Jesus lanem hao for waka gud witim narawan taem hem stap lo heven and datwan helpem hem taem hem waka witim olketa disaepol lo earth. Hao nao iumi savve followim example blo Jesus? Bae iumi ting raonem example blo Jesus, and iumi bae storyim thrifala Bible principle wea savve helpem iumi for waka gud witim olketa brata and sista blo iumi.

Samwan wea waka gud witim olketa narawan hem hambol, and no ting hem important winim olketa. Jesus lanem datwan from Dadi blo hem. Nomata Jehovah nomoa garem title Creator, hem laekem olketa narawan for savve lo important waka wea Son blo hem duim. Olsem example, God no sei hemseleva wakem olketa man. Hem sei lo Jesus: “Hemi gud fo yumi mekem man . . . fo hemi tekem wei blong yumi.” (Jenesis 1:26) Taem Jehovah talem disfala toktok, Jesus savve Jehovah hem hambol tumas.​—Sams 18:35.

Jesus tu showimaot hem hambol taem hem stap lo earth. Taem pipol praisem hem for olketa samting wea hem duim, hem mekhae lo Dadi blo hem. (Mark 10:17, 18; John 7:15, 16) From hem laekem olketa disaepol for hapi, hem treatim olketa olsem olketa  fren blo hem, and no olketa slave. (John 15:15) Hem wasim leg blo olketa tu for teachim olketa for hambol. (John 13:5, 12-14) Iumi laek followim example blo Jesus for tingim olketa wea iumi waka witim, winim for tingim iumiseleva. Waka bae gohed gud taem iumi “showimaot respect long narawan” and no laek kasem praise evritaem.​—Rome 12:10.

Samwan wea hambol bae luksavve hem needim advaes from narawan, and datwan bae mekem olketa “plan gohed” gud. (Provebs 15:22) Maet iumi garem staka experience or bigfala savve, bat iumi shud tingim hao no eni man savve lo evri samting. Nomata Jesus tu hem sei hem no savve lo evri samting. (Matt. 24:36) Hem laek for herem tu tingting blo olketa disaepol. (Matt. 16:13-16) Dastawe olketa hapi for waka witim hem! Sapos iumi willing for lisin lo idea blo narawan olsem Jesus, datwan bae mekem iumi stap gud witim olketa and olketa plan blo iumi bae gohed gud.

Hem important for olketa elder followim example blo Jesus for hambol taem olketa waka tugeta. Taem olketa elder meet tugeta, evriwan shud feel free for talem tingting blo olketa. Hem gud for tingim hao holy spirit savve helpem eniwan lo olketa elder for talem samting wea bae helpem kongregeson.

Samwan wea waka gud witim olketa narawan bae no ova tumas lo wanem hem expectim from narawan. Hem kaen, no strict tumas, and willing for change for fitim narawan. Jesus savve Dadi blo hem barava kaen lo pipol. Olsem example, Jehovah sendem hem kam daon lo earth for sevem iumi nomata iumi evriwan fit for dae.​—John 3:16.

Jesus kaen lo pipol tu. Nomata main waka wea Jesus kam for duim hem for helpem pipol lo Israel, hem no strict tumas and helpem tu datfala woman from Phoenicia. (Matt. 15:22-28) Jesus no ova tumas lo wanem hem expectim from olketa disaepol tu, and hem luksavve olketa no perfect. Nomata fren blo hem Peter denyim hem front lo staka pipol, hem willing for forgivim Peter. Gogo Jesus givim important waka lo Peter for duim. (Luke 22:32; John 21:17; Acts 2:14; 8:14-17; 10:44, 45) Example blo Jesus helpem iumi for luksavve iumi mas “showimaot long evriwan, [iumi] no ova tumas.”​—Phil. 4:5.

 Iumi laek for waka gud witim olketa difren kaen pipol tu, so iumi bae willing for change for fitim olketa. Olketa enemy blo Jesus jealous bikos hem kaen lo evriwan, dastawe olketa sei: “Olketa wea tekem tax and pipol wea sin nao olketa fren bilong hem.” (Matt. 11:19) Waswe, iumi savve olsem Jesus and waka gud witim difren kaen pipol? Louis, wea duim traveling waka and waka lo Bethel bifor, waka witim staka difren kaen pipol. Hem sei: “For waka witim pipol wea no perfect hem olsem iu wakem wanfala wall lo olketa ston wea garem olketa difren size and sheip. Iu need for mekem olketa ston hia fit gud tugeta, and gogo datfala wall bae kamap stret. Olsem wall ston hia, taem mi waka witim pipol wea garem olketa difren wei, mi mas waka hard for changem samfala wei blo mi for fitim olketa, mekem mifala waka gud tugeta.” Diswan mekem disfala brata waka gud witim olketa narawan!

Wanem taem nao iumi savve waka gud tugeta witim olketa narawan lo kongregeson? Iumi savve duim datwan taem iumi witim olketa brata and sista lo field service grup blo iumi. Maet iumi waka witim olketa pablisa wea garem difren famili responsibility or olketa wea olo or young winim iumi. Iumi savve kaen lo olketa taem iumi willing for duim ministry wea fitim olketa, mekem olketa enjoyim preaching waka.

Samwan wea waka gud witim olketa narawan hem willing for ‘sharem wanem hem garem.’ (1 Tim. 6:18) Taem Jesus helpem Dadi blo hem for creatim olketa samting, hem lukim evri samting wea Jehovah duim. Taem Jehovah “wakem skae,” Jesus “stap witim hem” and lane from hem. (Prov. 8:27, NW) Gogo, taem Jesus kam lo earth hem hapi for sharem “evri samting wea [hem] herem” from Jehovah witim olketa disaepol. (John 15:15) Iumi laek followim example blo Jehovah and Jesus, and sharem savve and experience blo iumi witim olketa brata and sista. Samwan wea laek waka gud witim olketa narawan hem no haedem information wea narawan needim or wea bae helpem datfala brata or sista, bikos hem laek for boss. Bat hem hapi for sharem olketa gud samting wea hem savve.

Iumi savve encouragem tu olketa wea iumi waka witim. Iumi feel gud taem samwan luksavve iumi waka hard and praisem iumi for datwan, iaman? Jesus no hol bak for praisem olketa disaepol for gud samting wea olketa duim. (Comparem Matthew 25:19-23; Luke 10:17-20.) Hem talem olketa tu, waka wea olketa duim bae “winim olketa samting” wea hem duim. (John 14:12) Lo naet bifor Jesus dae, hem praisem olketa aposol and sei: “Iufala . . . nating lusim mi taem mi kasem hard taem.” (Luke 22:28) Datwan mas barava encouragem olketa and mekem olketa laek for gohed duim waka. Sapos iumi no hol bak for praisem olketa wea iumi waka witim, datwan bae mekem olketa hapi and gohed duim gud waka blo olketa.

Kayode sei: “Samwan wea waka gud witim narawan no need for perfect, bat hem laek for mekem olketa hapi and enjoyim waka blo olketa.” Waswe, pipol hapi for waka witim iu? Hao sapos iu askem samfala brata and sista sapos olketa hapi for waka witim iu? Sapos olketa sei olketa hapi for waka witim iu olsem olketa disaepol hapi for waka witim Jesus, iu savve sei olsem aposol Paul talem: “Mifala waka tugeta witim iufala for mekem iufala hapi.”​—2 Cor. 1:24.