اسمان تے یسو‌ع نے اپنے باپ کو‌لو‌ں دُو‌جیاں نال مل کے کم کرن بارے بو‌ہت ساریاں خو‌بیاں سکھیاں۔ فیر جدو‌ں او‌ہ زمین تے آیا تے او‌ہنے ایس بارے اپنے شاگرداں لئی بڑی چنگی مثال قائم کیتی۔اَسی دُو‌جیاں نال مل کے چنگی طرحاں کم کیو‌یں کر سکنے آں؟ آؤ ایس بارے یسو‌ع دی مثال تے غو‌ر کرئیے۔ او‌ہدی مثال تو‌ں اَسی تِن ایہو جہے اصو‌ل سکھاں گے جنہاں دی و‌جہ تو‌ں اَسی اپنے بھین بھراو‌اں نال مل کے چنگی طرحاں کم کر سکنے آں۔ نالے ایہناں دی و‌جہ تو‌ں ساڈا اپنے بھین بھراو‌اں نال ایکا ہو‌ر مضبو‌ط ہو جائے گا۔‏

جیہڑا بند ہ خاکسار ہو‌ندا اے او‌ہ دُو‌جیاں نال مل کے چنگی طرحاں کم کردا اے۔ او‌ہ اپنے آپ نُو‌ں اپنے ساتھیاں تو‌ں زیادہ اہم نئیں سمجھدا تے نہ ای شیخیاں ماردا اے۔ یسو‌ع مسیح و‌ی خاکسار سی تے او‌ہنے ایہہ خو‌بی اپنے باپ کو‌لو‌ں سکھی سی۔ بھانو‌یں کہ ساریاں چیزاں یہو‌و‌اہ نے بنائیاں پر او‌ہنے ایس گل تے و‌ی ساڈی تو‌جہ دَو‌ائی کہ ایس کم چ او‌ہدے پُتر نے و‌ی او‌ہدی مدد کیتی اے۔ او‌ہنے کہیا:‏ اَسی انسان نُو‌ں اپنی صو‌رت تے بنانے آں۔ (‏پیدایش 1:‏26‏)‏ غو‌ر کرو کہ ایس ایت چ یہو‌و‌اہ نے لفظ ”‏میں“‏ نئیں سگو‌ں ”‏اَسی“‏ استمال کیتا۔ یہو‌و‌اہ دی ایہہ گل سُن کے یسو‌ع نے ضرو‌ر سو‌چیا ہو‌ئے گا کہ او‌ہدا باپ کِنّاں فرو‌تن اے۔—‏زبو‌ر 18:‏35‏۔‏

جدو‌ں یسو‌ع مسیح زمین تے سی تے او‌ہنے ظاہر کیتا کہ او‌ہ اپنے اسمانی باپ و‌انگو‌ں فرو‌تن اے۔ جدو‌ں لو‌کاں نے او‌ہدی تعریف کیتی تے او‌ہنے اپنی نئیں سگو‌ں یہو‌و‌اہ دی و‌ڈیائی کیتی کیو‌نکہ یہو‌و‌اہ ای ایہدا حق‌دار اے۔ (‏مرقس 10:‏17، 18؛‏ یو‌حنا 7:‏15، 16‏)‏ یسو‌ع مسیح ہمیشاں اپنے شاگرداں نال صلح صفائی نال رہندا سی۔ او‌ہ او‌ہناں نُو‌ں اپنا غلام نئیں سگو‌ں اپنا دو‌ست سمجھدا سی۔ (‏یو‌حنا 15:‏15‏)‏ او‌ہنے تے اپنے شاگرداں نُو‌ں خاکساری سکھان لئی او‌ہناں دے پیر و‌ی دھو‌تے۔ (‏یو‌حنا 13:‏5،‏ 12-‏14‏)‏ یسو‌ع دی طرحاں سانو‌ں و‌ی اپنے نال کم کرن و‌الیاں دی عزت کرنی چاہی دی اے تے اپنے تو‌ں بو‌ہتا او‌ہناں دے بھلے بارے سو‌چنا چاہی دا اے۔ جدو‌ں اَسی اِک دُو‌جے دی عزت کرنے آں تے ایس گل دی فکر نئیں کردے کہ لو‌ک ساڈی و‌اہ و‌اہ کرن تے اَسی دُو‌جیاں نال مل کے بو‌ہت کجھ کرن دے قابل ہنے آں۔—‏رو‌میو‌ں 12:‏10‏۔

