Kema Jesús itstoya iluikak kiyekok kuajkuali tlamantli tlen kipaleuik kuali tekitis ininuaya sekinok. Uan kema itstoya ipan Tlaltipaktli kinnextilik itokilijkauaj nojkia kiampa ma kichiuakaj. ¿Kenijkatsa techpaleuia tlen kichijki? Tikitasej eyi tlamantli tlen techpaleuis kuali ma titekitikaj ininuaya sekinok, kuali ma timouikakaj uan ma timosentikapaleuikaj.

Kema se maseuali amo moueyimati, kuali tekiti ininuaya sekinok uan kinpatiita, uan amo mouejkapantlalia. Jesús kiitak iTata amo moueyimati pampa maske san Jehová kinamiki kiiljuisej Tlachijchijketl, ya kipatiitak tlen Jesús kichijki. Kiampa kinextik kema kiijtok: “Tikinchiuasej [maseualmej] ma elikaj keja tojuantij uan kipiasej totlachialis” (Gén. 1:26). Kema Jehová kiampa kiijtok, Jesús kiitak iTata amo moueyimati (Sal. 18:35).

Jesús amo moueyimatki kema itstoya ipan Tlaltipaktli. Kema maseualmej kinekiyayaj kiuejkapantlalisej nochipa kiijtok Jehová kipaleuiyaya (Mar. 10:17, 18; Juan 7:15, 16). Nojkia, kichijki kampeka kuali mouikas ininuaya itokilijkauaj uan kinitak kej iuampoyouaj, uan amo kej itekipanojkauaj (Juan 15:15). Kema kinikxipajpajki, kinmachtik amo ma moueyimatikaj (Juan 13:5, 12-14).  Sanse kej Jesús, ma tikinpatiitakaj katli ininuaya titekitij uan ma timotekipachokaj ipan tlen kinpano. Kema nochi timotlepanitaj uan amo san tikitaj ajkia tlauel pankisa, techpaleuia kuali ma titekitikaj (Rom. 12:10).

Katli amo moueyimati, kiniljuia sekinok ma kipaleuikaj, kiampa “nochi tlen kichiua kisa kuali” (Prov. 15:22). Maske kuali tijchiuaj se keski tlamantli ma tikilnamikikaj amo aka ueli kichiua nochi. Jesús kiijtok amo nochi kimatiyaya (Mat. 24:36). Maske itokilijkauaj eliyayaj tlajtlakolejkej, ya kintlatsintokik kenijkatsa kiitayayaj se keski tlamantli (Mat. 16:13-16). Yeka, itokilijkauaj kuali kiyolmatiyayaj kema itstoyaj iuaya. Kema amo timoueyimatij, tikilnamikij amo nochi ueli tijchiuaj uan kuali tikintlakakiliaj sekinok, titekitij ika tlaseuilistli uan ‘nochi tlen tijchiuaj kisa kuali’.

Tlauel ipati ueuejtlakamej ma kichiuakaj kej Jesús uan amo ma moueyimatikaj kema sansejko tekitij. Moneki kiilnamikisej toTeotsij itonal uelis kipaleuis se ueuejtlakatl ma kiijto se tlamantli tlen kinpaleuis nochi ueuejtlakamej kuali ma kitlapejpenikaj se tlamantli. Tlaj kema mosentiliaj nochi kuali motlakakiliaj uan kiijtouaj tlen moiljuiaj, tlen kitlapejpenisej kichiuasej kinpaleuis nochi toikniuaj ipan tlanechikoli.

Se katli kinkuamachilia sekinok amo san kineki ma mochiua se tlamantli kej ya kineki. Jesús nochipa kiitak iTata techkuamachilia. Se neskayotl, Jehová kititlanki iKone ma kinmakixtiki maseualmej katli kinamikiyaya mikisej (Juan 3:16).

Jesús kichiuilik tlen kuali kema kiitak kinamiki. Ma tikilnamikikaj, maske kititlankej ma kinpaleuiki israeleuanij, nojkia kipaleuik se siuatl katli eua Canaán (Mat. 15:22-28). Nojkia, kimatiyaya itokilijkauaj amo ueliyayaj kichiuaj nochi. Kema iuampo Pedro kiijtok ininixpa sekinok amo kiixmatiyaya, Jesús kitlapojpoljuik uan teipa kimakak sekinok tekitl (Luc. 22:32; Juan 21:17; Hech. 2:14; 8:14-17; 10:44, 45). Tlen Jesús kichijki, kinextia moneki nochipa tikinchiuilisej sekinok tlen kuali (Filip. 4:5).

