Hakhalele Yesu mu dilu, walongugile makalegelo amukuatesele ha gutshita mudimo muabonga nu athu ako tangua diajile muene ha mavu. Luholo lutshi gifezegeselo gienji giajiya gutukuatesa? Gula tualonguga ndaga jiamutadila, tuajiya guheta malongo thathu ajiya gutukuatesa ha gutshita mudimo muabonga nu athu ako. Malongo ene mbaatukuatesa ha gukhala mu guhuima nu aphangi’etu.

Muthu wana tshita mudimo muabonga nu athu ako wakhala nu khadilo dia gudibulumuisa, wana guazula nji nu ndando. Ganago gutangiza egi wabalega athu ako. Yesu walongugile khadilo edi dia gudibulumuisa hakhalele muene nu Sh’enji mu dilu. Phamba Yehowa udi watagana ha gutamegewa egi Mufugi, uvi watshiginyile egi athu ako ajiye mudimo wa ndando wakalegele Mun’enji. Tuana kotelesa ndaga yene mu mbimbi jiazuelele Nzambi egi: ‘Tufuge muthu mu gifuanesa gietu.’ (Gis. 1:26) Tangua Yehowa wazuelele mbimbi eji, Yesu wakotelesele egi Yehowa wakhala diago nu khadilo dia gudibulumuisa.—Ngi. 18:35.

Hakhalele Yesu ha mavu, wamonesele nji khadilo dia gudibulumuisa. Tangua athu akhalele gumutumbuisa mukunda nu ndaga jiakhalele muene mukalagala, wakhalele muhana lutumbu luene gudi Nzambi. (Mako 10:17, 18; Yone 7:15, 16) Yesu wakhalele mutshita ngolo ha gukhala mu guhuima nu alandundi enji. Gakhalelego guazula gifua  ahiga enji, uvi wakhalele guazula gifua mafuta enji. (Yone 15:15) Wawovele ikanzo yawo ha guakuatesa akhale athu a gudibulumuisa. (Yone 13:5, 12-14) Esue nji tudi naye gunemesa athu tudi mutshita nawo mudimo. Tushigo naye gukamba phamba gubonga guetu. Gula tudi ‘gudinemesa mukatshi dietu,’ mbatushigo mukamba egi athu ako atutumbuise, mbatutshita nji nawo mudimo muabonga.—Lomo 12:10.

Muthu wagudibulumuisa wana jiya nji egi ‘ndaga jiana bonga gula muthu watoga malongo.’ (Ish. 15:22) Ikhale tudi nu eksperianse yavula, uvi tudi naye gujiya egi gushigo nu muthu wana jiya ndaga jiagasue. Yesu nji wakhalele mujiya egi guakhalele nu ndaga jiko gakhalelego mujiya. (Mat. 24:36) Alandudi a Yesu akhalelego athu atagana. Uvi Yesu wakhalele mukamba nji gujiya matangi’awo. (Mat. 16:13-16) Hene akhalele musuanguluga gutshita n’enji mudimo. Gula esue nji tudi athu agudibulumuisa, tudi mujiya egi tuanago gujiya ndaga jiagasue nu tudi mutshigina matangi a athu ako, mbatukhala nawo mu guhuima. Ngenyi ‘ndaga mbajibonga.’

Idi nu ndando egi akulu alandule gifezegeselo gia Yesu tangua adi mutshita hamoshi. Adi naye gujiya egi nyuma Nzambi yajiya gukuatesa mukulu wagasue mukatshi diawo ha guhana matangi. Tangua adi mu gudibungisa guawo, adi naye gutshita ngolo hagula muthu wagasue adivue muabonga ha guhana matangi’enji. Ngenyi mbaazula badesizio abonga anyi mbaakuatesa aphangi agasue mu hungu.

Muthu wana kalagala mudimo muabonga, gakhala ndo muenya ndaga jiakola ntagua adi mutshita mudimo nu athu ako. Wana tshigina matangi’awo. Yesu wakotelesele egi Sh’enji gakhalelego muenya ndaga jiakola. Ha gufezegesa, wamutumine ha guhuluisa athu gu gufua.—Yone 3:16.

Matangua ako Yesu wakhalele nji musombegesa matangi’enji. Wakuatesele mukhetu wa gu Fenisia, ikhale mukhetu muene gakhalego muenya Isalele. (Mat. 15:22-28) Gakhalelego mutoga alandudi enji ha gukalagala ndaga jinyi ene ajiyilego gutshita. Tangua futa dienji Phetelo wamutunyine gutuama dia athu agasue, Yesu wamutotesele nu mutshima umoshi. Gungima wahanele Phetelo ginemo giakoma. (Luka 22:32; Yone 21:17; Makal. 2:14; 8:14-17; 10:44, 45) Gifezegeselo gia Yesu gidi gutulongesa egi tudi naye ‘gumonesa gudi athu agasue egi tushigo enya ndaga jiakola’ gula tudi mutshigina matangi awo.—Fili. 4:5.

