Tá ni̱xi̱yo ta̱ Jesús chí ndiví, sa̱kúaʼara ndáa ki̱ʼva viíní kachíñura xíʼin inkana. Ta tá ki̱xira nu̱ú ñuʼú yóʼo, va̱ʼaní yichi̱ sa̱ndákoora nu̱ú na̱ xi̱kachíñu xíʼinra. Ña̱kán tá ná kundiku̱nyó yichi̱ra, ¿ndáa ki̱ʼva chindeétáʼanña xíʼinyó? Tá ná kaʼviyó xa̱ʼa̱ ña̱ ke̱ʼéra sakúaʼayó xa̱ʼa̱ u̱ni̱ ña̱ chindeétáʼan xíʼinyó ña̱ vií kachíñuyó xíʼin inkana, vií kutáʼanyó xíʼinna ta chindeétáʼanyó xíʼin táʼanyó.

Na̱ yiví na̱ xíni̱ kachíñu xíʼin inkana vitá íyo inina, chíndayáʼvina na̱ káchíñu xíʼinna ta va̱ása ni̱nu kúnina nu̱úna. Ta ta̱ Jesús xi̱nira ña̱ saá vitá íyo ini yivára. Ni mií Jehová kúú ta̱ i̱xava̱ʼa ndiʼi ña̱ʼa, soo kúni̱vara ña̱ ná kunda̱a̱-ini ndiʼiyó ña̱ chi̱ndeétáʼan se̱ʼera xíʼinra. Chi saá íyo ña̱ ni̱ka̱ʼa̱n Jehová nu̱ú tu̱ʼunra tá ka̱chira: “Ná ixava̱ʼayó na̱ yiví táki̱ʼva íyo miíyó” (Gén. 1:26). Tá ni̱ka̱ʼa̱n Jehová ña̱yóʼo, ta Jesús ki̱ʼinra kuenta ña̱ vitání-ini yivára (Sal. 18:35).

Ta saátu ta̱ Jesús vitání ni̱xi̱yo-inira tá ni̱xi̱yora nu̱ú ñuʼú yóʼo. Saáchi tá xi̱ka̱ʼa̱n na̱ yiví xíʼinra ña̱ va̱ʼaní íyo ña̱ xi̱keʼéra, xi̱ka̱ʼa̱nra ña̱ mií Jehová kúú ta̱ xi̱chindeétáʼan xíʼinra (Mar. 10:17, 18; Juan 7:15, 16). Saátu xi̱chikaa̱ra ndee̱ ña̱ viíní kutáʼanra xíʼin na̱ discípulora ta va̱ása ní xi̱ ixandi̱va̱ʼara xíʼinna chi migora xi̱kuuna (Juan 15:15). Ta nda̱a̱ nda̱katara xa̱ʼa̱na ña̱ va̱ʼa sanáʼa̱rana ña̱ vitá koo inina (Juan 13:5, 12-14). Ña̱kán, nda̱a̱ táki̱ʼva ke̱ʼé ta̱ Jesús ná chindayáʼviyó na̱ káchíñu xíʼinyó, ta ná kundi̱ʼi̱-iniyó xa̱ʼa̱ ña̱ ndóʼona nu̱úka ña̱ kundi̱ʼi̱-iniyó xa̱ʼa̱ miíyó. Va̱ʼaníka  kachíñuyó tá ná ixato̱ʼóyó inkana, ta va̱ása kundi̱ʼi̱-iniyó ña̱ ka̱ʼa̱n va̱ʼana xa̱ʼa̱yó (Rom. 12:10).

