Peenze kululu, Yesu ephunzila minkhalidwe inyinji kufumila kuli Ausuwake. Izi niye zemuyavya kuti akwanishe kuseŵenza bwino na ŵanthu ayakine peciwela pacalo. Tonse tufunika kutolela cisanzo cake. M’nkhani ino, tilaŵizhyane mfundo zitatu zamene zingatiyavye kuti tikoseŵenza bwino na ŵanthu ayakine. Mfundo izi zitiyavye soti kuti tikonkhala okatizhyana na akwasu na azilongosi.

Mkhristu wamene ni olicefya, olemekeza ŵanthu ŵakuseŵenza nao ndipo opewa kuzioneshela. Yesu ephunzila nkhalidwe iyi kufumila kuli Ausuwake. Olo kuti Yehova niye elenga zinthu zonse, yove efuna kuti ŵanthu aziŵe kuti Mwana wake ecita nchito yofunika ngako pomuyavya kulenga zinthu. Eonesha izi pecilaŵila kuti: “Tiyeni tipange munthu m’cifanizilo casu.” (Gen. 1:26) N’zoonekelatu kuti peecimvwa mau aŵa, Yesu esimikizhya kuti Yehova ni wolicefya.​—Sal. 18:35.

Peciwela pacalo, Yesu etolela cisanzo ca Ausuwake mwa kuonesha nkhalidwe yolicefya pocita zinthu na ŵanthu ayakine. Mwacisanzo, ŵanthu ayakine peciyamba kum’tamanda cifukwa ca vinthu viweme veciŵacitila, yove etwala ulemelelo kwa Mulungu. (Mko. 10:17, 18; Yoh. 7:15, 16) Kuyangizhyila apo, enzoseŵenza mwamtendele na ophunzila ŵake ndipo enzoŵaona monga ashamwali ŵake osati akapolo. (Yoh. 15:15) Yove efwika mpaka na posambika mendo ya ophunzila ŵake pofuna kuŵaonesha kufunika konkhala olicefya. (Yoh. 13:5, 12-14)  Nase tufunika kutolela cisanzo ca Yesu mwa kuonesha ulemu ku ŵanthu ŵatuseŵenza nao noika zofuna zao pa malo oyamba. Ngati ‘tuoneshana ulemu’ nopewa kuzioneshela, zitiyavye kuti tikoseŵenza bwino na ŵanthu ayakine.​—Aro. 12:10.

Munthu wolicefya ozindikila kuti ‘aphungu akapaka, nchito yukwanilishiwa.’ (Miy. 15:22) Olo kuti tingankhale na luso ndipo tingoziŵa zinyinji zokhuza nchito yasu, tufunika kukumbukila kuti paliye munthu wamene oziŵa zinthu zonse. Olo Yesu evomelezhya kuti pali zinthu ziyakine zamene enzoziziŵa lini. (Mat. 24:36) Olo kuti ophunzila ŵake enzeve ungwilo, nthawi zinyinji Yesu enzoŵasenga kuti afotokoze maganizo ŵao na zinthu zeenzoziŵa. (Mat. 16:13-16) Izi niye zecitisha kuti ŵanthu onse akosangalala kuseŵenza pamozi na yove. Molingana na Yesu, ngati nise olicefya ndipo tuzindikila kuti tuziŵa lini vinthu vonse, tikosenga ŵanthu ayakine kuti alaŵilepo maganizo ŵao. Ndipo izi zikotiyavya kuti tikoseŵenza mwamtendele na ŵanthu ayakine.

Makamaka akulu, ofunika kuyesayesa kutolela cisanzo ca Yesu pa nkhani yolicefya paakucita zinthu na akulu ayao. Ofunika kukumbukila kuti mzimu utuŵa ungacitishe mkulu aliyense, kulaŵila mfundo yamene ingayavye bungwe ya akulu kupanga cosankha canzelu. Ngati akumana pamozi, mkulu aliyense ofunika kunkhala womasuka kukambapo maganizo ŵake. Izi zingayavye kuti apange zosankha zanzelu zamene zingapindulishe mpingo wonse.

Monga Akhristu, tufunika kuyesayesa kunkhala ololela pocita zinthu na ŵanthu ŵatuseŵenza nao. Kuyangizhyila apo, tufunika kunkhala okonzeka kucinja nopewa kuyumilila maganizo ŵasu. Peenze kululu, Yesu enze na mipata inyinji yoona mwamene Ausuwake enzooneshela nkhalidwe yololela. Mwacisanzo, Yehova emutuma pacalo kuti azepulumuse ŵanthu ku ucimo na imfwa.​—Yoh. 3:16.

Yesu enzoonesha nkhalidwe yololela akaona kuti n’poyenelela. Olo kuti enze etumiwa kuti azeyavye ng’anda ya Isiraeli, pa nthawi iyakine Yesu eonesha nkhalidwe yololela mwa kuyavya munakazi wa ku Foinike. (Mat. 15:22-28) Yove enzoonesha soti nkhalidwe iyi pocita zinthu na ophunzila ŵake. Mwacisanzo, pa nthawi iyakine, mtumwi Petulo emukana pamenso pa ŵanthu. Koma Yesu emukhululukila. Ndipo pavuli pake, emupasa maudindo oyangizhyilika. (Luka 22:32; Yoh. 21:17; Mac. 2:14; 8:14-17; 10:44, 45) Cisanzo ca Yesu, cutionesha kuti tufunika kunkhala ‘ololela pocita zinthu na ŵanthu onse.’​—Afil. 4:5.

