Me so Yesu ba zorugo, ifahaʼö ia ba wondrouʼö amuata sanolo yaʼia tobali si falulu fohalöwö si sökhi. Ba me so Yesu ba gulidanö, tobali ia duma-duma si sökhi me falulu fohalöwö ia ba niha böʼö. Hadia wamahaʼö si tola tahalö moroi ba duma-duma nibeʼe Yesu? Na tafahaʼö ita ba duma-dumania, so tölu goi-goi nisöndrada sanolo yaʼita tobali si falulu fohalöwö si sökhi. Goi-goi daʼö zanolo yaʼita enaʼö itugu teʼosambuaʼö ita khö ndra talifusöda ba wamati.

Niha si falulu fohalöwö si sökhi so khönia wangide-ngideʼö. Iʼameʼegö tödö niha si falulu fohalöwö khönia ba lö iʼalui lala enaʼö adöni dödö niha khönia. Ifahaʼö ia Yesu khö Namania ba wangoromaʼö fangide-ngideʼö. Hewaʼae ha Yehowa zinangea mufotöi Somböi, omasi göi ia enaʼö laʼila niha fefu wa falulu fohalöwö khönia Nononia ba wamazökhi hadia ia. Oroma daʼö moroi ba wehede Lowalangi me imane, ”Datafazökhi niha famaedoda, si fakhili-khili khöda.” (1 Mo. 1:26) Me iwaʼö daʼö Yehowa, tatu aboto ba dödö Yesu wa so wangide-ngideʼö khö Namania.—Si. 18:35.

Me so Yesu ba gulidanö, so göi khönia wangide-ngideʼö. Me lasuno ia niha sato börö dandra sahöli-höli dödö nifaluania, iforomaʼö Yesu wa sindruhunia Yehowa zinangea musuno. (Mrk. 10:17, 18; Yoh. 7:15, 16) Baero daʼö, iforege Yesu enaʼö sökhi gamakhaitania khö ndra nifahaʼönia, ba ikaoni ira si fahuwu khönia tenga sawuyu. (Yoh. 15:15) No göi irai isasai gahe ndra nifahaʼönia ba wamahaʼö yaʼira sanandrösa ba wangide-ngideʼö.  (Yoh. 13:5, 12-14) Simane Yesu, moguna taʼameʼegö tödö niha si falulu fohalöwö khöda ba taʼofönaiʼö zoguna khöra moroi ba zoguna khöda samösa. Na faoma ’tafosumange nawöda’ ba lö tarörö ita ba wamadöni haniha zinangea musuno, itugu oya halöwö si tola taʼasiwai.—Rom. 12:10.

Aboto göi ba dödö niha si so fangide-ngideʼö wa tola ”mofozu [gohitö dödö] na ato zanuturu lala”. (Amd. 15:22) Hewaʼae no toʼölö ita ba wamalua halöwöda ba so khöda waʼatua-tua, moguna tatörö tödöda wa lö hadöi niha sangila fefu hadia ia. Yesu manö ifaduhuʼö wa so zi lö aboto ba dödönia. (Mat. 24:36) Baero daʼö, omasi göi ia iʼila hadia mbua gera-era ndra nifahaʼönia si lö moʼahonoa. (Mat. 16:13-16) Daʼö mbörö wa ohahau dödö niha si falulu fohalöwö khö Yesu me so ira ba ngainia. Simanö göi, na tafaduhuʼö si fao fangide-ngideʼö wa so zi tebai tafalua ba omasi ita tafondrondrongo mbua gera-era niha böʼö, tola itugu sökhi gamakhaitada khöra ba mofozu hadia nifaluada.

Ba ginötö falulu fohalöwö ndra satua sokubaloi, moguna laforomaʼö wangide-ngideʼö simane nifalua Yesu. Moguna latörö tödöra wa mohalöwö geheha niʼamoniʼö ba wanolo gofu haniha manö ndra satua sokubaloi ba wamaʼema bua gera-era si sökhi. Na lafalua rafe, moguna larorogö waʼahono dödö enaʼö lö alawö ira ba wamaʼema bua gera-erara. Na lafalua daʼö, tola lahalö gangetula si sökhi soguna ba mbanua niha Keriso.

Niha si falulu fohalöwö si sökhi lö fatandro ia na fao ba niha böʼö. Omasi göi ia ba wamaudugö lala wangera-ngerania. Tatu asese iʼila Yesu gamuata Namania si lö fatandro. Duma-dumania, ifatenge Nononia ba wangefaʼö niha moroi ba hukuma sinangea latema, yaʼia daʼö faʼamate.—Yoh. 3:16.

Omasi Yesu ba wamaudugö lala wangera-ngerania ba ginötö moguna. Duma-dumania, hewaʼae mufatenge ia ba wanolo iraono Gizaraʼeli, omasi ia ba wanolo ira alawe Fenisia. (Mat. 15:22-28) Lö fatandro göi Yesu khö ndra nifahaʼönia. Me iʼosilöʼögö ia si fahuwu khönia sotöi Fetero föna niha sato, iʼefaʼö zalania Yesu. Ba gafuriata, so ösa noro dödö si tohude nibeʼe Yesu khönia. (Luk. 22:32; Yoh. 21:17; Hal. 2:14; 8:14-17; 10:44, 45) Moroi ba duma-duma Yesu, tola tafahaʼö ita wa moguna tafaudugö lala wangera-ngerada ba wangoromaʼö wa lö ”fatandro [ita] ba niha fefu”.—Fil. 4:5.

