Ompa iluikak, Jesús kiitak katiyejua kualneskayomej kipaleuiskiaj maj kuali tekiti iniuan oksekin. Uan keman yetoyaya nikan taltikpak kinkauilij se kuali neskayot akin iuan tekitikej. ¿Keniuj techpaleuia kuali neskayot tein kikauak? Keman timomachtiskej tein kichiuak, tikitaskej eyi tayolmajxitilis tein techpaleuis maj ueli titekitikan iniuan oksekin, maj kuali timouikakan iniuan uan maj timosenpaleuikan.

Akin amo ouij kikisa tekitis iniuan oksekin yolyemanik, kinpatiuita akin iuan tekitij uan amo moueyimati. Jesús kiitak ke iTajtsin yolyemanik. Maski sayoj kinamiki maj tikijtokan ke Jiova Tachijchiujkej, yejuatsin kinextij ke kipatiuitaya tekit tein kichiuak iKonetsin keman kijtoj nejin: “Maj tikchijchiuakan taltikpaknenkej ijkon kemej tejuan” (Gén. 1:26). Keman Jiova kijtoj nejin, Jesús kiitak ke iTajtsin semi yolyemanik (Sal. 18:35).

Keman Jesús yetoya nikan taltikpak no kinextij yolyemanilis. Keman taltikpakneminij kiueyitaliayaj keman kichiuaya teisa, yejua nochipa kiueyitaliaya Jiova (Mar. 10:17, 18; Juan 7:15, 16). Uan no, mochikauak kuali mouikas iniuan imomachtijkauan uan kinitak kemej itasojikniuan, amo kemej itakeualuan (Juan 15:15). Hasta kinmetspajpakak porin kinekia kinmachtis ke monekia yeskij yolyemankej (Juan 13:5, 12-14). Ijkon kemej kichiuak Jesús, moneki tikinpatiuitaskej akin iniuan  titekitij uan tiktemoskej maj kuali yetokan. Uelis tikchiuaskej miak taman komo tikinpoujkaitaj uan amo tiktemouaj maj tejuan techueyitalikan (Rom. 12:10).

Akin yolyemanik no kiajsikamati ke tein se kichiua “kuali kisa keman moajsij miakej tayolmajxitianij” (Prov. 15:22). Maski miak xiujmejya tikchiuanij se tekit oso ueli tikchiuaj miak taman, maj tikelnamikikan ke nion se taltikpaknenkej kimati nochi. Hasta Jesús kijtoj ke seki taman amo kimatia (Mat. 24:36). Uan no, maski itatojtokakauan katkaj tajtakolejkej, Jesús kinekia kimatis toni kinemiliayaj (Mat. 16:13-16). Yejua ika, akin iuan tekitiaj kuali momachiliayaj iuan. No ijkon, keman tiyolyemankej, keman tikelnamikij ke amo nochi ueli tikchiuaj uan keman tikakij tein oksekin kinemiliaj, titapaleuiaj maj tinochin kuali timouikakan uan maj “kuali kisa” tein tikchiuaj.

Okachi moneki maj tokniuan tayekananij kinextikan yolyemanilis kemej Jesús keman mosentiliaj iniuan okseki tayekananij. Moneki kielnamikiskej ke yektikatsin espíritu uelis kipaleuis semej tayekananij maj kijto teisa tein kinpaleuis maj kimatikan toni kiixtaliskej. Komo itech nechikolmej tein kipiaj, mochikauaj kichiuaskej maj nochin kimachilikan ke uelis kijtoskej tein kinemiliaj, kiixtaliskej tein kinpaleuis nochin tokniuan.

Akin amo ouij kikisa tekitis iniuan oksekin yektanemilia. Yejua ika kikaki tein oksekin kinemiliaj uan kipata tein kiixtalijtoya. Jesús miakpa kiitak ke iTajtsin ijkon kichiua. Kemej neskayot, Jiova kiualtitanik maj kinmakixtiki taltikpakneminij maski kinnamikia mikiskej (Juan 3:16).

Jesús kipatak tein ixyetoya keman kiitak ke kinamikia oso ke monekia. Maj tikelnamikikan ke kipaleuij se siuat cananea maski sayoj kiualtitankaj maj kinpaleuiki akin nemiaj itech xolal Israel (Mat. 15:22-28). No kinajsikamatia imomachtijkauan, yejua ika amo kichiaya maj kichiuanij tein amo ueliaj. Keman Pedro, akin kuali iuan mouikaya, kijtoj ke amo kiixmatia, Jesús kitapojpoluij uan satepan kimakak uejueyi tekimej (Luc. 22:32; Juan 21:17; Hech. 2:14; 8:14-17; 10:44, 45). Tein kichiuak Jesús kinextia ke moneki tikpataskej tein tikixtalijtoyaj, uan ijkon nochin kiitaskej ke tiyektanemiliaj (Filip. 4:5, TNM).

