Mu ntsimbu yaco, Yesu ua lilongesele ku kala na vifua via mu puisile mukua ku panga vuino na vakuavo. Kaha muezile ha mavu, ua puile lungano lua cili lua muntu a tantekeya ku panga vuino na vakuavo. Vati lungano lua Yesu lu hasa ku tu kuasa? Mu ku hilula vuino lungano lueni, tu hasa ku nongonona vitume vitatu vize vi hasa ku tu kuasa ku panga vuino na vakuetu. Vitume viaco vi ka tu kuasa ku sambeya cimbembesi ca ku likuata kumo na ku pangela hamo.

Mukua ku panga vuino na vakuavo ua pua ua ku likehesa, kaha ua haka seho ya kama ku vakuavo ve ku panga navo, ke ku seteka ku lituntula ha kati kavo. Yesu ua lilongesele ku likehesa caco kuli Ise. Vutuhu Yehova ikeye lika ua fuila ku mu sana Sakatanga, vunoni ua tondele naua vantu va tantekeye cipanga ca lingile Muaneni, mukua ku panga neni. Evi tu vi muena ku mezi a handekele Njambi ngueni: “Tu pangienu muntu mu ciseteko cetu.” (Njen. 1:26) Mua vusunga, Yesu ua muene ku likehesa ca Yehova ku hitila mu mezi aa.—Visa. 18:35.

Ngeci mua kele ha mavu Yesu neni ua muesele ku likehesa caco. Mu va kele na ku mu sangala ku viuma via puisilemo, Yesu ua kele na ku talekesa visangala viaco kuli uze i via pande. (Mako 10:17, 18; Yoa. 7:15, 16) Yesu ua tondele ha kale ciyulo  ha kati keni na vandongesi veni, ngeci ua va puisile vavusamba kati vangamba. (Yoa. 15:15) Ntsimbu imo ua hetele vene na ha ku va tanesa ku viliato, linga a va longese ku likehesa. (Yoa. 13:5, 12-14) Netu tu puenu na ku tambuluisa Yesu mu ku muesa kasingimiko ku vakuetu va tue ku panga navo, kati ku ku tuameka lika vizango vietu. Mu ku muesa kasingimiko kuli umo na mukuavo, na ku hona ku tuala mana kuli iya va sangala ku tuala ha cipanga ci tua lingi, tue ku puisamo via vingi.—Loma 12:10.

Muntu ua ku likehesa a tantekeya naua ngecize, ‘ku lana ca vakua zinguli ce ku puisamo via vingi.’ (Visi. 15:22) Ambe nga tua kala na vutongue vua ku fua vati, ka tua pandele ku suva ngecize na umo muntu a tantekeya viose uahi. Cipue Yesu neni ua litavelele ngecize kua kele vimo ka tantekeyele. (Mat. 24:36) Cikuavo Ua hakele seho ku viuma vi va tantekeyele vandongesi veni, na ku cifua ci va kele na ku singaniekelamo vutuhu ka va tantulukile. (Mat. 16:13-16) Ngeci mukemuo, vantu va livuile ku zituka ku panga neni. Na vuno vene, nga tu pua na ku vuluka ha lengela ngolo ni vuhasi vuetu, na ku tavesa vakuetu navo va haneko vukuasi ni vinguli viavo, tu ka sambeya ciyulo. Kaha cikuavo naua, tu ka puisamo via vingi.

Ca pua ca seho cikuma-kuma ku vakuluntu mu cikungulukilo ku tambuluisa ku likehesa ca Yesu, omo va pangela hamo. Va na pande ku vuluka ngecize sipilitu santu i hasa ku pangesa mukuluntu uose-ouo, mu ku hana nguli i tondeka. Ngeci mukemuo nga vakuluntu va lihakela kapandi ka ku livuisa ku zituka umo na mukuavo, mu viuano viavo, va ka hasa ku linga vihangula vi ka kuasa cikungulukilo cose.

Mukua ku panga vuino na vakuavo ua pua ua ku votsika. Ke ku kaluuisa viuma, kaha ue ku tava ku uisila kumo na vakuavo. Mua vusunga, Yesu ua kele na vukovelelo vua vuingi vua ku mona ku votsika ca Ise. Ca ku muenako, ua mu tumine kuiza hano ha mavu mukua ku patula vantu ku kasitiku ka kutsa kaze ka va pandele.—Yoa. 3:16.

Yesu ua kele na ku muesa ku votsika ha vintsimbu vi ca tondekele ku lingamo. Ca ku muenako, Yesu ua kuasele umo mpuevo ua ku Kanana, vutuhu va mu tumine mu kua ku kuasa ndzivo ya Isaleli. (Mat. 15:22-28) Cikuavo naua, ua muesele ku votsika ku viuma via lavelelele ku vandongesi veni. Kaha vutuhu umo ua vavusamba veni va kama, Petulu ua mu vianenene ha mbunga, vunoni Yesu ua liviukisilile mu ku mu ecela. Mu nima ya ntsimbu, ua kundikile Petulu citeli ca kama. (Luka 22:32; Yoa. 21:17; Vili. 2:14; 8:14-17; 10:44, 45)  Lungano lua Yesu lua muesa ha toma ngecize tua pande ku tavesa ku votsika cetu, ci “soloke ku vantu vose”.—Filp. 4:5.

