Ко небо о Исус стекнинѓа бут шуже особине со поможинѓе леске те овел јекх шукар соработнико хем адалеске кеда сине ки Пхув ов сине јекх бут шукар пример околенге со соработинѓе леа. Со шај амен те сикљова таро е Исусескоро пример? Ако проучинаја лескоро пример, ка аракха трин начелија со ка поможинен аменге шукар те соработина е јаверенцар хем те ова ко јекхипе амаре пхраленцар.

Јекх шукар соработнико тано понизно. Ов ценинела е јаверен хем на фалинела пе. О Исус сиклило акава понизно стави таро пло Дад. Иако само о Јехова заслужинела те овел викимо Створители, ов мангља о јавера те џанен баши важно бути со керѓа ла лескоро Чхаво. Адава шај те дикха ле таро адава со вакерѓа о Девел: „Те кера мануш спрема амаро лико“ (1. Мој. 1:26). Кеда о Јехова вакерѓа акала лафија, о Исус сигурно бут ценинѓа лескири понизност (Пс. 18:35).

Џикоте сине ки Пхув, о Исус исто аѓаар сикавѓа понизност. Кеда о јавера фалинена ле сине башо адава со керѓа, ов дела сине цело фалба е Девлеске (Мар. 10:17, 18; Јован 7:15, 16). Ов трудинела пе сине те овел ко мир пле учениконцар хем дикхела лен сине сар амала а на сар робија (Јован 15:15). Ов чак тховѓа ленгере пре те шај те сикавел лен те овен понизна (Јован 13:5, 12-14). Амен да ваљани те ценина амаре соработникон а на те дикха само  аменге те овел шукар. Шај те овел амен бут побаро успех ако сикаваја поштовање јекх јекхеске хем ако нане аменге важно кој ка добинел и пофалба (Рим. 12:10).

Јекх понизно мануш тано свесно кај „о планија... успејнена кеда иси бут советникија“ (Изр. 15:22). Бизи разлика кобор искуство иси амен хем саве тане амаре способностија, на смејнаја те бистра кај нијекх мануш на џанела са. Чак о Исус признајнѓа кај иси буќа со ни ов на џанела (Мат. 24:36). Исто аѓаар, ов мангела сине те џанел со мислинена или со џанена лескере несовршена следбеникија (Мат. 16:13-16). Адалеске на чудинела амен со лескере соработникија осетинена пе сине шукар леа! Слично аѓаар, ако сием понизна хем признајнаја кај иси амен ограничувања хем шунаја е јаверенгере предлогија, ка кера те овел мир хем о планија ка успејнен.

Посебно о старешине ваљани те џан пало е Исусескоро пример џикоте заедно соработинена. Ола на ваљани те бистрен кај ко ленгере состанокија о свети дух шај те влијајнел упро било кова старешина. Ако ола керена сарине те осетинен пе слободна те вакерен пумаро мислење, тегани ка анен одлуке кола со ка овен корисна цело собраниеске.

Јекх шукар соработнико тано разумно кеда керела бути е јаверенцар. Ов тано прилагодливо хем спремно тано те попуштинел. Е Исусе сигурно сине ле бут прилике те дикхел кобор о Јехова тано разумно. На пример, о Јехова бичхалѓа ле те спасинел е манушен иако ола заслужинена сине те мерен (Јован 3:16).

О Исус попуштинела сине кеда ваљани сине. Адава шај те дикха ле таро адава сар поможинѓа е Феничанкаке, иако ов сине бичхалдо е Израелцонге (Мат. 15:22-28). Лескири разумност исто аѓаар шај сине те дикхел пе таро адава со очекујнела сине таро пле ученикија. Откеда лескоро паше амал о Петар англо јавера одречинѓа пе лестар, о Исус сине спремно те простинел леске. Пало несаво време, ов денѓа е Петареске баре одговорностија (Лука 22:32; Јован 21:17; Дела 2:14; 8:14-17; 10:44, 45). Е Исусескоро пример јасно сикавела аменге кај ваљани те ова пенџарде сар разумна мануша (Фил. 4:5).