Na̱ vitá-ini kúnda̱a̱-inina ña̱ va̱ʼaní kána chiñu “nu̱ú íyo ku̱a̱ʼá na̱ táxi consejo” (Prov. 15:22). Ni xa̱a̱ ku̱a̱ʼání ku̱i̱ya̱ kéʼéyó iin chiñu á xíni̱níyó keʼéyóña, ná ndakaʼányó chi kǒo na̱ yiví xíni̱ keʼé ndiʼi ña̱ʼa. Nda̱a̱ ta̱ Jesús xi̱kunda̱a̱-inira ña̱ va̱ása níxi̱xini̱ra xa̱ʼa̱ sava ña̱ʼa (Mat. 24:36). Ta saátu xi̱kuni̱ra kunda̱a̱-inira ndáaña xi̱ndakanixi̱ní na̱ discípulora ni xi̱kuuna na̱ yiví ku̱a̱chi (Mat. 16:13-16). Xa̱ʼa̱ ña̱kán, va̱ʼaní xi̱kuni na̱ discípulora tá xi̱kachíñuna xíʼinra. Ta saátu miíyó, tá vitá íyo iniyó ta ndákuniyó ña̱ íyo sava ña̱ va̱ása kívi keʼéyó, ta saátu tá xíniso̱ʼoyó ña̱ káʼa̱n inkana, saá kúú ña̱ viíní kutáʼanyó xíʼin na̱ káchíñu xíʼinyó ta viíní kana chiñu ña̱ kéʼéyó.

Tá ndákutáʼan na̱ anciano, ndáyáʼviní vitá koo inina nda̱a̱ táki̱ʼva ni̱xi̱yo ta̱ Jesús. Ta xíniñúʼu ndakaʼánna chi espíritu santo Jehová kivi chindeétáʼanña xíʼin nda̱a̱ ndáaka na̱ anciano ña̱ taxina iin consejo ña̱ chindeétáʼan xíʼinna ña̱ vií ndaka̱xinna ña̱ keʼéna. Tá ndákutáʼanna ña̱ ka̱ʼa̱nna xa̱ʼa̱ iin ña̱ʼa, ta táxina ña̱ ná ka̱ʼa̱n iin tá iinna xa̱ʼa̱ ña̱ ndákanixi̱nína, saá kúú ña̱ viíní koo ña̱ ndaka̱xinna keʼéna. Ta ña̱yóʼo va̱ʼaní chindeétáʼanña xíʼin iníísaá congregación.

Tá viíní káchíñuyó xíʼin inkana, saá náʼa̱yó ña̱ viíní íyo ña̱ ndákanixi̱níyó. Ta ni xa̱a̱ nda̱kaxinyó keʼéyó iin ña̱ʼa va̱ása kéʼéyó ña̱ kúni̱ miíyó, chi kíʼinyó kuenta ndáaña ndákanixi̱ní inkana. Ku̱a̱ʼání yichi̱ xi̱ni ta̱ Jesús ña̱ viíní ndákanixi̱ní Jehová. Tá kúú, chi̱ndaʼára ta̱ Jesús ña̱ ki̱xira ni̱xi̱ʼi̱ra xa̱ʼa̱yó ni va̱ása níxiniñúʼu keʼéra ña̱yóʼo (Juan 3:16).

Sava yichi̱ na̱samava ta̱ Jesús ña̱ xi̱keʼéra. Ná ndakaʼányó chi ni ki̱xira ña̱ chindeétáʼanra xíʼin na̱ ñuu Israel, chi̱ndeétáʼanvara xíʼin iin ñaʼá ñá ñuu fenicia (Mat. 15:22-28). Ta saátu xi̱kunda̱a̱-inira xíʼin ña̱ xi̱ndoʼo na̱ discípulora, saáchi va̱ása níka̱ʼa̱nra xíʼinna keʼéna iin ña̱ʼa ña̱ va̱ása níxi̱kuchiñuna keʼéna. Ta tá ni̱ka̱ʼa̱n ta̱ Pedro ña̱ va̱ása xíni̱ra ta̱ Jesús, i̱xakáʼnu-inira xa̱ʼa̱ra. Tándi̱ʼi, ta̱xira ku̱a̱ʼáka chiñu ña̱ ndáyáʼviní ndaʼa̱ra (Luc. 22:32; Juan 21:17; Hech. 2:14; 8:14-17; 10:44, 45). Ña̱ ke̱ʼé ta̱ Jesús náʼa̱ña nu̱úyó ña̱ sava yichi̱ xíniñúʼu nasamayó ña̱ kéʼéyó, tasaá kunda̱a̱-ini inkana ña̱ va̱ʼaní íyo ña̱ ndákanixi̱níyó (Filip. 4:5).

