Jesusqa cielopi kashaspa sumajta yachakorqa wajkunawan trabajananpaj. Chaytataj kay jallpʼapi kashaspa wajkunaman yachacherqa. ¿Imaynatá pay jina ruwasunman? Diospa Wawanmanta yachakushaspaqa kinsa yuyaychaykunata tarisunchej. Chaytaj yanapawasun wajkunawan allinta trabajanapaj, hermanosninchejwanpis sumaj ujchasqa kanapaj.

Wajkunawan trabajayta yachaj runaqa kʼumuykukoj sonqo, wajkunaj ruwasqanta jatunpaj qhawan, manataj may kasqanta yuyakunchu. Jesusqa Tatan ajina kasqanta rikorqa. Jehovaqa tukuy imata ruwayta atispapis, munarqa wajkuna yachanankuta Wawanpis sumajta yanapasqanta. Chaytataj sutʼita reparanchej “runata noqanchejman rijchʼakojta ruwana” nisqanpi (Gén. 1:26). Jesusqa Tatanpa nisqanpi sutʼita repararqa, kʼumuykukoj sonqo kasqanta (Sal. 18:35).

Jesuspis kay jallpʼapi kashaspa kʼumuykukoj sonqollataj karqa. Runasqa Jesuspa allin ruwasqasninta rikuspa payta alabarqanku. Jesustaj Tatantapuni jatuncharqa (Mar. 10:17, 18; Juan 7:15, 16). Jesusqa kallpachakorqa discipulosninwan allinta kausakunanpaj. Paykunataqa amigosninta jina qhawarqa manataj esclavosninta jinachu (Juan 15:15). Chantapis chakisninkuta mayllarqa kʼumuykukoj sonqo kayta yachachinanpaj  (Juan 13:5, 12-14). Noqanchejpis Jesús jina, hermanosninchejta jatunpaj qhawananchej tiyan, paykunaj allinninkutapunitaj maskʼananchej tiyan. Purajmanta respetanakuspa, nitaj alabachikuytachu maskʼaspaqa, ashkha imasta ruwayta atisunman (Rom. 12:10).

Kʼumuykukoj sonqo runaqa, sutʼita yachan ‘ashkhaspa yuyaychayninkuwanqa imallapis allinta ruwakusqanta’ (Pro. 15:22). Mashkha experienciayoj kaspapis chayri ashkha imasta ruwayta yachaspapis, runasqa mana tukuy imatapunichu yachanchej. Jesuspis nerqa mana tukuy imatachu yachasqanta (Mat. 24:36). Chantapis Jesusqa discipulosnin pantaj runas kajtinkupis, imatachus yuyasqankuta yachayta munarqa (Mat. 16:13-16). Chayrayku discipulosnenqa paywan kaspa may kusisqa kaj kanku. Noqanchejpis kʼumuykukoj sonqo kaspa, mana tukuy imatachu ruwayta yachasqanchejta yuyaspa, wajkunatataj sumajta uyariyta yachaspa, wajkunawan allinpi kanchej, tukuyninchejtaj allin imasta ruwanchej.

Ancianosqa khuska llankʼaspa Jesús jina kʼumuykukoj sonqo kananku tiyan. Ancianospura imallatapis sumajta ajllanankupaj tantakushajtinkoqa, Jehovaqa espíritu santonwan mayqennillankutapis yanapanman sumaj yuyaywan parlananpaj. Tantakushajtinku sapa ujpa parlasqanta sumajta uyarinankupaj kallpachakojtinkoqa, imatachus ajllasqanku tukuynin congregacionta yanapanqa.

Uj sumaj compañeroqa allin yuyayniyoj, mana nisqantapunichu valechin, wajkunatataj uyarin. Jesusqa ashkha kutispi rikorqa Tatan kʼacha kasqanta, nitaj nisqantapunichu valechisqanta. Chaytataj rikorqa payta tukuy runasta wañuymanta salvananpaj kachamusqanpi (Juan 3:16).

Jesuspis kʼacha karqa, nitaj nisqantapunichu valecherqa. Payqa uj kuti fenicia warmita yanaparqa, Israel nacionmanta kajkunallata yanapananpaj kachamusqa kaspapis (Mat. 15:22-28). Jesusqa mana suyarqachu discipulosnin ni imapi pantanankuta. Chaypipis rikucherqa kʼacha kasqanta. Uj pacha amigon Pedro tukuypa ñaupaqenpi mana rejsisqanta nerqa. Jinapis Jesusqa perdonarqa, aswan qhepamantaj sumaj llankʼaykunata qorqa (Luc. 22:32; Juan 21:17; Hech. 2:14; 8:14-17; 10:44, 45). Jesusmantaqa sutʼita yachakunchej kʼachas kananchej kasqanta. Ajinamanta tukuy runas yachanankupaj mana nisqanchejtapunichu valechisqanchejta (Fili. 4:5).