Na lö fatandro ita, tola tafaudugö lala wangera-ngerada gofu haʼökhö manö, irege aoha  khöda falulu fohalöwö khöra. Sökhi gamuata Yesu ba niha böʼö, tefarahu ba daʼö niha sanugi pajak hegöi niha sebua horö somasi mamondrongo turia nifaʼemania. Daʼö mbörö wa lawaʼö ira si faʼudu khönia wa yaʼia andrö ”si fahuwu ba zanugi pajak hegöi ba niha sebua horö”. (Mat. 11:19) Simane Yesu, hadia tola falulu fohalöwö ita gofu haʼökhö manö? Nehegö atö duma-duma zi samösa talifusöda ira matua sotöi Louis. Me tobali ia satua samasui hegöi me mangai halöwö ia ba Mbetieli, falulu fohalöwö ia gofu haʼökhö manö. Imane, ”Na falulu fohalöwö ita ba niha si lö moʼahonoa, fagölö daʼö simane na taʼogunaʼö gara si faböʼö-böʼö faʼebua ba wamazökhi öli. Börö me faböʼö-böʼö waʼebua gara niʼogunaʼö, oya wamaudugö sinangea mufalua enaʼö tola mosindro göli andrö. Oya göi zinangea ufaudugö enaʼö tola fao ndraʼo ba wamasindro öli andrö.” No lala wangera-ngera si sökhi sibai daʼö!

Hawaʼara taforomaʼö ba mbanua niha Keriso wa lö fatandro ita? Tola taforomaʼö daʼö ba ginötö falulu fohalöwö ita ba kelompok dinas si farahu yaʼita. Tola manö fao ita manuriaigö khö ndra talifusöda si faböʼö döfi khöda mazui sangokhögö noro dödö yomo ba nomo si faböʼö moroi khöda. Enaʼö ohahau dödöra ba wanuriaigö, hadia taforomaʼö wa lö fatandro ita, lö mangaösö-ngaösö ita, ba tafaudugö lala wanuriaigöda?

Niha si falulu fohalöwö si sökhi andrö ”lö atali” ia. (1 Ti. 6:18) Me falulu fohalöwö Yesu khö Namania, iʼila wa lö nibiniʼö Yehowa khönia hadia nifaluania. Me ”ibörögö wamazökhi banua si yawa, so [Yesu] ba daʼö” ba tola ifahaʼö ia moroi khö Yehowa. (Amd. 8:27) Ba gafuriaita, omasi Yesu ba wanutunö khö ndra nifahaʼönia ’fefu nirongonia’ moroi khö Namania. (Yoh. 15:15) Simanö göi, böi atali ita ba wanutunö ba niha si falulu fohalöwö khöda hadia zi no aboto ba dödöda hegöi si no irai alua khöda. Niha si falulu fohalöwö si sökhi, lö iforege waminiʼö turia soguna ba niha böʼö ha enaʼö tola ifatörö ira. Omuso dödönia wanutunö ba niha böʼö hadia zi no ifahaʼö yaʼia.

Tola tabeʼe wehede famarou dödö ba niha si falulu fohalöwö khöda. Na lanehegö niha böʼö hadia halöwö si no tafalua ba laʼandrö khöda saohagölö soroi ba dödö, tatu omuso dödöda. Inehegö Yesu hadia zi sökhi nifalua niha si falulu fohalöwö khönia ba lö atali ia ba wanuno yaʼira. (Fareso göi Mataiʼo 25:19-23; Luk. 10:17-20.) Ifatunö göi khöra wa hasambalö ’lafalua halöwö sabölö ebua’ moroi khönia. (Yoh. 14:12) Ba mbongi fatua lö mate ia, isuno ndra nifahaʼönia si lö faröi Yesu me imane, ”Yaʼami niha si lö faröi khögu me göna ndraʼo fanandraigö.” (Luk. 22:28) Tofakha sibai ba dödöra wehede Yesu andrö irege tefarou dödöra ba wamalua satulö. Na tasuno niha si falulu fohalöwö khöda, tatu omuso dödöra ba oya lala halöwö si tola taʼasiwai.

Imane samösa talifusöda ira matua sotöi Kayode, ”Niha si falulu fohalöwö si sökhi andrö tenga dali moʼahonoa. Hizaʼi, iʼasogö waʼomuso dödö ba niha si fasui yaʼia ba aoha khöra wamalua lala halöwöra.” Hadia si falulu fohalöwö simane daʼö ndraʼugö? Enaʼö tola öʼila wanema linia, moguna öʼandrö mbua gera-era ndra talifusöda ba wamati. Na omuso dödöra falulu fohalöwö khöu, hulö simane ira nifahaʼö Yesu omuso dödöra falulu fohalöwö khönia, tola öwaʼö simane nisura Waulo, ”Yaʼaga [no] si falulu fohalöwö khömi ba waʼomuso dödö.”—2 Ko. 1:24.