Jesu o yono omamọ iruemru ri ha userhumu riẹn rhiẹ obọdẹn udje rẹn idibo yi, ọke rọ ha otọrakpọ na. Marhẹ ene ru mẹrẹn erere nẹ udje i Jesu? Arha dabu ni udje yi fiotọre, ana sabu mẹrẹn iruemru-urhi esa ri na ha userhumu rẹn ọwan rhiẹ ihworho ra wian ọrẹ okugbe. Iruemru-urhi enana ina ha userhumu rẹn ọwan toroba ufuoma ọrhẹ okugbe.

Omamọ ọwionwian o vwo ọdaremẹro kpahen ereva ye, o vwo ji dje omaye-en. Uruemru ọnana yi Jesu o yono mie Ọsẹ ye. Dedevwo, Jehova ọvo yo mwuovwan re ne se Ọmemama, ọrẹn Jehova o vwo ọdaremẹro kpahen owian Ọmọyen o lelirie wian. A mẹrẹn ọnana vwrurhe uvuẹn ẹmro Osolobrugwẹ ọ tare: “Jenẹ a ma onyakpọ uvuẹn ohọhọme ọwan.” (Gen. 1:26) Jesu o vwo ọdaremẹro kpahen omeriotọre i Jehova uvuẹn erhirhiẹ ọnana.—Ps. 18:35.

Ọke i Jesu ọ ha otọrakpọ na, no dje omeriotọre na phia. Ọke ihworho e jiriẹ fọkiẹ ewian yen, nọ ha ujiri na vwe Osolobrugwẹ. (Mark 10:17, 18; John 7:15, 16) Jesu o lele idibo yi wian kugbe ọrẹ ufuoma, no nirin aye rhiẹ igbehian yen ukperẹ ono rhiẹ evrẹn. (John 15:15) O tobọ ghwe aghwẹ aye no yono aye uyono kpahen omeriotọre. (John 13:5, 12-14) O ji fo ne vwo ọdaremẹro kpahen imizu ukoko na, ukperẹ ana ha edamẹ  ọwan karọ rẹn erẹ aye. Arha ‘họghọ rẹn owuowọnwan,’ e ji brudu kpahen ujiri-i, na na sabu wian ewian ọwan gba.—Rom. 12:10.

Ohworho ro vwo omeriotọre, ọ ji mẹrẹnvwrurhe taghene “efikparobọ o rhirhiẹ ye, ihworho buebun i rha djẹ iroro kugbe.” (Prov. 15:22) O toro oborẹ e rhiẹromẹrẹn ne yanghene omẹgbanhon ọwa-an, o fori na karorhọ taghene o vwo onyakpọ owuorowu ro rhe i kemru kemru-u. Ukperhumu i Jesu ọ tare taghene o vwo ekwakwa ezẹko ro vwo rhe. (Matt. 24:36) Habaye, Jesu o vwo ọdamẹ kpahen oborẹ idibo yi ri vwa gba, i rheri yanghene oborẹ aye e roro. (Matt. 16:13-16) Ọnana yọ soriẹ idibo yi a dabu vwo ẹhẹn ro te otọre ọke aye e lelie wian! Ọrẹ ohọhọme, arha dabu rhe ekete omẹgbanhon ọwan o teri, ji ha uphẹn rẹn awọrọ nẹ aye i hobọtua ọwan, ne toroba ufuoma uvwre ọwan, ọrẹ okugbe ne vwo “efikparobọ.”

Ọghanren omamọ nẹ ekpako ukoko i hẹrokele i Jesu uvuẹn erhirhiẹ ọnana, ọke aye a wian kugbe. O fori nẹ aye i karorhọ taghene ẹhẹn ọfuanfon na ọnọ sabu ha userhumu rẹn owuọwan usuẹn ekpako na brorhiẹn ro serhọ. Orhianẹ aye i ha ẹghware ekpako, o fori nẹ aye i damoma sẹrorẹ erhirhiẹ ufuoma, neneyo owuowọnwan usuẹn ekpako na i sabu toroba ẹghware na, ọrẹ okugbe aye ina sabu brorhiẹn ri na rhua erere rhiẹ ukoko na.

Omamọ ọwionwian ọ dabu roro rẹn ereva ye re lelie wian. Ọ vwọ mọren urhi kokoroko-o, ọ ji ha ẹmro awọrọ. Jesu ọ dabu mẹrẹn oborẹ Ọsẹ ye o roro rẹn awọrọ lele. Jerẹ udje, Jehova o djerie no yo simi ituakpọ nẹ uhwu ro fo rẹn aye bi.—John 3:16.

Jesu ọ ji ha ẹmro awọrọ ọke erhirhiẹ na orho serhọ. Karorhọ oborẹ ọ ha userhumu rẹn ọmase onyẹ Phoenicia, dedevwo unuoghwa Israel ye djerie bru. (Matt. 15:22-28) Jesu o ji roro rẹn idibo yi kpahen oborẹ ọ guọlọre taghene aye i ru. Ọke i Peter ọ tiẹn hin ọrẹ afiede, Jesu nọ harhomie. Ọke oru, nọ ha ewian eghwaghwa rẹn Peter. (Luke 22:32; John 21:17; Acts 2:14; 8:14-17; 10:44, 45) Udje i Jesu ọ dabu dje yi fiotọre taghene o fori nẹ “uruemru [ọwan e] roro rẹn awan ọ dabu fiotọre rẹn ihworho ephian,” nyoma ra ha ẹmro awọrọ.—Phil. 4:5.

