Yesu mwakele mwilu, walilongesele bifwa byabibwa bije byamulingisile apangele hamo na banu hano hasi mu ngila yaibwa manene. Mwanja wa Yesu utukwasa bati? Kusinganyekesesa ha mwanja wa Yesu kutukwasa tunanguke binangulo bitatu bije bitukwasa tupange mwamubwa na bakwetu. Ebi binangulo bitukwasa tulikwatasane manene na bandolome na bandokazi betu.

Munu uje akapanga mwamubwa na bakwabo akabasingimika, co kesi kulimwesa ngwe azibuka byabingi kubatubakana. Yesu walilongesele kupwa wa kulikehesa kuli Ishe. Nameme Yehova ikeye lika itunapande kutumbula ngwetu Ishamatanga, oloni wendekeleko byuma bimo bije bimwesa ngwabyo Munendi wamukwasele mu cipangi ca kutanga. Majwi endekele amwesa ngoco. Walekele Yesu ngwendi: ‘Tutange munu wa kulifwa netu na mu cifwa cetu.’ (Kusha 1:26) Yehova mwendekele awa majwi, Yesu wanangukile ngwendi Ishe wapwa wa kulikehesa.—Myaso 18:35.

Yesu mwakele hano hasi, nendi wapwile wa kulikehesa. Mubakele na kumushangala mwafwa ya byuma byalingile, wanene bumpau kuli Njambi. (Mako 10:17, 18; Yowa 7:15, 16) Yesu wakele mu kwoloka na bandongesi bendi, co wabamwene kupwa babusamba bendi keti bangamba embwe. (Yowa 15:15) Wabajelesele ku mendi mangana abalongese kupwa ba kulikehesa. (Yowa 13:5, 12-14)  Netu tunapande kusingimika bakwetu batukapanga nabo kutubakana kutwameka lika biyongola byetu. Tupanga byabingi nga tulisingimika umo na mukwabo keti kushaka lika ngwetu batushangale.—Loma 12:10.

Munu wa kulikehesa azibuka ngwendi “nga kuli munga ya baka-kunangula, byuma bikabwaha.” (Visi 15:22) Nameme tuli na cashu ca kulinga byuma bimo, co lalo tunalilongesa byuma byabingi, tunapande kwanuka ngwetu wahi munu azibuka byuma byoshe. Yesu nendi wanangukile ngwendi kuli byuma bimo bije kazibukile. (Mateo 24:36) Simbu imo wakele na kwihula bandongesi bendi ba kujeneka kulumbunuka bamuleke byuma bibasinganyeka nambe bibazibuka. (Mateo 16:13-16) Mukemwo bapwile ba kushubuluka kukala nendi. Nga tulikehesa na kwanuka ngwetu kutuzibuka byuma byoshe na kutolilila ku biyongola bya bakwetu, co tukala mu kwoloka. Co lalo, tupanga byabingi.

Bakulunu mu cikungulukilo banapande kutembwinina Yesu. Banapande kupwa ba kulikehesa omwo bapangela hamo. Banapande kwanuka ngwabo sipilitu ya kujela yasa kulingisa mukulunu woshe-woshe endeke byuma bimo bije bikwasa bakulunu boshe kwangula mwamubwa bya kulinga. Nga ha simbu ya ciwano, bakulunu batabesa mukulunu woshe-woshe kwendeka biyongola byendi, co bangula byuma bije bikwasa cikungulukilo coshe.

Munu uje azibuka kupanga mwamubwa na bakwabo akabazibisisa, co akatambula biyongola byabo. Ha bisimbu byabingi, Yesu wanangukile ngwendi Ishe wapwa muka-kuzibisisa. Cakumwenako, wamutumine mangana akupatule banu ku butsi buje bubalinenelele.—Yowa 3:16.

Yesu wazibisisile bakwabo mwamwene ngwendi kunapande kulinga ngoco. Anukeni ngweni wakwasele munakazi wa ku Fonisiya nameme bamutumine kuli Baisalele. (Mateo 15:22-28) Co lalo, kabandamenene ngwendi bandongesi bendi balinge byuma bije kubasa. Kabusamba kendi Petulu mwamubyanene hakati ka mbunga, Yesu wamukonekelele. Kutundaho, wanene Petulu bipangi byakama. (Luka 22:32; Yowa 21:17; Vili 2:14; 8:14-17; 10:44, 45) Mwanja wa Yesu umwesa ngwawo netu tunapande ‘kuzibisisa banu boshe.’—Fili 4:5.

