Jesusqa wakinkunawan alli trabajanampaqmi ciëluchö imëkata yachakurqan. Y Patsachö këkarnam, alli yanapakoqkuna kayänampaq wakinkunata yachatsirqan. ¿Imanötan pëpita yachakunqantsik yanapamantsik? Tsëta shumaq rikarmi, alli trabajaq mayi kanapaq y juntu yanapanakurnin imatapis ruranapaq yanapamaqnintsik kima consëjukunapita yachakushun.

Wakinkunawan trabajëta yachaqqa humildim, pëwan trabajaqkunatam valoran y manam allishtukuntsu. Jesusqa, Teytan tsënö humildi kanqantam rikarqan. Kamakoqtanö Jehovällata reqishqapis, imëkata ruranqanchö wamran alläpa yanapakushqa kanqantam nirqan. Tsënö kanqanta Dios kënö ninqanchömi cläru rikakan: “Nunakunata noqantsik rikoqta y kikintsik niraqta rurashun” (Gen. 1:26, TNM). Jehoväta tsëta neqta wiyarqa, Teytan alläpa humildi kanqantachi Jesusqa rikarqan (Sal. 18:35).

Jesuspis, Patsachö këkarnin humildim karqan. Ruranqampita nunakuna alabayaptinqa, Jehovä yanapanqantam imëpis neq (Mar. 10:17, 18; Juan 7:15, 16). Jina qateqninkunawan alli kanampaqmi kallpachakurqan. Y pëkunataqa, manam sirweqninkunatanötsu tratarqan, sinöqa amïgunkunatanömi (Juan 15:15). Pëqa, humildi kayänanta  munarmi chakinkunatapis paqapurqan o awipurqan (Juan 13:5, 12-14). Jesus ruranqannöllam, noqantsikwan trabajaqkunata valoranantsik. Y munëninkunatam noqantsikpa munënintsikpitapis mas puntaman churanantsik. Juknintsik juknintsik respetanakushqa y allishtukunapaq mana yarpachakurqa, imëkatam rurëta puëdintsik (Rom. 12:10).

Jina humildi nunaqa, “käyitsikuqkunata tapukïkur ruraptinqa llapanpis allim kanqa” neq consëjutam yarpan (Prov. 15:22). Imatapis unëpana rurashqa kar o imatapis rurëta yacharqa, yarpäshun llapanta rurëta mana yachanqantsikta. Kikin Jesuspis, llapanta mana musyanqantam nirqan (Mat. 24:36). Jina qateqninkunatam, imata pensayanqanta musyanampaq tapoq (Mat. 16:13-16). Tsëmi pëwan puriraq y yanaqaqninkunaqa, kushishqa kayaq. Tsënöllam humildi kashqa, llapanta mana musyanqantsikta yarpashqa y wakinkunata shumaq wiyashqaqa, pëkunawan alli kawakushun y ruranqantsikkunam alli yarqunqa.

Congregacionchö yanapanakur trabajaq creikoqkunata rikaqkunam, masqa Jesusnö humildi kayänan. Yarpäyänanmi, imatapis alli patsätsiyänampaq poderninwan Jehovä yanapaptin, mëqampis allita parlarinampaq kaqta. Llapëkikuna parlakuriyänëkipaqnö reunionnikikuna kanampaq kallpachakuyaptikiqa, llapan patsätsiyanqëkikunam congregacionpaq alli kanqa.

Wakinkunawan alli trabajaqqa, manam pensanqanllachötsu tsarakun. Tsëmi wakinkuna pensayanqanta cuentaman churan, y pëkuna niyanqannö ruran. Jesusqa mëtsika kutiraq rikarqan, pensanqanllachö Teytan mana tsarakunqanta. Këllaman pensarishun: Jehoväqa, jutsallakuyanqanrëkur nunakuna wanuyänampaq kaqta nirpis, Jesustam Patsaman mandamurqan salvamänapaq (Juan 3:16).

Alli kaptinqa, imanö pensanqanta Jesus cambiareqmi. Yarpäshun, Israel nacionpita kaqkunallata yanapanan këkaptimpis, Fenicia nacionpita warmitapis yanaparqanmi (Mat. 15:22-28). Jina rurëta puëdiyanqampita mastaqa, manam qateqninkunata exigirqantsu. Nunakuna jananchö alli amïgun Pëdru negaptimpis, Jesusqa listum këkarqan perdonanampaq y tiempuwanqa jatun cargukunachö yanapakunampaqmi churarqan (Lüc. 22:32; Juan 21:17; Hëch. 2:14; 8:14-17; 10:44, 45). Rikanqantsiknömi, ñampu shonqu kanqantsikta nunakuna rikäyänampaqqa, Jesus ruranqannömi ruranantsik y manam pensanqantsikllachötsu tsarakunantsik (Filip. 4:5).

