Йесомӕ уӕлӕрвты цы хорз миниуджытӕ фӕзынд, уыдоны фӕрцы сси хорз ӕмкусӕг. Ӕмӕ уый фӕстӕ зӕххыл куы уыд, уӕд уымӕй иннӕтӕн уыди фӕзминаг. Ӕркӕсӕм Йесойы цӕвиттонмӕ ӕмӕ аныхас кӕнӕм ӕртӕ уагӕвӕрдыл. Уыдон нын баххуыс кӕндзысты, цӕмӕй хорз ӕмкусджытӕ уӕм ӕмӕ не ’хсӕн иудзинад уа.

Хорз ӕмкусӕг вӕййы сӕрныллӕг ӕмӕ йе ’мкусджытӕн фӕаргъ кӕны. Уый афтӕ нӕ фӕхъуыды кӕны, ӕмӕ иннӕтӕй хуыздӕр у. Йесо дӕр ахӕм ӕмкусӕг уыд. Ӕмӕ ууыл йӕ Фыдӕй сахуыр. Кӕд ӕрмӕстдӕр Йегъовӕйы ис схонӕн Сфӕлдисӕг, уӕддӕр Йегъовӕйы фӕндыд, цӕмӕй иууылдӕр зыдтаиккой, Йесо дӕр йемӕ кӕй фыдӕбон кодта. Уый бӕрӕг у, цы загъта, уымӕй: «Скӕнӕм адӕймаджы нӕхимӕ гӕсгӕ» (Райд. 1:26). Ацы ныхӕстӕ Йесойӕн ууыл дзурӕг уыдысты, ӕмӕ йӕ Фыд у сӕрныллӕг (Пс. 18:35).

Йесо зӕххыл куы уыд, уӕд-иу уый дӕр ӕвдыста сӕрныллӕгдзинад. Цы арӕзта, уыдӕтты тыххӕй-иу ӕй куы кадджын кодтой, уӕд-иу уый та Йегъовӕйы скадджын кодта (Мар. 10:17, 18; Иоан. 7:15, 16). Йесо ӕмӕ йӕ ахуыргӕнинӕгты ’хсӕн уыди фарн. Уый сӕ цагъартыл нӕ нымадта, фӕлӕ йе ’мбӕлттыл (Иоан. 15:15). Ӕмӕ уыдоны дӕр ахуыр кодта сӕрныллӕгдзинадыл. Сӕ къӕхтӕ дӕр ма сын ныхсадта (Иоан. 13:5, 12–14). Мах дӕр хъуамӕ хотӕ ӕмӕ ’фсымӕртӕн аргъ кӕнӕм ӕмӕ ӕрмӕст нӕхиуыл ма хъуыды кӕнӕм. Кӕрӕдзийӕн куы кад кӕнӕм ӕмӕ, кад кӕмӕ ӕрхаудзӕн, ууыл куы нӕ мӕт кӕнӕм, уӕд нын фылдӕр ӕнтысдзӕн (Ром. 12:10).

 Сӕрныллӕг адӕймаг ма ӕмбары: «Бирӕ уынаффӕгӕнджытӕ кӕм уа, уым... алцыдӕр рауайдзӕн» (Ӕмб. 15:22). Кӕд фӕлтӕрдджын стӕм ӕмӕ нӕм цавӕрдӕр курдиӕттӕ ис, уӕддӕр хъуамӕ нӕ зӕрдыл дарӕм, адӕймаг алцы кӕй нӕ фӕзоны. Суанг ма Йесо дӕр загъта, цыдӕртӕ кӕй нӕ зоны (Матф. 24:36). Стӕй кӕд йӕ ахуыргӕнинӕгтӕ ӕнӕххӕст уыдысты, уӕддӕр-иу сӕ бафарста, цы хъуыды кӕнынц, уымӕй (Матф. 16:13–16). Уӕдӕ диссаг нӕу, йемӕ алкӕмӕн дӕр ӕнцон кӕй уыд, уый. Мах дӕр хъуамӕ нӕ зӕрдыл дарӕм, алцы кӕй нӕ зонӕм, ӕмӕ-иу, иннӕтӕ цы фӕзӕгъынц, уымӕ байхъусӕм. Афтӕ куы кӕнӕм, уӕд не ’хсӕн уыдзӕн фарн ӕмӕ-иу нын «алцыдӕр рауайдзӕн».