Kunkhala ololela kungatiyavye kuti tikoseŵenza mwamtendele na ŵanthu osiyanasiyana. Yesu enzocita zinthu mololela na ŵanthu amene  enzomvwishila uthenga wake. Izi zecitisha kuti adani ŵake amucitile nsanje noyamba kumunena kuti enze “muyao wa okhomesha msonkho na ocimwa.” (Mat. 11:19) Kansi tingacitenji kuti tikokwanisha kuseŵenza na ŵanthu osiyanasiyana monga ni mwecicitila Yesu? Mkwasu Louis wamene kwa vyaka vinyinji watumikila pamozi na ŵanthu osiyanasiyana m’nchito ya dela na pa Beteli, elaŵila kuti: “Kuseŵenzela pamozi na ŵanthu amene aliye ungwilo, kuli monga ni kumanga ng’anda poseŵenzesha miyala yosiyanasiyana kukula kwake. Pofwana kuti miyala iyi ni yosiyana, pofunika khama kuti cipupa cisabende. Tetyo, nuyesayesa kunkhala wolicefya nocinja mbali ziyakine pa umoyo wangu, cifukwa nuziŵa kuti niye zinganiyavye kuseŵenza mwamtendele na ŵanthu ayakine nokwanilisha utumiki wangu.” Tufunika kuyesayesa kutolela cisanzo ca mkwasu uyu.

Tufunika soti kunkhala ololela patucita zinthu na akwasu na azilongosi mumpingo. Mwacisanzo, pavuli pa makambisilano a mu ulaliki, payakine angatigaŵe kuti tilalikile pamozi na wofalisa wamene ali na maudindo a m’banja osiyana na ŵasu. Olo payakine angatigaŵe na wofalisa wamene ni mtontho olo mkulu pali seo. Tingaoneshe kuti nise ololela mwa kucita ulaliki wakukonda ove. Kucita izi kungaŵayavye kuti apeze cimwemwe pa nchito yolalikila.

Poseŵenza na ŵanthu ayakine, tufunika kunkhala ‘okonzeka kuyaŵana nao’ zinthu zatuziŵa. (1 Tim. 6:18) Yesu ephunzila zinyinji peenzoseŵenza na Ausuwake cifukwa cakuti enzomufisa lini kalikonse. Mwacisanzo, Yehova “peenzolenga kululu,” Yesu “enzepo” ndipo ephunzilapo zinyinji. (Miy. 8:27) Peenze pacalo, Yesu ephunzisa ophunzila ŵake “zinthu zonse zecimvwa” kufumila kuli Ausuwake. (Yoh. 15:15) Nase tingatolele cisanzo ca Yehova mwa kuuzhyako ŵanthu ŵatuseŵenza nao, kuyangizhyilapo akwasu na azilongosi zinthu zatuziŵa. Tufunika kupewa kunkhala na maganizo akuti ngati tuuzhyako ŵanthu ayakine zinthu zatuziŵa, niye kuti angatipambane noleka kutipasa ulemu. M’malo mwake, tufunika kuŵauzhyako zinthu zatuziŵa.

Kuyangizhyila apo, tufunika soti kulaŵila mau acilimbikiso ku ŵanthu ŵatuseŵenza nao noŵayamikila cifukwa ca khama yakucita. Kansi mukumvwa tyani ngati munthu muyakine wakuyamikilani cifukwa ca khama yamucita? Mosakaikila, munkhala wacimwemwe, ndipo niye cimwemwe caangankhale naco ayanu ŵamuseŵenza nao ngati mwaŵayamikila. Yesu enzoyamikila ophunzila ŵake pa zinthu ziweme zeenzocita. (Linganizhyani na Mateyu 25:19-23; Luka 10:17-20.) Yove efwika mpaka poŵauzhya kuti “akacite nchito zikulu kupambana” zecicita yove. (Yoh. 14:12) Pa usiku wakuti mailo apaiwe, eyamikila atumwi ŵake okhulupilika mwa kuŵauzhya kuti: “Mweo mwapitilizhya kunkhala nane m’mayeselo ŵangu onse.” (Luka 22:28) N’zoonekelatu kuti mau aya yeŵalimbikisha ngako atumwi. Ngati namwe muyamikila ayanu ŵamuseŵenza nao, ziŵayavye kuti ankhale acimwemwe na kuti akolimbikila pa nchito.

Mkwasu Kayode elaŵila kuti: “Tufunika lini kunkhala angwilo kuti tikwanishe kuseŵenza na ŵanthu osiyanasiyana. M’malo mwake, tufunika kuonesha minkhalidwe iweme yamene ingacitishe kuti ŵanthu ayakine akosangalala poseŵenza na seo.” Kansi muonesha minkhalidwe yabwino ku nchito? Kuti mupeze yankho, mungacite bwino kusenga ŵanthu ŵamuseŵenza nao kuti akuuzhyeni mwamucitila nao zinthu. Ngati osangalala kuseŵenza na mweo monga ni mwamene ophunzila a Yesu esangalalila kuseŵenza pamozi naye, niye kuti mungalaŵile mau monga ni yecikamba mtumwi Paulo, akuti: “Nise anchito ayanu kuti munkhale na cimwemwe.”​—2 Akor. 1:24.