Kan li ti dan lesiel, Zezi ti kiltiv bann kalite ki ti fer li vinn enn bon konpagnon travay. Akoz sa, kan li ti vinn lor later, li ti enn bon konpagnon travay ek li ti enn bon lexanp pou lezot. Ki bienfe nou gagne gras-a lexanp Zezi? Kan nou etidie so lexanp, nou kapav trouv trwa prinsip ki kapav ed nou pou vinn enn bon konpagnon travay. Sa bann prinsip-la kapav ed nou pou travay ek pou korper avek nou bann frer ek ser dan linite.

Enn bon konpagnon travay ena limilite. Pou li, so bann konpagnon travay bien inportan ek li pa atir latansion lor limem. Zezi ti aprann limilite ar so Papa. Mem si zis Zeova tousel merite ki nou apel Li Kreater, Li ti anvi ki bann lezot dimounn konn bann travay inportan ki so Garson ti fer. Nou trouv sa dan seki Bondie ti dir: “Anou fer dimounn kouma nou, dan nou resanblans.” (Zen. 1:26) Kan Zeova ti dir sa bann parol-la, Zezi ti kone ki so Papa ena boukou limilite.​—Ps. 18:35.

Kan Zezi ti lor later, li osi li ti manifeste limilite. Kan bann dimounn ti donn li loner pou seki li ti fer, Zezi ti donn loner Bondie. (Mark 10:17, 18; Zan 7:15, 16) Zezi ti fer zefor pou ki ena lape ant so bann disip, ek li ti konsider zot kouma so bann kamarad, pa kouma so bann esklav. (Zan 15:15) Li ti mem  lav zot lipie pou ansegn zot ki zot ti bizin ena limilite. (Zan 13:5, 12-14) Parey kouma Zezi, olie ki nou fer nou lintere personel pas avan lintere lezot, nou bizin donn loner nou bann konpagnon travay. Nou pou kapav fer pli boukou dibien kan nou ‘onor nou kamarad’ ek nou pa rod laglwar pou noumem.​—Rom. 12:10, NW.

Enn kikenn ki ena limilite, li osi rekonet ki ‘bann plan reisi kan ena enn kantite konseye.’ (Prov. 15:22) Ninport ki kapasite ouswa lexperyans nou ena, nou bizin rapel ki okenn imin pa konn tou kitsoz. Mem Zezi ti rekonet ki li pa ti konn tou kitsoz. (Mat. 24:36) Zezi ti anvi kone osi ki so bann disip ti panse. (Mat. 16:13-16) Se pou sa rezon-la ki so bann konpagnon travay ti santi zot alez kan zot ti ansam avek li. Dan mem fason, kan nou aksepte avek limilite ki nou pa konn tou kitsoz ek kan nou ekout lezot, nou favoriz lape. Lerla, nou travay ansam avek lezot pou ki ‘bann plan reisi.’

Li bien inportan ki bann ansien imit lexanp Zezi dan sa domenn-la, kan zot travay ansam avek zot kamarad. Zot bizin rapel ki lespri sin azir lor tou bann ansien ki dan komite bann ansien. Dan zot bann renion, bann ansien fer zefor pou ki ena enn bon lanbians, kot zot tou santi zot alez pou exprim zot lopinion. Lerla, zot pou kapav pran bann desizion ki pou fer lasanble gagn bann bienfe.

Enn bon konpagnon travay montre ki li rezonab kan li travay avek lezot. Kan li pe travay avek lezot, li flexib. Zezi ti ena boukou lokazion pou trouve kouma so Papa rezonab. Par exanp, li ti trouve kouma Zeova rezonab kan Li ti avoy li kouma enn ranson pou sov bann dimounn.​—Zan 3:16.

Zezi ti flexib kan sa ti neseser. Mem si li ti vini pou ed pep Izrael, Zezi ti ed enn fam ki ti sorti Fenisi. (Mat. 15:22-28) Li ti osi rezonab anver so bann disip. Apre ki so kamarad, Pier, ti renie li an piblik, Zezi ti dispoze pou pardonn li. Plitar, li ti donn li bann gran responsabilite. (Lik 22:32; Zan 21:17; Zist. 2:14; 8:14-17; 10:44, 45) Dan enn fason kler, lexanp Zezi montre nou ki nou bizin “les zot tou kone ki [nou] bann dimounn rezonab” kan nou flexib anver lezot.​—Fil. 4:5, NW.

