Iaia i te rangi, kua akatupu a Iesu i te au tu te ka akariro iaia ei oa rave angaanga meitaki. E oti iaia i te enua nei, kua akanoo aia i te akaraanga meitaki tikai no tetai tei angaanga meitaki ma etai ke. Akapeea tatou e puapinga ai mei te akaraanga o Iesu? Me apii matatio i tona akaraanga, ka kite tatou e toru kaveinga te ka tauturu ia tatou kia riro mai ei au oa rave angaanga meitaki. Ka tauturu teia au kaveinga ia tatou kia angaanga taokotai ki to tatou au taeake.

E tu akaaka to te oa rave angaanga meitaki. E puapinga tona au oa angaanga kiaia e kare aia e maani atu e kite atu aia ia ratou. Kua apii mai a Iesu i teia tu akaaka no ko mai i tona Metua. Noatu ko Iehova anake Tei Anga mai, kua inangaro Aia i tetai ke kia kite i te tuanga angaanga puapinga a tana Tamaiti. Ka mārama tatou i teia mei ta te Atua i tuatua: “E anga [taua] i te tangata i to [taua] uaorai tu.” (Genese 1:26) Papu, kua mataora tikai a Iesu i te kite i te tu akaaka o Iehova mei Tana i tuatua.—Sala. 18:35.

Iaia i te enua nei, kua akaari katoa a Iesu i te tu akaaka. Te akameitakiia anga aia no tana i rave, kua akapaapaa aia i te Atua. (Mare. 10:17, 18; Ioa. 7:15, 16) Kua angaanga pakari a Iesu i te akatupu i te ‘au ma tana au pipi e kua akono aia ia ratou mei te au oa rai, kare mei te tavini. (Ioa. 15:15) Kua orei katoa aia i to ratou vaevae ei apii ia ratou kia akaaka. (Ioa. 13:5, 12-14) Mei iaia rai, ka akangateitei  tatou i to tatou au oa angaanga e kare e tuku i to tatou au anoano na mua atu i to ratou. Me tauta tatou “i te akangateitei anga tetai ki tetai,” e kare tatou e manata e koai te ka akameitakiia, e maata te angaanga ka rauka ia tatou i te rave.—Roma 12:10.

Ka āriki katoa te tangata akaaka e, “kia maata ra te aronga kimi tuatua kua mou ïa.” (Mase. 15:22) Noatu to tatou kite karape e te au tareni, e akamaara tatou e kare e tangata i kite i te au mea pouroa. Kua āriki katoa a Iesu e au mea tetai kare aia i kite. (Mata. 24:36) Pera katoa, kua inangaro aia i te kite eaa ta tana au pipi apa ua i kite e i manako. (Mata. 16:13-16) No reira rai tona au oa angaanga i inangaro ei i te noo ua i te pae iaia! Mei te reira katoa, me akaaka tatou e me akamaara e kua kotingaia ta tatou ka rauka i te rave, e me āriki i te manako o tetai ke, ka akatupu tatou i te pirianga oa kia ratou e ka rave meitakiia te angaanga.

E mea puapinga roa no te aronga pakari kia aru i to Iesu tu akaaka me angaanga kapiti ratou. Ka tau ratou kia akamaara e ka akakeu te vaerua tapu i tetai o te aronga pakari kia tuatua. Penei ka riro tona manako ei tauturu i te pupu aronga pakari kia rave i tetai tukuanga tika. I ko i te au uipaanga a te aronga pakari, ka tauta ratou kia maoraora ua te katoatoa i te akakite mai i to ratou manako. Ka rave i reira ratou i te au tukuanga tika te ka puapingaia te putuputuanga.

E tu maru to te oa rave angaanga meitaki me angaanga kapiti aia ki tetai ke. E tu tau tona e ka akatika i te manako o tetai ke. E maata te au atianga i kite ei a Iesu i te tu maru o tona Metua. Ei akaraanga, kua tono a Iehova iaia ei akaora i te tangata mei te utunga o te mate tei tau no ratou.—Ioa. 3:16.

Kua akatika a Iesu i te manako o etai ke me kua anoanoia te reira. Akamaara akapeea aia te tauturu anga i tetai vaine ngati Kanaana, noatu e kua tonokia aia ei tauturu i te ngutuare o Iseraela. (Mata. 15:22-28) Akaari katoa aia i te tu maru na roto i tana i tapapa mei tana au pipi. Muri ake i te uuna anga tona oa piri vaitata ko Petero iaia i mua i te katoatoa, kua papa ua a Iesu i te akakore i tana ara. E i muri mai, kua oronga aia i te au apainga puapinga kia Petero. (Luka 22:32; Ioa. 21:17; Anga. 2:14; 8:14-17; 10:44, 45) Te apii maira to Iesu akaraanga ia tatou e “kia kitea meitakiia oki to [tatou] maru i te tangata katoa,” na te akatika anga i to ratou manako.—Phili. 4:5.