Ku pua va ku votsika ce ku tu lingisa naua ku litombola na vantu va vifua viose, linga tu hase ku panga vuino navo. Yesu ua kele na ku litombola vuino na vantu mu cifua ca lingisile vene na vitozi veni ku mu ku vangeya nguavo, “kavusamba ka vakua milambu na vakua vipi.” (Mat. 11:19) Vuno ngeci mua Yesu, netu tu hasa ku panga vuino na vantu va vifua vieka ni? Umo muanetu ua kele mu vuniungi vua ku zinguluka na ku pangela ha Mbetele na vantu va visemua via ku liseza-seza, ua lizina Louis, ua handekele ngueni: “Ange nje ku setekesa nkala civunga ca vantu va nje ku panga navo ku civumbe ca mavue a ku tuntumuka-tuntumuka. Mu ku alulula vihela via amo mavue, u hasa ku tunga civumbe ca ku oloka. Nange nje ku lihakela kapandi ka ku lisungamesa linga hose ha cihela ha va nji haka kati ha henge.” Evi visinganieka via cili ni vati?

Vukovelelo vuka vu tua kala navuo vua ku muesa ku votsika cetu mu cikungulukilo? Vukovelelo vuaco, vua pua nga tuli ku civunga cetu ca ku tuhuka mu lihia. Halumo tu ka tuhuka mu lihia na vakua ku ambulula va kala na viteli mu vusoko, ni vakua citso ceka. Nga mukemuo, tu hasa ku litombuesa ku vuhasi vuavo, ni ku cifua ca ku ambulula ci va lema, linga navo va hase ku ivua ndzolela mu cipanga ca ku ambulula.

Mukua ku panga vuino na vakuavo ua kala na “cizango ca ku hana-hana.” (1 Tim. 6:18) Mua kele na ku panga na Ise, mua vusunga Yesu ua muene ngecize Yehova ka puile mukua ku sueka-sueka viuma. Ca ku muenako, omo Yehova “ua viukisile melu,” Yesu ‘kua kele’ kaha ua lilongesele via vingi. (Visi. 8:27) Mu nima ya ntsimbu Yesu neni ua lekeleko vandongesi veni, viuma ‘viose via vuile kuli Ise.’ (Yoa. 15:15) Netu tu hasa ku tambuluisa lungano lua Yesu, mu ku lekako vamuanetu vutongue vu tua lilongesa, ni viuma vi tu tantekeya ku linga. Mua vusunga, mukua ku panga vuino na vakuavo ke ku suekela vakuavo vukuasi ni mizimbu ya tondeka omo lia ku tonda ku haka vose ku ndzili yeni. Vunoni ua kala na ndzolela ya ku lekesako vakuavo viuma via na lilongesa.

Tu hasa naua ku kaniamesa vakuetu va tue ku panga navo. Nga muntu na mono kapandi ketu kaha a tu santsela na mutima uose, ka tue ku ivua vuino ni? Yesu ua kele na ku uana ntsimbu ya ku sangala vaze va kele na ku panga navo. (Setekesenu na Mateo 25:19-23; Luka 10:17-20) Kaha ua va lekele ngueni: ‘Va ka panga vipanga via ku hiana vize via lingile ikeye.’ (Yoa. 14:12) Ku vutsiki vua ku manusuila tele kanda va mu tsihe, Yesu ua sangalele vandongesi veni ngueni: “Enu mu vaze va na tokoho nange mu vieseko viange.” (Luka 22:28) Aci singaniekenu ha ndzolela na ndzili i va vuile, mu va halakanene aa mezi! Ngeci mukemuo, nga tu pua na ku uana ntsimbu ya ku sangala vakuetu va tue ku panga navo, tu ka va vuisa ndzolela kaha citava va ka hasa ku puisamo naua via vingi.

Umo muanetu Kayode, ua handekele ngueni: “Ku panga vuino na vakuetu ka ca tondekele ku pua va ku tantuluka.” Vunoni ue ku lihakela kapandi ka ku vuisa ndzolela vakuavo ve ku panga navo, na kuehuisa vipanga viavo. Nenu mukemuo mu mua fua ni? Ci ka pua ca cili nga mu hula vamo vakuenu Vakua Kilistu, ku tuala ha vati ve ku livua mu ku panga nenu. Nga va lema ku panga nenu ngue muze mu va lemene vandongesi ku panga na Yesu, kaha mu hasa ku handeka ngue mua handekele kapostolo Paulu ngueni: “Tu vakuasi [ni vakua ku panga nenu] mu ku mi zolesa.”—2 Kol. 1:24.