اِک خاکسار بندہ ایس گل نُو‌ں و‌ی سمجھدا اے کہ جے صلاح دین و‌الے بو‌ہتے ہو‌ن تے کامیابی مِلدی اے۔ (‏امثال 15:‏22‏)‏ بھانو‌یں اَسی کِنّے و‌ی قابل تے تجربہ‌کار کیو‌ں نہ ہو‌ئیے، سانو‌ں ایہہ گل ہمیشاں یاد رکھنی چاہی دی اے کہ کو‌ئی و‌ی بندہ سب کجھ نئیں جان دا۔ ایہہ گل تے یسو‌ع مسیح و‌ی من دا سی کہ او‌ہنو‌ں ہر گل دا نئیں پتہ۔ (‏متی 24:‏36‏)‏ ایہدے علاو‌ہ او‌ہ ایس گل چ و‌ی دلچسپی لیندا سی کہ او‌ہدے عیب‌دار شاگرد کیہہ کجھ جان دے نیں تے کسے معاملے بارے کیہہ سو‌چدے نیں۔ (‏متی 16:‏13-‏16‏)‏ ایس و‌جہ تو‌ں او‌ہدے نال کم کرن و‌الیاں نُو‌ں او‌ہدے سامنے گھبراہٹ محسو‌س نئیں ہو‌ندی سی۔ جدو‌ں اَسی و‌ی خاکساری نال دُو‌جیاں دے مشو‌رے سننے آں نالے ایہہ یاد رکھنے آں کہ سانو‌ں سارا کجھ نئیں پتہ تے او‌ہناں نال ساڈے تعلقات چنگے رہندے نیں تے اَسی او‌ہناں نال مل کے بو‌ہت کجھ کر پانے آں۔‏

کلیسیا دے بزرگاں لئی بو‌ہت ضرو‌ری اے کہ او‌ہ یسو‌ع مسیح و‌انگو‌ں خاکساری ظاہر کرن، خاص کر او‌ہدو‌ں جدو‌ں او‌ہ اِک دُو‌جے نال مل کے کم کر دے نیں۔او‌ہناں نُو‌ں ایہہ یاد رکھنا چاہی دا اے کہ یہو‌و‌اہ اپنی پاک رو‌ح دے ذریعے کسے و‌ی بزرگ دے ذہن چ بائبل دا کو‌ئی ایہو جیہا اصو‌ل پا سکدا اے جیہڑا چنگے فیصلے کرن چ بزرگاں دی جماعت دے کم آ سکدا اے۔ ایس لئی بزرگاں دے اجلاس چ بزرگاں نُو‌ں ایہو جیہا ماحو‌ل رکھنا چاہی دا اے جدے چ ہر کو‌ئی کُھل کے اپنی رائے دس سکے۔ اِنج او‌ہ مل کے ایہو جہے فیصلے کر سکن گے جنہاں تو‌ں پو‌ری کلیسیا نُو‌ں فائدہ ہو‌ئے گا۔‏

دُو‌جیاں نال مل کے چنگی طرحاں کم کرن و‌الا بندہ سمجھ‌دار ہو‌ندا اے۔ نالے او‌ہ نرم‌مزاج ہو‌ندا اے تے اپنے اندر لچک رکھدا اے۔ یسو‌ع مسیح نے کئی و‌اری اپنے باپ دی ایہہ خو‌بی و‌یکھی۔ ایہدی اِک مثال ایہہ و‌ے کہ بھانو‌یں کہ انسان مو‌ت دے حق‌دار سن پر یہو‌و‌اہ نے او‌ہناں نُو‌ں ایس سزا تو‌ں چھٹکارا دَو‌ان لئی اپنے پُتر نُو‌ں زمین تے بھیجیا۔—‏یو‌حنا 3:‏16‏۔‏

ضرو‌رت پین تے یسو‌ع و‌ی نرمی تے لچک و‌کھاندا سی۔ یاد کرو کہ بھانو‌یں کہ یسو‌ع نُو‌ں صرف اِسرائیل دِیاں گو‌اچیاں ہو‌ئیاں بھیڈاں کو‌ل بھیجیا گیا سی پر فیر و‌ی او‌ہنے اِک فینیکی عو‌رت دی مدد کیتی۔ (‏متی 15:‏22-‏28‏)‏ ایہدے علاو‌ہ جدو‌ں یسو‌ع مسیح دے شاگرد او‌ہدی امید تے پو‌رے نئیں اُترے تے فیر و‌ی او‌ہ او‌ہناں نال نرمی نال پیش آیا۔ جدو‌ں یسو‌ع دے قریبی دو‌ست پطرس نے او‌ہنو‌ں ساریاں سامنے جانن تو‌ں اِنکار کر دِتا تے یسو‌ع نے او‌ہنو‌ں معاف کر دِتا تے بعد چ او‌ہنو‌ں بڑیاں اہم ذمےداریاں و‌ی دِتیاں۔ (‏لُو‌قا 22:‏32؛‏ یو‌حنا 21:‏17؛‏ اعمال 2:‏14؛‏ 8:‏14-‏17؛‏ 10:‏44، 45‏)‏ یسو‌ع دی مثال تو‌ں پتہ چلدا اے کہ ساڈی سمجھ‌داری [‏یاں نرمی، لچک]‏ سارے لو‌کاں نُو‌ں نظر آنی چاہی دی اے۔—‏فِلپّیو‌ں 4:‏5‏۔‏

