Nakasezulwini, uJesu wafunda ubuntu obamenza waba sibonelo esiphuma phambili bewakghona nokusebenzelana kuhle nabanye nakasephasini. Singazuza njani esibonelweni sakaJesu? Nasihlolisisa isibonelo sakhe, sizokubona iinkambisolawulo ezintathu ezisisiza sisebenzelane kuhle nabanye. Iinkambisolawulwezi, zizosisiza sibumbane nabafowethu.

Umuntu osebenzelana kuhle nabanye uyazithoba, uqala abantu asebenza nabo njengabakhulu kunaye begodu akazidoseli amehlo. UJesu wafunda ukubona izinto ngendlela le kuBabakhe. Nanyana kunguJehova kwaphela obizwa ngokuthi Mbumbi, bekafuna abantu bawazi umsebenzi oqakathekileko owenziwa nguJesu. Lokho sikubona emezwini kaZimu athi: “Asenze umuntu ngomfanekiswethu.” (Gen. 1:26) UJehova nakatjho amezwi la, kwakhanya kuJesu ukuthi uZimu uthobekile.—Rhu. 18:36.

Nakasephasini, uJesu naye bekathobekile. Abantu nabambuka ngakwenzileko, wathatha yoke iphazimulo wayisa kuZimu. (Mar. 10:17, 18; Jwa. 7:15, 16) UJesu wenza bona kube nokuthula phakathi kwakhe nabalandeli bakhe begodu bekabathatha njengabangani bakhe, ingasi iingqila zakhe. (Jwa. 15:15) Wabahlambisa iinyawo bona abafundise ukuthobeka. (Jwa. 13:5, 12-14)  Nathi senza kuhle ngokuba nendaba nabantu esisebenza nabo kunokuthi sibeke iintlhogo zethu phambi kwezabo. ‘Nasihloniphanako’, singatshwenyeki ngokuthi kubukwa bani, kunengi esingakufikelela.—Rom. 12:10.

Umuntu othobekileko uyazwisisa ukuthi amaqhinga ayaphumelela “ngabeluleki abanengi.” (IzA. 15:22) Nanyana sinelemuko namkha amakghono, kufuze sikhumbule bona akakho umuntu owazi yoke into. NoJesu wavuma ukuthi ezinye izinto akazazi. (Mat. 24:36) Bekanekareko kilokho abafundi bakhe abanesono abakwaziko namkha abakucabangako. (Mat. 16:13-16) Kungebangelo kungasirari ukuthi abantu ebekasebenza nabo bebatjhaphulukile nabanaye. Ngendlela efanako, nasithobekileko besikhumbula ukuthi asazi koke, silalele nemibono yabanye, sizokwenza bona kube nokuthula begodu ‘sizokuphumelela.’

Kuqakatheke khulu ukuthi abadala balingise isibonelo sakaJesu njengombana basebenza ndawonye. Kufuze bakhumbule ukuthi ummoya ocwengileko ungasebenza kinanyana ngimuphi umdala osesihlopheni. Abadala nabasemhlanganweni, kufuze benze woke umdala azizwe atjhaphulukile ukuveza umbono, lokho kuzokwenza ukuthi bathathe iinqunto ezizokuzuzisa ibandla loke.

Isisebenzi esihle siyababonelela abantu esisebenza nabo. Siya nobujamo begodu samukela imibono yabanye. UJesu wafumana amathuba amanengi wokubona uYise abonelela. Ngokwesibonelo, uJehova wamthuma bona azokusindisa abantu esigwebweni sokufa ebebaqalene naso.—Jwa. 3:16.

UJesu bekayamukela imibono yabanye nakutlhogekako namkha nakufaneleko. Khumbula indlela asize ngayo umfazi womFunisiya, ngitjho nanyana bekathunywe bona azokusindisa isitjhaba sakwa-Israyeli. (Mat. 15:22-28) Bekanombono ofaneleko kilokho ebekakulindele ebafundini bakhe. Ngemva kokuthi umnganakhe atjhidelene naye uPitrosi amphike tjhatjhalazi, uJesu wamlibalela. Ngokukhamba kwesikhathi, wanikela uPitrosi umsebenzi oqakathekileko. (Luk. 22:32; Jwa. 21:17; IzE. 2:14; 8:14-17; 10:44, 45) Isibonelo sakaJesu sikuveza ngokukhanyako ukuthi kufuze senze ‘ukubonelela kwethu kwaziwe  ngibo boke abantu’ ngokwamukela imibonwabo.—Flp. 4:5.