 Kan nou rezonab, sa ed nou pou adapte ar tou kalite dimounn. Lerla, nou kapav travay ansam avek zot dan lape. Zezi ti tret bann dimounn bien. Akoz sa, so bann lennmi ti zalou li ek zot ti akiz li ki “li frekant bann ramaser tax ek bann move dimoun.” Me parski li ti tret zot bien, sa bann dimounn-la ti aksepte so mesaz. (Mat. 11:19) Eski, kouma Zezi, nou kapav travay dan lape avek bann dimounn ki pa parey kouma nou? Enn frer, ki apel Louis, ti servi plizir lane dan Betel ek osi kouma responsab sirkonskripsion. Pandan sa bann lane-la, li’nn travay ansam avek plizir dimounn. Li dir: “Travay ansam avek lezot dimounn ki inparfe, li parey kouma mont enn miray avek diferan groser ros. Parski bann ros-la diferan groser, sa demann boukou zefor pou mont sa miray-la. Me selman, miray-la kapav vinn drwat. Mo’nn esey fer bann sanzman pou ki mo kapav travay dan lape avek lezot, pou ki travay-la kapav fer.” Sa vremem enn zoli latitid, pa vre!

Ki bann lokazion nou ena pou montre nou rezonab anver nou bann frer ek ser dan nou lasanble? Nou ena lokazion pou montre sa kan nou avek nou group predikasion. Kitfwa nou bizin travay avek bann proklamater ki pena mem sitiasion familial ki nou, ouswa ki pena mem laz ki nou. Kitfwa nou konpagnon prefer osi enn lot form predikasion. Eski nou pre pou adapte nou, pou ki nou konpagnon gagn plis lazwa dan so minister?

Enn bon konpagnon travay “pre pou partaze.” (1 Tim. 6:18, NW) Kan Zezi ti travay ansam avek so Papa, Zezi ti remarke ki so Papa pa ti kasiet bann kitsoz. Kan Zeova “ti prepar lesiel,” Zezi ti la ek li ti kapav aprann avek Li. (Prov. 8:27) Plitar, Zezi ti partaz avek so bann disip “tou seki [li] finn tande” ar so Papa. (Zan 15:15) Dan mem fason, nou kapav imit lexanp Zeova kan nou partaz seki nou’nn aprann avek nou bann frer ek ser. Enn bon konpagnon travay pa pou gard bann linformasion pou limem, zis pou li ena kontrol lor lezot. Li kontan partaz bann bon kitsoz ki li’nn aprann avek lezot.

Nou kapav osi ankouraz nou bann konpagnon travay. Sa fer nou dibien kan enn kikenn remark bann zefor ki nou fer ek felisit nou pou sa. Zezi ti pran letan pou felisit so bann konpagnon travay pou bann bon kitsoz ki zot ti fer. (Konpar ar Matie 25:19-23; Lik 10:17-20.) Zezi ti mem dir zot ki zot ti pou fer bann “pli gran kiksoz ki” li. (Zan 14:12) Lanwit avan so lamor, li ti felisit so bann zapot ki fidel, kan li ti dir zot: “Zot finn toultan ar mwa dan mo bann difikilte.” (Lik 22:28) Sa bann parol-la sirman inn bien ankouraz zot ek inn pous zot pou azir! Si nou osi, nou pran letan pou felisit nou bann konpagnon travay, zot pou pli ere ek zot pou kapav vinn pli efikas dan seki zot fer.

Enn frer ki apel Kayode, dir: “Enn bon konpagnon travay, li pa bizin parfe. Li bizin ede pou ki lezot travay dan lazwa ek ki zot travay vinn pli fasil.” Eski to sa kalite konpagnon travay la? Kitfwa to kapav demann sertin frer ek ser ki kalite konpagnon travay to ete. Si zot kontan travay avek twa, parey kouma bann disip ti kontan travay avek Zezi, to pou kapav dir, parey kouma lapot Pol, ki to enn konpagnon travay ki ‘kontribie pou boner’ lezot.​—2 Kor. 1:24.