Bo ali kumwanya Yesu, amanyile isya tuyilo utununu utu twalimpangisye ukuti abombeghe kanunu imbombo na bangi. Bo ali pa kisu, anangisyagha ikifwanikisyo ikinunu pa nkhani iyakubomba kanunu imbombo na bangi. Ngimba tukumanyilako isyafiki kwa Yesu? Linga tukwinong’onela fiyo isya kifwanikisyo kyake, tubaghile ukusyagha ifundo sitatu isi sibaghile ukututula ukubomba kanunu imbombo na bangi. Ifundo isi sikuya pakututula ukuti tukolelaneghe fiyo na bakamu na balumbu bitu.

Umbombi umwinitu ikubaketa abangi ukuya bakulondiwa fiyo kangi ikuya wakwiyisya. Yesu amanyile akayilo akakwiyisya aka ukufuma kwa Tata wake. Nalinga ukuti Yehova wapamwanya fiyo, loli umwene alondagha ukuti abangi bamanye isyakulondiwa kwa mbombo iyi umwanake abombile. Tukuketa isi umwene ayobile ukuti: “Oko, tumpeleghe umundu nkifwani kyitu.” (Bwa. 1:26) Pakabalilo aka Yehova ayobagha amasyu agha, Yesu asimenye ukuti Yehova wakwiyisya.—Sal. 18:35.

Bo ali pa kisu kyapasi, Yesu ali wakwiyisya fiyo. Bo abandu bikumpala ukufwana na isi abombagha umwene ampalagha Kyala. (Mar. 10:17, 18; Yoh. 7:15, 16) Yesu abombagha mwalutengano  na bafundiwa bake kangi abaketagha ukuya bamanyani komma ukuya batumwa. (Yoh. 15:15) Umwene abasughuswisye amalundi ghabo nukubamanyisya ukuya bakwiyisya. (Yoh. 13:5, 12-14) Nanuswe tukubomba kanunu linga tukubaghindika ababombi binitu m’malo mwakubika ifyakulondiwa fyitu pa malo ghakwanda. Tubaghile ukubomba nyingi linga tukubaghindika abangi nukuti bangatupalagha.—Rom. 12:10.

Umundu wakwiyisya ikumanya kangi ukuti “linga asinong’wine fiyo syosa sikwenda bununu itolo.” (Mbu. 15:22) Kisita kwinong’onela ubumanyi pamo amaluso agha tuli nagho, tukulondiwa ukukumbukila ukuti akayapo umundu uyu asimenye syosa. Yesu yope anangisye ukuti fyalipo ifindu fimo ifi akafimenye. (Mat. 24:36) Umwene ahobokagha na isi abafundiwa bake babombagha nalinga ukuti bali basita bugholofu. (Mat. 16:13-16) Yonongwa yake aba abombagha nabo imbombo bahobokagha nawe. Mwakufwana itolo, linga tuli bakwiyisya nukukumbukila ukuti tukamanya syosa tukuya pakupilikila isi abangi bikuyoba, ukuya nabo palutengano ukuti fyosa “fyendeghe kanunu.”

Kwakulondiwa fiyo ukuti abakulumba bakipanga bakongeghe ukwiyisya kwa Yesu linga bikubombela pampene. Abene bikulondiwa ukukumbukila ukuti mbepo mwikemo ghubaghile ukuntula unkulumba aliwesa ukuti asale kanunu ifyakubomba. Linga baghene, bikulondiwa ukuketesya ukuti aliwesa ikuya mwabuke ukuyobapo aminong’ono ghake, ukuti basale kanunu ifyakubomba ifi fibaghile ukuya fyakutula ku kipanga kyosa.

Umbombi unnunu ikuya nubumanyi linga ikubomba ifindu na bangi. Umwene ikuya wakupilikisya kangi wakwiyisya. Yesu ali nulusako ulwakuketa muno Tata wake anangisyilagha ubumanyi. Mwakifwanikisyo, Yehova alintumile umwanake ukuti asabapoke abandu ku bufwe—Yoh. 3:16.

Yesu ali mololo fiyo. Kumbukila muno alintulile unkikulu uwa ku Fonike, nalinga ukuti abukagha ku Israeli. (Mat. 15:22-28) Kangi umwene ahobokagha na isi abafundiwa bake babombagha. Bo ummanyani wake Peteri ankanile pa gulu lya bandu, Yesu alinhobokile. Bo akabalilo kakindilepo umwene alimpele Peteri ubudindo ubwakulondiwa fiyo. (Luka 22:32; Yoh. 21:17; Imbo. 2:14; 8:14-17; 10:44, 45) Ikifwanikisyo kya Yesu  kikututula ukuti “ubumanyi bwitu bumanyiweghe na bandu bosa” mwakuya bololo.—Filip. 4:5.

