E Yesu wasambilizile imiwele iyizima kwe Yehova yino yamwavwizye ukuwawomba icete nawantu wanji pano wizile munsi. Avyani vino tungasambililako kwe Yesu? Nga cakuti tukusambilila sana kwe vino wacitanga, tungazana inzila zitatu zino zingatwavwa ukumanya ivyakuwomba icete nawanji. Swinya vyonye vyo-o ivisinka vingatwavwa ukuwa awalemenkane na wanawitu.

Umuwomvi muzima wayicefya. Akalola awawomvi wawuye ukuti wacindama ukumulusya. Swinya asikwelezya ukucita ivili vyonsinye pakulenga wanji wamulola ukuti wacindama. E Yesu wasambilizile ukuyicefya kwe yisi. Nanti acakuti e Yehova awo wacindama pe wonsinye pamulandu wakuti awili e kelewula, walondanga awantu ukumanya umulimo uwucindame wuno umwana wakwe wawomvile. Tukakwivwicisya co-o icisinka pamulandu navyo Leza walanzile ukuti: “Kanonzi twelewule umuntu ku wukola witu.” (Inta. 1:26) Pano Yehova walanzile ya-a mazwi e Yesu waweni ukuti e yisi wayicefya nkaninye.—Amalu. 18:35

Pano Yesu walinji mu nsi walanjizizye ukuti wayicefya. Nga cakuti awantu wamusalifya pa milimo yino wawomba, nawe watwalanga ilumbo kwe Yehova. (Mar. 10:17, 18; Yoha. 7:15, 16) E Yesu wawikanga sana amano ku kupanga umutende nawa sambilizi wakwe. Atawalolanga ukuti awazya lelo wawalolanga ukuti aviwuza vyakwe. (Yoha. 15:15) Impindi yimwi wawapizizyepo na matamba pakuti awasambilizye pa kuyicefya.  (Yoha. 13:5, 12-14) Nasweswenyene tuzipizile ukucindika wano tukawomba nawo nukuwalola ukuti wacindama ukutucila. Cikazipa nkaninye nga cakuti ‘tukucindikana’ swinya tutakusakamala nape wino azipizile ukupocela umucinzi.—Roma. 12:10

Umuntu umuyicefya akamanya ukuti pakawa ukuwomba icete nga cakuti ‘pali ukupanda amano ukufuma ku wantu awavule.’ [NWT] (Imilu. 15:22) Asamulandu nukuvula kwa vintu vino twamanya navino twacenjelamo, tuzipizile ukuwakwizuka ukuti kutawa wino wamanya ivintu vyonsinye. Amuno nanti we Yesu nye wamanyile ukuti kwalinji vimwi vino atamanyile. (Mat. 24:36) Swinya wivwanga icete nkaninye ukwivwako kwe vino awasambilizi wakwe wano watalinji awapwililike wamanyile navino welenganyanga. (Mat. 16:13-16) Co-o acino calenganga wonsinye wakwivwa icete pano wakuwomba nawe. Nasweswenye nga cakuti tuyicefizye nukumanya umwakupelela swinya tukuleka nawanji wakulandapo, tukapanga umutende pano tukuwomba. Swinya ‘nimilimo yikawombeka icete.’

Cacindama nkaninye ukuti wa eluda wakolanya Yesu ukupitila mukucindikana pano wakuwombela ponga. Wazipizile ukwizuka ukuti umuzimu wutele wungavwa e eluda uwili wensinye ukupingula icete pa vintu. Nga cakuti pano wasunkine wakulazyanya mu mutende swinya wonsinye wakulandapo vino wapingula vingazipila wonsinye awa mwiwungwe.

Umuwomvi umuzima akawa nu mutembo pano akuwomba nawanji swinya akayikundila ukupiluka nukwivwako kwevino wanji wakulanda. E Yesu walolanga pano e yisi e Yehova walanjizyanga umutembo imiku imivule. Ku cakulolelako e Yehova watumile Yesu ukwiza mukupususya awantu kuluwembu ni mfwa vino wapyana.—Yoha. 3:16

E Yesu wayikundilanga ukupiluka nga cayana. Teyizukani vino wavwizye umwanaci umwina Kanani nanti acakuti wafumile muluko lwa wina Israeli. (Mat. 15:22-28) Swinya walinji nu mutembo nkaninye pano wawombanga nawa sambilizi wakwe. Ku cakulolelako, pano e ciwuza wakwe e Peter wamukanile paminso ya wantu, e Yesu wayikundizile ukumutetela. Pansizi wizile amupa ni milimo imicindame iyakuwomba. (Luk. 22:32; Yoha. 21:17; Imili. 2:14; 8:14-17; 10:44, 45) Icakulolelako cakwe Yesu cikatulanjizyavye apatiswenye ukuti tuzipizile ukuwa nu mutembo kuwantu wonsi ukupitila mukuyikundila ukupiluka.—Flpi. 4:5

