Ne iluikak, Jesús ouel kenon kuajli tekitis imiuan oksekimej. Niman ijkuak onen nikan ipan tlaltikpaktli, okimititi akin imiuan otekit kenon uelis kuajli nopaleuiskej. ¿Kenon uelis techpaleuis tlen Jesús okichiuj? Ijkuak tikitstiaskej tlen Jesús okichiuj, noijki tikitaskej yeyi tlemach tlen techpaleuis kuajli matitekitikan imiuan oksekimej.

Yakaj akin ueli tekiti imiuan oksekimej yolyemanki, kinpatiojkaita akin imiuan tekiti niman xnoueyimati. Jesús okitak kenon iTajtsin yolyemanki. Maski san Jehová akin kinamiki makiueyiteneuakan ipampa nochi tlen okichijchiuj, okijto ika melak kipatiojkaita pampa iKonetsin okipaleui. Ijkon tikijtouaj ipampa tlen toTajtsin okijto ipan Génesis 1:26: “Ma tikinchijchiuakan tlaltikpaktlakamej yejuan tlajtlachaskej niman tlajtlamatiskej ken tejuamej”. Ijkuak Jehová ijkon okijto, Jesús kuajli okitak ika iTaj melak yolyemanki (Sal. 18:35).

Ijkuak Jesús onen nikan ipan tlaltikpaktli, noijki okiteititi ika yolyemanki. Ijkuak miyekej kiueyiteneuayaj ipampa tlen kichiuaya, yejua nochipa kimijliaya ika san makiueyiteneuakan Jehová (Mar. 10:17, 18; Juan 7:15, 16). Noijki, onokojtili kinpaleuis inomachtijkauan para kuajli manouikakan. Niman okimitak ken iamigos, xken itekitkauan (Juan 15:15). Hasta okimikxipajpak niman ijkon kimititis ika nonekiya yolyemankej yeskej (Juan 13:5, 12-14). Ijkon ken Jesús, tejuamej noijki noneki tikinpatiojkaitaskej akin imiuan titekitij niman xsan totech titlanemiliskej. Tla tikintlakaitaj oksekimej niman xsan totlatlantokej, uelis miyek tlemach tikchiuaskej (Rom. 12:10).

 Akin yolyemanki noijki kasikamati ika itekiyo más kuajli onkisas tla oksekimej kipaleuiyaj (Prov. 15:22). Maski itiuejueyimej noso miyek tlemach ueli tikchiuaj, matikilnamikikan ika xakaj nochi kimati. Hasta Jesús okijto ika xnochi kimatiya (Mat. 24:36). Noijki, kinekiya kimatis tlen kinemiliayaj inomachtijkauan maski tlajtlakolejkej katkaj (Mat. 16:13-16). Ika yejon, miyekej kuelitayaj iuan tekitiskej. Noijki ijkon, tla tejuamej tiyolyemankej, tikasikamatij ika xnochi ueli tikchiuaj niman tijkakij tlen oksekimej kinemiliaj, titlapaleuiskej para tinochimej kuajli matouikakan niman kuajli makisati totekiyo.

Ijkon ken Jesús, tlayekankej melak noneki kiteititiskej ika yolyemankej ijkuak san sekan tekitij. Noneki kilnamikiskej ika espíritu santo uelis kichiuas ika maski san katlejua tlayekanketl makijto itlaj tlen kinpaleuis tlayekankej kuajli makitlapejpenikan tlenon kichiuaskej. Tla ijkuak nosentlaliaj kuajli kikakij tlen nochimej tlayekankej kinemiliaj, tlen kitlapejpeniskej kipaleuis nochi tlanechikojli.

Yakaj akin kuajli tekiti imiuan oksekimej, teasikamati. Xsan kineki manochiua tlen yejua kineki niman xnimantsin kualani. Kuajli tikmatstokej ika Jesús miyekpa okitak kenon iTajtsin teasikamati. Jehová okiteititi ika teasikamati ijkuak okuajtitlan iKonetsin para makinmakixtiki tlaltikpakchanejkej, maski nochimej kinamikiya mamikikan (Juan 3:16).

Kemantika, Jesús okichiuj tlen oksekimej okitlajtlanilijkej. Matikilnamikikan kenon okipaleui se siuatl cananea, maski yejua san okuajtitlankaj para makinpaleui akin israelitas katkaj (Mat. 15:22-28). Noijki, okiteititi ika kimasikamatiya inomachtijkauan pampa xokintlajtlanili makichiuakan itlaj tlen kimatiya ika xueliskiaj. Ijkuak Pedro okiteijli ika xkixmatiya, Jesús okitlapopolui niman sakin okimakak más tekitl (Luc. 22:32; Juan 21:17; Hech. 2:14; 8:14-17; 10:44, 45). Tlen okichiuj Jesús kuajli techititia ika kemantika noneki tikchiuaskej tlen oksekimej techijliaj, ijkon oksekimej kitaskej ika titeasikamatij (Filip. 4:5).

