Tej tten Jesús toj kyaʼj, el tkanoʼn kyiʼj tbʼanel tmod Jehová. Ex onin jlu tiʼj tuʼn kytzalaj txqantl tej kyaqʼunan tukʼil. Ex tej tten tzalu twitz Txʼotxʼ, kubʼ tqʼoʼn jun tbʼanel techel kywitz qeju e onin tukʼil. ¿Tzeʼn jaku tzʼonin qiʼj aju techel kyaj tqʼoʼn Jesús qwitz? Aj qxnaqʼtzan tiʼj, kʼelel qnikʼ kyiʼj oxe nabʼil jaku che onin qiʼj tuʼn qtzalaj aj qaqʼunan junx kyukʼil txqantl ex tuʼn kukx tten mujbʼabʼil qxol.

Aju xjal in nonin tuʼn kytzalaj txqantl, mintiʼ in jaw tnimsan tibʼ ex in nok tqʼoʼn kyoklen qeju in che aqʼunan tukʼil. Atzun tmod Jehová lu el tkanoʼn Jesús. Maske oʼkx Jehová Bʼinchalte tkyaqil, ok tqʼoʼn toklen taqʼun Jesús tej tonin tiʼj. Ex in nel qnikʼ tiʼj jlu kyuʼn qe tyol Jehová jlu: «Qbʼinchan kubʼ xjal ik tzaʼnx qe qilbʼilal» (Gén. 1:26). Tej tqʼama Jehová jlu, el tnikʼ Jesús tiʼj qa mintiʼ in jaw tnimsan tibʼ Tman (Sal. 18:35).

Tej tten Jesús tzalu twitz Txʼotxʼ, mintiʼ jaw tnimsan tibʼ. Xi tqʼamaʼn kye xjal tuʼn tjaw kynimsaʼn Jehová ex nya a tuʼn tjaw nimsaʼn (Mar. 10:17, 18; Juan 7:15, 16). Ok tilil tuʼn Jesús tuʼn tten mujbʼabʼil kyxol kyukʼil t-xnaqʼtzbʼen ex e ok tqʼoʼn ik tzeʼn qe tamiw ex nya ik tzeʼn qe tmajen (Juan 15:15). Axpe ikx, el ttxʼjoʼn kyqan t-xnaqʼtzbʼen tuʼn t-xi tyekʼin kye qa nim toklen tuʼn tkubʼ kyin kyibʼ (Juan 13:5, 12-14). Ik tzeʼn bʼant tuʼn Jesús, tbʼanel qa ma tzʼok qqʼoʼn kyoklen qukʼil ex qa ma qo ximen kyiʼj. Qa mintiʼ ma qo ximen tiʼj  alkye mas tbʼanel taqʼun ma bʼant ex qa ma tzʼok qqʼoʼn qoklen qxolx, jaku bʼant jun tbʼanel aqʼuntl quʼn (Rom. 12:10).

Aju xjal mintiʼ in jaw tnimsan tibʼ, in nel tnikʼ tiʼj qa ax tok qe yol lu: «Qa at nim qʼol consej bʼaʼn nneʼla» tkyaqil (Prov. 15:22). Maske at nim qojtzqibʼil moqa jaku bʼant nim aqʼuntl quʼn, bʼaʼn tuʼn ttzaj qnaʼn qa ni jun xjal ojtzqiʼn tkyaqil tuʼn. Axpe ikx te Jesús tqʼama qa mintiʼtoq ojtzqiʼn tkyaqil tuʼn (Mat. 24:36). Ex kubʼ tyekʼin qa tajtoq tuʼn tok tbʼiʼn aju kubʼ kyximen t-xnaqʼtzbʼen maske aj il qe (Mat. 16:13-16). Tuʼntzunju, e tzalaj tej kyten tukʼil. Yajtzun qe, ¿tiʼ jaku bʼant quʼn tuʼn kytzalaj txqantl aj qaqʼunan kyukʼil ex tuʼn tel bʼaʼn qaqʼun? Tnejel, bʼaʼn tuʼn tkubʼ qin qibʼ. Tkabʼin, bʼaʼn tuʼn tel qnikʼ tiʼj qa mlay bʼant tkyaqil quʼn. Ex toxin, bʼaʼn tuʼn tok qqʼoʼn toklen kyximbʼetz txqantl.

