Isua chuan vâna a awm laiin, hnathawhpui ṭha nihtîrtu miziate a zir a. Leia a awm lai pawh khân, ani chu mi dangte thawhpuina kawnga entawn tûr ṭha tak a ni. Engtin nge Isua entawn tûr siam chu kan hlâwkpui theih? A entawn tûr siam bih chianna hmangin, hnathawhpui ṭha ni tûra min ṭanpui theitu thu bul pathum kan hre thei a ni. Chûng thu bulte chuan kan unaute nêna inpumkhat lehzual tûrin min ṭanpui ang.

Hnathawhpui ṭha chu a inngaitlâwm a. A thawhpuite chu a ngai pawimawh thiamin, mahni inngaihventîr a tum lo. Isua chuan chu inngaihtlâwmna rilru put hmang chu a Pa hnên aṭangin a zir a ni. Jehova chauh chu Siamtu tia koh phû ni mah se, ani chuan a hnathawhpui a Fapa thiltih pawimawh tak takte chu mi dangte pawhin hria se a duh a. Chu chu: ‘Kan anpuiin, mihring siam ila,’ tia a sawiah hian kan hmu thei a ni. (Gen. 1:26) Isua chuan hemi chungchânga Pathian Jehova inngaihtlâwmna chu a ngaihlu hle ngei ang.—Sâm 18:35.

Isua chuan leia a awm laiin, chutiang inngaihtlâwmna chu a lantîr a. A thiltihte avânga mite’n an chawimawi khân, a phû Bertu hnênah chawimawina a hlân a ni. (Mk. 10:17, 18; Joh. 7:15, 16) Isua chuan a zirtîrte nêna an awmho khân, boruak muanawm tak a siam a, anni chu bâwih ang ni lovin, ṭhiante angin a thlîr a. (Joh. 15:15) Inngaihtlâwmna chungchâng zirtîr nân, an kête a silsak hial a ni. (Joh. 13:5, 12-14) Keini pawhin kan hnathawhpuite  chu kan mi mal ngaihven zâwngte aia anmahni ngaihven zâwngte dah pawimawhsak zâwkin kan chawimawi ve tûr a ni. Mite fak hlawh nih tum lo va, chutianga ‘kan inchawimawi tawn’ a nih chuan, kan thil hlenchhuahte chu a nasa lehzual ang.—Rom 12:10.

Mi inngaitlâwm chuan, “Remhria an tam chuan a hlawhtling ṭhîn,” tih pawh a hria a. (Thuf. 15:22) Kan thiltawnte leh theihnate chu eng pawh ni se, mihring tu mah hian thil engkim an hre vek thei lo tih kan hre reng tûr a ni. Isua ngei pawhin a hriat loh thilte a awm tih a pawm a. (Mt. 24:36) Chu bâkah, ṭha famkim lo a zirtîrte ngaih dân pawh hriat a duh a ni. (Mt. 16:13-16) A hnathawhpuite’n a bula awm nuam an ti pawh hi a mak lo ve! Chutiang bawkin, inngaihtlâwmna kan neih a, thil engkim kan hre vek thei lo tih kan pawm a, mi dangte thusawi kan ngaihthlâksak hian, remna kan awmtîr a, kan thawhhonate chu “a hlawhtling ṭhîn.”

Hemi chungchângah hian kohhran upate’n an thawhhonaah Isua an entawn a pawimawh lehzual a. Thlarau thianghlim chuan an zînga a tua pawh a chêttîr thei tih an hre reng tûr a ni. Kohhran upate chuan ṭhuthona an neih hunah, sawihonaa an tel ṭheuh theih nâna boruak muanawm tak an siam a nih chuan, kohhran pum hlâwkpui tûr thu tlûknate an siam thei ang.

Hnathawhpui ṭha chuan a thawhpuite a cheibâwl dânah a âwm tâwk a hria a. Ani chu insiamrem thei tak leh nunnêm tak a ni. Isua chuan a Pain a âwm tâwk a hriatzia hmuh theihna hun remchâng ṭha tak a nei a. Entîr nân, Jehova chuan ani chu thihna ata mihringte chhandam tûrin a tîr a ni.—Joh. 3:16.

Isua chu a ṭûl hunah, a nih loh leh a inâwm hunah chuan nunnêm tak a ni a. Israel hnam hnêna tirh ni mah se, Kanaan hmeichhe pakhat a ṭanpui dân kha hre reng rawh. (Mt. 15:22-28) A zirtîrte laka a beiseinaah pawh a âwm tâwk a hre bawk. A ṭhian hnai tak Petera’n mite hmaa a phatsan hnuah, Isua chuan ani chu a ngaidam a. A hnuah, Petera chu mawhphurhna lian tak tak a pe a ni. (Lk. 22:32; Joh. 21:17; Tirh. 2:14; 8:14-17; 10:44, 45) Isua entawn tûr siam chuan, keini pawhin nunnêmna lantîrna hmangin, “a âwm tâwk [kan] hriatzia mi zawng zawng hmaah [kan] lantîr” tûr a ni tih a târ lang a ni.—Phil. 4:5, NWT.

