Lapud akaaral ya maong si Jesus ed abaybayag ya impankimey to ed tawen kaibay Ama to, impanengneng toy maabig ya alimbawa no panon so mankimey kaibay arum nen wadiad dalin. No aralen tayoy alimbawa to, makaaral tayoy taloran prinsipyo ya makatulong pian magmaliw tayo met ya maong ya kakimeyan na arum tan ontulong iraya pian napansiansia tayoy pankakasakey tayo.

Say sakey ya maong ya kakimeyan et mapaabeba. Sikatoy aliwan pasikat tan ipapasen ton importante iray kakaiba to. Sayan ugali et naaralan nen Jesus ed Ama to. Anggano si Jehova so Amalsa ed amin, impaamta to ya kaiba toy Anak to ya nankimey. Mapatpatnag itan nen imbaga nen Jehova ed si Jesus: “Mamalsa ta na too unong ed indengan ta.” (Gen. 1:26) Seguradon aliklikna nen Jesus so inkamapaabeba nen Jehova nen arengel ton mismo irayan salita ed si Ama to.—Sal. 18:35.

Nen wadiad dalin si Jesus, impanengneng to met so inkamapaabeba. Aminsan, nen sikatoy irarayew na totoo, impaarap toy dayew ed si Jehova. (Mar. 10:17, 18; Juan 7:15, 16) Komportable iray disipulo nen Jesus ed sikato ta inturing to ran kakaaro, aliwan  aripen. (Juan 15:15) Inurasan to ni ingen so sali ra pian nibangat to ran manpaabeba. (Juan 13:5, 12-14) Ipapanengneng tayo met ya importante iray kakimeyan tayo no iisipen tayoy pankaabigan da, imbes ya say sarili tayo labat. No ‘ipanengneng tayoy galang ed sakey tan sakey’ tan agtayo isipen ya sikatayo dapat so nirayew, mas dakel so nagawaan tayon kimey.—Roma 12:10.

Bibidbiren na mapaabeban too ya “walay nagawaan no dakel so mananimbawa.” (Pro. 15:22) Anggano marundunong odino dakdakel lay eksperiensya to, nepeg ton tandaan ya anggapo tay toon amta to lan amin. Anggan si Jesus et imbaga to ya wala met iray agto ni amta. (Mat. 24:36) Tan anggano aliwan perpekto iray disipulo to, labay ton naamtaan no antoy iisipen da. (Mat. 16:13-16) Kanian agnaiilang ed sikato iray disipulo to. No mapaabeba tayon awaten so suggestion na arum tan agtayo iisipen ya amta tayo lan amin, mas labalabay da tayon kaiba tan mas dakel so nagawaan tayo.

Kaukolan ya aligen na saray elder so inkamapaabeba nen Jesus, lalo la no walay desisyonan o gawaen da. Tatandaan da ya sarag ya pakiwasen na masanton espiritu so anggan siopan elder pian walay ni-suggest to ya makatulong ed desisyon na ulop na mamatatken. No diad miting da et agnababaingan so kada elder ya ibaga so iisipen o suggestion to, seguradon saray desisyon da et makagunggona ed interon kongregasyon.

Say maong a kakimeyan et makatunongan. Amta toy manpalugar tan mibagay ed arum. Anengneng itan ya mismo nen Jesus ed si Ama to. Singa bilang, imbaki nen Jehova so Anak to pian nadondon itayo, anggano kanepegan tayoy ompatey.—Juan 3:16.

Makatunongan met si Jesus. Aminsan, pinagbigyan toy kerew na sakey ya biin taga Fenicia tan tinulongan to anggano sikatoy imbaki parad sankaabungan na Israel. (Mat. 15:22-28) Ontan met, anggano sikatoy imburi na apostol to ya si Pedro, mabulos ton pinerdona. Diad tua, nen inmoli lay Jesus, inikdan to ni ingen si Pedro na ambelat iran responsabilidad. (Luc. 22:32; Juan 21:17; Gawa 2:14; 8:14-17; 10:44, 45) Aligen tayoy  Jesus—“naamtaan komon na amin a totoo a makatunongan [tayo].”—Fil. 4:5.

