Pewenze kudzulu, Yesu adapfunzira makhalidwe yabwino yomwe yadamuthandiza kuti ambaphate bwino basa. Padabwera padziko yapasi, iye wenze chitsanzo chabwino pakuphata bwino basa na anango. Ko tingapfunzire chani pa chitsanzo cha Yesu? Tikawona mosamala chitsanzo chake, tingazindikire mpfundo zitatu zomwe zingatithandize kuti timbaphate bwino basa na anzathu. Mpfundo zimwezi zingatithandize kuti timbakhale wobverana maninge na anzathu.

Munthu wophata bwino basa achakhala wodzichepesa, awona kuti anzake ni wofunika ndipo awapwajalini nkumbafuna kuti wanthu ambandowona iye basi. Kudzichepesa ni khalidwe yomwe Yesu adapfunzira kwa Ababa wake. Podiya kuti Yahova ndiye yekha wodikana kuchemerewa kuti Mulengi, iye adafuna kuti wanthu anango adziwembo basa yomwe Mwana wake adaphata. Tinkudziwa vimwivi tikaganizira mawu yomwe adafotokoza kuti: ‘Nabo tikonze munthu muchifaniziro chathu.’ (Gen. 1:26) Ni vodziwikiratu kuti Yesu padabva mawu mwaya adazindikira kuti Yahova ni wodzichepesa.—Sal. 18:35.

Pewenze padziko yapasi, Yesu adawonesambo kuti ni wodzichepesa. Pomwe wanthu ambamutamanda ndawa ya vabwino vambachita, iye ambafuna kuti ulemerero wose uyende kwa Mulungu. (Maliko 10:17, 18; Yoh. 7:15, 16) Yesu adayesesa kukhala pantendere na wopfunzira wake ndipo ambawawona kuti ni azishamwali wake osati akapolo. (Yoh. 15:15) Iye mpakana adafika pa kusambika  mapazi ya wopfunzira wake kuti awapfunzise khalidwe yodzichepesa. (Yoh. 13:5, 12-14) Isembo tichadekana kulemekeza wanthu womwe tinkuphata nawo basa nkumbaikha vofuna vawo patsogolo osati vathu. Tingachite bwino ‘kumbalemekeza anango’ na kupewa kufuna kuti wanthu ambatitamande. Tikateno tidzakwanise kuchita vizinji.—Aro. 12:10.

Munthu wodzichepesa azindikira pomwe kuti ‘alangizi akawanda, vinthu vifamba bwino.’ (Miy. 15:22) Podi tikhale wanzeru tani na wodziwa vizinji tani, timbazindikire kuti palibe yemwe achadziwa vose. Olo Yesu ambazindikira kuti panavinthu vomwe avidziwalini. (Mat. 24:36) Iye ambaikhira soti nzeru pa vomwe wopfunzira wake alibe ungwiro ankuganiza na vomwe ankudziwa. (Mat. 16:13-16) Ni vosachita kubvunza kuti wanthu ambakomedzewa kuphata naye basa pabodzi. Nchibodzibodzimbo, tikakhala wodzichepesa nkumbazindikira kuti vinango tingakwaniselini na kubvesera maganizo ya anango, tingakhale pantendere na anzathu ndipo ‘vinthu vingafambe bwino’ ndawa yakuti tinkuchitira pabodzi.

Makamaka akulu achadekana kutewedzera chitsanzo cha Yesu akambachitira vinthu pabodzi. Akambachita nsonkhano wa akulu, ambadziwe kuti mzimu wa Yahova ungachitise aliyese kufotokoza mpfundo yomwe ingathandize kuti bungwe ya akulu isankhule vinthu mwanzeru. Peno iwo ankupasa mpata aliyese kuti afotokozeko maganizo yake, angasankhule vinthu vophindulisa mpingo wose.

Munthu wophata bwino basa achita vinthu mwachikatikati akambasewenza na anzake. Iye abvesera maganizo ya anzake ndipo ni wokonzeka kuchinja. Nthawe zizinji Yesu adawona kuti Yahova ni wobvumiradi. Mwakulinganiza, Yahova adabvuma kumutumiza kudzafera wanthu wose nkuwawombola ku impfa.—Yoh. 3:16.

Yesu ambakhalambo wobvumira akawona kuti viri bwino. Ganizirani momwe iye adathandizira nkazi wa ku Foinike podiya kuti wenze adatumiziwa kudzathandiza nyumba ya Izirayeli. (Mat. 15:22-28) Ndipo iye ambadikhiralini kuti wopfunzira wake ambachite vinthu mosaphonyesa. Padagumana na shamwali wake Petulo yemwe adamulamba pagulu, Yesu wenze wokonzeka kumukhululukira. Patsogolo pake adapasa Petulo udindo ukulu. (Luka 22:32; Yoh. 21:17; Mac. 2:14; 8:14-17; 10:44, 45) Chitsanzo cha Yesu chinkutiwonesa kuti tichadekana ‘kubvuma maganizo ya anango’ na kukhala wokonzeka kuchinja.—Afil. 4:5.