 Tá viíní íyo ña̱ ndákanixi̱níyó, va̱ʼaní kachíñuyó xíʼin na̱ hermanoyó ta saátu xíʼin nda̱a̱ ndáaka na̱ yiví. Ta̱ Jesús viíní xi̱kitáʼanra xíʼin ndiʼi na̱ yiví ta xa̱ʼa̱ ña̱yóʼo ni̱sa̱a̱-ini savana xi̱ninara, ta ni̱ka̱ʼa̱nna xa̱ʼa̱ra ña̱ va̱ása va̱ʼa kéʼéra chi kítáʼanra xíʼin na̱ ndákaya xu̱ʼún ña̱ impuesto, ta saátu xíʼin na̱ yiví ku̱a̱chi (Mat. 11:19). ¿Á kundiku̱nyó yichi̱ ta̱ Jesús ta kusi̱í-iniyó kachíñuyó xíʼin inkana ni xa̱a̱ síín íyona nu̱úyó? Iin ta̱ hermano ta̱ naní Louis xa̱a̱ káchíñura xíʼin ku̱a̱ʼání na̱ hermano, saáchi xi̱kuura superintendente ña̱ circuito ta saátu xi̱kachíñura Betel. Ta̱yóʼo káchira: “Ña̱ kachíñuyó xíʼin xa̱a̱ síín síín na̱ hermano, táki̱ʼva íyo ña̱ íxava̱ʼayó iin nama̱ xíʼin xa̱a̱ síín síín yu̱u̱ saá íyoña. Tá ná chika̱a̱yó ndee̱ ña̱ viíní chindooyó yu̱u̱ yóʼo, saá kúú ña̱ nda̱kúní koo nama̱ yóʼo. Ña̱kán chíka̱i̱ ndee̱ ña̱ nasamai̱ ki̱ʼva ña̱ íyoi̱ ña̱ va̱ʼa vií kachíñui̱ xíʼin inkana, tasaá vií kana chiñu ña̱ kéʼéndi̱”. Va̱ʼaní ña̱ kéʼé ta̱ hermano yóʼo.

¿Ndáa ki̱ʼva na̱ʼa̱yó ña̱ kúnda̱a̱-iniyó xíʼin ña̱ ndóʼo na̱ hermanoyó? Tá kúú, ti̱xin grupo ña̱ predicación nu̱ú ndíka̱a̱yó, sana ñúʼu na̱ hermano na̱ xa̱a̱ síín síín ku̱i̱ya̱ á na̱ kúúmií xa̱a̱ síín síín chiñu ti̱xin veʼena. Ña̱kán, tá kéeyó nátúʼunyó xa̱ʼa̱ Ndióxi̱ xíʼin na̱yóʼo, ná na̱ʼa̱yó ña̱ kúnda̱a̱-iniyó xíʼinna. Tá kúú, sana xíniñúʼu kúeeka ku̱ʼu̱nyó xíʼinna, á nasamayó ki̱ʼva ña̱ nátúʼunyó xíʼin na̱ yiví ña̱ va̱ʼa kusi̱íka-inina natúʼunna xa̱ʼa̱ Ndióxi̱.

