Jesu o ile a ithuta dika tše dibotse go Tatagwe tšeo di ilego tša mo thuša gore a kgone go dirišana le batho bao a bego a sepela le bona ge a be a le mo lefaseng. Mohlala wa Jesu o ka re hola bjang? Ge re dutše re ithuta ka yena, re tlo bona melao ya metheo e meraro yeo e ka re thušago gore re kgone go dirišana le batho ba bangwe. Melao ye ya motheo e tlo re thuša gore re dule re na le botee ge re dirišana le bana babo rena le dikgaetšedi.

Motho yo a kgonago go šomišana le batho ba bangwe o a ikokobetša e bile ga a leke go ikgantšha. Jesu o ithutile go ba le boikokobetšo go tšwa go Tatagwe. Le ge Jehofa e le yena feela yoo a swanelwago ke go bitšwa Mmopi, o be a nyaka gore batho ba tsebe gore Morwa wa gagwe o dirile mošomo o bohlokwa. Re kwešiša se ka seo Jehofa a se boletše ge a be a re: “A re dire motho ka seswantšho sa rena.” (Gen. 1:26) Jesu Kriste o ile a bona gore Jehofa o na le boikokobetšo ge a be a bolela mantšu ao.​—Ps. 18:35.

Nakong ya ge Jesu a be a le mo lefaseng, o ile a bontšha gore o na le boikokobetšo go swana le Tatagwe. Ge batho ba be ba mo reta, o be a iša ditheto tšeo go Modimo. (Mar. 10:17, 18; Joh. 7:15, 16) Jesu o be a phedišana le barutiwa ba gagwe ka khutšo e bile a ba lebelela e le bagwera ba gagwe go e na le go ba lebelela e le makgoba. (Joh. 15:15) Le gona o ile a ba ruta gore ba be le boikokobetšo ka gore a ba hlapiše dinao. (Joh. 13:5, 12-14) Le rena re ka mo ekiša ka gore re hlomphe bašomigotee le rena  go e na le go nagana ka rena feela. Ge e ba re ‘hlomphana’ e bile re sa nyake go dula re retwa, re tlo kgona go dira dilo tše dintši.​—Baroma 12:10.

Motho yo a ikokobeditšego o a tseba gore “taba e a atlega mo go nago le baeletši ba bantši.” (Die. 15:22) Go sa šetšwe dilo tšeo re kgonago go di dira, re a tseba gore ga go na motho yo a kgonago go dira dilo ka moka. (Mat. 24:36) Jesu le yena o ile a bolela gore go na le dilo tšeo a bego a sa di tsebe. (Mat. 16:13-16) O be a nyaka go tseba dilo tšeo barutiwa ba gagwe ba bego ba di tseba le tšeo ba bego ba di nagana. Ke ka baka leo batho bao ba bego ba dirišana le yena ba bego ba ikwa ba lokologile ge ba be ba e na le yena! Le rena ge e ba re ikokobeditše e bile re tseba gore go na le dilo tšeo re sa kgonego go di dira, re tlo theetša ge batho ba bangwe ba bolela, e bile ra ba le khutšo le bona gomme ka moka ga rena ra “atlega.”

Ke ga bohlokwa kudu gore bagolo ba ekiše boikokobetšo bja Jesu ge ba šoma gotee. Ba swanetše go gopola gore mogolo yo mongwe le yo mongwe a ka thušwa ke moya o mokgethwa gore a bolele selo se itšego. Ge bagolo ba le sebokeng sa bona, ba swanetše go kgonthišetša gore yo mongwe le yo mongwe o bolela ka tsela yeo a ikwago ka yona. Ge e ba ba dira bjalo, ba tlo dira diphetho tšeo di tlago go hola phuthego ka moka.

Motho yo a nago le tirišano o na le tekatekano ge a šoma le batho ba bangwe. O fetofetoga le maemo e bile o amogela dikgopolo tša batho ba bangwe. Jesu o ile a bona ge Tatagwe a be a bontšha tekatekano dilong tše dintši. Ka mohlala, Jehofa o ile a roma Jesu gore a phološe batho ka gore a ba hwele.​—Joh. 3:16.

Jesu o be a fetofetoga le maemo ge go hlokagala. Ka mohlala, o ile a thuša mosadi wa Mofenikia gaešita le ge a be a tletše go tlo thuša Baisiraele. (Mat. 15:22-28) Le gona o be a sa letela gore barutiwa ba gagwe ba se ke ba dira diphošo. Ka morago ga gore mogwera wa gagwe yo mogolo e lego Petro a mo latole gare ga batho, o ile a mo lebalela. Ka morago ga moo, o ile a nea Petro maikarabelo a magolo. (Luka 22:32; Joh. 21:17; Dit. 2:14; 8:14-17; 10:44, 45) Mohlala wa Jesu o re ruta gore re swanetše go bontšha gore re na le ‘tekatekano’ ka go se dire gore batho ba bangwe ba dule ba ekwa ka rena.​—Bafil. 4:5.

