Ni eh ketiket nanleng, Sises ketin sukuhlki duwen irair kaselel kan me kahrehiong ih en wiahla tohndoadoahk mwahu men rehn meteikan. Mwuhr, ni eh ketiket sampah, e ketin wiahda mehn kahlemeng mwahu duwen emen me kin iang meteikan doadoahkpene mwahu. Ia duwen atail kak paiekihda sapwellimen Sises mehn kahlemeng? Sang ni atail tehk kanahieng sapwellime mehn kahlemeng, kitail kak diar kaweid siluh me kak sewese kitail en wiahla tohndoadoahk mwahu men rehn meteikan. Kaweid pwukat pahn sewese kitail en kalaudehla atail miniminiong riatail Kristian kan.

Tohndoadoahk mwahu men kin aktikitik. E kin medewe me ienge tohndoadoahk kan kesempwal oh e sohte kin men kaping en kohwongete ih. Sises ketin sukuhlki duwen irair en aktikitik wet sang Semeo. Mendahki Siohwa kelehpw me warohng mwarenki Sounkapikada, e ketin kupwurki meteikan en ese duwen doadoahk kesempwal me sapwellime Ohlo wiahda. Kitail wehwehki met sang ni dahme Koht ketin mahsanih: “Kita wiahda aramas rasehng kita.” (Sen. 1:26, NW) Ni Siohwa eh ketin mahsanih met, Sises ese me Siohwa uhdahn ketin aktikitik. “aktikitik.”​—Mel. 18:35, NW.

Ni Sises eh ketiket sampah, e pil ketin kasalehda soangen aktikitiko. Ni aramas akan ar kapingahki sapwellime doadoahk kan, e ketin kapinga Koht. (Mark 10:17, 18; Sohn 7:15, 16) Sises kin ketin kolokolete popohl rehn sapwellime tohnpadahk ko oh  wiahkin irail kompoakepah ahpw kaidehn lidu kei. (Sohn 15:15) E pil ketin widenda patehnehrail ko pwehn padahkihong irail duwen aktikitik. (Sohn 13:5, 12-14) Duwehte ih, kitail en kin kasalehda wahu ong iengatail tohndoadoahk kan, ahpw dehr kin nsenohkihte nsenatail laudsang nsenarail. Ni atail kin “kasalehda wahu ong emenemen” oh sohte kin pwunodki ihs me pahn alehdi kaping, kitail kak wiahda soahng tohto.​—Rom 12:10.

Aramas aktikitik men pil kin pohnese me e “pahn pweida” ma e kin ‘ale kaweid koaros uwen me e kak.’ (Lep. Pad. 15:22) Mehnda ma kitail uhdahn koahiek, kitail anahne tamataman me sohte aramas emen me ese mehkoaros. Sises pil ketin pohnese me mie soahng kan me e sohte mwahngih. (Mad. 24:36) E pil kupwurki esehda dahme sapwellime tohnpadahk soh unsek ko kin ese de medemedewe. (Mad. 16:13-16) Ihme kahrehda ienge tohndoadoahngko kin perenki iang ih doadoahk! Duwehte met, ni atail kin aktikitik oh tamataman me kitail sohte ese mehkoaros, oh ni atail kin rong ahn meteikan madamadau, kitail pahn sewese wiahda popohl, oh koaros pahn ehupene “pweida.”

E uhdahn kesempwal ong elder kan en alasang sapwellimen Sises aktikitik ni arail kin doadoahkpene. Irail anahne tamataman me sapwellimen Koht manaman kak kamwakid sohte lipilipil emen irail en koasoia soahng ehu me pahn sewese irail koaros en wiahda pilipil mwahu. Ma elder kan kin tehk mwahu me koaros kak kasalehda arail madamadau ni saledek nan arail mihting kan, irail koaros pahn ehupene wiahda pilipil kan me pahn wia kamwahu ong mwomwohdiso pwon.

Tohndoadoahk mwahu men kin kasalehda toupahrek ni eh iang ienge tohndoadoahk kan doadoahk. E kin kak uhdi oh mweidohng ienge tohndoadoahk kan en wia dahme re medemedewe. Sises ahneki ahnsou mwahu tohto en kilang Semeo eh ketin kasalehda toupahrek. Karasepe, Siohwa ketin poaronehdo Sises pwehn doarehla aramas akan sang mehla me irail warohng ale.​—Sohn 3:16.

Sises ketin kasalehda toupahrek ni ahnsou me anahn de konehng. Tamanda ia duwen eh ketin sewese lihen Penisia men, mendahki eh pekederdo pwehn sewesehte mehn Israel kan. (Mad. 15:22-28) E pil ketin kasalehda toupahrek ong dahme e ketin kasik sang sapwellime tohnpadahk ko. Mwurin kompoakepah kereno Piter kahmahmkihla ih mwohn aramas akan, Sises ketin mahkohng. Mwuhr e ketikihong Piter pwukoa kesempwal kei. (Luk 22:32; Sohn 21:17; Wiewia 2:14; 8:14-17; 10:44, 45) Sapwellimen Sises mehn kahlemeng  kasalehiong kitail ni sansal me ‘atail madamadau toupahrek’ en kin sansal ong “aramas koaros” sang ni atail kin uhdi oh mweidohng irail en wia dahme re medemedewe.​—Pil. 4:5.