И разумност исто аѓаар ка поттикнинел амен те ова прилагодлива те шај ко мир те кера бути разна манушенцар. О Исус сине добором шукар околенцар со сине околу лесте со лескере  љубоморна душмања вакерѓе кај тано „амал е даночниконгоро хем е грешниконгоро“ со прифатинѓе лескоро хабери (Мат. 11:19). Шај ли амен да сар о Исус успешно те соработина е јаверенцар? О Луис, јекх пхрал кова со служинѓа ки патувачко служба хем ко Бетел коте со соработинѓа различна пхраленцар хем пхењенцар вакерела: „Те кере бути манушенцар со нане совршена тано сар те пхене ѕидинеа јекх ѕидо различно баренцар. Адалеске со о бара тане различна, ваљани повише те трудине тут те шај те редине о бара коте со одговоринена. Ме да трудинѓум ман те керав промене ки манде те шај те дав мло дело о ѕидо те овел право“. Кобор шужо стави!

Кеда иси амен прилика те соработина е објавителенцар таро амаро собрание? Шај те кера адава кеда сием ки служба амаре групаја проповедибаске. Шај те соработина објавителенцар со иси лен поразлична фамилијарна одговорностија амендар или сој ки различно возраст. Шај ли те сикава разумност аѓаар со ка прилагодина амен спрема ленгере околностија или аѓаар со спремно ка учествујна ки служба колате со ола повише уживинена?

Јекх шукар соработнико „тано спремно те делинел“ (1. Тим. 6:18). Џикоте керела сине бути пе Дадеа, о Исус сигурно приметинѓа кај о Јехова на гаравела сине лестар о буќа. Кеда о Јехова „керѓа о небо“, о Исус сине „адатхе“ хем шај сине те сикљол лестар (Изр. 8:27). Покасно, о Исус да сине спремно те вакерел пле учениконге са о буќа со шунѓа таро по Дад (Јован 15:15). Шај те џа пало е Јеховаскоро пример, аѓаар со амен да ка ова спремна те делина амаре соработниконцар адава со џанаја хем о искуство со иси амен. Џанѓола пе, јекх шукар соработнико нане те гаравел информацие со ка поможинен е јаверенге само те шај те овел ле контрола упри ленде. Наместо адава, ов ка овел бахтало те вакерел е јаверенге о шукар буќа со сиклило.

Амен исто аѓаар шај те охрабрина амаре соработникон. Кеда некој приметинела кобор трудинаја амен хем сикавела благодарност, адава керела те осетина амен шукар. О Исус одвојнела песке сине време те вакерел пле соработниконге адава со ценинела сине ки ленде (Споредин Матеј 25:19-23; Лука 10:17-20). Ов чак вакерѓа ленге кај ола ка „керен хем побаре буќа“ лестар (Јован 14:12). И рат англедер те мерел, ов пофалинѓа пле верна апостолен е лафенцар: „Тумен сиен адала со ачхилен манцар ко мле искушенија“ (Лука 22:28). Замислин само кобор лескере лафија охрабринѓе лен хем поттикнинѓе лен понадари да те ден пестар са! Ако амен да одвојнаја аменге време те пофалина е јаверен, ола сигурно ка овен бут бахтале хем пошукар ка керен бути.

О пхрал Кејод, вакерела: „Јекх шукар соработнико на ваљани те овел совршено, наместо адава ов керела е јаверен те овен бахтале хем на керела пхаро околенге со керена леа бути“. Дали ту сиан асавко соработнико? На пример, шај те пуче несаве објавителен со мислинена ола саво соработнико сиан ту. Ако о јавера тане бахтале џикоте керена туја бути, сар е Исусескере ученикија со сине бахтале џикоте соработинена сине леа, тегани шај те вакере адава со вакерѓа о апостол Павле: „Амен сием тумаре соработникија те шај те овен бахтале“ (2. Кор. 1:24).