 Gula tushigo enya ndaga jiakola, mbatukhala mu guhuima nu athu a maluholo agasue. Yesu wakhalele mukalegela athu ndaga nu gisemo hene mbalagaji jienji jiamufundjile egi udi ‘futa dia afutshishi a gitadi nu enya gubola’ anyi akhalele mutshigina lukuma luabonga. (Mat. 11:19) Esue nji tuajiya gulandula gifezegeselo gia Yesu gula tudi mu guhuima nu athu ako. Phangi Louis wakhalele mutadi muwendji, wakalegele nji mudimo gu Betele. Udi muzuela egi: “Gutshita mudimo nu athu ashigo atagana gudi gifua gutunga gibayi nu maseso ashigo gukoma gumoshi. Handaga gula maseso adi agudisha, yana toga gutshita ngolo ha gutunga, uvi gibayi giajiya gukhala giakola. Ngatshitshile ngolo ha gulonda makalegelo ami hagula ngutshite mudimo mu guhuima nu aphangi ako.” Diakhalele khadilo diabonga diago!

Tangua ditshi tudi naye gumonesa egi tuakhago enya ndaga jiakola nu aphangi mu hungu? Tudi naye gumonesa khadilo diene tangua tudi mu hunji dietu dia mudimo wa gulongesa. Tuajiya gumonesa khadilo diene gula tudi mulongesa nu athu agudisha, ikhale mvuaji nga ana azonda nga athu agukula. Tuajiya gusombegesa ba metode nga ndo gulongesa mu maluholo aphangi ene ana tshigina, hagula akhale nu gusuanguluga guavula mu mudimo wa gulongesa ba?

Muthu wana gutshita mudimo muabonga ‘wakhala hehi ha gukhaphela athu ako ima.’ (1 Tim. 6:18) Tangua Yesu wakhalele mutshita mudimo nu Sh’enji, wakotelesele egi Yehowa gakhalelego gumusuegela ndaga. Tangua Yehowa ‘wafugile dilu,’ Yesu ‘wakhalele hene,’ walongugile nji ndaga jiavula. (Ish. 8:27) Gungima, tangua diajile Yesu ha mavu, wawambelele alandudi enji nu gusuanguluga guagasue ‘ndaga jiavile’ muene gudi Sh’enji. (Yone 15:15) Esue nji tuajiya gulandula gifezegeselo gia Yehowa gula tudi muwambela athu ako ndaga tudi mujiya. Yadiago, muthu wana gutshita mudimo muabonga wana wambela athu ako ndaga jidi muene mujiya, wana guakuatesa nji ha gutshita mudimo muabonga. Wana suanguluga muavula ha guwambela athu ako ndaga jiabonga jidi muene mujiya.

Tuajiya nji guzuela mbimbi jidi muhana gikhesa gudi aphangi tuana kalagala nawo mudimo. Gula muthu mumoshi wamona egi tudi mutshita ngolo ha gukalagala ndaga jiabonga, watushimana nji mukunda nu ndaga jiene, yana gutusuanguluisa muavula. Yesu wakhalele mushimana alandudi enji mukunda nu ndaga jiabonga akhalele mutshita. (Fuanesa nji nu Matayo 25:19-23; Luka 10:17-20.) Waawambelele nji egi mbaatshita ‘mudimo wavula gubalega’ mudimo wakalegele muene. (Yone 14:12) Mu phipha gutuama dia gufua guenji, washimanele apostolo enji egi: “Enue mudi athu anyi asalele a gujinginyina nu ame mu malamba ami.” (Luka 22:28) Mbimbi eji jiakuatele diago mitshima ya alandudi enji nu jiaahanele gikhesa ha gutshita mudimo! Gula esue nji tudi mushimana aphangi’etu, mbaasuanguluga muavula, mbaatshita nji mudimo nu gikhesa giagasue.

Phangi Kayode wazuelele egi: “Muthu wana tshita mudimo muabonga nu athu ako ganago gukamba egi atshite mudimo gifua muthu watagana. Uvi wana suanguluisa athu ako, wana kalagala egi ene nji asuanguluge nu mudimo wene.” Aye nji wana tshita mudimo muabonga ba? Wajiya guhula aphangi ako a mala nu a akhetu egi ngana tshita mudimo muabonga nga ndo? Gula ana gusuanguluga gutshita naye mudimo gifua luholo alandudi akhalele musuanguga gutshita mudimo nu Yesu, wajiya guzuela gifua muazuelele mupostolo Phaula egi: “Tudi mafut’enu a mudimo mukunda nu gusuanguluga guenu.”—2 Kol. 1:24.