Ompa iluikak, Jesús omomachti tlen omonekiaya kichiuas para kuali mouikas inmiuan oksekimej ijkuak itlaj kichiuaskiaj. Ik non, ijkuak okatka nikan tlaltikpak noijki ijkon okinmachti oksekimej. ¿Ken techpaleuia tlen okichi? Axkan tikitaskej eyi principios bíblicos tlen techpaleuiskej kuali ma timouikakan iuan tokniuan ijkuak itlaj tikchiuaskej inmiuan.

Akin kimati mouikas iuan oksekimej kiteititia yolyamanki, kinpatioita akinmej inmiuan kajki uan amo moueyineki. Jesús okitaya iTajtsin yolyamanki. Maski Jehová okichijchi nochi tlen onka okiteititi Jesús sapanoua okipaleui ijkuak otlachijchi. Ijkon okiteititi ijkuak okijto: “Ma tikchijchiuakan tlakatl ijkon ken tejuan” (Gén. 1:26). Jesús okitak iTajtsin sapanoua yolyamanki uan amo moueyineki (Sal. 18:35).

Ijkuak Jesús okatka nikan tlaltikpak noijki okiteititi yolyamanki. Miakej okiueyichiuayaj ijkuak itlaj okichiuaya pero ye nochipa okiueyichiuaya Jehová (Mar. 10:17, 18; Juan 7:15, 16). Noijki omochijchika kuali mouikas iuan imachtijkauan, Jesús okinmitaya ken iyolikniuan amo ken itlakeualuan (Juan 15:15). Jesús okinmachti noijki omonekiaya yetoskej yolyamankej ijkuak okinpakili  inmikxiuan (Juan 13:5, 12-14). Ijkon ken ye, tejuan moneki tikinpatioitaskej tokniuan uan amo san totech ma timotekipachokan. Ijkuak timotlakaitaj uan amo timokuayejyekouaj tejuan okachi topati, uelis tikchiuaskej miak tlamantli (Rom. 12:10).

Akin amo moueyineki kuali kimati “nochi kuali kisa ijkuak kintlajtlaniaj oksekimej tlen kichiuaskej” (Prov. 15:22). Maski yitikpiaj miak xiuitl noso tikmatij tikchiuaskej miak tlamantli, ma tikilnamikikan amikaj nochi kimati. Jesús noijki okijto amo nochi okimatiaya (Mat. 24:36). Ye okinekiaya kimatis tlen omokuayejyekouayaj imachtijkauan (Mat. 16:13-16). Akinmej omouikayaj iuan Jesús kuali omomachiliayaj. Tla tiyolyamankej tikajsikamatij amo nochi ueli tikchiuaj, noijki moneki tikkakiskej tlen oksekimej kijtoskej ijkon tinochtin kuali timouikaskej uan “nochi kuali kisas”.

Tlayekankej moneki yetoskej yolyamankej ijkon ken Jesús ijkuak kiyektlaliskej seki tlamantli. Moneki kilnamikiskej iespíritu toTajtsin Dios uelis kipaleuis ikaj ma kijto tlen kinpaleuis ma kipejpenakan tlen kichiuaskej. Tla kuali mouikaj tlayekankej uan yolyamankej, ijkuak monechikoskej nochtin uelis kijtoskej tlen mokuayejyekouaj uan tlen kipejpenaskej kinpaleuis tokniuan tlen inmiuan monechikouaj.

Akin kuali mouika iuan oksekimej teajsikamati. Ik non, kiselia tlen oksekimej kipejpenaj. Jesús okitak iTajtsin nochipa teajsikamati. Maski tinochtin technamiki timikiskej porque titlajtlakolejkej, Jehová okiualtitlanki iKone para ma techmakixtiki (Juan 3:16).

Jesús noijki okikak tlen oksekimej okijtouayaj. Ma tikilnamikikan ye okititlankej san itech altepetl Israel pero Biblia kijtoua Jesús okipaleui se siuatl cananea noso fenicia (Mat. 15:22-28). Jesús kuali okimatiaya imachtijkauan amo nochi uelis kichiuaskiaj. Ik non, ijkuak iyolikni Pedro teixpan okijto amo okixmatiaya, Jesús okitlapojpolui uan satepan okikauili okachi ma tlapaleui itech tlanechikol (Luc. 22:32; Juan 21:17; Hech. 2:14; 8:14-17; 10:44, 45). Tlen okichi Jesús techmachtia moneki tikseliskej tlen oksekimej kijtouaj, ijkon  nochtin kitaskej melauak titeajsikamatij (Filip. 4:5).

