Jizɔs bee nɔ pya elap dogo a bee doo kɔ a sere le edoba nɛ pya nɛɛ ba bee ye nyɔɔnɛ siniātam a kɛnɛkɛ̄. Ena i dap nɔ aāloo edoba Jizɔs ani? Lo i nɔ ye edoba leere, i muɛ taa nu eyerebah i nɛ kɔ i lu le nɛɛ enyɔɔnɛ siniātam. Pya nu i nɔ ama edoo kɔ i ɛrɛ edɔɔ̄ gbaaloo.

Le nɛɛ enyɔɔnɛ siniātam wee kumalookɛ̄ sa yere ka loo pya aa nyɔɔnɛ si tam e a naa wee gbī kɔ ba a yere ye ka loo yeekɛ̄. Jizɔs bee nɔ kumalookɛ̄ ama aābah ye Tɛ. Kere Jɛhova na nɛɛ a bɔloo ekure Nɛɛ Dɛmnu a, a doo kɔ alu esuā kɛ̄ ye Nwiīnɛɛdam bee ɛrɛ bah bu tam ba bee gbaa si doo. I muɛ lo ama aāloo ue Bari bee kɔ, lo a kɔ: “Doraa i dɛm nɛɛ bu i bera.” (Jɛn 1:26) Jizɔs bee tɔgɛ nia loo kɛ̄ Jɛhova kumalookɛ̄ doo ama.​—⁠Yɔɔ 18:⁠35.

Jizɔs bee tɔgɛnage dua kumalookɛ̄ ama sɔ̄ a bee le a kɛnɛkɛ̄. Sɔ̄ a bee lu ekaɛgɛ ye loo pya nu a doo, a bee su ka nɛ Nɛɛ a bɔloo. (Maak 10:​17, 18; Jɔn 7:​15, 16) Jizɔs bee kiisī lo enyɔɔnɛ pya a wee ye nyɔɔnɛ dumɛ tɔɔ̄ bu efɛɛloo, sa wa aara doodoo pya ye gbo e naale doodoo pya zooro. (Jɔn 15:15) A bee wa tɔgɛ kumalookɛ̄ tɛ̄maloo elog wa ekpotɔ. (Jɔn 13:​5, 12-14) A  lee kɔ i yerenage ka loo pya le ii aa gbaa si tam taā i su ilii nia nua tuatua loo alaba. Sɔ̄ i ‘yere ka loo ziī’ sa ii gbī ka nɛ i loo, edoo kɔ i dap si gbɛnɛ-edo tam.​—⁠Rom 12:⁠10.

Nɛɛ a kumalookɛ̄ suā kɔ “tɛ̄maloo booboo . . . zuurabahtɔ̄ [nu ekiisī] leere.” (Kam 15:22) Kaɛlɛɛ nu i suā ale nu i para, lee kɔ i nyɛŋiabu kɔ lɔgɔ nɛɛ a suā dɛ̄dɛɛ̄ nu naale. Kere Jizɔs bee kɔnage kɔ a ɛrɛ pya nu a naa suāe. (Mat 24:36) A bee gbīnage esuā nu alu ekɛɛrɛ pya a wee ye nyɔɔnɛ dumɛ lo ba naa mmana. (Mat 16:​13-16) Nu anua sa loo pya a bee ye nyɔɔnɛ siniātam bee sukɛ̄ sɔ̄ ba bee ye le kpaɛ̄ lo! Bu aba lo sīdee, lo i kumalookɛ̄ sa nyɛŋiabu kɔ ii suāe dɛ̄dɛɛ̄ nu sa gbī ekɛɛrɛ pya dɔɔ̄na, i nyimɛ efɛɛloo kumaloo ziī, e lo ama edoo kɔ nu a “kiisī leere.”

Alu kaāna nu a kuī kɔ pya kanɛɛ a nɔ kumalookɛ̄ dookɛ̄ Jizɔs bee doo, sɔ̄ ba aa gbaa si tam. A bɔloo kɔ ba a suā kɔ kaɛ edɔɔ̄ dap yerebah nɛ ɛrɛgeba nɛɛ kanɛɛ kɔ a kɔ nu edɔbiī wa nɛ. Lo pya kanɛɛ doo kɔ dɛ̄dɛɛ̄ nɛɛ alu puɛ lo ekɔ nu a wa le nyiɛ sɔ̄ ba ɛrɛ zɔ̄zɔ̄ŋia, ba edap doo biaɛfii edɔbiī nɛ bɔŋanaloo.