Na̱ va̱ʼaní káchíñu xíʼin inkana, sánáʼa̱na inkana xa̱ʼa̱ ña̱ xíni̱na (1 Tim. 6:18). Tá xi̱kachíñu ta̱ Jesús xíʼin yivára, ki̱ʼinra kuenta ña̱ nda̱a̱ ni iin ña̱ʼa va̱ása níchise̱ʼéra nu̱úra. Ta̱ Jesús xi̱nivara ndáa ki̱ʼva i̱xava̱ʼa Jehová ndiʼi ña̱ʼa ña̱ íyo chí ndiví, ta ku̱a̱ʼání ña̱ sa̱kúaʼara xíʼin ña̱ ke̱ʼé yivára (Prov. 8:27). Ta tá ki̱xi ta̱ Jesús nu̱ú ñuʼú yóʼo sa̱náʼa̱ra na̱ discípulora xa̱ʼa̱ ndiʼi ña̱ sa̱náʼa̱ yivárara (Juan 15:15). Ña̱kán, ná kundiku̱nyó yichi̱ Jehová ta ná sanáʼa̱yó na̱ hermanoyó xa̱ʼa̱ ndiʼi ña̱ xíni̱yó. Savana va̱ása kúni̱na sanáʼa̱na inkana xa̱ʼa̱ ña̱ xíni̱na á xa̱ʼa̱ iin ña̱ kivi chindeétáʼan xíʼinna, saáchi kúni̱na kaʼndana chiñu nu̱úna. Soo miíyó va̱ása xíniñúʼu keʼéyó saá, chi ña̱ xíniñúʼu keʼéyó kúú ña̱ sanáʼa̱yó inkana xa̱ʼa̱ ña̱ xíni̱yó.

Inka ki̱ʼva ña̱ taxiyó ña̱ kúúmiíyó ndaʼa̱ na̱ hermanoyó kúú ña̱ chika̱a̱yó ndee̱ xíʼinna. Ndiʼivayó va̱ʼaní kúniyó tá xíto inkana ña̱ kéʼéyó, ta táxina tíxa̱ʼvi ndaʼa̱yó xa̱ʼa̱ ña̱yóʼo. Ta̱ Jesús xi̱tavára tiempo ña̱ xi̱ka̱ʼa̱nra xíʼin na̱ discípulora ña̱ va̱ʼaní íyo chiñu ña̱ xi̱keʼéna (chitáʼanña xíʼin Mateo 25:19-23; Luc. 10:17-20). Ta nda̱a̱ ni̱ka̱ʼa̱nra xíʼinna ña̱ ku̱a̱ʼákava chiñu keʼéna nu̱ú ña̱ ke̱ʼé miíra (Juan 14:12). Ñuú tá kúma̱ní kuvira, ni̱ka̱ʼa̱nra xíʼin na̱ apóstolra ña̱ va̱ʼaní íyo chiñu ña̱ kéʼéna. Ka̱chira xíʼinna: “Ndóʼó kúú na̱ íyo xíʼi̱n ni tá yáʼi̱ nu̱ú tu̱ndóʼo, kǒo sándakoondó yi̱ʼi̱” (Luc. 22:28). Ta ña̱ ni̱ka̱ʼa̱nra xíʼinna chi̱ka̱a̱níña ndee̱ xíʼinna ña̱ saxínuna chiñu ña̱ ta̱xira ndaʼa̱na. Ta saátu miíyó, tá táváyó tiempo ña̱ ka̱ʼa̱nyó xíʼin na̱ hermanoyó ña̱ va̱ʼaní íyo chiñu ña̱ kéʼéna, saá kúú ña̱ kusi̱íka-inina ta va̱ʼaní kachíñuna.

Iin ta̱ hermano ta̱ naní Kayode káchira: “Su̱ví ndiʼiví tiempo vií kachíñuyó xíʼin inkana saáchi na̱ yiví ku̱a̱chi kúúyó, soo kiviva sakúsi̱íyó-inina tá ná chika̱a̱yó ndee̱ ña̱ vií kachíñuyó xíʼinna”. ¿Á saá íyo ña̱ kéʼún? ¿Á kivi nda̱ka̱tu̱ʼún inka na̱ hermano á va̱ʼa káchíñún xíʼinna? ¿Á kúsi̱í-inina tá káchíñuna xíʼún nda̱a̱ táki̱ʼva xi̱kusi̱í-ini na̱ discípulo tá xi̱kachíñuna xíʼin ta̱ Jesús? Tá saá íyoña, kivi ka̱ʼún nda̱a̱ táki̱ʼva ni̱ka̱ʼa̱n ta̱ apóstol Pablo tá ka̱chira: “Na̱ chíndeétáʼan kuití xíʼinvandó kúúndi̱ ña̱ va̱ʼa si̱í koondó” (2 Cor. 1:24).