Nari wiirimu, Yesu aheetthuca uthoonyera makhalelo omaana yankavihenre uvara nteko ratta naakhwaawe. Vano waawilyaawe watuninyani, uyo ahowiitthuciha attharyaawe ayo makhalelwaayo. Ni hiiva ilelo ninawiitthuca ikano cinci cofayita namuupuwelaka Yesu. Nttwee noopele mwaha ikano tthaaru cimmwiitthucereehu Yesu. Nnyo ikanonnyo cinaahala unikavihera ucuwela waavarana nteko ratta mayamunneehu ni utepa wiiwanana naayo.

Wiira nivare nteko ratta naakhwiihu, nihaana nikhalaka atthu owiiyeviha. Ntthu owiiyeviha nawaattitthimiha atthu anaavaranaawe nteko ni khammananiha uthoonyera wiira uyova phinvara nteko ratta waapwaha atthu anaavaranaawe nteko. Yesu aari ntthu owiiyeviha kontha phi itthu yeetthucilyaawe ukati waavaraawe nteko naathumwaane, Yehova. Yehova paahi phinomphwanela wiihaniya Mpattusi. Uhookhalaru commo, Yehova mpheela wiira atthu acuwele wiira citthu cirivo khumpale veekha, masi ahokaviheriya ni Yesu wumpa citthu cotheene. Iyo phi itthu inoonannya nhina Uphattuwaca 1:26. Yehova enre co: “Nimumpe pinaatamu oolattaana ni hiiva ni ookhala toko hiiva.” Ayo moolumwaayo yahonkavihera Yesu woona wiira Yehova nawiiyeviha.—Isaa. 18:35.

Yesu ciicammo ukati waaryaawe watuninyani aanawiiyeviha. Wootakihera, Yesu aattottopeliyaka anthoonyera wiira Yehova phamphwanela uttottopeliya. (Mark. 10:17, 18; Joau 7:15, 16) Yesu ciicammo ahopanka yotheene yaakhitinryaawe wiira attharyaawe avare nteko nkhayi yakhalakhalaka ninnema. Yesu khaawehera attharyaawe khampa ipottha cawe, masi aawehera khampa apatthannyaawe.  (Joau 15:15) Yesu mpaka ahorapiha inyaa caattharyaawe, waaphenlyaawe waathoonyera wiira wiiyeviha ikhanle itthu yofayita. (Joau 13:5, 12-14) Hiiva ciicammo nihaana nintakihaka Yesu ni utotha waattitthimiha akhwiihu, uhiya uhoolelihera wiittitthimiha hiiva. Wiira nikhitiri uvara nteko ratta naakhwiihu nihaana nittitthimihanaka ni uhikhala nitothaka uttottopeliya nlattu wonteko unvareehu.—Aroo. 12:10.

Ntthu owiiyeviha naacuwela wiira “nipuro nincivale atthu anvaha miruku, itthu impheela uvariya inaakhuma saana.” (Miru. 15:22) Nihaana nihiliyalaka wiira khaavo ntthu nocuwela citthu cotheene, hataa akhalaka ncuwelaci awula ntthu owooryooryaca. Mpaka Yesu ahaamini wiira khaacuwela citthu cotheene. (Mat. 24:36) Yesu hataa acuwelaka wiira attharyaawe yaari atthu oopahuwa, anawaalepela miruku. (Mat. 16:13-16) Hataa phimaana attharyaawe khayoova uhimya itthu yoopuwelaaya yakhalaka nkhayi nuuyo. Hi ciicammo nihaana nikhalaka atthu owiiyeviha. Nakupaliki wiira khanincuwela citthu cotheene ni naalepelaka ankhili akhwiihu, ninaahala ukhalana nnema wanrimani wihu ni itthu impheeleehu uvara inaahala ukhuma saana.

Venci-venci mahumu ahaana yantakihaka Yesu wiira akhitiri uvara nteko nkhayi sana-saana. Mahumu ahaana yuupuwelaka wiira Yehova pooti unkavihera khula humu uvaha nruku unhala waakavihera mahumu otheene ulakela upanka itthu yomaana. Ukati mahumu unthukumanaaya, khula humu pooti uvaha nrukwaawe woohoova. Mahumu yapankaka commo, anaahala ukhitiri ulakela upanka citthu comaana ni anaahala ukavihera cinene nloko naya.

Wiira nikhitiri uvara nteko ratta naakhwiihu, nihaana nikhalaka atthu ooreera nrima ni uhikhanyerera wiira citthu cotheene cipankiye khampa cimpheeleehu. Ikwaha cinci, Yesu ahokhitiri woona wiira Yehova khanle Nluku ooreera nrima. Wootakihera, Yesu ahomoona Yehova aathoonyeraka uthunku apinaatamu. Nlattu wo matampi, atthu otheene waanaaphwanela ukhwa. Masi Yehova hothoonyera ureera wawe nrima ni honvaherera mwanawe wiira awoopole atthu otheene.—Joau 3:16.