Уӕлдайдӕр хистӕр нӕлгоймӕгтӕ хъуамӕ фӕзмой Йесойы ӕмӕ уой сӕрныллӕг. Цавӕрдӕр фарстайыл куы фӕныхас кӕнынц, уӕд-иу хъуамӕ сӕ зӕрдыл дарой, сыгъдӕг тыхӕн йӕ бон кӕй у хистӕр нӕлгоймӕгтӕй кӕцыфӕндыйы дӕр баразӕнгард кӕнын хъӕугӕ хъуыды зӕгъынмӕ. Фембӕлд сын куы вӕййы, уӕд-иу хъуамӕ архайой, цӕмӕй се ’хсӕн уа фарн. Афтӕмӕй дзы алкӕмӕн дӕр йӕ бон уыдзӕн йӕ хъуыдытӕ сӕрибарӕй дзурын. Ӕмӕ-иу уӕд рахӕсдзысты, ӕмбырды се ’ппӕтӕн дӕр пайда чи ’рхӕсдзӕн, ахӕм уынаффӕтӕ.

Хорз ӕмкусӕг вӕййы ӕмбаргӕ, ӕнцондзырд ӕмӕ йӕхи ныхасыл нӕ ныллӕууы. Йесо арӕх уыдта, йӕ Фыд ӕмбаргӕйӕ кӕй архайы, уый. Зӕгъӕм, Йегъовӕ йӕ рарвыста зӕхмӕ, цӕмӕй адӕмы фервӕзын кодтаид мӕлӕты тӕрхонӕй, кӕд уый аккаг уыдысты, уӕддӕр (Иоан. 3:16).

Куы-иу хъуыди, уӕд-иу Йесо иннӕтӕм дӕр байхъуыста, йӕ ныхасыл-иу нӕ ныллӕууыд. Зӕгъӕм, финикийаг сылгоймагӕн баххуыс кодта, кӕд «ӕрмӕстдӕр Израилы адӕммӕ» ӕрвыст уыди, уӕддӕр (Матф. 15:22–28). Йесо ӕмбаргӕ кӕй уыд, уый ма бӕрӕг уыд, йӕ ахуыргӕнинӕгтӕй ӕгӕр бирӕ кӕй нӕ домдта, уымӕй дӕр. Кӕд дзы йе ’ввахс ӕмбал Петр адӕмы раз афтӕ загъта, нӕ йӕ зонын, зӕгъгӕ, уӕддӕр ын Йесо ныххатыр кодта ӕмӕ йын фӕстӕдӕр йӕ бар фылдӕр хӕстӕ бакодта (Лук. 22:32; Иоан. 21:17; Хъуыд. 2:14; 8:14–17; 10:44, 45). Уӕдӕ-иу мах дӕр хъуамӕ уӕм ӕнцондзырд ӕмӕ-иу нӕхи ныхасыл ма ныллӕууӕм. Ӕмӕ нӕ уӕд алчидӕр не ’мбаргӕдзинадӕй зондзӕн (Фил. 4:5).

Ӕмбаргӕ куы уӕм, уӕд ма уый фӕрцы нӕ бон уыдзӕн алыхуызон адӕмимӕ ӕмвӕнд-ӕмзондӕй  лӕггад кӕнын. Йесо зыдта алыхуызон адӕмимӕ цӕрын. Ӕмӕ ма йӕ уый тыххӕй йе знӕгтӕ фырхӕлӕгӕй фӕаххосджын кодтой, «хъалонисджыты ӕмӕ тӕригъӕдджынты лымӕн» у, зӕгъгӕ. Йесо та семӕ рӕстӕг уымӕн ӕрвыста, ӕмӕ-иу уыдон хорз хабар сӕ зӕрдӕмӕ айстой (Матф. 11:19). Махӕн дӕр нӕ бон у Йесойау иннӕтимӕ ӕмгуыст кӕнын? Луис уыди районон цӕстдарӕг, стӕй та лӕггад кодта Вефилы. Ӕмӕ-иу ӕй хъуыди алыхуызон хотӕ ӕмӕ ’фсымӕртимӕ ӕмгуыст кӕнын. Уый радзырдта: «Къул куы амайай ӕмӕ дуртӕй иутӕ стырдӕр куы уой, иннӕтӕ та къаддӕр, уӕд дӕ хъӕудзӕн фылдӕр бафыдӕбон кӕнын, цӕмӕй дзы алкӕцы дӕр йӕ бынаты сӕвӕрай ӕмӕ къул ӕмраст рауайа. Раст афтӕ, дӕхи хуызӕн ӕнӕххӕст адӕмимӕ куы ӕмгуыст кӕнай, уӕд дӕр фӕхъӕуы фылдӕр бафыдӕбон кӕнын. Ӕз-иу архайдтон, цӕмӕй иннӕтӕн мемӕ ӕнцон уыдаид, ӕмӕ куыст размӕ цыдаид». Ацы ӕфсымӕр махӕн дӕр у фӕзминаг.