Ubumanyi bukuya pakututula ukuketa kanunu ifindu ukuti tubombeghe mwalutengano na bandu bosa. Yesu ababombelagha kanunu abandu bosa yonongwa yake abalughu bake balimpele inongwa iyakuti “mmanyani wa basongesyasongo nabatulanongwa” aba bapilikisyagha isi afumusyagha. (Mat. 11:19) Ngimba tubaghile ukunkonga Yesu mwakubomba kanunu na bandu aba tukindene nabo? Louis, unkamu uyu abombile ububombeli ubwa kwendela idela nu bwa pa Beteli kwa kabalilo akatali na bandu abakukindanakindana atile: “Ukubombela pampene na bandu abasitabugholofu kufwene itolo nukuyenga ikimato na mabwe aghakukindanakindana. Panongwa yakuti amabwe ghakindene isaizi, tukulondiwa ukwiyipa loli ikimato kikabaghila ukuniongala. Ngughelaghela ukuchenja ifyakubomba pa bumi bwangu ukuti mbombeghe mwalutengano na bangi ukuti imbombo yendeghe kanunu. Isi syakulondiwa fiyo.

Ngimba budindo buliku ubu tuli nabo ukunangisya ukuti tukubomba kanunu ifindu na bangi nkipanga kyitu? Tuli nubudindo ubwakubomba isi linga tuli na bandu aba tukubomba nabo ububombeli. Tubaghile ukubombela pampene na bafumusi aba bali nubudindo ubwa mu mbumba ubwa kukindanakindana kangi na aba tukindene nabo ifyinja. Tubaghile ukuchenja ifyakubomba pamo ukwiyipa ukuti tubatule abafumusi ukubomba ubufumusi ubu bikulonda ukuti bakindilile ukuya nulusekelo mubufumusi.

Umbombi unnunu umwinitu “ikupa.” (1 Tim. 6:18) Pakabalilo aka abombagha na Tata wake, Yesu asimenye ukuti Yehova akafisagha ifindu. Bo Yehova “ikupela ikyakumwanya,” Yesu ali “palapala” kangi amanyilagha ku myake. (Mbu. 8:27) Bo akabalilo kakindilepo, Yesu ababulagha abafundiwa bake “ifindu ifi apilikagha” ukufuma kwa Tata wake. (Yoh. 15:15) Tubaghile ukunkonga Yehova mwakubabula abakamu na balumbu isi tumanyile. Umbombi unnunu umwinitu atikufisa ifindu kisita kubabula abangi isi bikulondiwa ukumanya na isi sibaghile ukubatula. Umwene ikuhoboka ukubabula abangi ifindu ifinunu ifi amanyile.

Tubaghile ukubabula amasyu aghakukasya abakamu na balumbu bitu. Linga yumo aketile ukwiyipa kwitu kangi ikutundaghisya, ngimba tutikwipilika kanunu? Yesu ayagha nakabalilo akakubabula ababombi abinake ifindu ifinunu ifi babombagha. (Fwanikisya na Matai 25:19-23; Luka 10:17-20) Umwene ababulile ukuti bayagha “pakubomba ningulumba ukusikinda” isi umwene abombagha. (Yoh. 14:12) Ikilo ikyakuti kilabo ikuya pakufwa, ababulile abafundiwa bake abasubiliwa ukuti: “Yo umwe mwali nanine mungelo syangu syosa.” (Luka 22:28) Amasyu agha ghabakasisye fiyo kangi ghabatulile ukubomba simo. Linga nanuswe tukuya nakabalilo akakubandaghisya ababombi abinitu, abene bikuya pakuya balusekelo nukubomba nyingi.

Unkamu Kayode atile: “Umbombi unnunu atikulondiwa ukuya ngolofu, loli umwene ikubapangisya abangi ukuti bahobokeghe kangi babombeghe kanunu imbombo na aba ikubomba nabo.” Ngimba mo muno mukubombela? Lumo mubaghile ukubasuma abakamu na balumbu bamo ukuti bababule muno mukubombela ifindu. Linga bikuhoboka ukubomba nanumwe, bo muno abafundiwa ba Yesu bahobokelagha ukubomba nawe, mubaghile ukuyoba amasyu agha untumiwa Pauli ayobile ukuti: “Tuli babombanisi nanumwe ukuti mulwagheghe ulusekelo.”—2 Kor. 1:24.