Sho a li megulu, Jesus okwi ilongo omaukwatya ngoka ge mu ningitha a kale ha vulu okulonga pamwe nayalwe nuupu. Opo nduno sho e ya kombanda yevi okwa li oshiholelwa oshiwanawa kwaamboka ya li haye endathana naye. Ongiini tatu vulu okumona mo uuwanawa moshiholelwa shaJesus? Ngele otwa konakona nuukeka oshiholelwa she, otatu ka vula okumona omakotampango gatatu ngoka taga vulu oku tu kwathela tu kale aaniilonga pamwe nayalwe ye li nawa. Omakotampango ngoka otage ke tu kwathela tu kale tu na uukumwe naamwatate naamwameme shi vulithe nale.

Omuniilonga pamwe nayalwe ngoka e li nawa oha kala a lenga aaniilonga pamwe naye noiha kambadhala okwiiyulika. Uukwatya mboka Jesus okwe wu ilongo kuHe. Nonando Jehova okwa gwana okwiithanwa Omushiti oye awike, okwa holola onkandangala ndjoka Omwana a dhana e li omuniilonga pamwe naye. Shoka otu shi iwetele sho a li a popi a ti: “Natu shiteni aantu ye tu fe.” (Gen. 1:26) Sho Jehova a popi oohapu ndhoka, otashi vulika Jesus a li a ndhindhilike kutya He omwiifupipiki. — Eps. 18:35.

Sho a li kombanda yevi, Jesus okwa li u ulike eifupipiko. Uuna a li a pandulwa omolwoshinima shontumba shoka a ninga, okwa li aluhe hu ukitha esimano kuJehova. (Mark. 10:17, 18; Joh. 7:15, 16) Jesus okwa li ha longo nuudhiginini, opo pokati ke naalongwa ye pu kale ombili nokwa li nokuli he yi ithana ookuume ke pehala lyoku ya ithana  aayakuli. (Joh. 15:15) Okwa li nokuli a yogo oompadhi dhawo, opo e ya longe oshiilongomwa kombinga yeifupipiko. (Joh. 13:5, 12-14) Ngaashi ye, natse otatu vulu okukala twa lenga aaniilonga pamwe natse pehala lyokukala twa pititha komeho omahalo getu komeho yogawo. Otatu vulu okupondola oshindji uuna hatu ‘ulukilathana esimaneko’ nokuyanda okukala owala otse twa hala tu pandulwe uuna pwa tompolwa sha. — Rom. 12:10.

Omuntu omwiifupipiki oha kala e shi kutya omadhiladhilo “otaga tompola sha mpoka pe na aagandjindunge oyendji.” (Omayel. 15:22) Kutya nduno otu na ontseyo nenge omagano gontumba, otwa pumbwa okudhimbulukwa kutya kapu na omuntu ngoka e shi kehe shimwe. Jesus naye okwa li nokuli a zimine kutya opu na iinima yimwe mbyoka kee shi. (Mat. 24:36) Okwa li wo aluhe ha kala a hala okutseya shoka aalongwa ye inaaya gwanenena ye shi nenge taya dhiladhila. (Mat. 16:13-16) Itashi kumitha nokuli sho aalongi pamwe naye ya li haya kala ye mu mangulukila. Sha faathana, ngele otwa kala hatu kaleke momadhiladhilo omangambeko getu nokupa yalwe ompito ya gandje omaetopo gawo, kungawo pokati ketu nayo otapu ka kala aluhe pu na ombili, notatu ka ‘tompola oshindji’ sho tatu longele kumwe.

Osha simanenena aakuluntugongalo ya kale haya holele eifupipiko lyaJesus, unene tuu uuna ye li momutumba naakuluntugongalo ooyakwawo. Oye na okudhimbulukwa kutya ombepo ondjapuki otayi vulu okukwathela kehe gumwe gwomuyo a popye sha shoka tashi vulu okukwathela olutu lwaakuluntugongalo lu ninge etokolo lili pandunge. Ngele oya kala haya pe kehe gumwe ompito a gandje omaetopo ge, nena otashi ke ya kwathela ya ninge omatokolo ngoka taga ka etela egongalo alihe uuwanawa.

Omuniilonga pamwe nayalwe oha kala e na olukeno naaniilonga ooyakwawo. Oha tifuka noha kala e na ondjaalela. Jesus okwa mono lwiikando oyindji nkene He ta ulike olukeno. Pashiholelwa, Jehova okwa li e mu tumu e ye kombanda yevi a hupithe aantu muulunde neso ndyoka yi ilongela. — Joh. 3:16.

Jesus okwa li ha tifuka uuna sha pumbiwa nenge tashi wapa. Dhimbulukwa kutya oshikando shimwe okwa li a kwathele omukiintu Omukaanani, nonando Jesus okwa li a tuminwa owala koonzi ndhoka dha kana dhomAaisraeli. (Mat. 15:22-28) Okwa li wo e na ondjele ngele tashi ya kiinima mbyoka a tegelela aalongwa ye ya ninge. Konima sho kuume ke kopothingo Petrus e mu idhimbike montaneho yaantu, Jesus okwa li i ilongekidha e mu  dhimine po. Lwanima, okwi inekelele Petrus iinakugwanithwa ya simana. (Luk. 22:32; Joh. 21:17; Iil. 2:14; 8:14-17; 10:44, 45) Oshiholelwa shaJesus oshe shi ulika sha yela kutya otwa pumbwa okukala ‘tu na olukeno naantu ayehe,’ mokukala hatu ya yaalele. — Fil. 4:5.