Yesu ciicammo ahothoonyera wiira aari ntthu ooreera nrima ni khaakhanyerera wiira citthu cotheene cipankiye khampa uyova caapheelaawe. Iyo itthwiiyo yahoonannya ukati waakavihenryaawe athiyana amoca o Fenícia. Yesu aaveleelihiye wiira aakavihere apoovu a Yehova paahi, kahi atthu olapo cikhwaawe. Masi waahookhalaru commo, Yesu ahothoonyera ureera wawe nrima ni ahaakavihera ale athiyanaale. (Mat. 15:22-28) Yesu ciicammo anthoonyera wiira aari ntthu ooreera nrima kontha khaaweherera wiira attharyaawe ahittheke. Iyo itthwiiyo yahoonannya ukati wanlevelenlyaawe apostolu Peturu, mpatthannyaawe. Peturu ahonkhotta Yesu ni aheera  wiira khanoncuwela. Hataa ukhalaka commo, Yesu ahonlevelela ni ahonvahacera miteko cuulupale cikhwaawe. (Luka 22:32; Joau 21:17; Mite. 2:14; 8:14-17; 10:44, 45) Ntakihero na Yesu ninnithoonyera wiira khaninlamuliya ukhanyerera wiira citthu cotheene cipankiiye khampa cimpheeleehu, ni ninnithoonyera wiira nihaana niikurumicaka wiira “ureera [wihu] nrima ucuweliye naatthu otheene.”—Afili. 4:5.

Nakhalaka atthu ooreera nrima, ciicammo ninaahala ukhitiri waavarana nteko ratta atthu o khula ikhapila. Yesu aanawaawacera saana atthu otheene mpaka awanannyaawe yaheera wiira uyo aari “mpatthani aanamaliviha nsokho ni aanamatampi.” (Mat. 11:19) Ninhala untakiha cani Yesu wiira nikhitiri waatanaca naakhwiihu? Munna mmoca neehaniya Louis virihale myaakha cinci aavaranaka nteko atthu oovirikana ukati waaryaawe mootoli osirikwiitu ni waavaraawe nteko u Peteli, neera: “Mi maweherwaaka, waavarana nteko atthu akhwaawe unaalikanaca nuuteka imuuru, kahi yo polookhu, masi yo maluku. Wanhala urika wookola. Masi ntthu noteka eesaka khula nluku nipuro noophwanelana, anhala ukhitiri wookola. Mi kihaana kicuwelaka uvara nteko nikhula ikhapila yaatthu.” Hiiva ciicammo iyo phi itthu inlamuliyeehu upanka.

Ukatini unlamuliyeehu uthoonyera wiira naatthu ooreera nrima ni uhinlamuliyeehu ukhanyerera wiira citthu cotheene co wanlokoni cipankiye khampa cimpheeleehu? Hiiva nihaana nipankaka iyo nhina ikhurupu yo wuulalyeerani iriihu. Pooti waneekurumiceehu waavarana nteko wuulalyaani miyamunna oovirikana, anamwane ni oolupale. Nihaana nirukunusaka makhalelweehu wiira nikhitiri unvarana nteko khula namalalyeera ni nihaana nittehaka inanna cikhwaawe coolalyaa ihapari ca Nluku.

Ntthu novara nteko naakhwaawe haana aaminiki ‘waameela’ citthu cawe akhunanawe anaavaranaawe nteko. (1 Tim. 6:18) Ukati wotheene Yesu uvirihalyaawe avaraka nteko naathumwaane wiirimu, uyo ahoona wiira Yehova khiivo itthu yaavithaawe. Ukati Yehova waatthenkacaawe irimu ni citthu cikhwaawe, Yesu aanawoona. Ni Yesu ahowiitthucera cinene Athumwaane nicitthu cotheene coonaawe. (Miru. 8:27) Ni ukati waawilyaawe watuninyani, Yesu ahowiitthuciha attharyaawe citthu ‘caawiiwalyaawe’ Athumwaane. (Joau 15:15) Hiiva ciicammo nihaana nintakihaka Yesu ni waalakihera akhwiihu citthu cincuweleehu. Nihihiye unlakihera nkhunanihu citthu cincuweleehu nlattu wo wuupuwela wiira nokowiitthuca cinene mpaka unipwaha hiiva. Masi unitteele nrima nlattu wo waameela akhwiihu awula waalakihera citthu cincuweleehu.

Hiiva ciicammo pooti waalipiha makhuva atthu anaavaraneehu nteko nimoolumo omaana. Nyuuva khunootteelani nrima ntthu oottottopelakani nlattu wo nteko uvanreenyu? Khweeliini unawuutteelani nrima. Yesu khaahiya waattottopela attharyaawe. (Nwehe ciicammo Matewus 25:19-23; Luka 10:17-20.) Yesu mpaka aheera wiira attharyaawe yanhala uvara miteko cuulupale unvikana uyova. (Joau 14:12) Ni uhiyu waahalaawe wiiviya, Yesu ahowiirela attharyaawe co: “Thi nyuuva nkhanle wamoca ni mi mmasakhani waka.” (Luka 22:28) Munnokhitiri wuupuwela mananna ayo moolumwaayo caalipihalyaaya atthari a Yesu? Khweeliini atthari a Yesu wiiwalyaaya ayo moolumwaayo, yaholakela utepa wiikurumca uvara nteko. Naattottopelaka atthu anaavaraneehu nteko, unawaatteela nrima ni anaatepa wiikurumica uvara nteko saana.

Munna mmoca neehaniya Kayode heera co: “Khunakhala wiira nyuuva nhaana nkhala ntthu oohivonya wiira nvare nteko saana. Itthu impheeliya, ukhanle utthuna uvara nteko niiraati ni uhaarikarikiha atthu anaavaraneenyu nteko.” Nyuuva nnawaavarana nteko ratta akhwiinyu? Nnoonela cani waalepela miyamunneenyu awula miyanuunwiinyu o wanlokoni wiira yuuhimyeereni wakhala wiira nyuuva munnaavarana nteko saana awula mena? Yoohimyeerakani wiira unawaacivela uvara nteko nkhayi ni nyuuva, pooti waneereenyu khampa apostolu Paulu cenryaawe: “Hiiva ninawiikurumica uvara nteko wiira nyuuva nkhale ootteeliya.”—2 Akor. 1:24.