 Mana nisqanchejtapuni valechispaqa tukuy runaswan allinta kausakuyta atillasun. Jesusqa tukuy runaswan allinta kausakorqa. Chayrayku impuesteroswan juchasapaswanqa, Diosmanta willasqanta uyarerqanku. Enemigosnintaj chayta rikuspa envidiakorqanku, juchacharqankutaj (Mat. 11:19). Noqanchejpis Jesús jina ruwasunman. Hermanonchej Louismanta parlarina. Payqa congregacionesta waturispa, Betelpi kashaspapis tukuy laya hermanoswan trabajarqa. Pay nin: “Pantaj runaswan trabajayqa, tukuy tamaño rumiswan uj perqata ruway jina. Rumis tukuy laya, tukuy tamañotaj kajtinpis, sumajta acomodaykuspaqa perqata cheqetanta ruwayta atisunman. Chayrayku mayta kallpachakorqani tukuy hermanoswan allinta trabajanaypaj. Ajinamanta Jehovapaj tukuy atisqaykuta llankʼanallaykupajpuni”, nispa. Ajinata llankʼayqa may sumajpuni.

Congregacionpirí, ¿imaynatá allin yuyayniyoj kasqanchejta rikuchisunman? Ichapis predicacionmanta gruponchejpeqa tukuy edadniyoj hermanos kanku. Wakin hermanosqa ichá familiankupi ashkha ruwanasniyoj kanku. Chayrayku paykunawan predicashaspaqa, atisqankuman jina chayri imaynatachus predicayta munasqankuman jina ruwanapaj kallpachakusunman.

Sumaj compañerosqa imatapis willanarikunkupuni (1 Tim. 6:18). Jesusqa Tatanta yanapashaspa repararqachá ni imata paymanta pakasqanta. Payqa Jehová “cielosta wakichishajtin” chaypi kasharqa, paymantataj mayta yachakorqa (Pro. 8:27). Aswan qhepamantaj Jesusqa Tatanpa tukuy ima nisqasninta discipulosninman kusiywan willarerqa (Juan 15:15). Noqanchejpis Jehová jina imastachus yachakusqanchejmanta hermanosman willarisunman chayri yachachisunman. Uj sumaj compañeroqa mana payllapajchu imatapis yachakun, manaqa wajkunaman yacharichin chayri willarin. Chaytataj mana tanqasqa jinallachu ruwan manaqa kusiywan.

Chantapis hermanostaqa kallpacharispa yanapallasunmantaj. Mayta kusikunchej pillapis allin ruwasqasninchejta reparajtin, tukuy sonqotaj agradecekuwajtinchej. Jesusqa discipulosninman nejpuni allin imasta ruwasqankuta (Mat. 25:19-23; Luc. 10:17-20, kikinchay). Chantapis nillarqataj paypa ruwasqasninmantapis astawanraj ruwanankuta (Juan 14:12). Wañucherqanku chay ñaupaj chʼisinpis apostolesninman nerqa: “Qankunaqa tukuy ima qhatirishawajtinpis noqallawanpuni karqankichej”, nispa. Chaywanqa paykunata sumajta ruwashasqankuta nisharqa (Luc. 22:28). Jesusqa imatachus nisqanwan discipulosninta maytachá sonqocharqa, kallpacharqataj ajinallatapuni ruwanankupaj. Noqanchejpis hermanosninchejta sumajta ruwashasqankuta nisun chayqa, aswan kusisqa kanqanku, sumajllatapunitaj ruwanqanku.

Kayode sutiyoj hermanonchej nin: “Pantaj runa kaspapis sumaj compañero kayta atisunman. Chantapis wajkunata yanapasunman kusisqa kanankupaj, trabajonkutapis kusiywan ruwanankupaj”, nispa. Noqanchejpis waj hermanosta tapurikusunman sumaj compañerochus manachus kasqanchejta yachanapaj. Jesuspa discipulosnenqa paywan kashaspa kusisqa kaj kanku. Hermanosninchejrí, ¿noqanchejwan kaspa kusikunkuchu? Ajina chayqa apóstol Pablo jina nisunman: “Kusisqa kanaykichejpaj qankunata yanapashayku”, nispa (2 Cor. 1:24).