Okukala tu na olukeno otaku ke tu kwathela wo tu igilile oonkalo, opo tu longele kumwe naantu ayehe nombili. Jesus okwa li ha ungaunga nawa nayalwe, shoka sha ningitha nokuli aatondi ye ye mu lundile kutya oku li “kuume kaafendelithi nokaalunde,” mboka ya li ya taamba ko etumwalaka lye. (Mat. 11:19) Mbela tse itatu vulu okukala hatu longele kumwe naamboka ya yooloka ko kutse ngaashi Jesus a li a ningi? Omumwatate Louis, ngoka a kala ethimbo ele miilonga yuuyendi nosho wo moBetel moka a kala ta longo nooitaali mboka ya za momaputuko ga yoolokathana, okwa ti: “Onda kala handi faathanitha mboka handi longo nayo noondhopi dha yoolokathana, ndhoka tadhi tungithwa ekuma. Ngele oondhopi dhimwe ndhoka owe dhi ukililitha, nena oto ka vula okutunga ekuma lya ukilila. Onda li wo nda kambadhala okuninga omalunduluko paumwene, opo ndi kwathele mokukaleka ekuma ndyoka lya ukilila.” Ndyoka oli li etaloko ewanawa lela.

Ongiini tatu vulu okuulika kutya otu na elongelokumwe megongalo? Shoka otatu vulu oku shi ulika mongundu yetu yomomapya. Otashi vulika hatu longo naauvithi mboka ye na iinakugwanithwa momagumbo ya yooloka ko kuyetu nenge kaaye shi yepipi lyetu. Otatu vulu okulundulula omukalo moka hatu uvitha nenge ondapo yetu, opo ngoka tatu longo naye a tyapule uukalele?

Omuniilonga pamwe nayalwe e li nawa oha “gandja.” (1 Tim. 6:18) Sho a kala naHe megulu, Jesus oku na okukala a li a ndhindhilike kutya Jehova ihe mu holeke iinima. Sho Jehova a li ta “yala egulu,” Jesus ‘opo a li’ nokwa li ta vulu okwiilonga kuye. (Omayel. 8:27) Lwanima, Jesus naye okwa li a lombwele aalongwa ye “iinima ayihe mbyoka [e] yi uva” kuHe. (Joh. 15:15) Tu na shoka momadhiladhilo, natse otu na okukala hatu topolelathana uuyelele nenge ontseyo ndjoka tu na naaniilonga pamwe natse. Odhoshili kutya omuniilonga pamwe nayalwe e li nawa ita ka holeka uuyelele nenge ontseyo ndjoka e na, opo a kale ta pangele aaniilonga ooyakwawo. Pehala lyaashono ota ka kala a nyanyukwa oku ya lombwela shoka e shi.

Otatu vulu wo okutsa omukumo aaniilonga pamwe natse. Mbela ihatu kala tu uvite nawa uuna gumwe e tu pandula sho twe mu ningila oshinima shontumba? Jesus okwa li ha kutha ethimbo a lombwele aalanduli ye kombinga yomaukwatya omawanawa ngoka ye na. (Yelekanitha Mateus 25:19-23; Lukas 10:17-20.) Okwa li nokuli e ya lombwele kutya otaya ka “longa iilonga iinene yi vule” ye. (Joh. 14:12) Uusiku mboka wa tetekele eso lye, okwa li a pandula aayapostoli ye aadhiginini a ti: “One omwa kala pamwe nangame momamakelo gandje agehe.” (Luk. 22:28) Dhiladhila owala kunkene oohapu dhe dha li dha gumu omitima dhawo noku ya ningitha ya katuke oonkatu! Ngele natse otwa kala hatu pandula aaniilonga pamwe natse, otaya ka kala ya nyanyukwa shi vulithe nale, notaya ka kala haya longo nuudhiginini.

Omumwatate gwedhina Kayode okwa ti: “Omuniilonga pamwe nayalwe e li nawa ina pumbwa okukala a gwanenena, ihe oha ningitha yalwe ya kale ya nyanyukwa noya longe iilonga yawo nuupu.” Mbela ngoye owu li omuniilonga a tya ngawo? Oto vulu okupula yamwe yomaamwatate naamwameme ye ku lombwele kutya ngoye omuniilonga a tya ngiini? Ngele ohaya nyanyukilwa okulonga pamwe nangoye ngaashi aalongwa yaJesus ya li haya nyanyukilwa okulonga pamwe naye, nena oto ka vula okupopya oohapu ndhoka omuyapostoli Paulus a li a popi a ti: “Otatu longo pamwe nane, oshoka otashi ke mu nyanyudha.” — 2 Kor. 1:24.