No makatunongan tayo, marunong tayon mibagay ed amin ya klase na too. Naobserbaan ya mismo na saray mamubusol ed si Jesus ya maomaong so impantrato to ed “saray managsingil na buis tan saray makasalanan” ya dinmengel ed mensahe to. (Mat. 11:19) Singa si Jesus, kasin maong tayon mibagay ed nanduruman totoo? Oniay imbaga nen Louis ya asali toy nanlingkor bilang Bethelite tan manangasikaso na sirkito: “Tandaan mo ya aliwan perpekto iray kaibam ed trabaho. Singa itan panggawa na padir ya say usaren mo et bato ya nanduruma so kabaleg to. Siempre, asisigtaen mo pian aliwan abogbogkol may padir. Kanian no mankikimey ak kaibay arum, aasikasoen koy panagtratok ed sikara pian naiwasan so problema tan nasumpal so kimey.” Balibalin aligen so alimbawa to!

Panon tayon nipanengneng ya makatunongan tayo diad kongregasyon? Singa bilang, diad field service group tayo, miulop tayo ed nanduruman agagi, aliwan apasakey. Mi-partner tayo ed saramay agtayo kaedad odino dumay situasyon da ed sikatayo. Ompan sarag tayon i-adjust so peles o estilo na panagpulong tayo pian mas na-enjoy da so ministeryo.

Say maong a kakimeyan et “akaparaan a mangiter” o manginabang ed amta to. (1 Tim. 6:18) Nen kaiba nen Jesus so Ama to ya mankikimey, seguradon naimano to ya aliwan masekreto si Aman Jehova. Wadman si Jesus “sanen imparaan [nen Jehova so] katawenan” kanian akaaral. (Pro. 8:27) Nen wadiad dalin si Jesus, maliket to met ya impaamta ed saray disipulo to so ‘amin a nadngel to ed Ama to.’ (Juan 15:15) Ontan tayo met dapat. Komon ta akaparaan tayon inabang ed saray kakimeyan tayo so amta o eksperiensya tayo. Agtayo itan isisiblet pian labat ompaway ya mas marunong tayo nen say sikara. Imbes, maliket tayo ran ibangat pian makaaral ira.

Maabig met no lanang tayon pasesegen iray kakimeyan tayo. Antoy naliknam no walay akaimano ed balibalin gagawaen mo insan misalamat ira ed sika? Di ba na touch ka? Ontan so ginawa nen Jesus. Agto lilingwanan ya komendaan iray disipulo to no walay maabig ya agawaan da. (Ikompara so Mateo 25:19-23; Lucas 10:17-20.) Imbaga to ni ingen ed sikara ya saray kimey ya gawaen da et “mas baleg” nen saray kimey ya agawaan to. (Juan 14:12) Diad samay labi antis na impatey to, inapresya to iray matoor ya apostol to tan imbaga tod sikara: “Sikayo ray nansiansiad siak diad saray subsubok.” (Luc. 22:28) Seguradon binmiskeg so liknaan na saray apostol tan apakiwas iran mantultuloy ya manlingkor. No agtayo met lingwanan ya komendaan iray kakimeyan tayo, seguradon mas panliketan day mankimey tan lalo ran onkuli.

“Anggano ag-itayo perpekto, sarag tayoy magmaliw ya maong ya kakimeyan,” so imbaga na sakey a brother ya si Kayode. “Basta paliket mo labat iray kaibam pian onlemew so trabaho.” Sika ey, kasin ontan ka? Maabig no tepetan mo ray agagi ya nakakaibam pian naamtaan mo no antoy pakanengneng dad sika bilang kakimeyan. No labalabay da kan kaiba ya mankimey, ya singa alikna na saray disipulo ed si Jesus, naibagam met may imbaga nen apostol Pablo: “Kakimeyan yo kami pian manliket kayo.”—2 Cor. 1:24.