Le nɛɛ enyɔɔnɛ siniātam wee suā kɛ̄ enyɔɔnɛ pya le ɛɛ aa siniātam dania nu doo. A wee lu nɛɛ a gbɔɔbah sa kpɛ̄naloo esu nu pya dɔɔ̄na kɔ. Bu kaka, Jizɔs bee su sɔ̄ ɛma kɛ̄ ye Tɛ bee su suānu nyɔɔnɛ pya dɔɔ̄na danianu doo. Bu edoba, Jɛhova bee ye yere lo e’agara pya nɛɛ lɛɛ bah pɔrɔ le luh.​—⁠Jɔn 3:⁠16.

Jizɔs bee su nu pya dɔɔ̄na kɔ sɔ̄ alu ebɛɛ̄ ale sɔ̄ a bɔloo. Nyɛŋiabu kɛ̄ a bee yerebah nɛ ziī waa Kenaan doo, kereadoo a bee lu eyere ye ture loo tɔ Izrɛl. (Mat 15:​22-28) A bee tɔgɛnage suānu bu nu a ɛmadɛɛ̄ aābah pya a wee ye nyɔɔnɛ dumɛ. Sɔ̄ Pita alu nɛɛ a bee tɔɔ̄ waɛloo Jizɔs kaāna bee ye anna bie kɛ̄sī pya nɛɛ, a bee ye aaloo nɛ. Sɔ̄ esaa, a bee su pya tam a kuī nɛ Pita. (Luk 22:32; Jɔn 21:17; Doonu 2:14; 8:​14-17; 10:​44, 45) Edoba Jizɔs tɔgɛ leere kɔ i ɛrɛ edoo kɔ “dɛ̄dɛɛ̄ nɛɛ [a] suā [i] le beenyiɛ” tɛ̄maloo esu nu pya dɔɔ̄na kɔ sɔ̄ a bɔloo.​—⁠Fil 4:⁠5.

Sɔ̄ i dābeeloo kɛ̄ enyɔɔnɛ pya dɔɔ̄na danianu doo edoo kɔ i dap nyaanabaloo kɛ̄ i wee doo nu doo lokwa i nyɔɔnɛ dɛ̄dɛɛ̄  nɛɛ siniātam bu efɛɛloo. Jizɔs bee aara pya dɔɔ̄na leere mmɛ kɛ̄ pya ye nɛɛ baa a bee ye manyiɛ bee ye gba ue kɔ alu “gbo pya etup le pya pɔrɔ,” lo ba bee gbaɛ̄tɔ̄ ye yereue. (Mat 11:19) I dapge nyɔɔnɛ pya dɔɔ̄na lo wa elap lu kee loo lo ili siniātam doodoo Jizɔs ni? Ziī wuga nɛɛdam a kura Louis, lo esiatam kuūdɛɛ̄loo sɛkiut le tam Bɛtɛl, sa nyɔɔnɛ pya nɛɛ ba aa keekee kɛ̄ siniātam bee kɔ: “M su ziī ziī eku m nyɔɔnɛ si tam dooreloo ekpadaɛ̄ alu esu dɛm alu keekee nɔma. Lo a le o nɔɔ pya lo dɛm leere, o waa lee ɛrɛ ekpadaɛ̄ a lera. M epiiganage lo ekwabaloo kɛ̄ m doo nu doo lokwa m dap nyɔɔnɛ pya dɔɔ̄na siniātam bu efɛɛloo, lo edoo kɔ i tam a kiisī leere.” Mɛ dua le dogo wuga nɛɛdam ama tɔgɛ sɛh!

Mɛ sɔ̄ na i dap tɔgɛ kɔ i gbae bee bah nɔɔnɔɔnu i bɔŋanaloo a? I ɛrɛ dee lo edoo wo sɔ̄ i le bu i eku tam zue ue. I dap nyɔɔnɛ pya zue ue a ɛrɛ keekee toh tam butɔ a wa le bee siniātam, pya a i nama ale pya ili nama. I dapge tɔgɛ kɔ i ɛrɛ le beenyiɛ tɛ̄maloo ekwabaloo kɛ̄ i si tam zue ue doo lokwa ba dap ɛrɛ ɛɛbu bu wa tam zue ue ni?

