzata nawantu abula kuwanina, kudi neyi kutuña itala namalola anyanya niamaneni. Chineli malola ekalaña anyanya niamaneni chakeñekaña kuzata nañovu, ilaña mbañu yekalaña yoloka. Nadihembaña kulonda tuzati nawakwetu mukuwunda hakwila tuzati mudimu.” Iyi hiyilwilu yayiwahi!

Mpinjinyi yitwatela kumwekesha netu twekala amwovu muchipompelu? Twatela kumwekesha netu tudi amwovu hampinji yitunakuzata nezanvu detu dakushimwina. Hadaha tunateli kuzata nawakwakushimwina akweti nyidimu yayivulu muchisaka kubadika yitukweti, hela akweti yaaka yashiyashana. Twatela kuzata nañovu kulonda twikali amwovu kuhitila mukuhimpa yilwilu yetu, twatela kuhimpa nzatilu yetu hakwila tushimwineña neyi chinakukeñawu kulonda ekaleña namuzañalu.

Muntu wazataña chiwahi nawakwawu ‘wayinkañahu yuma.’ (1 Tim. 6:18) Hampinji yazatileñayi Yesu naTata yindi, wamweni nindi hamuswekeleñahu chuma chidi chejimaku. Yehova haloñesheliyi mawulu, Yesu ‘wadiña kwoku’ nawa wadizilili kudi yena. (Yish. 8:27) Chimwahitili mpinji, Yesu niyena wayilejeli atumbanji twindi “yuma yejima yatiyiliyi” kudi Tata yindi. (Yow. 15:15) Dichi ninetu twatela kulejañaku amanakwetu niahela yuma yitweluka. Muntu wazataña chiwahi nawakwawu, wayijindaña wanyi chuma chidi chejima kulonda yayiyuuleña. Wayilejaña yuma yejima yelukayi.

Twatela cheñi kuyikolesha akwetu mutwazatilaña. Neyi muntu yamona chitunakuzata nañovu nawa yatusakilila, komana twatiyaña kuwaha wanyi? Yesu wayilejeleña atumbanji twindi yuma yayiwahi yamweneñayi mudi wena. (Esekejenu Matewu 25:19-23; Luka 10:17-20.) Wayilejeli nindi ‘akazata nyidimu yabadika nyidimu yazatiliyi.’ (Yow. 14:12) Hawufuku wakwila henohu kanda yafwi, wayihamekeli apostolu indi ashinshika nindi: “Enu iyenu munatwalekihu kuumikila hamu nanami mukweseka kwami.” (Luka 22:28) Mazu ahosheliyi ayikolesheli apostolu nawa ayiletesheli kuzata nankashi. Ninetu neyi twikala nampinji yakuyikolesha akwetu mutwazatilaña, akwikala namuzañalu nawa akudikitaña nankashi.

Manakwetu Kayode wahosheli nindi: “Muntu wazataña chiwahi nawakwawu hakeñekaña kwikala wawaninaku, wayizañaleshaña akwawu nawa hayikoleshelaña mudimuku.” Komana ninenu dichimwekala? Hadaha munateli kutambikaku manakwenu hela muhela kulonda ayileji chimwekala. Neyi atiyaña kuwaha kuzata nanenu neyi chatiyileñawu atumbanji twaYesu kuzata nayena mukuhosha neyi chahosheliyi kapostolu Pawulu nindi: “Tudi akwakukalakala hamu nanenu.”—2 Kor. 1:24.