 Ukuwa nu mutembo kulitwavwa ukuwawomba icete nawantu awalekane lekane. E Yesu wivwananga icete sana nawantu wonsinye. Icakuti impindi yimwi awalwani wakwe wizile awamunena ukuti “echiwuza wawasanguzi nawawembu!” wano wakateyelezya kwe vino akasambilizya. (Mat. 11:19) Uzye nasweswenye tungakumanisya ukuwomba icete na wanawintu awapusane pusane ngati we Yesu? Umwanawitu e Louis wino wawomba pampindi intali mu mulimo wakupita, swinya wawomba napa Bethel nawantu awalekane lekane walanzile ukuti: “Nkakwelezya na maka ukukolanya iwumba ilipya lino natalika ukuwomba nalyo kuciwumba cino wazenjela na mawe ayapusane uwukulu. Ukuwombesya ukutantika icete amawe yano yapusine uwukulu, kungalenga uzenge iciwumba icololoke. Wonye wo-o avino nkakwelezya namaka ukupiluka pakuti ndakwivwana icete nawanawitu nawa nkazi iwalekane lekane.” Ala wo-o vyo umwanawitu akacita vyazipa nkaninye!

Ampindi ci pano tungalanjizya ukuti swe wamutembo kuwanawitu nawa nkazi mwiwugwe? Tukalanjisya ukuti twawa nu mutembo pano tuli ponga nawanawitu nawa nkazi kwi wumba lino twawako ilya mulimo. Amuno manda yamwi tungawomba nawakawizya wano wawa nimilimo imilekane lekane mu lupwa lwawo swinya nawa vyimo ivilekane lekane. Mungapilulako imipitile nanti inzila yakuwizizyamo pakuti muleke nawo wasecelela pano wakuwomba umulimo wakuwizya.

Umuwomvi muzima ‘akapako wanji.’ (1 Tim. 6:18) Pano Yesu wawombanga ne yisi, afwile waweni ukuti patawa nanti cimwinye cino Yehova akafisilizya. Pano Yehova “wakunzululanga iyulu,” e Yesu ‘akuno walinji’ swinya wasambililanga kwe yisi. (Imilu. 8:27) Mukupita kwa mpindi e Yesu wanenile awasambilizi wakwe ‘vyonsinye vino wivwile’ kwe yisi. (Yoha. 15:15) Naswenye tungakolanya e Yehova ukupitila mukunenako awanawitu nawa nkazi pevino twasambilila. Umuwomvi umuzima asifisa awawomvi wawuye vino wamanya navino vingawavwa pakutivye awawatungulula. Lelo akakwivwa icete ukusambilizyako wanji pevino wasambilila.

Cinji aca kuti tungawomelezyako wano tukawomba nawo. Uzye mukakwivwa wuli nga cakuti wumwi wamisalifya ukufuma pansi ya mwezo nukuminena ukuti mukawombesya? E Yesu wapawuzileko impindi iyakusalifya awasambilizi wakwe pavizima vino waweni mwe woliwo. (Linganyaniko Mat. 25:19-23; Luk. 10:17-20) Wawanenile nukuti walinji ‘nukuwawomba imilimo iyikulu ukulusye na peyino wawombanga.’ (Yoha. 14:12) Wanda wumwi uwusiku pano walinji mupipi nu kufwa wanenile awatumwa wakwe ukuti: “Mwikala nani mpindi zyonsi izyamelezyo yane.” (Luk. 22:28) Ya-a amazwi yafwile yafisile nkaninye awasambi pa mwezo. Swinya yalenzile wavwambisya ukucitapo cimwi. Naswenye tungapawulako impindi iyakusalifya wano tukawomba nawo. Nga twacita wo-o, tulilenga wawa ni nsansa swinya waliwawombesya.

Umwanawitu Kayode walanzile ukuti: “Pakuti tuwe swe wawomvi awazima tutazipizile ukuwa awapwililike.” Walanzile nu kuti “akalenga awawomvi wawuye ukuwa ni nsansa nukulenga incito ukupepuka.” Uzye namwemwe mwe wawomvi awazima ngati awe umwanawitu? Mungakolowozya wano mukawomba nawo pakuti waminene vino walola nga mwe wawomvi wamusango ci. Nga cakuti wanji wakakwivwa icete ukuwomba namwemwe ngati awulyanye vino awasambilizi wakwe Yesu wivwanga icete ukuwomba nawe, lyo mungalanda ngati awulyanye vino umutumwa Paulo walanzile ukuti: “Swewawomvi wawuyo awakuwasansamusya.”—2 Kor. 1:24.