 Me akaari i te tu maru, ka akakeuia tatou kia akatano i to tatou tu kia angaanga kapiti ma te rotai ki te tangata ravarai. Kua akono meitaki tikai a Iesu i te aronga tana i aravei, no reira kua akakino tona au enemi tei vareae iaia, no te riro mai ei “oa no te au telona e te tangata ara” tei akarongo ki tana karere. (Mata. 11:19) Mei ia Iesu rai, ka rauka ainei ia tatou i te angaanga meitaki ki te aronga tei tuke mei ia tatou? Karanga a Louis, e taeake tei angaanga kapiti ki te aronga tukeke e manganui ei akaaere kotinga e i roto i te opati Betela: “Kua akaaite au i te pupu aronga tukeke taku i angaanga kapiti mei tetai patu rai tei maaniia ki te au toka tukeke. Na te akatanotano anga i te tuku anga i te au toka, ka tikatika ua te patu. Kua tauta katoa au i te akatanotano i toku uaorai tu kia angaanga meitaki ki tetai ke, e i te akaoti meitaki i te angaanga.” E tu meitaki tikai tona!

Akapeea tatou me akaari i te tu maru i roto i ta tatou putuputuanga? Ka akaari tatou i te tu maru me piri atu ki to tatou pupu tutu aere. Penei ka angaanga kapiti tatou ki te au papuritia e tuke ta ratou au apainga ngutuare ki ta tatou, me kore e tuke to ratou mataiti. Ka rauka ainei ia tatou i te akatano i ta tatou aerenga me kore kia puareinga ua i te rave i te tutu aere ta ratou e reka ana, kia mataora ratou?

Ka “oronga aere” te oa rave angaanga meitaki. (1 Timo. 6:18) Iaia e angaanga kapiti ra i te pae i tona Metua, kua kite mai a Iesu e kare a Iehova i uuna ana i te au mea mei ko mai iaia. Ia Iehova “i tamou i te au rangi ra, tei reira” a Iesu e kua apii mai a Iesu mei iaia. (Mase. 8:27) I muri mai, kua akakite aere a Iesu i “te au tuatua ravarai [tana] i kite” mei tona Metua ki tana au pipi. (Ioa. 15:15) Ka aru tatou i to Iehova akaraanga me akakite aere ki to tatou au taeake e te au tuaine i ta tatou i apii mai e to tatou kite karape. Kare tetai oa rave angaanga meitaki e tauta kia akaaere i tetai ke na te tāpu anga i te au manako tauturu ta ratou i anoano. Mari ra, ka rekareka aia i te akakite aere i te au mea meitaki tana i apii mai ki etai ke.

Ka rauka katoa ia tatou i te akamaroiroi i to tatou au oa angaanga. Me kite mai tetai ke i ta tatou tauta anga e me akameitaki ia tatou no ta tatou i rave, kare ainei ka pumaana to tatou ngakau? Kua akapou a Iesu i te taime i te akakite i te tu meitaki tana i kite i roto i tana au pipi. (Akaaite ia Mataio 25:19-23; Luka 10:17-20.) Akakite aia e “e maata ua atu rai” te angaanga ta ratou ka rave i tana i rave. (Ioa. 14:12) I te po i mua ake ka tamateia ai a Iesu, kua akameitaki aia i tana au apotetoro tiratiratu i te karanga anga: “Ko kotou ko te aronga e noo tamou i vaitata iaku i toku au timataanga nei.” (Luka 22:28) Akamanako ana akapeea tana au tuatua i te akapumaana anga i to ratou ngakau e te akamaroiroi anga ia ratou! Me akapou katoa tatou i te taime no te akameitaki i to tatou au oa angaanga, ka mataora atu ratou e ka maata atu ta ratou angaanga ka rave.

“Kare te oa rave angaanga meitaki e anoanoia kia apa kore,” i karanga ai tetai taeake ko Kayode, “mari ra, ka mataora tetai ke i te angaanga kapiti kiaia e kare te angaanga e riro ei mea teiaa.” Mei teia ainei toou tu ei oa rave angaanga? Penei ka ui koe ki tetai pae taeake me kore tuaine Kerititiano eaa to ratou manako ia koe ei oa rave angaanga? Me rekareka ratou i te angaanga kapiti kia koe, mei te au pipi rai a Iesu tei rekareka i te angaanga kapiti kiaia, ka tuatua tatou mei te apotetoro ko Paulo: “Ei tauturu ra matou i to kotou rekareka.”—2 Kori. 1:24.