Цы ис аразӕн, цӕмӕй не ’мбаргӕдзинад не ’мбырды бӕрӕг уа? Нӕ бон у нӕ уацамындон къорды хотӕ ӕмӕ ’фсымӕртӕй алкӕимӕ дӕр лӕггад кӕнын: бинонтӕ кӕмӕн ис, уыдонимӕ дӕр ӕмӕ, бинонтӕ кӕмӕн нӕй, уыдонимӕ дӕр, стӕй алы кары хотӕ ӕмӕ ’фсымӕртимӕ. Цӕттӕ вӕййӕм исты фӕивынмӕ, цӕмӕй сын лӕггад кӕнын ӕнцондӕр уа ӕмӕ сын уый фылдӕр циндзинад хӕсса?

Хорз ӕмкусӕг, цы йӕм ис, уымӕй иннӕтӕн дӕр фӕхай кӕны (1 Тим. 6:18). Йесо йӕ Фыдӕн куы ’ххуыс кодта, уӕд ӕй, ӕвӕццӕгӕн, уыдта, Йегъовӕ дзы кӕй ницы сусӕг кодта. Йегъовӕ «арв куы цӕттӕ кодта», уӕд Йесо дӕр уым уыди ӕмӕ йӕ бон уыд йӕ Фыдӕй ахуыр кӕнын (Ӕмб. 8:27). Ӕмӕ, йӕхӕдӕг цытӕ базыдта, уыдӕттӕ уый фӕстӕ йӕ ахуыргӕнинӕгтӕн дӕр дзырдта (Иоан. 15:15). Мах дӕр хъуамӕ Йегъовӕйы фӕзмӕм ӕмӕ-иу нӕ зонындзинӕдтӕй ӕмӕ нӕ фӕлтӕрддзинадӕй хотӕ ӕмӕ ’фсымӕртӕн фӕхай кӕнӕм. Хорз ӕмкусӕг нӕ фӕархайы, цӕмӕй алцыдӕр ӕрмӕстдӕр йӕхицӕй кӕнгӕ уа, ӕмӕ иннӕтӕй нӕ фӕсусӕг кӕны, пайда сын цы фӕуыдзӕн ӕмӕ сӕ зонын цы хъӕуы, уыдӕттӕ. Фӕлӕ йын ӕхсызгон вӕййы, йӕхӕдӕг цы зоны, уыдӕттӕ иннӕтӕн дӕр амонын.

Нӕ бон ма у нӕ хотӕ ӕмӕ не ’фсымӕртӕн сӕ ныфсыл ныфс ӕфтауын. Иннӕтӕ нын нӕ фыдӕбон куы фӕуынынц ӕмӕ нын уый тыххӕй куы раарфӕ кӕнынц, уӕд нын ӕхсызгон нӕ вӕййы? Йесо-иу йе ’мкусджытӕй сӕ хорз хъуыддӕгты тыххӕй раппӕлыд. (Абар Матфейы 25:19–23; Лукайы 10:17–20.) Афтӕ дӕр ма сын загъта, йӕхӕдӕг цы хъуыддӕгтӕ арӕзта, уымӕй «стырдӕр хъуыддӕгтӕ» кӕй араздзысты (Иоан. 14:12). Йӕ мӕлӕты размӕ изӕр та йӕ иузӕрдион апостолтӕй раппӕлыд ӕмӕ сын загъта: «Сымах мӕ фӕлварӕнты рӕстӕг уыдыстут мӕ фарсмӕ» (Лук. 22:28). Апостолтӕн уый фехъусын куыд ӕхсызгон уыдаид! Уый фӕрцы сӕ ноджы зӕрдиагдӕрӕй бафӕндыдаид архайын. Мах дӕр-иу иннӕтӕй куы раппӕлӕм, уӕд-иу сыл базыртӕ базайдзӕн ӕмӕ сын ноджы фылдӕр ӕнтысдзӕн.

Иу ӕфсымӕр, Кайоде, загъта: «Ӕнӕххӕст адӕймагӕн дӕр йӕ бон у, ӕмӕ хорз ӕмкусӕг уа. Хорз ӕмкусӕг фӕархайы, цӕмӕй иннӕтӕн ӕнцон уа йемӕ кусын ӕмӕ сын уый циндзинад хӕсса». Ды та цавӕр ӕмкусӕг дӕ? Хорз уаид, хотӕ ӕмӕ ’фсымӕртӕй искӕй уымӕй куы бафӕрсис. Кӕд сын демӕ ӕхсызгон у ӕмгуыст кӕнын, уӕд ды дӕ Йесойы хуызӕн хорз ӕмкусӕг. Ӕмӕ дӕ бон у апостол Павелау зӕгъын, зӕгъгӕ, ӕз дӕн уе ’мкусӕг, цӕмӕй уын уӕ циныл цин ӕфтауон (2 Кор. 1:24).