Kubvera maganizo ya anango kungatithandize kuti timbaphate basa mobverana na wanthu wose. Yesu ambakhala bwino maninge na wanthu mpakana wanthu womwe angamuzonda adamulewa kuti ni ‘shamwali wa wanthu wokhomesa msonkho na wochimwa.’ (Mat. 11:19) Ko tingakwanise kutewedzera Yesu pakuphata basa mobverana na wanthu wosiyana nase? M’bale Louis yemwe adaphata basa yonyang’anira dera kwa nthawe itali na kutumikira pa Beteli na wanthu wosiyanasiyana adalewa kuti: ‘Nimbalinganiza kagulu kalikose komwe ninkusewenza nako na chipupa chomwe chinkumangiwa na minyala yobendabenda. Ukambayesesa kuyaikha sitiriti pakumanga, udzawone kuti chipupa chaima bwino. Inembo ningayesesa kuchinja vinthu kuti nithandizire kukonza chipupa cha sitiriti.’ M’bale moyu ni chitsanzo chabwino maninge.

Ko ni pa vochitika viponi pomwe tingawonese kuti ndise wobvumira mumpingu mwathu? Tingakhale na mwayi wochita vimwevi tikakhala pakagulu ka utumiki. Tingalalikire pabodzi na wofalisa wosiyana naye magole panango yemwe anamaudindo m’banja yomwe ise tiribe. Ko tingakhale wokonzeka kuchinja kachitidwe kathu ka vinthu panango kuchinja njira yolalikirira na cholinga chomuthandiza kuti akhale wokondwa pomwe tinkulalikira?

Munthu wophata bwino basa achakhala ‘wokonzeka kugawira anango.’ (1Tim. 6:18) Pomwe Yesu angaphata basa na Ababa wake, adachita kuwona yekha kuti Yahova angamubisiralini chinthu. Pomwe Yahova ‘angakonza kudzulu’ Yesu ‘wenzepo’ ndipo wenze na mwayi wopfunzira vizinji. (Miy. 8:27) Patsogolo pake, Yesu wenze wokondwa kuuzambo anango ‘vinthu vomwe adabva’ kwa Ababa wake. (Yoh. 15:15) Tingatewedzere chitsanzo cha Yahova tikambauzambo anango vomwe tidapfunzira. Munthu wabwino kuphata naye basa abisiralini anzake malangizo yothandiza pa basa pakundofuna kuti ambafambise ndiye vinthu. Iye achakhala wokondwa kuuzambo anango vinthu vabwino vomwe adapfunzira.

Tingayankhule pomwe mawu yolimbikisa kwa wanthu womwe tinkuphata nawo basa. Ko vitikomedzalini tikawona kuti munthu watathandiza ankutitembeja? Yesu ambapatula nthawe yofotokozera anzake vinthu vomwe ankuwona kuti iwo achita bwino. (Linganizani na Mateyu 25:19-23; Luka 10:17-20.) Mpakana adafika pakuwauza kuti iwo ‘adzaphate basa izinji kuposha’ iye. (Yoh. 14:12) Usiku wakuti mangwana yake, Yesu adatembeja wopfunzira wake wokhulupirika pakuwauza kuti: ‘Imwepo ndimwe mwakhala nane m’masautso yangu.’ (Luka 22:28) Ndoganizani momwe mawu mwaya yadawalimbikisira kuti achitepo kanthu. Isembo tikambapatula nthawe yotembeja anzathu, angakhale wokondwa ndipo angachite vizinji.

M’bale munango dzina yake Kayode , adati: ‘Munthu wophata bwino basa adikhiralini kuti anzake ambachite vinthu mosaphonyesa. Koma achitisa kuti basa ikhale yosashupa ndipo vimwivi vichitisa kuti anzake ambakondwe.’ Ko imwepo mulimbo tene? Tani kubvunza Akhrisitu womwe musewenza nawo kuti akufotokozereni peno muphata bwino basa. Peno iwo viwakomedza kuphata namwe basa ninge momwe wopfunzira wa Yesu angakondwera kusewenza na Yesu, mungalewembo mawu ninge ya Paulo yakuti: ‘Ndise anyabasa anzanu kuti mukhale wokondwa.’—2 Akor. 1:24.