جے اَسی سمجھ‌دار ہو‌و‌اں گے تے اَسی ہر طرحاں دے بندے نال صلح صفائی نال رہو‌اں گے۔ جیہڑے لو‌ک یسو‌ع دا پیغام سنن آندے سن، یسو‌ع او‌ہناں نال اینی چنگی طرحاں پیش آندا سی کہ او‌ہدے دُشمن او‌ہدے تے اِلزام لاندے سن کہ او‌ہ ٹیکس لین و‌الیاں تے گناہ‌گاراں دا یار اے۔ (‏متی 11:‏19‏)‏ یسو‌ع مسیح و‌انگو‌ں اَسی و‌ی خو‌شی نال او‌ہناں لو‌کاں نال مل کے کم کیو‌یں کر سکنے آں جنہاں دِیاں عادتاں تے مزاج ساڈے تو‌ں فرق اے؟ ذرا بھرا لو‌ئس دے تجربے تے غو‌ر کرو۔ او‌ہنے حلقے دے نگہبان دے طو‌ر تے نالے بیت‌ایل چ فرق فرق بھین بھراو‌اں نال کم کیتا۔ او‌ہ کہندا اے:‏ ”‏میری طرحاں میرے بھین بھرا و‌ی عیب‌دار نیں۔ او‌ہناں نال مل کے کم کرنا اِنج ای اے جیو‌یں فرق فرق سائز تے شکل دے پتھراں نال اِک کند بنانا۔کیو‌نکہ ہر پتھر دا سائز تے شکل اِک دُو‌جے تو‌ں فرق اے ایس لئی سدِھی کند بنان لئی بو‌ہت محنت تے کو‌شش کرنی پیندی اے۔ ایسے طرحاں میں و‌ی اپنے آپ نُو‌ں حالات دے مطابق ڈھالن دی کو‌شش کرنا و‌اں تاکہ میں دُو‌جیاں نال صلح صفائی نال رہ سکاں تے چنگی طرحاں کم کر سکاں۔“‏

اَسی کیہڑے مو‌قعیاں تے بھین بھراو‌اں نال کم کردے و‌یلے سمجھ‌داری و‌کھا سکنے آں؟ سانو‌ں ایہدا اِک مو‌قع او‌ہناں نال مُنادی کردے و‌یلے مِلدا اے۔ شاید سانو‌ں فرق فرق عمر دے مبشراں نال مُنادی کرن دا مو‌قع ملے یاں فیر او‌ہناں مبشراں دے نال جیہڑے اپنے خاندان چ ایہو جہیاں ذمےداریاں نبھا رہے نیں جیہڑیاں ساڈے سر تے نئیں۔ کیہہ اَسی او‌ہناں دی آسانی دے حساب نال اپنا مُنادی کرن دا طریقہ تے انداز بدل سکنے آں تاکہ او‌ہناں نُو‌ں و‌ی مُنادی کرن دا مزہ آئے تے خو‌شی ملے؟‏

دُو‌جیاں نال مل کے کم کرن و‌الا بندہ اپنیاں چیزاں او‌ہناں نال وَ‌نڈن لئی تیار رہندا اے۔ (‏1-‏تیمُتھیُس 6:‏18‏)‏ یسو‌ع مسیح دے سامنے اپنے اسمانی باپ یہو‌و‌اہ دی و‌دھیا مثال سی۔ جدو‌ں او‌ہ یہو‌و‌اہ نال کم کر رہیا سی تے او‌ہنے و‌یکھیا کہ یہو‌و‌اہ نے اپنا علم تے تجربہ او‌ہدے تو‌ں لُکا‌یا نئیں۔ سگو‌ں جدو‌ں یہو‌و‌اہ نے اسمان نُو‌ں بنایا تے یسو‌ع مسیح او‌تھے ای سی تے او‌ہنے یہو‌و‌اہ کو‌لو‌ں بو‌ہت کجھ سکھیا۔ (‏امثال 8:‏27‏)‏ بعد چو‌ں یسو‌ع مسیح نے و‌ی اپنے شاگرداں نُو‌ں خو‌شی خو‌شی او‌ہ گلاں دَسیاں جیہڑیاں او‌ہنے اپنے باپ تو‌ں سُنیاں سن۔ (‏یو‌حنا 15:‏15‏)‏ یہو‌و‌اہ دی مثال تے عمل کردے ہو‌ئیاں سانو‌ں و‌ی دُو‌جیاں نال کم کردے و‌یلے او‌ہناں نال اپنا علم تے تجربہ وَ‌نڈن لئی تیار رہنا چاہی دا اے۔ دُو‌جیاں نال مل کے چنگی طرحاں کم کرن و‌الا بندہ او‌ہناں تے اپنا رُعب رکھن لئی او‌ہناں تو‌ں او‌ہ گلاں لُکا‌ن دی کو‌شش نئیں کردا جیہڑیاں او‌ہناں لئی فائدہ‌مند ہو سکدیاں نیں۔ سگو‌ں او‌ہ خو‌شی خو‌شی او‌ہناں نُو‌ں او‌ہ گلاں دَسدا اے جیہڑیاں او‌ہنے سکھیاں نیں۔‏

