Yesu akeega emitwarize eyaamuhweraire kukora gye na bagyenzi be omu nsi. Nitugasirwa tuta twatooreza Yesu? Twashwijuma gye ebi yaarabiremu, nitubaasa kutunga emisingye eshatu erikubaasa kutuhwera kukora gye na bagyenzi baitu. Emisingye egyo neija kutuhwera kwongyera kugira obumwe n’okukwatanisa.

Orikukora gye n’abandi omu bucureezi naasiima abakozi bagyenzi be kandi tarikuteeraho kweyoreka. Yesu akeegyera ahari Ishe omutwarize gw’obucureezi. N’obu Yehova araabe niwe wenka ohikire kwetwa Omuhangi, akaba naayenda ngu abandi bamanye omurimo mukuru ogu Omwana we yaakozire. Eki nitukireeba omu bigambo bya Ruhanga ebi: ‘Ka tuhangye omuntu omu muringo gwaitu.’ (Kut. 1:26) Ebigambo ebi nibibaasa kuba byahweraire Yesu kumanya ngu Yehova n’omucureezi.—Zab. 18:35.

Obu Yesu yaabaire ari omu nsi nawe akaba ari omucureezi. Ku baabaire bamuhimbisa ahabw’ebi yaakora, ekitiinisa akaba akigarurira Ruhanga ou kishemereire. (Mak. 10:17, 18; Yoh. 7:15, 16) Yesu akaba naakoragana n’abeegi be omu busingye, kandi arikubatwara nk’abanywani be beitu batari bahuuku. (Yoh. 15:15) Nangwa akabanaabisa n’ebigyere kubeegyesa eishomo rikuru ery’obucureezi. (Yoh. 13:5, 12-14) Naitwe twine kuha ekitiinisa abakozi bagyenzi baitu omu mwanya gw’okwebembeza ebyaitu. ‘Twahaana ekitiinisa’ kandi tutarikufayo aha oraaheebwe ekitiinisa, emirimo mingi neija kukorwa.—Rom. 12:10.

 Kandi omucureezi naamanya ngu “ahu abahi b’obwengye baingi bari,” haine ekirikukorwa. (Enf. 15:22) Oyihireho okumanya kwaitu nari okubaasa, twine kwijuka ngu tihaine orikumanya buri kimwe. Nangwa na Yesu akaikiriza ngu haine ebintu ebi yaabaire atarikumanya. (Mat. 24:36) Kandi, akaba naafayo aha bi abeegi be abatahikiriire baabaire nibateekateeka. (Mat. 16:13-16) Niyo nshonga ahabw’enki abakozi bagyenzi be baabaire nibeehurira gye baaba bari nawe! Naitwe omu bucureezi twamanya obugarukiro bwaitu tukaikiriza ebitenso by’abandi, nihabaho obusingye, kandi nitukora ebintu bingi.

Ni kikuru munonga abareeberezi kutooreza Yesu baaba nibakora hamwe. Baine kumanya ngu omwoyo gurikwera nigubaasa kuhiga omureeberezi weena aha kakiiko kaabo kugamba eky’oburyo. Abareeberezi baaba bari omu rukiiko rwabo, buri omwe naikirizibwa kuha ekitenso kye atatiinire, reero obwo nibaija kucwamu gye ebiraagasire ekibiina kyona.

Orikukwatanisa gye n’abakozi bagyenzi be naakora ebintu omu muringo oguringaniire. Tarikuremera aha nshonga naahurikiza eby’abandi. Yesu akatunga omugisha gw’okureeba Ishe arikutwaza omu muringo oguringaniire. Nk’eky’okureeberaho, Yehova akamwohereza kucungura abantu kuruga omu rubanja rw’okufa.—Yoh. 3:16.

Yesu akaba atarikuremera aha nshonga yaareeba ngu nikyetengyesa. Ijuka obu yaahwera omukazi wa Foiniike, n’obu araabe yaabaire ayohereziibwe aha b’enju ya Israeli. (Mat. 15:22-28) Kandi akaba atarikushaba abeegi be kukora eki batarikubaasa. Bwanyima ya Petero munywani wa Yesu ow’aha mara kumwehakana butunu, Yesu akaba ayeteekateekire kumusaasira. Bwanyima, akaha Petero obujunaanizibwa bw’amaani. (Luk. 22:32; Yoh. 21:17; Byak. 2:14; 8:14-17; 10:44, 45) Eky’okureeberaho kya Yesu nikitworeka gye ngu okuba abaringaniire kwaitu kwine ‘kumanywa abantu boona’.—Fil. 4:5.