Mas nim toklen tuʼn tkubʼ kyin kyibʼ ansyan ik tzeʼn te Jesús aj kyaqʼunan junx. Bʼaʼn tuʼn ttzaj kynaʼn qa jaku tzʼonin xewbʼaj xjan tiʼj alkyexku kye tuʼn ttzaj tqʼamaʼn jun tyol, aju jaku tzʼonin kyiʼj tuʼn tjaw kyskʼoʼn aju mas bʼaʼn. Qa ma txi kyqʼoʼn ansyan ambʼil kye kykyaqil tuʼn kyyolin aj tok kychmabʼil, kʼonil aju kbʼel kyximen tiʼj kʼloj okslal.

Qa tbʼanel tmod jun xjal, in ximen kyiʼj txqantl aj taqʼunan kyukʼil. Tuʼntzunju, mintiʼ in ximen tiʼj tuʼn tbʼant oʼkx te tajbʼil ex in xi tqʼoʼn ambʼil kye txqantl. Jaku txi qqʼamaʼn qa nimku maj ok tqʼoʼn Jesús twitz tiʼj qa in ximen Tman kyiʼj txqantl. Jun techel, tzaj samaʼn tuʼn Jehová tuʼntzun kyklet xjal tiʼj kamik (Juan 3:16).

Kubʼ tyekʼin Jesús qa ximen tiʼj teyele junjun xjal. Bʼaʼn tuʼn ttzaj qnaʼn qa onin tiʼj jun xuʼj te Canaán maske oʼkx tzaj samaʼn tuʼn tonin kyiʼj aj Israel (Mat. 15:22-28). Ax ikx, ximen kyiʼj t-xnaqʼtzbʼen tej mintiʼ xi tqanin mas tiʼchaq kye twitzju jakutoq bʼant kyuʼn. Ex kubʼ tnajsaʼn Jesús til apóstol Pedro tej tqʼama qa mintiʼtoq ojtzqiʼn twitz tuʼn ex xi tqʼoʼn mas toklen (Luc. 22:32; Juan 21:17; Hech. 2:14; 8:14-17; 10:44, 45). Aju techel kyaj tqʼoʼn Jesús qwitz, in tzaj tyekʼin qe qa nim toklen tuʼn t-xi qqʼoʼn ambʼil kye txqantl tuʼntzun tkubʼ qyekʼin qa in qo ximen kyiʼj (Filip. 4:5).

Qa in qo ximen kyiʼj txqantl, kʼokel tilil quʼn tuʼn qaqʼunan toj mujbʼabʼil tukʼil alkyexku  xjal. Kubʼ tyekʼin Jesús tbʼanel tmod kyukʼil kykyaqil xjal, tuʼntzunju, tzaj txʼaʼl tiʼj kykʼuʼj aj qʼoj tiʼj ex kyqʼama qa ok tamiwen tibʼ kyukʼil peyil pwaq ex qe aj il e ok lepeʼ tiʼj (Mat. 11:19). ¿Jakupe tzʼel qkanoʼn tiʼj Jesús ex jakupe qo aqʼunan tukʼil alkyexku xjal? O tzʼajbʼen jun ermano Louis tbʼi te ansyan in bʼet kyojele Ja te Chmabʼil ex toj Betel, ex o tzʼaqʼunan kyukʼil erman te junxichaq tnam. In tzaj tqʼamaʼn jlu: «Toj nwitze, teyele junjun kʼloj erman in che ok ik tzeʼn jun pared bʼinchaʼn maj tukʼil abʼj, ateʼ junjun matij ex junjuntl tal chʼin. Qa ma che bʼaj tnukʼuʼna abʼj toj tumel jaku bʼant jun tbʼanel pared. Ax ikx weye, o tzʼok tilil wuʼne tuʼn tten tbʼanel nmode tuʼntzun waqʼunane toj mujbʼabʼil kyukʼil txqantl ex tuʼn tbʼant jun tbʼanel aqʼuntl». ¡Tbʼanelxix t-ximbʼetz ermano Louis!