Tla titeajsikamatij, tikchiuaskej tlen moneki uan ijkon kuali timopaleuiskej iuan nochtin tokniuan. Jesús kuali omouikaya iuan nochtin pero akinmej okikokoliayaj okualankej, ik non, okijtojkej ye omouikaya iuan akinmej okololouayaj tomin uan akinmej otlajtlakolchiuayaj okiselijkej tlen otlamachtiaya (Mat. 11:19). ¿Uelis tikchiuaskej ken Jesús uan ika pakilis uelis titlapaleuiskej iuan oksekimej maski amo mokuayejyekouaj noso kichiuaj ken tejuan? Tokni tlen itoka Louis tlen yokinmixmatki miakej tokniuan tlen tlatlamantli inmialtepe porque miak xiuitl yotlapaleui ken tlayekanki itech circuito uan itech kali Betel, okijto: “Ne nikita tokniuan ken tlatlamantli temej, sekimej uejueyij uan oksekimej tsikitsitsintin. Tla ninmej temej kuali tikintlaliaj kanin moneki, uelis tikchiuaskej se kualtsin tepamitl. Ik non, ne nimochijchikaua kuali nimouikas iuan nochtin uan nikpatlas tlen amo kuali nikchiua para ijkon uelis nitekipanos iuan tokniuan uan nochi kuali kisas”. ¡Kuali tlen mokuayejyekoua non tokni!

¿Ken uelis tikteititiskej tikinmajsikamatij tokniuan? Xamo tokniuan akinmej inmiuan titetlapouiaj tlamantli xiuitl kipiaj uan tlatlamantli kinmaluiaj infamilias. Ik non, ijkuak inmiuan titetlapouiaj, ¿uelis titetlapouiskej ken yejuan kinekij para ijkon yolpakiskej?

Akinmej kuali mouikaj ijkuak mopaleuiaj iuan oksekimej kitemakaj tlen kipiaj (1 Tim. 6:18). Ijkuak Jesús okipaleuiaya iTajtsin ye miak tlamantli okimachti uan amitlaj okitlatili. Ijkuak Jehová okichijchi iluikak, Jesús ompa okatka uan miak tlamantli okimachti (Prov. 8:27). Satepan ijkuak ye ouala nikan tlaltikpak okinmilui imachtijkauan tlen iTajtsin okimachti (Juan 15:15). Tla tiknekij tikchiuaskej ken Jehová, ma tikinmiluikan nochtin tokniuan tlen yotimomachtijkej. Akin kuali mouika iuan oksekimej ijkuak inmiuan tlapaleuia amo kitlatia tlen moneki kimatiskej noso tlen uelis kinpaleuis, amo ijkon kichiua para kinnauatijtos. Kinmachtia tlen yikimati para kinpaleuis oksekimej tokniuan.

Noijki uelis tikinpaleuiskej tokniuan tla tikinyolchikauaj. Tiyolpakij uan kuali timomachiliaj ijkuak se tokni kipatioita uan techtlasojkamatilia nochi tlen tikchiuaj. Jesús okinmiluiaya imachtijkauan kuali tlen okichiuayaj (xikita Mateo 25:19-23; Luc. 10:17-20). Hasta okinmilui yejuan kichiuaskiaj okachi miak tlamantli (Juan 14:12). Ijkuak yikimiktiskiaj Jesús okinmilui iapóstoles: “Nomejwah nochipa nontlaijyowijtinemih nowa” (Luc. 22:28). Tlen okinmilui okinyolchika uan okinpaleui ma kichiuakan tlen kuali. Tla tejuan noijki tikinmiluiaj tokniuan kuali tlen kichiuaj yolpakiskej uan kinekiskej okachi kitekichiuiliskej Jehová.

Se tokni tlen itoka Kayode okijto: “Maski nochipa timotlapololtiaj uelis tikinpaleuiskej oksekimej uan uelis yolpakiskej”. ¿Ijkon tikchiua tejuatsin? ¿Uelis tikintlajtlanis tokniuan tlen inmiuan timopaleuia ken tikpia monemilis? Imachtijkauan Jesús kuali omomachiliayaj ijkuak iuan okatka ¿Noijki ijkon momachiliaj tokniuan ijkuak mouan katej? Tla ijkon panoua, uelis tikijtos ken okijto apóstol Pablo: “Titekitiskeh nomowah para xikpiakah okachi pakílistli” (2 Cor. 1:24).