Kuzibisisa bakwetu kutukwasa tupange mu kwoloka na banu ba kuliseza-seza. Yesu wayoyele mwamubwa na banu boshe mukemwo bitozi bendi bamubangeyeye ngwabo wapwa ‘kabusamba  wa baka-kutambula mutelo na baka-bubi’ baje batolililile ku muzimbu wendi. (Mateo 11:19) Kuma netu twasa kupanga mwamubwa na banu boshe ngwe mwalingile Yesu ndi? Ndolome Louis uje napanga mu cipangi ca kuzenguluka na ha Mbetele na banu ba bisemwa bya kuliseza-seza wendekele ngwendi: “Njikesekesa banu banjikapanga nabo ku cibumbe ca kutanga ha mamanya a kupengapenga. Nga twaka mwamubwa aje mamanya, co cibumbe coshe casa kupwa ca kusungama. Nange njikatengululako byuma bimo mangana njipangele hamo na bakwetu mu kwoloka.” Ou ndolome natwakela mwanja waubwa.

Simbu muka itwasa kumwesa ngwetu tuzibisisa bandolome na bandokazi mu cikungulukilo cetu? Twasa kumwesa ngoco ha simbu ituli nabo ku cibunga cetu ca mu lihya. Tunasa kupanga na baka-kwambulula bali na binaanga bya kuliseza nei yetu na myaka ya kuliseza nei yetu. Twasa kutengululako ngila ya mwakulingilamo byuma nambe ngila ya kwambulwilamo mangana nabo balikuwe cipangi ca kwambulula.

Munu uje akapanga mwamubwa na bakwabo akalipangela nabo byuma. (1 Tima 6:18) Mwakele na kupanga na Ishe, Yesu wanangukile ngwendi Yehova kamushwekelele byuma. Omwo Yehova “watumbikile lilu mu mwela walyo,” Yesu ‘kwakele,’ co walilongesele kuli ikeye. (Visi 8:27) Mu kwita kwa simbu, Yesu walekele bandongesi bendi ‘byuma byoshe byazibile’ kuli Ishe. (Yowa 15:15) Twasa kutembwinina Yehova nga tulekako bandolome na bandokazi betu byuma bitunalilongesa. Munu uje akapanga mwamubwa na bakwabo kesi kubashwekela biñanda bibanapande kuzibuka mwafwa ya kushaka lika kubatwamenena. Oloni abwahelela kulekako bakwabo byuma byabibwa byanalilongesa.

Twasa lalo kushongangeya bakwetu batukapanga nabo. Nga munu umo ananguka ngwendi tuli na kupanga na nzili, co atukandelela kutundilila kwisi ya mbunge, kuma kutwesi kuliziba mwamubwa ndi? Yesu wawaneko simbu ya kushongangeya bandongesi bendi mwafwa ya byuma byabibwa bibakele na kulinga. (Esekeseni Mateo 25:19-23; Luka 10:17-20.) Wabalekele ngwendi bakalinga “bipangi byakama kutubakana” byalingile. (Yowa 14:12) Ha butsiki bwa kwinduka litangwa libamutsiile, Yesu walekele bandongesi bendi ba kulongwa ngwendi: “Yeni munakala nange mu tuyando twange twoshe.” (Luka 22:28) Majwi endekele Yesu abashongangeyeye manene na kubakwasa batwaleleleho kupanga. Netu nga tuwana simbu ya kushongangeya bakwetu batukapanga nabo, co babwahelela manene na kupanga na nzili.

Ndolome Kayode wendekele ngwendi: “Munu kapandele kupwa wa kulumbunuka asinoni apange mwamubwa na bakwabo. Oloni munu uje akapanga mwamubwa na bakwabo akabalingisa babwahelele, co cipangi cikabendela mwamubwa.” Kuma mukapanga mwamubwa na bakweni ndi? Mwasa kwihula bandolome na bandokazi bamukapanga nabo mangana bamileke mumukapangela. Nga bakalikuu kupanga neni ngwe omwo bandongesi ba Yesu balikuwile kupanga hamo nendi, co mwasa kwendeka ngwe mwendekele kapositolo Paulu uje wendekele ngwendi: ‘Tuli na kupanga hamo neni mangana mubwahelele.’—2 Koli 1:24.