Tla titeasikamatij, tiknektoskej titekitiskej imiuan oksekimej maski tisesejnekamej. Jesús melak kuajli nouikaya imiuan oksekimej, yejua ika, itlauelikniuan opeuj kitlauelitaj niman okijtokej ika nouikaya imiuan “on tlajtlakolejkej niman on yejuan tlacobrarojkej ika on impuestos” akin kuajli kikakiyaj (Mat. 11:19). ¿Kenon uelis tikchiuaskej ijkon ken Jesús niman ika toyojlo titekitiskej imiuan oksekimej maski tisesejnekamej? Tokniuj Louis,  akin yotekit ken tlayekanketl ipan circuito niman yotekit Betel imiuan sesejnekamej tokniuan, kijtoua: “Nejua nikimita tokniuan ken se tepantli tlen tlachijchiujtli ika sesejnekamej temej. Tla kuajli tikinyejyektlalia yejon temej, uelis kuajli nokauas yejon tepantli. Noijki, yoninokojtili ninopatlas niman ijkon nitepaleuis tinochimej kuajli matouikakan niman kuajli makisa totekiyo”. ¡Melak kuajli ken tlanemilia yejuin tokniuj!

¿Kenon uelis tikteititiskej ipan totlanechikol ika titeasikamatij? Kanaj tokniuan akin imiuan titenojnotsaj xsan noijki ken uejueyimej noso kanaj kixnamiktokej tlen tejuamej xtikixnamikij. Ijkuak imiuan tikisaskej, ¿uelis titenojnotsaskej ijkon ken yejuamej kitlapejpeniskej tenojnotsaskej? Tla ijkon tikchiuaj, yejuamej ika inyojlo nomachiliskej ijkuak touan tenojnotsaskej.

Akin uelij tekitij imiuan oksekimej, kuelitaj kitemakaskej tlen kipiyaj (1 Tim. 6:18). Ijkuak Jesús otekit iuan iTaj, okitak ika yejua xsan ichtaka kichiuaya itlaj. Ijkuak Jehová “okichijchiu cielo”, Jesús ompa nemiya niman miyek itech ouel (Prov. 8:27). Sakin, Jesús ika iyojlo okimijli inomachtijkauan tlen iTajtsin yokititijka (Juan 15:15). Tla tiknekij tikchiuaskej ijkon ken Jehová, noneki tikimijliskej niman tikimititiskej tokniuan tlen itikmatij niman tlen itiuelij. Yakaj akin kineki kuajli tekitis imiuan oksekimej, xkiyana tlen ikimati san pampa xkineki ika yakaj okse makichiua itekiyo, yej kuelita kinmachtis oksekimej tlen yejua youel.

Tla tikinyolchikauaj tokniuan, noijki kentla tiktemakatoskiaj tlen tikpiyaj. ¿Xmelak ika kuajli tomachiliaj ijkuak techijliaj ika kuajli itlaj otikchiujkej niman techtlasojkamachiliaj? Jesús okixelo tiempo niman ijkon kimijlis inomachtijkauan tlen kuajli kichiuayaj (uelis tikitas Mateo 25:19-23; Lucas 10:17-20). Hasta okimijli ika yejuamej kichiuaskiaj “on tekitl yejuan más uejueyi” (Juan 14:12). Ijkuak ikimiktiskiaj, okimijli inomachtijkauan akin yoyolmelajkanenkaj ika melak kuajli tlen kichiujtoyaj, okimijli: “Nemejuamej nochipa nouan yonentlajyouijtinenkej” (Luc. 22:28). Kuajli tikmatstokej ika tlen okimijli okinyolchikauj niman okinpaleui mayolmelajkanemikan. Tla tejuamej tikxelouaj tiempo niman ijkon tikimijliskej tokniuan tlen kuajli kichiuaj, yejuamej más yolpakiskej niman más kuajli kichiuaskej intekiyo.

Se tokniuj itoka Kayode, kijtoua: “Maski titlajtlakolejkej, uelis kuajli teuan titekitiskej niman uelis tikinpaleuiskej oksekimej mayolpakikan niman kuajli makichiuakan intekiyo”. ¿Tlenon kinemiliaj oksekimej motech? ¿Tleka xtikintlajtoltia oksekimej tokniuan tla kuajli imiuan titekiti? ¿Ika inyojlo nomachiliaj akin imiuan titekiti ijkon ken inomachtijkauan Jesús nomachiliayaj ijkuak iuan nemiyaj? Tla kema, uelis tikijtos tlen apóstol Pablo okijto: “Titekitij para xpiyakan pakilistli” (2 Cor. 1:24).