Kema tikilnamikij amo nochi tiuelij tijchiuaj, techpaleuis ma timosentikapaleuikaj  ininuaya sekinok. Jesús kuali mouikayaya ininuaya maseualmej, uan yeka katli kikualankaitayayaj amo kinpaktik uan kiijtojkej mouampojchiuayaya ininuaya katli tlainamayayaj impuestos uan katli tlajtlakolchiuayayaj pampa inijuantij kuali kitlakakilijkej (Mat. 11:19). ¿Uelis tijchiuasej kej Jesús uan titekitisej ika pakilistli ininuaya sekinok maske amo moiljuiaj kej tojuantij? Toikni Louis, katli tlatekipanok kej tepaxalojketl uan ipan Betel, uan tekititok ininuaya miakej toikniuaj, kiijtoua: “Na nikinita toikniuaj kej se tepamitl tlen kichijchijtokej ika tetl tlen amo sanse ininuejuexka. Kema kikualchijchijtiauij sejse tetl uan kuali kitekpichojtiauij, nopa tepamitl amo chikotik mokaua. Nojkia, nijchijtok kampeka nijpatlas kej nimoiljuia uan kiampa uelis nitekitis ika tlaseuilistli ininuaya sekinok. Kema kiampa nijchijtok, nopa tekitl kuali kisa”. ¡Tlauel kuali kej moiljuia toikni!

¿Kenijkatsa uelis tijnextisej tikinikneliaj toikniuaj kema tikilnamikij amo nochi tiuelij tijchiuaj se tlenijki? Se neskayotl, uelis ipan totlanechikol itstokej se keskij toikniuaj katli ya uejueyij o katli kinmokuitlauiaj ininchampoyouaj. Kema titlajtolmoyauasej ininuaya, uelis tijchiuasej kej inijuantij kichiuaj o tijpatlasej kej titlajtolmoyauaj uan kiampa kinpaktis tlajtolmoyauasej touaya.

Katli tekitij sansejko amo moneki elisej “itskuimej” (1 Tim. 6:18). Kema Jesús tekitik iuaya iTata, kiitak amo kichiuayaya se keski tlamantli ichtakatsi. Kema Jehová “kichijchijki nochi tlen onka ipan iluikaktli”, Jesús itstoya nopaya uan kiyekok tlen iTata (Prov. 8:27). Teipa, Jesús kiniljuik itokilijkauaj tlake kiyekojtoya tlen iTata uan kichijki ika miak pakilistli (Juan 15:15). Moneki tijchiuasej kej Jehová uan tikiniljuisej toikniuaj tlen tijmatij tijchiuasej uan tlen uelis kinpaleuis. Tlaj tijmatij se keski tlamantli tlen uelis kinpaleuis sekinok, amo kinamiki tijtlatisej san pampa tijnekij tojuantij tijchijtosej se tlamantli, moneki tikiniljuisej uan kiampa nojkia kiyekosej.

Kema tikinyolchikauaj toikniuaj, kejuak titemakaj se tlenijki. Tlauel kuali tijyolmatij kema se akajya kiita tijchiuaj kampeka uan techtlaskamatilia ika nochi iyolo. Jesús kiniljuik itokilijkauaj nopa kuajkuali tlamantli tlen kinextiyayaj (nojkia xikita Mateo 25:19-23; Luc. 10:17-20). Uan kiniljuik kichiuaskiaj “más uejueyi tekitl” uan amo kej ya kichijtoya (Juan 14:12). Uan kema nechka kimiktiskiaj, kinyolchikajki uan kiniljuik: “Inmojuantij initstokej tlen inmokajtokej nouaya kema nijpanotok tlaouijkayotl” (Luc. 22:28). Nochi tlen kiniljuik tlauel kinyolchikajki uan kinpaleuik ma kichiuakaj tlen kuali. Tlaj tojuantij nojkia tikinyolchikauaj toikniuaj, tlauel yolpakisej uan nojua kinekisej kitekipanosej Jehová.

Se toikni katli itoka Kayode kiijtoua: “Maske titlajtlakolejkej, kena uelis tijchiuasej sekinok ma yolpakikaj uan tikiniljuisej kuali tekitij”. ¿Nojkia kiampa tijchiua? ¿Uelis tikintlatsintokis toikniuaj kenijkatsa mitsitaj? ¿Kinpaktia sekinok itstosej mouaya kej kiyolmatiyayaj Jesús itokilijkauaj? Tlaj kena, uelis tikijtos kej apóstol Pablo kiijtok: “Tojuantij tijnekij titekitisej sansejko ika inmojuantij uan tiinmechpaleuisej para noja más xipakikaj” (2 Cor. 1:24).