Komo tiyektanemiliaj, no tikpataskej tein monekis uan ijkon uelis kuali titekitiskej iniuan nochin tokniuan. Kemej Jesús semi kuali mouikaya iniuan nochin taltikpakneminij, akin kitauelitayaj kijtojkej ke kuali mouikaya iniuan akin kisentiliayaj tomin keman judíos kiixtauayaj impuestos uan  iniuan tajtakolchiuanij akin mochiujkaj imomachtijkauan (Mat. 11:​19). Maski akin iniuan titekitij amo tanemiliaj kemej tejuan, ¿uelis tikchiuaskej kemej Jesús uan kualtsin titekitiskej iniuan? Se tokniuj takat akin monotsa Louis tekitini iniuan miakej tokniuan porin takalpanouani itech nechikolmej uan tekitini Betel. Yejua kijtoua: “Se tekitis iniuan oksekin akin no tajtakolejkej kemej yeskia se kichijchiuas se tepamit ika tataman temej. Maski ouij tekisa se kichijchiuas porin temej tatamamej, komo se kintajtalia kampa kinamiki, tepamit kuali mokaua. No nimochikauani nikpatas kemej nitanemilia uan ijkon uelis kuali nitekitis iniuan oksekin. Nejon tapaleuia maj tekit kuali kisa”. ¡Semi kuali kemej tanemilia nejin tokniuj!

¿Keniuj uelis tiknextiskej itech nechikol ke tiyektanemiliaj? Kemej neskayot, tokniuan akin iniuan titanojnotsaj xa kipiaj tataman xiujmej oso kipiaj tekimej iniuan ininchankauan tein tejuan amo tikpiaj. Keman titanojnotsaskej iniuan, ¿ueliskia tinejnemiskej kemej yejuan momattokej oso titanojnotsaskej kemej yejuan okachi kiuelitaj? Nejon tapaleuis maj okachi kinyolpakti tanojnotsalis.

Akin amo ouij kinkisa tekitiskej iniuan oksekin kiuelitaj tapaleuiskej (1 Tim. 6:18). Keman Jesús tekitik iuan iTajtsin, xa kiitak ke yejuatsin amo mokauilia tein kimati. Jesús uelik momachtij miak taman porin iuan yetoya Jiova “keman yejuatsin kichijchiuak iluikak” (Prov. 8:27). Satepan Jesús kintapouij imomachtijkauan nochi tein iTajtsin kiluijka (Juan 15:15). Ijkon kemej kichiua Jiova, tejuan no moneki tikinmachtiskej tokniuan nochi tein tikmatij. Akin amo ouij kikisa tekitis iniuan oksekin, amo kintatilia tein monekiskia kimatiskej oso tein ueliskia kinpaleuis, sayoj porin kineki yejua taixyekanas, ta kiuelita kinnextilis tein momachtiani.

No tikinpaleuiaj oksekin keman tikinyolchikauaj. ¿Melauj ke semi kuali timomachiliaj keman aksa kiita tein tikchiuaj uan techtasojkamatilia? Jesús kinyolchikauaya akin iuan tekitiaj keman kiniluiaya tein kuali tein kichiuayaj (no xikonita Mateo 25:19-23; Lucas 10:17-20). Hasta kiniluij ke kichiuaskiaj “kachi uejueyi ok tachiualisme” ke tein yejua kichiuak (Juan 14:12). Uan youak achto ke kimiktiskiaj kinyolchikauak itatitaniluan akin amo kikaujkaj. Yejua kiniluij: “Namejuan nankisentokatiualayaj nannechtoktilitiualajke Nejuatsin tech nochi notajyouilisuan” (Luc. 22:28). Tein kiniluij xa semi kinyolchikauak uan kinpaleuij maj kisentokanij tekitinij. Komo tejuan no tikinyolchikauaj tokniuan, okachi yolpakiskej uan mochikauaskej okachi tekitiskej.

Se tokniuj takat akin monotsa Kayode kijtoua: “Maski tiontajtakolej, uelis kuali tiontekitis iniuan oksekin uan uelis tikonchiuas maj yolpakikan uan maj amo ouij kinkisa kichiuaskej tekit tein kipiaj”. ¿Keniuj mitsonixmatij tejuatsin? Kuali yeskia xikontajtani okseki tokniuan ox amo ouij kinkisa tekitiskej mouan. Komo kiuelitaj mouan tekitiskej ijkon kemej imomachtijkauan Jesús kiuelitayaj iuan tekitiskej, uelis tikonijtos tein kijtoj tatitanil Pablo: “Tiknekij tamechpaleuiske para […] nanmoyolpakiltijtiyaske” (2 Cor. 1:24).