Le nɛɛ enyɔɔnɛ siniātam wee kpɛ̄naloo e “wo nu [a] ɛrɛ nɛ pya dɔɔ̄na.” (1 Tim 6:18) Sɔ̄ Jizɔs aa bee nyɔɔnɛ ye Tɛ siniātam, a bee muɛ kɔ Jɛhova naa bee ye gɔ̄ lɔgɔ nu loo. Jizɔs “bee le” kɛ̄ sɔ̄ Jɛhova bee “wu dɛ̄dɛɛ̄ bunyɔɔ,” sa a bee ye nɔ nu aabah. (Kam 8:27) Sɔ̄ esaa, Jizɔs bee nyɔɔnɛ pya a wee ye nyɔɔnɛ dumɛ ponia “nu [a] bee dā” aā nu ye Tɛ. (Jɔn 15:15) Kuma sɔ̄ i suā doo wo a, i kpɛ̄nanage loo lo enyɔɔnɛ pya le ii aa gbaa siniātam ponia nu i suā le pya nu i etɛ̄nabu. Bu kaka, le nɛɛ enyɔɔnɛ siniātam naale e’aa pya yereue lo edap yerebah nɛ pya aa nyɔɔnɛ si tam wa lɛɛ loo, lokwa pya dɔɔ̄na kiisī lo ebia ye kɛɛ̄. Bu ye e’ɛɛ lo enyɔɔnɛ pya dɔɔ̄na ponia pya le nu a suā.

I dapnage kɔ ue yere mɛm loo nɛ pya le ii aa siniātam. Sɔ̄ ziī nɛɛ tɔgɛ kaāna nia loo kɛ̄ i piiga doo sa tɔgɛ kɔ nu i doo niae ye, ekɔ bu i naa wee ɛɛ ni? Jizɔs bee kɔ le nu a bee muɛ bu pya a wee ye nyɔɔnɛ dumɛ wa nɛ. (Dooreloo Matiu 25:​19-23; Luk 10:​17-20.) A bee wa kɔnage nɛ kɔ ba esi “tam a ee” pya lo alɛ bee si. (Jɔn 14:12) Uunɛ lɛɛ a gae lu efɛ ye, a bee kɔ nɛ pya ye nɛɛ lɛɛratam a bɔ ture nyiɛ loo kɔ: “Mɛ bɔɔlo na pya a mɛ yɔ tɔɔ̄ bu dɛ̄dɛɛ̄ na ɛma’ɛp.” (Luk 22:28) Naa kɛɛrɛ kɛ̄ pya ye ue ama bee dap wa tɔaloo sa wa zū kɔ ba a doo dogo doo a! Lo i kaɛgɛ pya le ii aa gbaa si tam dɛ̄dɛɛ̄ sɔ̄, edoo kɔ ba a ɛrɛ ɛɛbu sa si wa tam leere.

Ziī wuga nɛɛdam a kura Kayode kɔ: “Kaāna le nɛɛ enyɔɔnɛ siniātam naa ɛrɛ elu nɛɛ a mmana, mɛ a doo kɔ tam pya aa ye nyɔɔnɛ siniātam a waɛ sa ba gbaa ɛrɛ ɛɛbu.” O luge dua lo nɛɛ tam ni? O dap bip pio pya o wuga bu yira lo bui aa gbaa si tam lo esuā lo a le o lege doo wo. Lo bu wa ɛɛ lo enyɔɔnɛ a siniātam dookɛ̄ bu pya a wee nyɔɔnɛ dumɛ Jizɔs bee ɛɛ lo enyɔɔnɛ ye siniātam doo, nu dap a tɔɔ̄loo dookɛ̄ a bee tɔɔ̄loo nɛɛ lɛɛratam Pɔɔl doo, sɔ̄ a bee kɔ: “Ili na pya a yerebah nɛ bui ɛɛbu” a.​—⁠2 Kɔr 1:⁠24.