 Uruemru re roro, ọnọ ji ha userhumu rẹn ọwan wene lele erhirhiẹ ihworho sansan na sabu lele aye wian kugbe. Jesu ọ dabu lele ere rhirhiẹ kẹriẹ nyerẹn kugbe, te erhirhiẹ evwreghrẹn yen a mọriẹn ba ye obọ taghene ọye “ugbehian ere toro osa urhomu ọrhẹ iruedandan” ri kerhọ aghwoghwo yi. (Matt. 11:19) Ana sabu lele awọrọ nyerẹn kugbe jerẹ i Jesu? Omizu ọhworhare owu re se Louis, rọ wianren rhẹ imizu sansan ọke ro rhiẹ oniruo kinrhariẹ, ji wian uvuẹn Oghọn Ukoko, nọ tare: “Mi damoma ha ẹko owuowu mi lele wian ha vwanvwọn ugbomoghwa ra ha aruẹ itita sansan bọn. Wu rha kpọ itita ezẹko vi, wu na sabu bọn ugbomoghwa rọ phiọnren. Mi ji damoma mie ruẹ ọkpọvi omobọ neneyo mi sabu toroba ugbomoghwa ọphiọnphiọn na.” Ọnana obọdẹn uruemru!

Ọkiọgo ya na sabu dje uruemru okugbe phia uvuẹn ukoko ọwan? Ana sabu ruẹ ọnana ọke re kwomakugbe ẹko aghwoghwo ọwan. Ana sabu lele imizu ri vwo ohwan ekrun sansan yanghene ri ha ẹgbukpe sansan wian kugbe. Ana sabu rhiẹ ihworho re roro rẹn awan nyoma ra na kpọ ena ọwan vi, na ha userhumu rẹn aye riamerhen owian aghwoghwo na vuọnvuọn?

Omamọ ọwionwian o vwo omwemẹ “ro no tiobọnu.” (1 Tim. 6:18) Ọke i Jesu o leli Jehova wian, ọ mẹrẹnvwrurhe taghene o vwo tiẹ ekwakwa nuẹ riẹ-ẹn. Ọke i Jehova o “mwuegbe idjuwu na,” Jesu “ọ ha avwaye,” o ji yono mie Ọsẹ ye. (Prov. 8:27) Ọke oru, Jesu no ji dje rẹn idibo yi rhẹ omamerhomẹ “kpahen ọsoso ekwakwa [ro] rhon” mie Ọsẹ ye. (John 15:15) Nyoma udje ọrana, no fori nẹ ọwan i ji mwuegbe re ne tiobọnu irherhe ọrhẹ ena re vwori rẹn imizu re lele wian kugbe. Itiọrurhomẹmro, omamọ ọwionwian o vwo tiẹ iyẹnrẹn ro fori nẹ awọro i rhe kpahen nuẹ-ẹ, fọkime ọ guọlọ rhiẹ ohworho ro suẹ-ẹn. Oma ọnọ merhiẹn rọ nọ ghalẹ rhẹ awọrọ ekwakwa irhorhomu ro yono ne.

Ana ji sabu tiobọnu ẹmro urhebro rẹn imizu re lele wian kugbe. Ohworho ọrhọ djokarhọ omẹdamu ọwan, ji dje ọdaremẹro phia, oma ọ vwọ merhen ọwan? Jesu ọ dabu ha ọke ta rẹn ihworho ro lele wian kpahen ekwakwa irhorhomu rọ mẹrẹnren uvuẹn oma aye. (Haye vwanvwọn Matthew 25:19-23; Luke 10:17-20.) Ọ tobọ ta rẹn aye taghene aye ina “wian ewian ri vrẹn” enẹyen. (John 14:12) Uvuẹn ason o ki hwu, Jesu no jiri inyikọ yen ri fuevwan, nọ tare: “Are yẹ ihworho ri tigban mẹ uvuẹn ọke edamuni mẹ.” (Luke 22:28) Roro kpahen oborẹ ẹmro erana i te ọmudu inyikọ na te, ro ji mwu aye kpare idjaghwẹ! Erhe jiri imizu re lele wian kugbe, oma ọnọ ji merhen aye wian bunrhọ.

Omizu ọhworhare owu re se Kayode, nọ tare: “Omamọ ọwionwian o vwo rhiẹ ohworhọ rọ gbare vwẹre-e. Ọrẹn ọ lẹrhẹ oma merhen awọrọ, ji lẹrhẹ ewian aye lọhọ.” Wẹwẹ aruẹ ohworho ọrana? Ọkezẹko wu na sabu nọ imizu ezẹko we lele wian nẹ aye i ta wẹn aruẹ ohworho wu havwọ. Orhianẹ oma merhen aye rẹ aye ine leluo wian, jerẹ oborẹ idibo i Jesu i riamerhen owian aye, ne wu na sabu ta jẹrẹ ọnyikọ Paul: “Ame rhẹ are a wian kugbe fọkiẹ aghọghọ are.”—2 Cor. 1:24.