 Pensanqantsikllachö mana tsarakurqa, tukuy cläsi nunakunawan yanapanakur trabajanapaqmi listu këkäshun. Llapan nunakunawan Jesus alli apanakuptinmi o päsakuptinmi, pushakoq religiösukunaqa chikipäyarqan. Y yachatsikunqanta wiyakoq impuestu cobraqkunawan y jutsasapakunawan amïgu kanqantam niyarqan (Mat. 11:19). ¿Puëdishwanku Jesusnö këta y noqantsiknö mana kaqkunawan kushishqa trabajëta? Louis jutiyoq wawqim, congregacionkunata watukanqanchö y Betelchö, tukuyläya wawqi panikunawan trabajashqa. Pëmi kënö nin: “Noqapaqqa cada grüpu wawqi panikunam, tukuyläya tamäñu rumikunawan rurashqa perqanö kayan. Rumikunata shumaq churarqa, derëchu perqatam rurëta puëdintsik. Jina wakinkunawan shumaq yanapakunäpaq y rurëkanqäkuna alli yarqunampaqmi, imanö kanqäta cambianäpaq kallpachakurqö”. Tsënö pensanqanqa, ¡alläpa allim!

¿Imanötan pensënintsikllachö mana tsarakur congregacionchö yanapakushwan? Itsa Diospita yachatsikunqantsik grüpuntsikchöqa, noqantsikpita jukläya rurëkunayoq o tukuy edä wawqi panikuna kayan. Pëkunawan yachatsikoq yarqurqa, ¿puëdishwanku mas despaciu purita o kushishqa kayänampaq Diospita jukläya yachatsikuyta?

Alli kaq trabajaq mayikunaqa, ‘rakipänakuyänampaq listum këkäyan’ (1 Tim. 6:18). Teytanwan trabajarqa, Jesusqa manachi imatapis pakëllapa ruraqtatsu Jehoväta rikarqan. “Ciëluta patsakätsiptinpis”, Jesusqa ‘tsëchömi këkarqan’ y imanö ruranqampitam yachakurqan (Prov. 8:27). Tsëpita tiempuwanqa, Teytan imakunata ninqanta wiyashqa kanqantam Jesusqa qateqninkunata willarqan (Juan 15:15). Jehovä ruranqannöllam, wawqi panintsikkunata imakunata yachakunqantsikta y musyanqantsikta yachatsita procurashwan. Clärum këkan, trabajanqantsikchö alli kaq yanaqiqa, manam llapantapis pëlla rurëta munartsu imatapis kikinlla pakëllapa ruran. Tsëpa rantinqa, alli kaqkunata yachakunqantam, wakinkunata kushishqa yachatsin.

Jina rakipänakunapaq juknöpaqa listu këkantsik, llakinashqa këkaqkunata shumaq parlaparninmi. ¿Manaku kushikuntsik kallpachakunqantsikta rikar pipis alläpa agradecikamashqa? Jesusqa qateqninkuna imachö alli kayanqanta ninampaqmi, tiempunta patsätsirqan (Mateu 25:19-23; Lüc. 10:17-20 ninqankunatawan igualaratsi). Jina pëkunataqa, ‘noqa ruranqäpitapis mas jatun rurëkunatam rurayanki’ nirqanmi (Juan 14:12). Y wanunan paqasmi, apostolninkunata allita rurayanqampita felicitar kënö nirqan: “Qamkunam imëka pasanqäkunachö noqawan imëpis kayarqunki” (Lüc. 22:28). Tsënö ninqanqa, qateqninkunata alläpachi kushitsirqan y masta rurayänampaqchi yanaparqan. Wawqi panintsikkuna allita rurëkäyanqampita felicitänapaq tiempuntsikta patsätsishqaqa, alläpam kushikuyanqa y masta rurayänampaqchi churapakäyanqa.

Kayode jutiyoq wawqim kënö nin: “Alli yanapakoq kanëkipaqqa, manam mana pantaqraqtsu kanëki. Tsënö kaptimpis, qamwan trabajaqkuna kushishqa y shumaq trabajayänampaqqa, imëkanöpam yanapakuyta puëdinki”. ¿Tsënö yanapakoqku qamqa kanki? Alli o mana alli yanapakoq kanqëkita musyanëkipaqqa, ¿imanirtan wakinkunata tapurinkitsu? ¿Jesuswan qateqninkuna kushishqa kayanqannöku qamwan trabajaqkuna kushishqa kayan? Tsënö kaptinqa, apostol Pablu kënö ninqannömi ninki: “Kushishqa kayänëkipaq yanapakoqkunam kayä” (2 Cor. 1:24).