Go ba le tekatekano go re thuša gore re kgone go fetofetoga le maemo ge re šoma le batho ba mehuta ka moka. Jesu o be a swara batho bao a bego a phela le bona gabotse moo e lego gore manaba a gagwe a ile a mo jela mona gomme a  re ke “mogwera wa balekgetho le badiradibe.” (Mat. 11:19) Na re ka kgona go šomišana le batho ba bangwe gabotse go swana le Jesu? Ngwanabo rena Louis yoo a feditšego nako e ntši a le modirong wa tikologo le go šoma Bethele le batho ba go tšwa ditšong tša go se swane o re: “Ke be ke leka go swantšha sehlopha se sengwe le se sengwe seo ke bego ke šoma le sona le leboto leo le agilwego ka maswika a go se swane. Ge o ka tšea maswika a mangwe gomme wa a beakanya gabotse, o ka feleletša o dirile leboto leo le emego gabotse. Ka gona le nna ke ile ka leka go dira diphetogo gore ke kgone go dirišana le ba bangwe gabotse. Ruri o re beetše mohlala o motse!

Re ka bontšha bjang batho ba phuthegong ya gabo rena gore re na le tirišano? Re ka bontšha seo ka go ya tšhemong le sehlopha sa gabo rena. Re ka šoma tšhemo le bagoeledi bao ba nago le maikarabelo a go fapafapana ka malapeng a gabo bona goba le batho ba mengwaga ya go se swane. Eka re ka leka ka thata gore re be le tekatekano goba re ikemišetše go šoma tšhemo le bona ka tsela yeo e tlago go dira gore ba e thabele.

Motho yo a kgonago go dirišana le ba bangwe gabotse o ‘ikemišetša go abelana’ le bona. (1 Tim. 6:18) Ge Jesu a be a šoma le Tatagwe, a ka ba a ile a lemoga gore Tatagwe ga a mo utele selo. Ge Jehofa a be a “bopa magodimo,” Jesu o be ‘a na le yena’ le gona a ka ba a ile a ithuta se sengwe. (Die. 8:27) Ka morago, Jesu o ile a thabela go ruta barutiwa ba gagwe dilo “tšeo a di [rutilwego]” ke Tatagwe. (Joh. 15:15) Le rena re ka ekiša Jehofa ka go botša bana babo rena le dikgaetšedi dilo tšeo re ithutilego tšona. Motho yo a kgonago go dirišana le batho ba bangwe gabotse, a ka se ba utele dilo tšeo a di tsebago ka gobane a nyaka gore di tsebje ke yena feela. O tla thabela go botša batho ba bangwe dilo tše dibotse tšeo a ithutilego tšona.

Re ka kgothatša batho bao re dirišanago le bona. Ge motho yo mongwe a lemoga maiteko a rena e bile a re leboga go tšwa pelong, na seo ga se re thabiše? Jesu o ile a ipha nako ya gore a botše batho bao a bego a šoma gotee le bona ka dilo tše dibotse tšeo a di bonego go bona. (Bapiša le Mateo 25:19-23; Luka 10:17-20) O ile a ba botša le gore ba be ba tla “dira mediro e fetago” ya gagwe. (Joh. 14:12) Bošegong bja pele ga ge a ka hwa, o ile a kgothatša baapostola ba gagwe bao ba botegago ka gore: “Ke lena bao le swareletšego le nna melekong ya ka.” (Luka 22:28) Ruri mantšu ao a ile a ba kgothatša kudu le go ba dira gore ba dire se sengwe! Ge e ba le rena re ka ipha nako ya go kgothatša bašomigotee le rena, ba tlo thaba kudu gomme ba šoma ka mafolofolo.

Ngwanabo rena Kayode o re: “Motho yo a dirišanago le batho ba bangwe gabotse ga a dule a nyaka gore batho bao ba se dire diphošo, eupša o ba dira gore ba dule ba thabile le go ba dira gore ba se imelwe ke mošomo.” Na le wena o kgona go dirišana le batho ba bangwe gabotse? Ke ka baka la’ng o sa kgopele Bakristegotee le wena gore ba go botše ge e ba o kgona go dirišana le bona gabotse goba go se bjalo? Ge e ba ba thabela go šoma le wena go no swana le ge barutiwa ba Jesu ba ile ba thabela go šoma le yena o ka bolela mantšu ao a ilego a bolelwa ke moapostola Paulo ao a rego: “Re badirišanigotee le lena gore le thabe.”—2 Bakor. 1:24.