A âwm tâwk hriatna chuan mi chi hrang hrang nêna inrem taka hna thawk thei tûrin min chêttîr bawk ang. Isua chuan a vêla mite chu ṭha taka a cheibâwl avângin amah thîktu a hmêlmate chuan a thuchah chhâng lêttu “chhiahkhawntute leh mi  sualte ṭhian,” tiin an sawisêl hial a ni. (Mt. 11:19) Isua angin, mi dangte chu lungrual takin kan tawhpui ve thei ang em? Bial a kannaah leh Bethel-a rawng a bâwlnaa unau hrang hrang thawhpuitu unau Louis-a chuan: “Ṭha famkim lo mi dangte nêna thawhho chu lung intiat lote hmanga sak bang ang a ni a. Lungte chu a intiah loh avângin thawhrim ngai lehzual mah se, bang chu ngîl taka sak zawh theih a ni. Chutiang bawkin, ṭha taka kan hnate hlen thei tûra mi dangte nêna inrem taka kan thawhho theih nân, mi mal insiamremnate ka nei ṭhîn a ni,” tiin a sawi. Rilru put hmang ṭha a va ni êm!

Tualchhûng kohhrana unaute nên lungrual taka thawhho theihna hun remchâng kan nei em? Kan field service group-a unaute nên kan thawhho hunah chutiang hun remchâng chu kan nei a ni. Kan neih ang ni lo chhûngkaw mawhphurhna dangte chelhtu, a nih loh leh kan rualpui ni lo thuchhuahtute nên kan thawkho mai thei a. Rawngbâwlnaa hlimna an neih lehzual theih nâna anmahni ṭanpui nân kan kal chak dân, a nih loh leh kan thusawi dânte chu kan siamrem thei ang em?

Hnathawhpui ṭha chuan “mi dangte sem ve” tûrin a inpeih a ni. (1 Tim. 6:18, C.L. Re-edited) Isua chuan a Pa Jehova bula hna a thawh lai khân, a Pa chuan thil a thup ngai lo tih a hre ngei ang. Isua chu Jehova’n ‘vânte a tihngheh laia’ a “awm” ve avângin, a hnên aṭangin a inzir thei a ni. (Thuf. 8:27) A hnuah, Isua ngeiin a Pa hnên aṭanga ‘a thil hriatte’ chu a zirtîrte hnêna hrilh chhâwn nuam a ti a. (Joh. 15:15) Chu a entawn tûr siam chu hre rengin, keini pawh kan thil hriatte leh thiltawnte chu kan thawpuite hnênah kan hrilh chhâwng ve tûr a ni. Ni e, hnathawhpui ṭha chuan a thawhpuite hriat ngai, a nih loh leh an hriat atâna ṭhate chu hrilh loh leh thup bo a tum lo vang a. Mi dangte hnên aṭanga a thil zir ṭha tak takte chu a hnathawhpuite hnêna hrilh chhâwn nuam a ti hle zâwk ang.

Kan hnathawhpuite chu mi tichak thei tak fuihna thute kan hrilh thei bawk. Tu emawin kan thawhrimna a hmuh a, a lâwmzia min hrilh hian, kan hlim tak zet a ni lâwm ni? Isua chuan a hnathawpuite chu an thil ṭha tihte avângin a fak a. (Matthaia 25:19-23; Luka 10:17-20 nên khaikhin rawh.) A thiltih “aia thil ropui zâwk pawh” an la ti dâwn tih a hrilh a ni. (Joh. 14:12) A thih hma zân khân, a tirhkoh rinawmte chu heti hian a fak a ni: “Thlêmna ka tawh chhûng zawng nangni mi awmpuitu in ni,” tiin. (Lk. 22:28) A thusawiin an thinlung a khawih dân tûr leh thil ṭha ti tûra a chêttîr dân tûr chu han mitthla teh! Kan hnathawpuite chu kan fak ṭhîn a nih chuan, an hlim lehzual ang a, hnathawhnaah ṭhahnem an ngai lehzual ngei ang.

Unau Kayode-a chuan: “Hnathawhpui ṭha chu ṭha famkim a nih a ngai lo; ani chuan a vêla mite chu a tihlimin, a thawhpuite tân hnathawh a tiawlsam lehzual a ni,” tiin a sawi. Chutiang hnathawhpui ang chu i ni em? Engvângin nge i hnathawhpui i Kristian unaute chu hemi chungchânga nangmah an hmuh dân che i zawh loh vang? Isua chu a zirtîrte’n thawhpui nuam an tih anga unaute’n thawhpui che nuam an tih chuan, tirhkoh Paula angin: “In lâwmna ṭanpuitu kan ni,” tiin i sawi ve thei ang.—2 Kor. 1:24.