¿Tzeʼn jaku kubʼ qyekʼin qa in qo ximen kyiʼj erman toj kʼloj okslal? Jun techel, bʼalo junxichaq kyabʼqʼi erman ateʼ toj qgrupo ex junxichaq tiʼ in bʼant kyuʼn. Aj qpakbʼan kyukʼil, bʼaʼn tuʼn t-xi qqanin kye tiʼ kyaj tuʼn tbʼant kyuʼn tuʼntzun kytzalaj tiʼj pakbʼabʼil.

Qa in kubʼ tyekʼin jun xjal tbʼanel tmod kyukʼil txqantl, in xi tqʼoʼn chʼin kye (1 Tim. 6:18). Tej tonin Jesús tiʼj Tman, el tnikʼ tiʼj qa mintiʼ kubʼ tewin jun tiʼ twitz. «Tej tbʼant twitz kyaʼj» tuʼn Jehová, ten Jesús tukʼil ex jakutoq tzʼel tiʼn nim xnaqʼtzbʼil tiʼj (Prov. 8:27). Tej tbʼet ambʼil, xi tqʼamaʼn Jesús kye t-xnaqʼtzbʼen aju ok tbʼiʼn tiʼj Tman (Juan 15:15). Bʼaʼn tuʼn tel qkanoʼn tiʼj techel in kubʼ tqʼoʼn Jehová qwitz ex qyekʼinx kye txqantl erman aju o tzʼel qnikʼ tiʼj. Qa qaj tuʼn kytzalaj txqantl aj kyaqʼunan qukʼil, mintiʼ tuʼn tkubʼ qewin jun tqanil nim toklen noq tuʼnju nya qaj tuʼn tok kybʼiʼn tzeʼn in bʼant junjun aqʼuntl. Sino kʼokel tilil quʼn tuʼn t-xi qyekʼin kye txqantl aju o tzʼel qnikʼ tiʼj.

Juntl tumel tuʼn t-xi qqʼoʼn chʼintl kye erman, aju qa ma txi qqʼuqbʼaʼn kykʼuʼj. In kubʼ qnaʼn nim tzalajbʼil aj tok kyqʼoʼn txqantl kywitz tiʼjju in bʼant quʼn ex aj ttzaj kyqʼoʼn chjonte qe. El tpaʼn Jesús ambʼil tuʼn t-xi tqʼuqbʼaʼn kykʼuʼj qeju e onin tiʼj (mojbʼankuya tukʼil Mateo 25:19-23; Lucas 10:17-20). Ex xi tqʼamaʼn kye qa «mas nim aqʼuntl» kbʼantel kyuʼn (Juan 14:12). Ax ikx, xi tqʼamaʼn tbʼanel yol kye t-xnaqʼtzbʼen tej chʼixtoq tkyim. Xi tqʼamaʼn jlu kye: «Atzun kyeye kukx ma che tene wukʼile tuj yajbʼil weye» (Luc. 22:28). Nimxixlo e onin tyol Jesús kyiʼj t-xnaqʼtzbʼen ex tuʼn jlu ok tilil kyuʼn. Qa ma tzʼel qpaʼn ambʼil tuʼn t-xi qqʼamaʼn tbʼanel yol kye erman, jakulo che tzalaj ex jakulo bʼant mas aqʼuntl kyuʼn.

Tqʼama jun ermano jlu, aju Kayode tbʼi: «Nya il tiʼj tuʼn toka te tzʼaqli tuʼn tonina kyiʼj txqantl tuʼn kytzalaj toj kyaqʼun». ¿In nokpe tilil quʼn tuʼn kytzalaj txqantl toj kyaqʼun? Bʼaʼn tuʼn t-xi qqanin kye qa in qo onin kyiʼj tuʼn kytzalaj toj kyaqʼun. Qa in che tzalaj txqantl aj kyaqʼunan qukʼil ik tzeʼn e tzalaj t-xnaqʼtzbʼen Jesús tej kyten tukʼil, aʼyex yol jaku txi qqʼamaʼn ik tzeʼn tqʼama apóstol Pablo: «Oʼkx qajbʼile tuʼn qonine kyukʼile tuʼn tten kytzalajbʼile» (2 Cor. 1:24).