Okuba abaringaniire nikwija kutubaasisa kuhinduramu kubaasa kukora n’abantu b’emiringo yoona. Yesu akaba naatwariza gye bagyenzi be abaikiriize obutumwa bwe, kwonka abazigu be bakamwomesereza ngu ni “munywani w’abahooza n’abasiisi.” (Mat. 11:19) Mbwenu shi naitwe nitubaasa kukoragana gye n’abandi nka Yesu? Louis, ow’eishe-emwe owaamazire  obwire naataayaayira ebibiina kandi akaheereza n’aha Beseeli n’ab’eishe-emwe kuruga omu nganda zitarikushushana, naagira ati: “Niinteeraho kureeba buri guruupu y’abu ndikukora nabo nk’ekisiika ekyombekyesiibwe amabaare agatarikwingana. Waaguma noohindahindura amabaare orikugatereeza, noohendera otungire ekisiika ekitereire. Kandi naanye niinteeraho kukora empindahinduka kubaasa kwongyera aha kutereera kw’ekisiika.” Ogwo ka n’omutima murungi!

Ni ryari obu twine kukoragana omu muringo guringaniire omu kibiina kyaitu? Nitubaasa kukikora twaba turi omu guruupu zaitu z’okubuurira. Nitubaasa kukora n’ababuurizi abaine obujunaanizibwa bw’amaka oburikutaana n’obwaitu nari emyaka etarikwingana n’eyaitu. Nitubaasa kuba ab’oburyo turikuhindura aha bwira bwaitu nari emibuuririre yaitu kugira ngu bashemererwe baaba nibabuurira naitwe?

Orikutwariza gye abagyenzi be naaba ayeteekateekire kubagana nabo. (1 Tim. 6:18) Obu Yesu yaabaire naakora na Ishe, naabaasa kuba yaayetegyereize ngu tarikusherekyereza. Obu Yehova “yaataho eiguru,” Yesu naabaasa kuba yaabaire ariho kumwegyeraho. (Enf. 8:27) Bwanyima, Yesu akabagana n’abeegi be ebintu ‘ebi yaagambiirwe’ Ishe. (Yoh. 15:15) Twaijuka eky’okureeberaho ekyo, nitwija kuba tweteekateekire kubagana n’abandi ebi turikumanya. Buzima, orikukora gye na bagyenzi be naabagana nabo ebi arikumanya, tarikubyesigariza wenka. Naashemererwa kubagana n’abandi ebirungi ebi ayegire.

Kandi naagambira abakozi bagyenzi be ebigambo ebirikubagumya. Omuntu yaatusiima ayihire aha mutima ahabw’eki twakora, tikirikutushemeza? Yesu akaba naatwara obwire bwe kugambira abakozi bagyenzi be ebirungi ebi arikubareebamu. (Gyeragyeranisa Matayo 25:19-23; Luka 10:17-20.) Nangwa akabagira ngu nibaija kukora ‘emirimo erikukira’ eye. (Yoh. 14:12) Ekiro eki Yesu baamukwatiireho, akasiima entumwa ze abeesigwa arikubagira ati: “Niimwe abaagumisiriize naanye omu bi naagyeziibwe.” (Luk. 22:28) Teebereza oku ebigambo ebyo byabareeteire kwehurira, kandi bikabahiga kugira eki baakora! Naitwe twasiima abakozi bagyenzi baitu, nibaija kwongyera kushemererwa kandi bongyere kukora bingi.

“Orikukora gye na bagyenzi be tikirikumwetengyesa kuba ohikiriire,” nikwo ow’eishe-emwe orikwetwa Kayode arikugira, “kureka naashemererwa n’abandi, kandi tarikubahenza emirimo. Nikwo orikukora otyo na bagyenzi baawe? Ahabw’enki otarikubuuza abakozi bagyenzi baawe kukugambira yaaba noobatwariza gye? Ku baraabe nibakunda kukora naiwe, nk’oku abeegi ba Yesu baabaire nibakunda kukora nawe, noobaasa kugamba nk’entumwa Paulo owaagizire ati: “Nitukorera hamwe naimwe ahabw’okubareetera okushemererwa.”—2 Kor. 1:24.