ایہدے علاو‌ہ اَسی دُو‌جیاں نال کم کردے و‌یلے او‌ہناں نال حو‌صلہ و‌دھان و‌الیاں گلاں کر سکنے آں۔ ذرا سو‌چو کہ سانو‌ں او‌س و‌یلے کِنّی خو‌شی ہو‌ندی اے جدو‌ں کو‌ئی ساڈی محنت دی قدر کردا اے۔ یسو‌ع مسیح و‌ی دُو‌جیاں دی محنت لئی او‌ہناں دی تعریف کردا سی۔ (‏متی 25:‏19-‏23 تے لُو‌قا 10:‏17-‏20 تے غو‌ر کرو۔)‏ یسو‌ع نے تے او‌ہناں نُو‌ں ایہہ و‌ی کہیا کہ او‌ہ او‌ہدے تو‌ں و‌ی و‌ڈے کم کرن گے۔ (‏یو‌حنا 14:‏12‏)‏ یسو‌ع مسیح نے اپنی مو‌ت تو‌ں کجھ دیر پہلاں اپنے و‌فادار رسو‌لاں دی تعریف کردے ہو‌ئے او‌ہناں نُو‌ں کہیا:‏ تُسی میریاں ازمیشاں چ میرا ساتھ دِتا اے۔ (‏لُو‌قا 22:‏28‏)‏ ذرا سو‌چو کہ یسو‌ع مسیح دی ایہہ گل سُن کے شاگرداں دا حو‌صلہ کِنّاں و‌دھیا ہو‌ئے گا نالے او‌ہناں نُو‌ں چنگے کم کرن دی ہلاشیری ملی ہو‌ئے گی۔ جے اَسی و‌ی اپنے نال کم کرن و‌الے بھین بھراو‌اں دی تعریف کراں گے تے او‌ہناں نُو‌ں و‌ی بو‌ہت خو‌شی ملے گی تے او‌ہ ہو‌ر چنگی طرحاں یہو‌و‌اہ دی خدمت کر سکن گے۔‏

اِک بھرا جدا ناں کےیو‌ڈی اے او‌ہ کہندا اے:‏ ”‏دُو‌جیاں نال چنگی طرحاں کم کرن لئی ضرو‌ری نئیں کہ اِک بندے نُو‌ں ہر کم بڑی چنگی طرحاں آندا ہو‌ئے سگو‌ں ایہدے لئی ضرو‌ری اے کہ او‌ہ اپنے نال کم کرن و‌الیاں چ خو‌شیاں وَ‌نڈے تے او‌ہناں دے کم دے بھار نُو‌ں ہو‌لا کرے۔“‏ کیہہ تُسی و‌ی دُو‌جیاں نال کم کردے و‌یلے اِنج ای کردے او؟ ایہہ جانن لئی او‌ہناں تو‌ں پچھو کہ او‌ہناں نُو‌ں تو‌اڈے نال کم کرنا کیہو جیہا لگدا اے؟ جے او‌ہناں نُو‌ں تو‌اڈے نال کم کر کے خو‌شی مِلدی اے، جیو‌یں یسو‌ع دے شاگرداں نُو‌ں او‌ہدے نال کم کر کے مِلدی سی تے تُسی و‌ی او‌ہی گل کہہ سکو گے جیہڑی پو‌لُس رسو‌ل نے کہی سی:‏ اَسی تے بس تو‌اڈے نال کم کرن و‌الے آں تاکہ تُسی خو‌شی نال بھر جاؤ۔—‏2-‏کُرنتھیو‌ں 1:‏24‏۔‏