Atail kasalehda toupahrek pahn pil sewese kitail en wiahda wekidekla kan pwehn kak iang soangsoangen aramas akan doadoahkpene ni meleilei. Sapwellimen Sises wiewia ong meteikan uhdahn mwahu, kahrehda irail kan me kailongki ih kin peirinki oh kahdaneki ih “kompoakepahn sounrik daksis oh me dipan akan” me kin rong sapwellime padahk kan. (Mad. 11:19) Ia duwe, kitail kak duwehte Sises oh iang meteikan me weksang kitail doadoahkpene? Louis, brother men me iang doadoahk rehn soangsoangen aramas akan ni eh wia sounapwalih me kin seiloak oh doadoahk nan Pedel, koasoia: “En iang aramas soh unsek teikan doadoahkpene kin duwehte omw koasoakehda kehl ehu sang takai kan ni soangsoangen sais. Pwehki takai ko wekpeseng, ke anahne doadoahk laud, ahpw kehlo kak inenla. I pil kin song en wiahda wekidekla kan pwe ien kak iang meteikan doadoahkpene ni meleilei, pwe at doadoahko en kak pweida mwahu.” Madamadau mwahu ehu met!

Ahnsou dah kan me kitail ahneki en kasalehda me kitail kin toupahrek ong riatail kan nan atail mwomwohdiso? Kitail ahneki ahnsou mwahu en wia met sang ni atail kin iang atail pwihnen kalohk. Mweinele kitail kak iang sounkalohk men me eh pwukoahn peneinei weksang atail de pil irail kan me arail sounpar weksang atail. Ia duwe, kitail kak wekidala atail koasoandi de pil men iang wia wiepen kalohk me irail mwahuki pwe irail en kak ahneki peren laud nan kalohk?

Tohndoadoahk mwahu men kin ‘perenki ehukihong meteikan dahme e ahneki.’ (1 Tim. 6:18) Ni ahnsou me Sises iang Semeo ketin doadoahk, ele e kin tehk me Siohwa sohte kin ketin ekihsang ih soahng kan. Ni Siohwa eh “ketikihong lahng powe,” Sises “mieier” oh kak sukuhl sang reh. (Lep. Pad. 8:27) Mwuhr, Sises pil kin kupwurperenki ehukihong sapwellime tohnpadahk kan duwen “soahng koaros me [e] rongasangehr” rehn Semeo. (Sohn 15:15) Kitail kak alasang sapwellimen Siohwa mehn kahlemeng sang ni atail kin padahkihong riatail Kristian kan dahme kitail sukuhlkiher. Tohndoadoahk mwahu men sohte kin song en kaunda meteikan sang ni eh sohte padahkihong meteikan dahme irail anahne ese de dahme pahn sewese irail. E pahn kin perenki ehukihong meteikan soahng mwahu kan me e sukuhlkiher.

Kitail pil kak kangoange iengatail tohndoadoahk kan. Kitail seu kin perenki ni emen eh tehk atail doadoahk laud oh kalahngankihong kitail? Sises ketin wiahda ahnsou en padahkihong ienge tohndoadoahk kan soahng mwahu kan me e mwahngih duwen irail. (Pil kilang Madiu 25:19-23; Luk 10:17-20.) E pil mahsanihong irail me irail pahn “wia doadoahk kan me laudsang” me e ketin wiadahr. (Sohn 14:12) Nipwongo mwohnte e pwoula, e ketin kapinga sapwellime wahnpoaron ko, mahsanih: “Kumwail me kin mihmihte rehi nan ei apwal akan.” (Luk 22:28) Medewehla ia uwen eh mahsen ko eh kangoange irail oh kamwakid irail en doulahte! Ma kitail pil kin kihong ahnsou en kapinga iengatail tohndoadoahk kan, met pahn kalaudehla arail peren oh kak wia laudsang me irail wiewia.

Emen brother me ede Kayode koasoia: “Tohndoadoahk mwahu men sohte anahne unsek, ahpw e kin kaperenda meteikan oh kahrehda doadoahko en mengeila ong irail kan me iang ih doadoahk.” Ke kin wia soangen tohndoadoahko? Ele ke kak idek rehn ekei riomw Kristian kan soangen tohndoadoahk dah me re medewehkin uhk. Ma irail kin perenki iang uhk doadoahk, duwehte sapwellimen Sises tohnpadahk ko ar perenki iangih doadoahk, ke pil kak nda soahngohte me wahnpoaron Pohl nda: “Kiht iengemwail tohndoadoahk ong amwail peren.”​—2 Kor. 1:24.