Ukubonelela kuzosenza sizivumelanise nobujamo bona sisebenze ngokuthula nabo boke abantu. UJesu wabaphatha kuhle boke ebebaseduze naye kangangokuthi amanabakhe anomona aleya amala athi “umngani wabathelisi nezoni” okungilabo abalalela umlayezwakhe. (Mat. 11:19) Kghani singakghona ukulingisa uJesu ngokuthi sisebenzelane kuhle nabanye abantu abangafani nathi? Umfowethu u-Louis, osebenze nabantu abanengi nakajikeleza nalokha nakase-Bethel uthi: “Bengilinga ukumadanisa abantu ebengisebenza nabo neboda elakhiwe ngamatje angalinganiko. Ngokuhlalisa kuhle amatje angalinganiko la, bewungakha iboda elinqophileko. Ngilinge ukuzivumelanisa nobujamo ukwenzela bona ngisebenzelane ngokuthula nabanye.” Akhe uqale bona sibonelo esihle kangangani lesi!

Ngimaphi amathuba esinawo wokutjengisa ukuthi sisebenzelana kuhle nabantu esilotjha nabo uZimu? Sinamathuba wokwenza njalo nasinesiqhema sethu sesimu. Singasebenza nabafowethu nabodadwethu abanemithwalo ehlukileko kweyethu emndeninabo namkha nalabo abangalingani nathi ngeminyaka. Singazivumelanisa nobujamo babo, sizimisele ukusebenzisa iindlela abazithabelako zokutjhumayela ukwenzela bona bakuthabele ukuba sesimini.

Isisebenzi esihle ‘sikulungele ukuhlanganyela izinto nabanye.’ (1 Thim. 6:18) UJesu nakasebenza hlanu kwakaBabakhe, wabona ukuthi uJehova akanafihlo. Lokha uJehova ‘ajamisa amazulu’ uJesu ‘besele akhona’ begodu wafunda okunengi kuye. (IzA. 8:27) Ngokukhamba kwesikhathi, uJesu wakuthabela ukwabelana nabafundi bakhe ‘izinto ebekazizwe’ kuBabakhe. (Jwa. 15:15) Singalingisa isibonelo sakaJehova ngokuthi sitjele abafowethu nabodadwethu lokho esikufundileko. Isisebenzi esihle asinawo umrhobholo wokuthi singatjeli abanye izinto abatlhoga ukuzazi ngebanga lokufuna ukuhlala silawula. Siyakuthabela ukwabela abanye izinto ezihle esizifundileko.

Singabelana nangamezwi akhuthazako nabantu esisebenza nabo. Kghani lokha umuntu nakasibuka ngokusuka ehliziyweni asizizwa kamnandi? UJesu wazipha isikhathi sokutjela abantu asebenza nabo ngezinto ezihle ebebazenza. (Madanisa noMatewu 25:19-23; Luk. 10:17-20.) Wabe wabatjela nokuthi ‘bazokwenza imisebenzi emikhulu’ kunaye. (Jwa. 14:12) Ebusuku ngaphambi kokuhlongakala kwakhe, wabuka abapostoli bakhe abathembekileko wathi: “Nina ningilabo abakghodlhelele nami ekulingweni kwami.” (Luk. 22:28) Cabanga ngendlela amezwi la abakhuthaze ngayo! Nathi nasizipha isikhathi sokubuka abantu esisebenza nabo, bazokuthaba begodu bazokusebenza budisi.

Umfowethu uKayode uthi: “Isisebenzi esihle akutlhogeki sibe ngesingenzi imitjhapho, kodwana senza abanye bathabe begodu senza umsebenzi ube lula ebantwini esisebenza nabo.” Kghani abantu osebenza nabo bazizwa njalo ngawe? Mhlamunye ungabuza abantu osebenza nabo ukuthi bakufumana kunjani ukusebenza nawe. Nangabe bayakuthabela ukusebenza nawe, ngendlela abalandeli bakaJesu ebebakuthabela ngayo ukusebenza naye, nawe ungatjho amezwi atjhiwo mpostoli uPowula athi: “Siziinsebenzi ezikunye nani ukuze nithabe.”—2 Kor. 1:24.